Read idege IJeremaya 40 Bible Online

IJeremaya 40 - idege bible

IJeremaya 40

¹Ụka ká iNebusaradan olegbeju nya angịdẹwụ nya ala ịBabịlọn gba iJeremaya kpehe bwu agba kpa, Amkpaa a ya ẹla ta iJeremaya, lẹlẹ. Ụka ọwa ị yẹ iJeremaya kị jwoo agba ụwa ẹpwarịrị nya angịlẹ ka alẹwụ wu nya agba nya ẹwụ juwa kpaa rụ bwu iJerusalẹm bala iJuda kela ka ọpyị nya ịBabịlọn.

²Olegbeju nya alẹwụ kpa iJeremaya ka ọka, owa ọ byoo yẹkẹẹ, Amkpaa Ohe Oluhye nyanụ gbilenu ụbwọ ụrụ ya ọwa nyị ka yẹ epweji ọlẹ akama.

³Ma ị myị yẹ irya da ka, Ị juwa la egbeju-ọngịrị kịlahị-ịlahị gbee kọ yaa akama jaabwọ kọ ya.

⁴Am jam yi agba ịlẹ kị ya jung aabwọ m ka gban kpehe lẹ. Ori kọ hang nyọka bam ka ọpyị nya ịBabịlọn, a ka bam rụ myị m ka kpẹhị rịrịng, ma ori ka ọọwa a tị ri irya nyang ka, a ka chụ Iga myịga ọlẹ kọ hang kaka hụ am epweji ọlẹ mị, a ka hu ẹga ọwa.

⁵Ụka ọlẹ kam wẹ ẹla ọlẹ kọ ya kaka lẹ, iNebusaradan a myịmyị byim yẹkẹẹ, Tịrẹkpẹ ka nya iGedaliya ọnyị nya Ahikam ọlẹ ka adamwụ-ọgbahị ri iChafan mẹ. Ọwa iNebukadinesa Adịrahụ nya ịBabịlọn a chụ nya ịgọvụnọ nya iJuda lẹ. Ọ ri kọ hang a ka kele kaa huwa tọọ ụwa epwarịrị nya angịnyị nyang lee ẹga myịga kọ hang a ka hụ myị. Ọ yang oriri bala ang ịkịla gaha iJeremaya owa lẹ, ọ tụbwọ hyoo rụ lẹlẹ.

⁶IJeremaya tịrẹkpẹ kaa hụ ta iGedaliya ụwa epwarịrị nya angịnyị nyamwụ ịlẹ kị hi ka alẹwụ a kpa rụ ka ụwa iMsipa.

⁷Alegbeju nya ala iJuda bala angịdẹwụ nyaa ịhyẹ a myị kpa ịla kịla Adịrahụ nya ala ịBabịlọn ka. Ụka ọlẹ kị wo ya Adịrahụ nya ala ịBabịlọn nyị hu iGedaliya nyọka ri ịgọvụnọ ọkpẹhị rịrị ịpyị bala ọngọ ọ ka kpẹhị rịrị angịlẹ wuu ka alẹwụ nya ala ịBabịlọn a myị wu kpa rụ ka ịlẹ kị ri alẹbyahị ịla epweji.

⁸Ụka ọọwa lẹ, Ichimẹlụ ọnyị nya ịNataniya bala iJohanan ọnyị nya iKareya bala iSeraya ọnyị nya ịTanhumẹtị ọlẹ ka adamwụ ogbahị ri Efayị ọlẹ kọ bwu epweji nya iNetofa bala iJesaniya ọlẹ kọ bwu ịMaaka a kele bala angịnyị kịga nya iGedaliya ụwa iMisipa lẹlẹ.

⁹iGedaliya myị ọnu haa yẹkẹẹ, Anụ a juhi nyọka me ịlọnụ je adịrahụ nya ịBabịlọn kaka. Anụ ku am ọpyị ẹgẹlẹ chajị kanụ myị ẹrụ ha adịrahụ nya ịBabịlọn mẹ, alẹ anụ a ka myịmyị la akama kaka.

¹⁰Am lẹ, am ka kụ am epweji nya iMisipa nyọka ri ọngọ ku ọmwakpa nyanụ ẹ-ẹga nya ala ịBabịlọn ịlẹ, kị warị we ẹga nyahị lẹ anụ ka tu egba nya ekeji guru bala ere bala Ida nya olivu. Kanụ nọ ẹpwa epweji ịlẹ kanụ ji mẹ.

¹¹Lụka ọọwa ịnyịnyị. Ala Isirẹlụ ịlẹ kị nyị epepe ka iMowabụ bala Amon bala Ẹdọm bala ẹpwụma ịkịla wo nyọrị, adịrahụ nya ala ịBabịlọn tụbwọ hi angịhyẹ ịlẹ kọ wu kparụ ka, angịịwa nyị nọ ẹpwa ụwa iJuda. Bala ọ ri nyị hụ iGedaliya nya ịgọvụnọ ọ kpẹhị rịraa.

¹²Ọọwa, Ị nya tịrẹkpẹ bwu ẹga ịlẹ wuu kị nyẹpepe ka wẹ epweji nya iJuda lẹlẹ. Ị ka ẹga nya iGedaliya ụwa iMisipa, ọọwa lẹ ị tụ ere lụmẹ-lụmẹ bala egba nya ekeji gụrụ ụwa lẹlẹ.

¹³IJohanan ọnyị nya iKareya bala alegbeju nya angịdẹwụ ịlẹ wuu kị myị kpịla kịla ala ịBabịlọn ka we ẹga nya iGedaliya ụwa iMisipa.

¹⁴Ọọwa, ị byoo yẹkẹẹ, A jẹ ya ịBaalisi Adịrahụ nya Amọn du Ichimẹlụ ọnyị nya ịNataniya ẹrụ warị nyọka nwụng ka-á? IGedaliya a myị ẹla ọwa ju angịlẹ kị ya jwoo ka.

¹⁵IJohanan ọnyị nya ịKareya ke iGedaliya ụrụ lẹ ọ byoo kwii yẹkẹẹ, “Ba him kam kele kaa nwụ Ichimẹlụ ọnyị nya ịNataniya kpịbaa-kpịbaa mẹ, ọngọngọhẹ a juwa je ka. Ọlịyẹ a tị du kahị ka ya iwe da kọ ka nwụng? Ori kọ nwụng, ala iJuu ịlẹ wuu kị tu ịlaa guru dagaga jung ka nyi epepe hwahị. Owa tị ka du angịnyị ịlẹ kị hi wuu jam ọpyị nya iJuda ka ye akama otụka.”

¹⁶Ma iGedaliya wọọ yẹkẹẹ, “Ehe, a họ ịnyị ka. Ọnọọkịla anụ wẹ me ba Ichimẹlụ lẹ.”