Read idege IJeremaya 41 Bible Online

IJeremaya 41 - idege bible

IJeremaya 41

¹Ẹpwụ nya oya ohariye nya ẹka ọwa, Ichimẹlụ ọnyị nya ịNataniya, ọ bwu ọdọdẹpwa nya Idịrịhụ ọ myịmyị ri ọngọhẹ ẹ-ẹpwụ nya olegbeju nya angịdẹwụ nya adịrahụ. Ichimẹlụ kpa aleewu iwo dịrẹ ịlọmwụ wẹ ẹga nya iGedaliya ụwa iMisipa. Iwa bala iGedaliya ri ang oriri lawụlẹ ụwa iMisipa.

²Ụka ọlẹ kị juwa kpa ang oriri ri lẹ, Ichimẹlụ bala angịdẹwụ angị iwo ịwẹ a wuleji lẹ, ị nwụ iGedaliya ọngịnyị ọlẹ ka Adịrahụ nya ịBabịlọn chụ ri ịgọvụnọ nya iJuda lẹlẹ.

³Ichimẹlụ myịmyị nwụ ala Isirẹlụ ịlẹ kị juwa iMisipa ta iGedaliya bala angịdẹwụ nya ala ịBabịlọn ịlẹ kị juwa ụka ọọwa ịnyịnyị.

⁴Ene kpa ka ọngọngọhẹ ka jẹ ẹnụtụrụ ọkịla nyọlẹ kị nwụ iGedaliya,

⁵alẹng angị iwo ineku warị bwu epweji nya iChekem bala iChilo bala ịSameriya. Ị pwọ ịchwọ nyaa bala ọ gu ịwụrụ nyaa ene bala ọ-chụ agbụ kụrụ ịlaa wuu. Alẹng iwo ineku ịịwa kpa ajẹ nya ang-ẹrụ bala ịtangare ka kịla iya u-Ube nya Amkpaa.

⁶Ụka ọwa lẹ, Ichimẹlụ a kpee bwu epweji nya iMisipa kaa tọ alẹng ịịwa lida-lida lẹlẹ. Ụka tọ taa ụ-ụgbẹyị lẹ, ọ byaa yẹkẹẹ, “Anụ kẹwẹ kaka yẹ iGedaliya ọnyị nya Ahikam mẹ.”

⁷Ụka ọlẹ kị pwụ iMisipa lẹ, Ichimẹlụ bala alẹwụ nyamwụ angịnyị iwo ịwẹ a nwwaa lẹ, ị go egu nyaa chịka iwẹlụ lẹlẹ.

⁸Ma alẹng angịnyi iwo ịhyẹ juwa ẹpwa nya angịnyị ohu-ine ịwẹ kị bịlẹ iGedaliya kọ ka nwaa ka. Ị myị ọnụ kị ka ya iwiiti bala ịbali bala ida nya olivu ọlẹ kị ya kpịbaa họọ. Ụka ọọwa lẹ, iGedaliya a chị ọhịhị nya angịnyị iwo ịwa da lẹlẹ.

⁹Ịwẹẹlụ ọlẹ ka Ichimẹlụ go egu ịlẹ kọ nwụ ju ka ri ịwẹẹlụ ọlẹ kọ lụmẹ kaa kpoye. Adịrahụ Asa a wu ịwẹẹlụ ọwa ụka ọlẹ ka ịBaacha Adịrahụ nya Isirẹlụ dẹwụ tọọ lẹ. Ichimẹlụ go egu nya angịnyị myị ịwẹlụ ọọwa kpọng kpọng.

¹⁰Ụka ọọwa, ọ wu anyị anyang nya adịrahụ wuu bala anyịnyị ịlẹ kị hi wuu ụwa iMisipa ịlẹ ka iNebusaradan olegbeju nya angịdẹwụ nya ala ịBabịlọn ya hi iGedaliya ụbwọ. Ọ waa wuu nya alaba nya ẹwụ. Ọọwa lẹ, Ichimẹlụ ọnyị nya ịNataniya a juwa kpaa rụ jahị da ọpyị nya ala Amọn lẹlẹ.

¹¹IJohanan ọnyị nya ịKareya bala alegbeju nya alẹwụ ịlẹ kị juwa tọ wo ẹla chajị nyang onyobyi ọlẹ ka Ichimẹlụ họ.

¹²Ụka ọọwa, ị wuleji bala angịdẹwụ nyaa wuu kele ka dẹwụ ta Ichimẹlụ. Ị wu Ichimẹlụ ọyi ẹ-ẹga nya ẹmwụ-enyi ọla iGibyọn.

¹³Ụka ká angịnyị ịlẹ ká Ichimẹlụ wu nya alagba yẹ iJohanan bala alegbeju nya angịdẹwụ ịlẹ kị bajẹ, ị chị ọkẹkẹnị ọtụka-ọtụka.

¹⁴Ị jahị kpata lẹ, ị rụnyẹ kaa tọ iJohanan bala alegbeju nya angịdẹwụ ịịwa lẹlẹ.

¹⁵Ma Ichimẹlụ bala angịnyị nyamwụ ineku be rụnyẹ rụ ka epweji nya Amọn lẹlẹ.

¹⁶Ụka ọọwa lẹ, iJohanan bala alegbeju nya alẹwụ ịlẹ kị bajẹ a kpa anyang bala anjwo ichiche bala alẹng ịru agba ịlẹ ka Ichimẹlụ wu nya alagba bwu epweji nya iMisipa ụka ọlẹ kọ nwụ iGedaliya kpa. Ị kpaa nya tịrẹkpẹ bwu iGibyọn lẹlẹ.

¹⁷Ụka kị jẹ gbee, ị gudayị iGerutị-ịkimham ọlẹ kọ juwa ọọnụ nya ịBetịlẹhẹm. Ụka owa, I jụwa rụ ka ọpyị nya ala iJipiti.

¹⁸Ị juhi nya alẹwụ nya ala ịBabịlọn chajị nyọlẹ ka Ichimẹlụ nwụ iGedaliya ọngọlẹ ka Adịrahụ nya ala ịBabịlọn chụ ri Ịgomwụno nya iJuda.