Read idege IJeremaya 37 Bible Online

IJeremaya 37 - idege bible

IJeremaya 37

¹INebukadinesa Adịrahụ nya ala ịBabịlọn chụ iSedekaya ọnyị nya iJosaya ri Adịrahụ nya ala iJuda ku ọmwakpa nya iJehoyachin ọnyị nya iJehoyakim.

²Ma iSedekaya lee alegbeju itụkụ yoo tụ angịnyị a myị juhihi nya ẹrụ ọlẹ ká Amkpaa dụm taa ka.

³ISedekaya Adịrahụ du iJehukalụ ọnyị nya iChelemaya bala ọngọkiliya ịSẹfaniya ọnyị nya ịMaaseya kaa bịlẹ iJeremaya chajị kọ ka raabwọ ha Amkpaa chajị nya ẹpwụma nyaa.

⁴Lụka ọlẹ lẹ, i wu iJeremaya ja agba lẹka. Ọ la ịlọmwụ ka juwa ga ka iga myị ẹga ịlẹ kị họọ wẹ.

⁵Ịnọ alẹwụ nya ala ịBabịlọn dagaga ju epweji nya iJerulsalẹm wuu, ma ụka ọlẹ kị wo ya alẹwụ nya Ijipiti nyị juwa warị, ọọwa lẹ alẹwụ nya ala ịBabịlọn a rụ tịrẹkpẹ ka ọpyị nyaa lẹlẹ.

⁶Ụka ọọwa lẹ Amkpaa Ohe Oluhye nya ala Isirẹlụ a ya ẹla ta iJeremaya yẹkẹẹ,

⁷Amkpaa Ohe Oluhye nya ala Isirẹlụ yẹkẹẹ, Ịlẹ anụ ka byi ISedekaya Adịrahụ nya ala iJuda ọlẹ kọ dunu ẹrụ warị kaa tọm ẹla wo lẹ, alẹwụ nya ala Ijipiti juwa ụụ-gbẹyị juwa warị kaa danụ ụbwọ ma ị tị juwa tịrẹkpẹ ka ẹpwa nyaa.

⁸Ala ịBabịlọn juwa tịrẹkpẹ warị kaa de ẹwụ ta ala epweji ọlẹ, ị ka kụrụ i ka chị ịgẹlẹ ila.

⁹Am Amkpaa ya jenu yẹkẹẹ, anụ a da ịlọnụ lụgbaa nyọ rẹkẹẹ ala ịBabịlọn rụ ka ẹpwa nyaa lẹ, ị juwa mwẹẹkpẹ kaka lẹ ka ị juwa mwẹkpẹ wẹẹ.

¹⁰Ọ ri kanụ dọmwụ dẹẹwu kụrụ alẹwụ nya ịBabịlọn. Kọ ri ka angịlẹ kị chịa ẹbẹ bwu ọgbẹẹwu kem a hi bwẹpwụ nyaa, angịịwa ka myịmyị la ogogo ị ka kaa chị epweji ọlẹ ịla

¹¹Alẹwụ nya ala ịBabịlọn tịrẹkpẹ nyọka dẹwụ ta iJerusalẹm chajị nya alẹwụ nya ala Ijipiti.

¹²IJeremaya a rụ bwu iJerusalẹm juwa ka ọpyị nya alimwawụ nya iBenjamịn nyọka ye ebwo nya ọpyị ọlẹ kị gọọ lẹlẹ.

¹³Ụka ká iJeremaya jẹ kaa pwụ Ogirigba nya iBenjamịn lẹ, olegbeju ọkpẹhị rịrị angịdẹwụ igbeji ọlẹ ká ẹnyị nyamwụ ri Irija ọnyị nya iChelemaya ká adamwụ ọgbahị ri ịHananiya-à woo lẹ, ọ tọọ wo yẹkẹẹ, “Ala ịBabịlọn ā wẹẹ rụ ka yẹjula ka le?”

¹⁴IJeremaya wẹ Irija yẹkẹẹ, “Ehehe, ịnyị koo. Ḿ ji oye nyaa ka.” Ma, Irija-á myị kẹ ụrụ lọọ ka. Ọ wu iJeremaya lẹ, ọ kpọọ kịla alegbeju lẹlẹ.

¹⁵Alegbeju wu eje ọtụka-ọtụka ta iJeremaya, ị nyoo lẹ, ị jwoo agba ẹ-ẹpwa nya iJonatan kọ ri akịraa lẹlẹ. Ị lẹẹ yẹ ẹpwa nya iJonatan la ube nya agba.

¹⁶Ị wu iJeremaya ju agba ola ẹpwụ nya ịpyị ọ juwa a agba ẹpwụ nya ẹnụtụrụ lụmẹ-lụmẹ.

¹⁷Ụka kọ nụwa lẹ, adịrahụ iSedekaya a du ẹrụ to IJeremaya ka ẹpwa nyamwụ, ọọwa lẹ ọ tọ wo kpịba kpịba yẹkẹẹ, Amkpaa du ẹrụ ọhẹ-lọhẹ wẹẹ? iJeremaya wọ yẹkẹẹ, ee, ọ du ẹrụ. ọọwa lẹ ọ ya ẹrụ ọdudu ọwa je adịrahụ yẹkẹẹ, “Amkpaa ka yang ju Adịrahụ nya ala ịBabịlọn ụbwọ.”

¹⁸IJeremaya tọ adịrahụ ịtọ wo yẹkẹẹ, “Angị onyobyi oyina m tị họ bang bala alegbeju ịla ekpeji nyang bala angịnyị du kanụ wum ju agba?

¹⁹Alọmwụ nyang ịlẹ kị kaa yẹ ọmwụ jung yẹkẹẹ, Adịrahụ nya ala ịBabịlọn nyị juwa warị kaa deewu to epweji ọlẹ ka tị lee?

²⁰Agaba idu, m bịlẹng kaka ke ụrụ lam chajị kaka họ ang ọlẹ kam bịlẹng. Chuchu a myịmyị yam du tịrẹkpẹ ka agba ọla ẹpwa nya Ijonatan kaka ọrinyi ka m ka gbu ụwa pịyọọ.”

²¹Ụka ọọwa lẹ adịrahụ iSedekaya a da ehile kị ka ya ọlọmwụ iJeremaya ju agba ụwa ube ọtụka ọla ẹpwa nya adịrahụ lẹlẹ. Ụka kị jwọọ agba ụwa angịlẹ kị ka họ ị kaa kpa ẹbẹ nya ịkaa kilọọ ẹnụ myị ẹnụ gbee ka Ikaa ọla epweji wuu myị gbang gbang.