Read idege IJeremaya 4 Bible Online

IJeremaya 4 - idege bible

IJeremaya 4

¹Amkpaa yẹkẹẹ, Anụ ala Isirẹlụ ee, ó-ri kanụ ka ji kpata hi ang onyobyi ọhọhọ lẹ aalẹ, ẹga nyam anụ ka ji kpata wẹ lẹ. Anụ ka pẹhi ijiga nyanụ ịwẹ chịịrụ hwẹ̀ẹẹ, kanụ ka hịnyọ la ọ-rụ hwahị him.

²Anụ ka juwa nwa iro lẹnyị nyam Amkpaa ẹ-ẹpwụ nya ẹla nya ịlẹhị bala ẹla ọkpakpa bala abwẹla ọnyịịla. Ọọwa, alẹpwụma nya odehe wuu à ka bịlẹ ahị ọwawa nyam lẹ, ị ka gwogbo ham lẹlẹ.

³Amkpaa jam byi ala iJuda bala ala iJerusalẹm yẹkẹẹ, “Anụ wu ajẹrụ nyanụ ẹrụ mẹ, ānụ ya ajẹ nya ang-ẹrụ nyanụ tọ ẹ-ẹpwụ nya ejwo ka.

⁴Anụ ala iJuda bala IJerusalẹm ee, anụ nwụ ọkịlẹtụ nyanụ rịrị ham Amkpaa, kanụ tụ ang-ibyi ịlẹpwụ nya ọhịhị nyanụ kịnyaa mẹ. Ó-ri ịnyị ka aalẹ, agbama nyam ka wuru lala ila, ọọ-lajị nya ang inyibyi ịlẹ kanụ họ, ọngọngọhẹ-ẹ́ tị ka jwọọ mịrị ka.”

⁵Amkpaa yẹkẹẹ, Ya dodehe gboo i-iJuda, ká da ọna ya je ala iJerusalẹm. Byaa kị chị opyike tụ ẹga myị ẹga da yẹkẹẹ, Anụ kẹwẹ kaka jịra, kahị rụnyẹ rụ ka epweji ịlẹ kị me egwalọ dagaga ju mẹ!

⁶Da angịnyị ụbwọ yahị da ka ịSayọn mẹ! Anụ kpa ịlọnụ rụnyẹ nyọka bebe mẹ, anụ họ atịmẹ kokoo! M̀ wẹẹ kpa akama bwu ẹtẹ yahị danụ, uhila nya akama ịnyị.

⁷Ọngọ ta ẹpwụma ayịreji gba kpehe kpiloko lẹ, lala ugẹbẹ à kpehe bwu iwe-ịbaa nyamwụ, ọ wuleji nya ẹdịyẹ wẹẹ yahị da iJuda warị, kọ ka ta ọpyị nyanụ ayịreji, epweji ịla iJuda wuu ka kpụ egwawụ-egwawụ, ọngọngọhẹ-ẹ́ ka hi kụ ụwa ka.

⁸Lẹẹ lẹ anụ hu apwụ nya owuru ọkpakpa kụrụ, kanụ juwa jida gbagbilede mẹ, chajị ikẹjẹ-awụrụ ọtụka nya Amkpaa-á pwuru hi iJuda lẹka.

⁹Amkpaa yẹkẹẹ, “Ẹnụtụrụ ọọwa-á pwụ eji, adịrahụ bala alegbeju wuu ka ju uhi hụ́ kpákpaakpa, angikiliya ka dapwụ hụ amẹ, ahị ka họ alọmwụ bwuu.”

¹⁰Ọọwa, m̄ yẹkẹẹ, “Họ́ọ̀họ, Ọngọlahị Amkpaa. Ọọwa ri ụgbaa ā da ala iJerusalẹm lẹ-ẹ́? À tị́ myị ọnụ ya okpunyi nyị ka ji haa, ẹma tị nịraa o-omyị-ì wẹ!”

¹¹Ụka ọọwa, Amkpaa ka byi angịlẹ bala ala iJerusalẹm yẹkẹẹ, “Igbachịwụ ọchịpwuu ọhẹ wẹẹ da bwu ugbileji yahị danụ anụ angịnyị nyam. Ọọhụ opileleele ọlẹ kọ ka hịrị ewoo nya ang hụrụ koo.

¹²Igbachịwụ ọlẹ kam kpa da ehile ịnyị. Ọ la ọngịrị kaka kpoye. Am Amkpaa lịlọm à wẹẹ wụrụ akama ọwẹ chịnụ ọgụ lẹ.”

¹³Anụ yẹ-ẹ̀ wẹ mẹ, aluji lalẹẹ wẹ tuu lala egbamwụ, ang ịrụnyẹ nyamwụ lala ugbọchịrị, anyịrẹ nyamwụ la kpịra-kpịra gụ ịchịnụ idu wẹẹ. Ahị gbu hụrụ lẹ ooo! Ahị ri enyi gu obyi lẹ ooo!

¹⁴IJerusalẹm ee, hụ́ ang inyibyi ịlọkịlẹtụ nyang hụrụ chajị ká ka la ọchịda mẹ. À tị́ ka kịnyaa lirya inyibyi imeme tata ka ba anyị?

¹⁵Alẹrụ kpa oja ọ-byị ụrụ ọwẹ kaka mịla eji bwu imwawụ nya ịDan bala epweji ịlịgbọdọ nya Ifurem.

¹⁶Ị juwa yẹkẹẹ, “Anụ dọna nya ẹlẹwẹ ha alẹpwụma ịkịla wo, kanụ ya dodehe je ala iJerusalẹm ịnyịnyị me, aluji lalẹẹ warị bwu ọpyị ọlụrụ ọhẹ, ị ka mwu eje nya ẹwụ yahị da epweji ịlọpyị nya iJuda.

¹⁷Ị ka dagaga ju epweji nya iJerusalẹm jaabwọ ká angịnyị kaa gbe ẹrụ nyaa, chajị alụwa la egbeju-ọngịrị tam am Amkpaa. Am Amkpaa-à ya ẹlẹwẹ lẹ.

¹⁸Ọhịhị nyanụ à wụrụ igu ọlẹ nwụnụ anụ ala iJuda lẹ, Ọhọbịrị nyanụ à kpa akama ọlẹ chịnụ ọgụ lẹ, ọ tọ olujwo lụmẹ, ọ wunu ọyị a-alegu lẹ.”

¹⁹Áaayo! Olujwo tọm! Olujwo tọm! M̀ rebilo ẹ-ẹpwụ nya ọjụjụ! Ọkịlẹtụ dum kuukuukuu, ḿ ka ya ọnụ bawụlẹ myị koo, chajị m̀ chụrụ kaka wo opyike nya ẹwụ, m̀ wo eje nya ẹwụ lẹẹ.

²⁰Akama ọhẹ kpeji dịrẹ akama ọkịla, ọpyị ọlẹ kpụ egwawụ-egwawụ wuu lẹ. Lụka ọmwaaa, ị ta ẹpwa nyahị ayịreji wuu, ẹ-ẹpwụ nya ẹhị ọ-mwụbiri, ị gu ịpwụ ikeke ịlụwa ene hwẹ́ẹ̀hwẹ́ẹ̀ wuu.

²¹M̀ tị́ ka kịnyaa juwa yẹ ẹwụ ọlẹ tata ka ba ányị? M̀ tị́ ka wo ipyike nya ẹwụ tata ka ba ányị?

²²Amkpaa yẹkẹẹ, “Angịnyị nyam chị uchi, ị́ jẹm ka. Ị ri anyị i-ju ẹmwa, ị́ jẹ ịngịngịhyẹ ka. Ị ri ọnggwọ nya ang onyobyi ọhọhọ, ị́ tị jẹ jaabwọ kị ka họ ang ọnyịịla ka.”

²³M̀ chẹhị yẹ odehe, ọ kpụ egwawụ-egwawụ, m̀ chẹhị ka uhye-ọgba, ahịgboo juwa ka.

²⁴M̀ chẹhị kaka yẹ ịgbọdọ, ị juwa hụ́ kpuka-kpuka, ikiti wuu juwa gu gbaagbàagbaa.

²⁵M̀ mwụrụ yọyị chịng-ng angịnyị ehe-é ji ẹgẹgẹhẹ ā ka yẹ ka, ịchịnụ wuu hụ̀ rụ lẹ.

²⁶M̀ mwụrụ yọyị chịng-ng, m̀ yẹ ká ọpyị o-ju eyo ọwẹ yẹ ri ugbileji, epweji ịlụwa kpụ egwawụ-egwawụ wuu, chajị nya agbama ọtụka nya Amkpaa.

²⁷Amkpaa yẹkẹẹ, “Ọpyị ọlẹ wuu ka myị̀ ụmẹ ri ugbileji dụwa, ḿ tị ka tọọ ayịreji wuu gbanggbang ka.

²⁸Ajị nya ọọwa lẹ, odehe ka bida, uhye-ọgba ka chị owu kpịlẹẹ. Am Amkpaa-à ya ẹlẹwẹ lẹ, ḿ ka nwụ irya me ọkịla ka. M̀ chị eje nyọka họ ịnyị lẹ, ḿ ka nwụ irya me kaka.”

²⁹Ụka kị wọ anụ nya angị kụ anyịrẹ bala angị da ịcha, ọng myị ọng ka rụnyẹ mwụ ata bịmwụ. Angịhyẹ ka rụnyẹ yẹtẹ chị ipyinu, angịkịla ka rụ kaka kpụ ịbaa u-uhye nya ajwọ. Epweji ọnyị myị ọnyị ka da luhwo-luhwo, ọngọngọhẹ-ẹ́ ka hi kụ ụwa kaka.

³⁰IJerusalẹm ee, à ri enyi gu obyi lẹ! Ịnyangga ọ-họ ịlọng lịpwụ ịnyịmịla ọwẹ ri ododu. A go ịjang nya okpoko ịgọm da, kwo ahị nyang larị. À họ ịlọng ịnyangga nwuro-nwuro ododu, alakpa nyang ịlẹ ká há ene-ene gbang ugu lẹ, ị wẹẹ tịtọ nya egbeju-igu nyang.

³¹M̀ wo omyi ọhẹ lala ịnya ọnyang ọ-hya ụma, juwa mwu eru lala ịnyaa juwa ka ma ọnyị nya ọọgbanyẹ. IJerusalẹm à lalẹẹ chị kikiiki lẹ, Ọ pyẹ abwọ da dẹẹlẹẹ juwa chị eko yẹkẹẹ, “M̀ gbu hụrụ lẹ! Ị wẹẹ wẹ kaka nwụm lẹ!”