Read idege IJeremaya 35 Bible Online

IJeremaya 35 - idege bible

IJeremaya 35

¹Ụka ká iJehoyakim ọnyị nya iJosaya ri Adịrahụ nya ala iJuda Amkpaa ya ẹla tam yẹkẹẹ,

²Kele ka ẹpwa nya ala iRekabụ chajị ka ya ẹla taa. Kpaa warị wẹ ẹpwụ nya ube ọhẹ am Ube nya Amkpaa chajị ka ya ere haa kị nwa.

³Ụka ọọwa lẹ m kpa ịJaasanịya ọnyị nya iJeremaya ọkịla ọlẹ ka adamwụ ri ịHabasiniya bala anyịnamwụ alẹng tu anyị alẹng nyawmụ bala ala ọdọdẹpwa nya ala ịRekabụ wuu.

⁴Ọọwa, m kpaa ka Ube nya Amkpaa lẹlẹ. M kpaa kele ka ẹpwụ nya ube nya anyị nya ịHanan ọnyị nya Igdalịah ongịnyị nya Ohe Oluhye. Ẹpwụ nya ube ọwa ju ẹpwụ nya ube nya alegbeju chwẹẹ. Ọ ji uhye nya ẹpwụ nya ube nya ịMaaseya ọnyị nya ịChalum ọlẹ kọ kaa kpẹhị rịrị ang ọ da ọọnang nya ube chụẹẹ.

⁵Ụka ọọwa, m̀ go ekeku bala ịgbajị nya ere rịrị ala iRekabụ ịwẹ lẹ, m̄ byaa yẹkẹẹ, “Anụ nwa ere mẹ.”

⁶Ị wẹm yẹkẹẹ, “Eheehe, áhi kaa nwa ere ka, chajị iJonadabụ adahị ogogo ọnyị nya iRekabụ ya ehile dahị ya ahị lee anyị ịtụma nyahị nyị nwa ere ka.

⁷Iwa nyị ka nwụ ẹpwa bala ọ wu ẹrụ ka. Iwa nyika ya egbe nya ekeji tọ ka. Ọdu ịwa nya ka nọ une gbe oyi myị oyi lẹ. Ụka ọọwa lẹ ị wa nya ka hịhị tata ụwa ọpyị ọlẹ ka ịwa nyi ri anga lẹlẹ.

⁸Ahị ju ihi nya ona ọdada nya ịJonadabụ adịda ogogo nyahị pyịyọ daalẹ ahi ayị dang lee ịhụ bala anyị nyahị wuu a ka nwa ere ka.

⁹Ahị a nwụ ẹpwa iga kahị ka nọ une ka. Ahị a wu ẹrụ lee ọ ya egbe nya ekeji tọ ka. Ahị a tị la ịpyị ka ịnyịnyị.

¹⁰Ẹga kahị ka nune ri ọdụ. Ehile onyịmọnyị ịlẹ ka ịJonadabụ adịda ogogo nyahị dahị ahị kpaa wuu kpẹẹkpẹẹ.

¹¹Ma ụka ọlẹ ka iNebukadinesa Adịrahụ nya ala ịBabịlọn dẹwụ ta alẹpwụma nyahị owale ahi cheje nyọka warị kaa kụ am iJerusalẹm chajị kahị ka be hi alẹwụ nya ala ịBabịlọn bala ala Asiriya lẹlẹ.”

¹²Ụka ọọwale, Amkpaa a ya ẹla ta iJeremaya lẹlẹ.

¹³Ịlẹ Amkpaa Agụgụ Ohe Oluhye nya ala Isirẹlụ a byim lẹ: Kele ka byi angịnyị nya ala iJuda bala ala iJerusalẹm yẹkẹẹ, Anụ a ka myị ụbwọ ogbile ụ-rụ nyam bala o ke ụrụ lam kaa?

¹⁴Anyị ịtụma nya iJonadabụ ju ihi nya ehile ọlẹ kọ daa ya nyị nwa ere ka gbee da wẹ alẹ ọngọngọhẹ lẹpwụ nyaa a myị nwa ere ka. Ma am Amkpaa tị juwa ya ẹla tanụ pyịyọọ anụ a tị myị ju ihi nyam ka.

¹⁵M juwa kinya lọ du anchẹ nyam alọmwụ ẹrụ tọnụ pyịyọọ. I byinu ya anụ hịnyọ hi ang ịtịpyọ ịhọhọ chajị kanụ họ ang ịnyịla. Ị gbilenu ụbwọ ụrụ ya anụ nyị gbịgba lee ọ myị ẹrụ ha ihe ịkila ka chajị kanụ ka jam ọ-pyị ọlẹ kam ya hanụ bala adịda igogo nyanụ gbe oyi myị oyi. Ma, anụ à tị́ke ụrụ la omyi nyam ka.

¹⁶Anyị ịtụma nya iJonadabụ ju ihi nya ona ọdada nyamwụ ma anụ à tị́ myị juihi nyam ka.

¹⁷Chajị nyowa lẹ, Amkpaa Agụgụ Ohe Oluhye nya ala Isirẹlụ ka kpa ayịreji ọtata ịlẹ kọ myị ọnụ wuu wẹ uhye nya ala iJuda bala ala iJerusalẹm. Ang odudu rẹkẹẹ, m ya ẹla taa ma ịmyị ke ụrụ lam ka, m beko wụrwaa, ị tị myị ẹkọ owa ka.

¹⁸Ọọwa, iJeremaya a byi alugbiyegu nya iRekabụ yẹkẹẹ, “Ịịlẹ Amkpaa Agụgụ Ohe Oluhye nya ala Isirẹlụ a ya lẹ: ‘Anụ ju ihi nya ọna ọdada nya iJonadabụ adanụ ogogo. Anụ dịrẹ ọgụ ọpẹtẹ ọlẹ kọ ya danụ eji bala kpa ehile nyamwụ wuu kpẹẹkpẹẹ.

¹⁹Ajị nya ọọwa lẹ, Am Amkpaa Agụgụ Ohe Oluhye nya ala Isirẹlụ myị ọnụ ya ọnyị ọlẹng ọlẹ kọ ri ọnyị ọtụma nya iJonadabụ ọhẹ ka ji ịnyịnyịịnyị ọlẹ kọ ka myị ẹrụ ham gbe oyi myị oyị.’ ”