Read idege IJeremaya 43 Bible Online

IJeremaya 43 - idege bible

IJeremaya 43

¹Ụka ọọwa, am iJeremaya ya je angịnyị ẹla myị ẹla ịlẹ ká Amkpaa Ohe Oluhye nyaa dum ẹrụ nyọka ya jaa.

²Ọọwa, Asariya ọnyị nya iHochaya bala iJohanan ọnyị nya ịKareya bala angịnyị ịkịla wuu ịlẹ kị la egbeju ongịrị a byi iJeremaya yẹkẹẹ, “A me ọnụ-ọkịla lụmẹ. Amkpaa Ohe Oluhye nyahị a dung ẹrụ tọhị ya ahị nyị ka Ijipiti ka lẹ ka.

³ỊBaruku ọnyị nya iNeriya-à a dung juhi chajị ka ala ịBabịlọn ka kuhi kị ka nwụhị lee o-wuhi kpa rụ ka ọpyị nya ala ịBabịlọn lẹ.”

⁴Lẹẹlẹ, iJohanan lee olegbeju nya aangịdẹwụ ọhẹ-lọhẹ lee ọngọngọhẹ-ẹ́ myị ju ihi nya ẹla oyaya nya Amkpaa ọlẹ kọ byaa ya nyị hụwa i-iJuda ka.

⁵Owalẹ iJohanan bala alegbeju nya angịdẹwụ a kpa angịnyị ịlẹ wuu kị juwa iJuda tụ angịnyị ịlẹ kị nyi epepe ka epwụma ịkịla kị tị nyà tịrẹkpẹ rụ ka Ijipiti lẹlẹ.

⁶Angịlẹ kị kparu ka Ijipiti ri alẹng ịgbahị bala anyang ịhụ bala anjwo ichiche bala anyị anyang nya adịrahụ. Ị kpa ọng myị ọng ịlẹ wuu ka iNebusaradan olegbeju nya angịdẹwụ ya ju ụbwọ nya iGedaliya ọnyị nya Ahikam ọlẹ ka adamwụ-ọgbahị ri ịChafan tụ ịBaruku bala iJeremaya ọlọmwụ wuu rụ ka Ijipiti.

⁷Ị myị ju ihi nya ẹla Amkpaa ka. Ọọwa, ị rụ ka Ijipiti lẹlẹ, I jẹ gbee ka pwụ epweji nya ịTapanhesi.

⁸Amkpaa yẹla tam ị-ịTapanhesi yẹkẹẹ,

⁹“IJeremaya ee, go ajwọ ịtụka tụka ka ya jụka ọpyị ịlẹ kị me wẹ kị ya da ụgbẹyị ka angịnyị ka jẹdịyẹ bwu uhye nyaa. Ka ẹpwa nya adịrahụ ọlẹ kị me jam epweji ọlẹ. Go ajwọ ịwa ka họ jaabwọ kam bing ịlahị nya angịnyị ịhyẹ bwu epweji nya iJuda.

¹⁰Byi angịnyị nyam mẹ am Amkpaa Agụgụ Ohe Oluhye nya ala Isirẹlụ jụwa ka kpa iNebukadinesa Adịrahụ nya ala ịBabịlọn ọnchẹ nyam warị wẹ ẹgẹlẹ. Ọ ka ya ẹchị-adịrahụ nyamwụ yeji u-uhye nya ajwọ ịlẹ kam ya ju eji lẹẹ bala ọ pyẹ ọdụ nya adịrahụ nyamwụ maa kụrụ eji am̀.

¹¹Ọ ka da ẹwụ ta ala Ijipiti ọ ka kụrwaa. Angịlẹ kị chịnọ haa kị ka gbu igu nya ẹdụrụ ị ka gbụ. Angịlẹ ka ịnyaa a ri alẹwụ o-waa kpa rụ, ị ka waa. Angịlẹ ka ịnyaa tị ri igu nya ẹwụ ọdada, ị ka gbu igu-ẹwụ.

¹²Ọ ka wuru ịla ju ube nya ijiga nya ala Ịjipiti. Ịjiga nyaa wuu ka rụ ila lee ọ ka gyaa kparụ ka ịBabịlọn. Jaabwọ ka ọngọgbikpịlọ kaa gba ela chịịrụ hi ịwụrụ ịkụrụ-kụrụ nyamwụ, ịnyịnyị adịrahụ nya ala ịBabịlọn a ka tu Ijipiti wuu cheri-cheri lẹ, ọ ka rụ ka ọpyị nywamụ la ọkụrụ-kụrụ lẹlẹ.

¹³Adịrahụ nya ala ịBabịlọn ka tụrụ ẹjwọ nya ojiga ọla iHeliyopolisi ọlọpyị nya Ijipiti, kọ ka jụ ube nya ijiga nya ala Ijipiti ịla hụrụ.”