Read idege IJeremaya 38 Bible Online

IJeremaya 38 - idege bible

IJeremaya 38

¹IChefatiya ọnyị nya Imattan bala iGedaliya ọnyị nya Ịpachọr bala Ijehucal ọnyị nya iChelemaya bala Ịpachọr ọnyị nya iMalikiya wo ẹla ịlẹ ka iJeremaya ya je angịnyị

²yẹkẹẹ, “Jaabwọ ká Amkpaa ya ri ọng myị ọng ọlẹ kọ hi hụwa e-epweji, alẹwụ ka nwọọ lee ọ ka gbu igu nya imyi lee ẹdụrụ. Ọngọlẹ kọ gba ịlọmwụ kpehe ha angịdẹwụ nya ala ịBabịlọn aalẹ, alẹwụ á ka nwụ ọngọọwa ka, ọ ka kpa ọhịhị nyamwụ be.

³Amkpaa ya ene-ene yẹkẹẹ, ‘M̀ ka ya epweji ọlẹ ju angịdẹwụ nya adịrahụ nya ala ịBabịlọn ụ-ụbwọ. Ala ịBabịlọn ka ye la.’ ”

⁴Ụka ọọwa, alegbeju a ka ẹga nya adịrahụ kaa byoo yẹkẹẹ, “Ọlẹng ọlẹ chịla kị ka nwọọ, chajị ọ họ ọkịlẹtụ juwa kpụ angịdẹwụ ịlẹ kị hi jam e-epweji bala angịnyị wuu enyi bwula ụma nya ẹla ịlẹ kọ wẹẹ ya taa. Ọlẹng ọlẹ-ẹ́ tịtọ nya ọhágụ nya angịnyị ka, ayịreji ọtata nya kem ịnyị.”

⁵ISedekaya Adịrahụ waa yẹkẹẹ, “Ee, ọ tị́-ị̀ wẹ lẹ, ọ juwa ụbwọ nyanụ. Ḿ ka byinu anụ họọ abwọhẹ ka lẹka.”

⁶Ọọwa, ị wu iJeremaya, ya ori jwoo da ju ka ẹpwụ nya ịwẹẹlụ oluhwo-luhwo ọhẹ ọdọda lẹlẹ. Ịtọpyị ji ẹpwụ nya ịwẹẹlụ ọọwa. ỊMalikiya-à la ịwẹẹlụ ọọwa lẹ.

⁷Ma Ebẹdị-ịmẹlẹkị ọla Itiyopyiya kọ ri olegbeju ọgbẹgbịlẹ ẹ-ẹpwa nya adịrahụ wo nyori nyị ya iJeremaya ju ka ẹpwụ nya ịwẹẹlụ. Ụka ọọwa, adịrahụ hụhụ hụwa ogirigba ọlẹ kị wụrụ “Ogirigba nya iBenjamịn.”

⁸Ebẹdị-ịmẹlẹkị à kele ka ẹga nya adịrahụ lẹ, ọ byoo yẹkẹẹ,

⁹“Agaba Idu ee, ang ọlẹ ka angịlẹ họ lẹ, ọ ha koo. Ị wu iJeremayị ju ka ẹpwụ nya ịwẹẹlụ. Ọ́ ka dayị la o-gbu igu nya imyị ụ-ụwa kaka, chajị ang oriri-í hi jam e-epweji kaka.”

¹⁰Ụka ọọwa, adịrahụ byi Ebẹdị-ịmẹlẹkị kọ ka be ẹkọ wụrụ alẹng angị ịta chajị kị ka gba iJeremaya kpehe bwu ẹpwụ nya uje-enyi chajị kọka gbu ụwa kaka lẹlẹ.

¹¹Ebẹdị-ịmẹlẹkị kele bala alẹng ịta ịwa ka ube ọ-ya ang guru kaa go achapwụ ịhye bwu ụwa, ị ya ju ori wu awụlẹ ọọwa lẹ ị nịrọọ kpaa kaa tọ iJeremaya ẹpwụ nya uje-enyi lẹlẹ.

¹²Ọ byoo yẹkẹẹ, “Ya achapwụ ịwẹ bala ori ju ịlẹng ịị gẹng-gịnẹ mẹ.” Ụka kọ họ ịnyị lẹ.

¹³I gbile ori lọọ kpehe bwu ẹpwụ nya ụjẹ lẹlẹ. Bwu ụka ọwẹ lẹ, ị yọọ hụwa ube ọtụka nya angigbeji lẹlẹ.

¹⁴Lụka okịla ọhẹ lẹ, ISedekaya Adịrahụ a beko wụrụ iJeremaya ka ọ girigba ọhata ọlẹ kị kaa bwu ka ube Igogo nya Amkpaa lẹ ọ byoo yẹkẹẹ, “I tọ ala ịlẹ kam wẹ ka tọng lẹ, am titọ ka-ka ya ẹla nya ịlẹhị jem wuu.”

¹⁵IJeremaya wọ yẹkẹẹ, Ori kam ya ẹla nya ilehi jeng, a ka nwụm ori kam tị chịng abwọ jaabwọ ka ka họ a ka mịị kpa ẹla ọwa họ ụkụrọ ka.

¹⁶ISedekaya Adịrahụ gọlọ ju ịlọmwụ kpịba kpịba byi iJeremaya yẹkẹẹ, “Am golo la ẹnyị nya Amkpaa ọlẹ kọ juwa ohịhị ọlẹ kọ ya ọhịhị hahị. M ka nwụng lee ọ yang ju angịlẹ kịtịtọ nyọka nwụng ụ-ụbwọ ka.”

¹⁷IJeremaya byi adịrahụ iSedekaya yẹkẹẹ, Jaabwọ ká Amkpaa Ohe Oluhye nya ala Isirẹlụ ya alẹlẹ. “Ori ka tụbwọ hi ịlọng ju Adịrahụ nya ala ịBabịlọn ụbwọ wụlẹlẹ alẹ ị ka chị ọhịhị nyang da, ị tị ka chị epweji ọlẹ ịla ka inyịnyị myịmyị. Ahụ bala ala ọdọda ẹpwa nyang ka chịda.

¹⁸Ma ori ka tụbwọ hi ịlong ju ala ịBabịlọn ụbwọ wụlẹlẹ ka, a ka ya epweji ọlẹ ju ala ịBabịlọn ụbwọ ị ka chịọọ ila. Ahụ ayịdangà tị́ ka be bwu ụbwọ nyaa ka ịnyịnyị.”

¹⁹Adịrahụ wọọ yẹkẹẹ, “Am juhi nya ala iJuu aanahị ịlẹ kị rụ ka jula ala ịBabịlọn. Ọrị kam tubwọ hị ịlọm jwaa ụbwọ ị ka yẹm akama.”

²⁰iJeremaya byoo yẹkẹẹ, Ehe, ọ ka lịnyị ka. Juihi nya omi nya Amkpaa ọlẹ kam wẹ ya jeng mẹ alẹ ang wuu ka ha hang lẹ ọhịhị nyang tị ka chịda ịnyịnyị.

²¹M aori ka nwụlanọ nyọka tụbwọ hi ịlọng wụlẹlẹ ka aalẹ, ang ịlẹ ká Amkpaa mẹjẹm kị ka họ a lẹẹ lẹ.

²²Amkpaa wụrụ ẹhi nyam, am yẹ anyang ihu ịlẹ kị hi wuu ẹpwa nya Adịrahụ nya ala iJuda kị gba kpehe kpa ka ẹpwa nya Adịrahụ nya ala ịBabịlọn. Anyang ịwa juwa yẹkẹẹ, Aligu nyang ịlẹ ka dẹhị hile dang lugbaa, ịkụrụng lẹ. A pẹtẹ nyang dụrụ iwa, a jẹ gbaa myị kaka. Aligu nyang tịrẹkpẹ hing lẹ.

²³Ị ka nwụla Ịhụ nyang bala anyị nyang wuu kịla ala ịBabịlọn. A hụ ayịdang kpang a tị ka be myị ka. Adịrahụ nya ala ịBabịlọn ka wung kparụ ka ju agba. I ka ju epweji ọlẹ ila.

²⁴ISedekaya Adịrahụ wẹ iJeremaya yẹkẹẹ, A ya ẹla ọlẹ kahị ya lẹẹ je ọngọngọhẹ ka wo ka, ao rinyi ka ọhịhị nyang ka mi.

²⁵Ụka ká alegbeju ị kpẹhị rịrị ẹpwụma a jẹ ya am ya ẹla tang, i ka warị kaa tọng wo chajị kị ka jẹ ẹla ọọwa ị myị ọnụ hang ya ịwa nyị ka nwụng ka, ahụ nyị ya je ịwa mẹ.

²⁶A byaa yẹkẹẹ, ọwa nyị bịlẹ Adịrahụ chajị ka adịrahụ nyị ka kpụba la ọ-ya owa du ka agba ọla ẹpwa nya iJonatan o-ri ịnyi ka ọwa nyị ka gbu ụwa.

²⁷Ụka ká alegbeju ị kpẹhị rịrị ẹpwụma kele ka tọ iJeremaya ịtọ nya ala ịlẹ ka ọwa bala Adịrahụ ya, ọ walẹ, iJeremaya a byaa jaabwọ ka adịrahụ ya lẹlẹ. Ị myịmyị byi iJeremaya a bwẹhẹ kaka chajị ọngọngọhẹ lẹpwụ nyaa a wo ẹla ịlẹ ka ọwa bala adịrahụ ya ta awụlẹ ka.

²⁸I ya iJeremaya juwa u-ube ọtụka nya angị gbeji gbee pwụ ụka ọlẹ ka alẹwụ kụrụ epweji nya iJerusalẹm.