Read idege IJeremaya 42 Bible Online

IJeremaya 42 - idege bible

IJeremaya 42

¹Ụka ọọwa, alegbeju nya angịdẹwụ wuu tụ iJohanan ọnyị nya iKareya bala Asariya ọnyị nya iHochaya bala alụdụ tụ ikpehika

²ka ẹga nya iJeremaya ọlọmwụ kaa byoo yẹkẹẹ, “Chuchuu, aa họ hahị ang ịlẹ kahị wẹẹ bịlẹng mẹ. Raabwọ ha Amkpaa Ohe Oluhye chajị nyahị hahị mẹ. Raabwọ chajị nyahị ahị angị hihi ịlẹ mẹ. Ịnọ ene-ene ahị ju iru, ọlẹẹlẹẹ tị lẹ, ahị angị hihi la wure-wure lẹ.

³Raabwọ chajị ká Amkpaa Ohe Oluhye nyahị ka mẹ jẹhị ụgbẹyị ọlẹ kahị ka bwu bala abwẹla ịlẹ kahị ka họ.”

⁴IJeremaya wẹ yẹkẹẹ, “Ee, m myị ọnụ kam ka raabwọ ha Amkpaa Ohe Oluhye nyahị chajị nyanụ jaabwọ kanụ byim lẹ. Ẹla myị ẹla kọ ya jem, m̄ ka ya jenu lẹ. Ḿ ka ya ẹla ọhẹ-lọhẹ kpịbaa hinu ka.”

⁵Ọọwa, angịnyị a wẹ iJeremaya yẹkẹẹ, “Amkpaa Ohe Oluhye họ ibeenu nya ịlẹhị bala ọkpẹẹkpẹẹ tụụhị pyịpyị ó-ri kahị kpa ehile ịlẹ wuu kọ wẹẹ ka ya dung tọhị ka.

⁶Ọ́ haahị há, ọ́ haahị há ahị ka ju ihi nya Amkpaa Ohe Oluhye ọlẹ kahị wẹẹ dung ẹrụ kaka raabwọ bịlẹ chajị nyahị pyii lẹ.”

⁷Ẹnụtụrụ kịlahị lẹ, Amkpaa a yẹla ta iJeremaya lẹlẹ.

⁸Ụka owalẹ, iJeremaya a bẹkọ wụrụ iJohanan bala alegbeju nya alẹwụ ịlẹ ị juwa ba-lọọ tụ Ikpehika bala alụdụ

⁹ọ byaa yẹkẹẹ, “Ịịle Amkpaa Ohe Oluhye nya ala Isirẹlụ ọlẹ kanụ dum ẹrụ tọ kam ka bịlọọ hanụ a ya lẹ.”

¹⁰Ori kanụ tịtọ nyọka kụ am ọpyị ọlẹ aalẹ m ka họ anụ ka nwa ka uhye, m ka tanụ ayireji ka. M ka yanụ wueji, m ka hụnụ cheeji ka. Ayireji ọtata ọlẹ kam ya iwe da kọ chịnụ ọgụ lẹ, ọ tọm olujwo lụmẹ.

¹¹Anụ a myịmyị juhi nya Adịrahụ nya ala ịBabịlọn kaka. Am Amkpaa juwa tanụ lẹ, m ka gbanụ kpehe bwu ẹpwụtụbwọ nyamwụ.

¹²M ka họ ọ ka yẹ ahyẹrwerwa nyanụ. Ọ ka tụbwọ hinu anụ ka nya tịrẹkpẹ wẹ ọpyị nyanụ myịmyị. Inyi am Amkpaa a ya lẹ.

¹³Ma ori kanụ juwa kịlahị juwa yẹkẹẹ, Ahị a ka ku am ọpyị ọlẹ ka, kọri kanụ juihi nya omyi nya Amkpaa Ohe Oluhye nyanụ ka.

¹⁴Kanụ yẹkẹẹ, ehe, Ahị ka rụ ka ọpyị nya Ijipiti Iga ka ẹwụ ọdada lee ẹkụrwẹ nya ẹwụ ọdada bala imi ọnwụnwụ a ji ka chajị kahị ka ku ẹpwa ụwa.

¹⁵ori kanụ họ ịnyị aalẹ, Amkpaa Agụgụ Ohe Oluhye nya ala Isirẹlụ yẹkẹẹ, ori kanụ chị eje nyọka kele kaa ku ọpyị nya Ijipiti aalẹ.

¹⁶Ewu ọdada imyi ọnwụnwụ ịlẹ kanụ juihi ka chịnụ ọgụ ọ-ọpyị nya ala Ijipiti ọọwa lẹ anụ ka gbu ụwa lẹlẹ.

¹⁷Ong myị ong ọlẹ kọ chị eje nyọka rụ kaa kụ Ijipiti ka gbu igu nya ẹwụ ọdada lee imyi ọnwụnwụ lee ẹduru ọjụjụ. Akama ịlẹ kanụ ka yaa ụwa lẹ, ọngọngọhẹ lẹpwụ nyaa a ka hi la ọhịhị ka.

¹⁸Amkpaa Ohe Oluhye nya ala Isirẹlụ yẹkẹẹ, Jaabwọ kam wu ịkẹjẹ awụrụ bala agbama ta ala iJerusalẹm, ọgụ ọwa m ka wu ịkẹjẹ awụrụ bala agbama ta angịlẹ kị rụ ka ọpyị nya Ijipiti lẹ. Ị ka ri ang ihideji ịchị ọọtẹwụ, angịnyị ka kpaa họ, I ka daa ido bala ọhụlọ ahụ jwaa.

¹⁹M juwa jenu myịmyị, Amkpaa byinu anụ angịlẹ kanụ hi iJuda kanụ ka rụ ka ọpyị nya Ijipiti ka. Am lịlọm tị juwa danụ ọna ịnyịnyị.

²⁰Anụ ka họ pyị lụmẹ ọ ri kanụ kele. Anụ byim kam ka ri abwọ ha Amkpaa myị ọnụ kanụ ka juihi nya ẹla nyamwụ ọlẹ kọ byinu.

²¹Ma am tị ya ala ịwa jenu, anụ a tị myị juihi nya ẹla nya Amkpaa Ohe Oluhye nyahị ịlẹ kọ dum ẹrụ tanụka.

²²Chajị nya ọọwa lẹ, anụ a je myịmyị-mẹẹ, anụ ka gbu Igu nya ẹwụ ọdada bala imyi onwunwu bala ẹdụrụ ọjụhụ ụwa ọpyị ọlẹ kanụ wẹẹ rụ kaa kụ.