Read idege IJeremaya 39 Bible Online

IJeremaya 39 - idege bible

IJeremaya 39

¹Ẹpwụ nya oya okiriwo nya ẹka ohikichu n ya ọlẹ ka iSedekaya ri Adịrahụ nya ala iJuda, iNebukadinesa Adịrahụ nya ala ịBabịlọn kpa alẹwụ nyamwụ wuu kele ka dẹwụ ta ala iJerusalẹm.

²Ẹnụtụrụ ihikichu nya ọya ohene ẹpwụ nya ẹka Iwo kụrụ okpokpo nyọlẹ ka iSedekaya ri adịrahụ, alẹwụ be ụgbwụlọ ọdagaga ju iJerusalẹm ene jụka ẹpwụ nya epweji.

³Ụka ká alẹwụ nya ịBabịlọn kụrụ ala epweji nya iJerusalẹm, alegbeju ịgbẹgbịlẹ nya ala ịBabilọn wuu bala angịkịla ilẹ kị wụrụ iNẹgalụ ịSarẹsa rẹja bala iSamga-nebo bala iSarsekim a kele kaa hụhụ ụwa ogirigba ola epwarị lẹlẹ.

⁴Ụka ká iSedekaya Adịrahụ nya ala iJuda bala alẹwụ nyamwụ wuu yẹ ang ọlẹ kọ juwa họ lẹ, ị dọmwụ nyọ rụ ụnyẹ rụ bwu epweji nya iJerusalẹm ala-odu bwu ugbẹyị ọlẹ kọ da bwu ẹpwụ nya ẹrụ nya adịrahụ lẹlẹ. Ị kpehe bwu ogirigba ọlẹ kọ jụwa epwarịrị nya egulo imiiye, ọwa i rụ unye jahị da ka ọkpọọ nya ịJọdan lẹlẹ.

⁵Alẹwụ nya ala ịBabịlọn kwaa gbee kị wu adịrahụ iSedekaya opepe ọla ọnụ nya epweji nya iJericho. Ị kpọọ kịla iNebukadinesa adịrahụ nya ala ịBabịlọn ụwa iRibla ola imwawụ nya iHamat. Ụka owa Adịrahụ iNebukadinesa a lọọ eje lẹ, eje a wo ụwa lẹlẹ.

⁶Uwa epweji nya iRibla, iNebukadinesa adịrahụ nwụ anyị alẹng nya adịrahụ iSedekaya chị ahi jwọọ. Ọ myịmyị nwụ alegbeju nya ala iJuda wuu ụwa.

⁷Ụka ọlẹ kọ nwụa kpa lẹ, ọgba adịrahụ iSedekaya egbahị imimiye, ọwa ọ ya agba juọ kpa rụ ka epweji nya ịBabịlọn lẹlẹ.

⁸Alẹwụ nya ala ịBabịlọn myịmyị ju ẹpwa nya Adịrahụ nya ala iJuda bala ẹpwa nya angịnyi ịla iJerusalẹm ila. Ị be ugulọ odagaga ju iJerusalẹm ene.

⁹INebusaradan alegbeju nya alẹwụ nya ala ịBabịlọn wu angịlẹ wuu kị hi juwa epweji nya iJerusalẹm bala angịlẹ wuu kị kpa ịlaa kịla ka agba ụwa ịBabịlọn.

¹⁰Angịlẹ wuu kọ tu ụbwọ hi epweji nya iJuda ri angịlẹ kị ri ikpehika kị la ịngịnyịhyẹ ka. INebusaradan ya i ku nya egbe ekeji bala ẹrụ haa.

¹¹Adịrahụ iNebukadinesa da INebusaradan olegbeju nya alẹwụ ehile chajị nya iJeremaya yẹkẹẹ,

¹²Kele ka pịlahị nya iJeremaya chajị ka kpẹhị rịrọọ yẹyẹyẹ. A họọ ang onyobyi ọhẹ-lọhẹ ka. Ang myị ang ịlẹ kọ ya wuu a họ ang ịwa họ.

¹³Ụka owa lẹ, iNebusaradan bala iNebuchasaban bala ịNealụ-ịsarẹsẹẹ tụ alegbeju ịgbẹgbịlẹ ịkịla ịla ekpeleji nya Adịrahụ nya iNebukadinesa adirahụ nya ala ịBabịlọn a du ẹrụ ta iJeremaya lẹ,

¹⁴Ị gbọ kpehe bwu ube ọtụka nya angịgbeji. Ị yọọ ju iGedaliya ọnyị nya Ahikam ọlẹ ka adamwụ ogbahị ri ịChafan kọ ka kpọ rụ ka ẹpwa, ọọwa lẹ iJeremaya a hụwa bala angịnyị nyamwụ lẹlẹ.

¹⁵Ụka ká iJeremaya juwa a-gba ube nya angi leje wẹẹ, Amkpaa ya ẹla tọ yẹkẹẹ,

¹⁶Kele ka byi Ebẹdị-ịmẹlẹkị ọla Itiyopyiya ya am Amkpaa Agụgụ Ohe Oluhye nya ala Isirẹlụ nyị yẹkẹẹ, “Yẹ mẹ, ang ịlẹ kam hwahwa nyọka họ epweji ọlẹ wuu lẹ, m̀ juwa haa jịra lẹ. Akama m̄ ka kpa warị lẹ, ịịlahị ọkaka koo. Ahụ ayịdang ka juwa kpẹhị nya ịlọng yẹ ang ịịwa.

¹⁷Ma Am Amkpaa tị ka kpẹhị rịrịng. Ḿ ka ya iwe da ha angịlẹ kị lang uhi-uhị ị ka kụrụng ka.

¹⁸M ka chịng da chajị nyọlẹ ka dahịhilem. Ị́ ka nwụn ka, à ka be lọhịhị nyang. Am Amkpaa a ya ịnyị lẹ.”