Read idege IJeremaya 44 Bible Online

IJeremaya 44 - idege bible

IJeremaya 44

¹Amkpaa yẹla tam chajị nya ala Isirẹlụ ịlẹ wuu kị juwa ọpyị nya Ijipiti bala epweji nya iMigidolu bala iTaphanhes bala iMemfisi bala ụwa ọpyị nya iPatụrọsị.

²Ịlẹ Amkpaa Agụgụ Ohe Oluhye nya ala Isirẹlụ a ya lẹ. Anụ kpẹhị nya ịlọnụ yẹ jaabwọ kam ta iJerusalẹm bala epweji ị dagaga ju wuu nya iJuda ayịreji. Gbee da we ọlẹlẹ, Ị ri egwawụ ọngọngọhẹ a kwẹpa ụwa lẹka.

³M taa ayịreji chajị nyang onyobyi nyaa ịlẹ kị họ, jaabwọ kị hu agbama jum bwula ijiga ịkpụkpụ, ọ myị ẹrụ ha ijiga ịlẹ ka ịwa ayịdang lee adịda igogo nyaa adọmwụ jẹjẹ ka.

⁴“M juwa kịnyaa ịnyịnyị lọ du anche nyam alọmwụ ẹrụ tọnụ kanụ ka kpụba lọ họ ang onyobyi ịlẹ kị wụm-ẹjẹ.”

⁵Ma anụ amị keụrụ lee ọ kpa ẹla ọwa họ ụkụrwọ ka. Anụ a myị yẹ irya da bwu ẹpwụ nya ang onyobyi ịhọhọ bala ijiga ọkpụkpụ ka.

⁶Ịnyị a du kam wụ agbama bala ịkẹjẹ awụrụ nyam uhye nya ẹpwụma nya iJuda bala ipeje ịla iJerusalẹm kam chaa ịla lẹ. Bwu ụka owa gbee daa lẹ, ị yẹ rụ egwawụ bala ẹga ka angịnyị ka ya ẹla rụ.

⁷Chajị nyowa lẹ, Amkpaa Agụgụ Ohe Oluhye nya ala Isirẹlụ juwa tọnụ wo ịlẹ, “Ọọlịyẹ atị dụ kanụ juwa họ ịlọnụ ẹla onyọbị ụma ọlịwẹẹ, anụ juwa tịtọ kanụ ka kpa ayịreji ọtata ọtụka wẹ uhye nya alẹng ị ye ịhụ bala anyang ịrwọrụ bala anjwo ichiche tu anyị ịlabwo ọlẹ ka ọngọngehe a ka hi ọpyị nya ala Isirẹlụ kaa?”

⁸Ányị tị́ du kanụ juwa hu agbama jum bwula ọ-kpụ eteji bala ọ-kịla iya ha ijiga am̀ ọ-ọpyị nya ala Ijipiti ẹga kanụ wẹ kaka kụ ene-è? Anụ juwa họ kanụ ka ta ịlọnụ ayịreji chajị ka ẹpwụma ilodehe ịkịla ịlẹ kị wo ka hụlọ ahụ junu bala ọ chịnu arụụ?

⁹Anụ deeri nya ang onyobyi nya adịda igogo nyanụ anyị bala ịnya ịdịrịhụ nya ala iJuda bala ịhụ nyaa bala ang ịnyibyi nyanụ bala ịhụ nyanụ ịlẹ wuu kanụ họ ọpyị nya iJuda bala ipeje nya iJerusalẹm?

¹⁰Gbee daa lẹ, anụ a myị kpa ịlọnụ keji ka. Anụ a myị jum ihi lee ọ kpa ehile ịlẹ kam danụ bala adịda igogo nyanụ ka.

¹¹Chajị nya ọọwa lẹ, am Amkpaa Agụgụ Ohe Oluhye nya Ịsirelụ cheje kam ka tanụ ayịreji ka ịnya iJuda ka myị wuu gbang gbang.

¹²Ịnya ala iJuda ịlẹ kị hi lọhịhị kị tị wẹẹ charịnya nyọka wẹ Ijipiti pyii-ì wẹẹ, m̀ ka taa ayịreji wuu ụ-ụwa. Ịwa wuu ka gbu ọ-ọpyị nya Ijipiti. Ẹwụ-ụ́ ryaa ka, imyi ka nwaa gbee kị ka gbu. Ọngọngọhẹ nyaa-á ka hi ka. Angị ichiche tụ angịtụka nyaa wuu ka gbu. Ị ka ta atịra lọyẹyẹ ẹ-ẹhị. Angịnyị ka kpaa họ bala ọ-kpa ẹnyị nyaa gọlọ ju awụlẹ.

¹³Angịlẹ kị ku ụwa ọpyị nya ala Ijipiti, m ka yaa akama jaabwọ kam ye ala iJerusalẹm akama la ẹwụ ọdada bala imyi ọnwụnwụ bala ẹdụrụ ọjụjụ.

¹⁴Ala iJuda ihihi ịlẹ ka alẹwụ a wua kpa rụ ka ịlẹ wuu kị warị kaa ku am ọpyị nya Ijipiti. Ongenegene nyaa a ka be rụ tịrẹkpẹ ka iJuda kaka. Ọ ka baaba myị nyọka nya tịrẹkpẹ ka ọpyị nya iJuda myịmyị ma angịnyị ịmanyị manyị nyaa kem a ka be rụ tịrẹkpẹ lẹlẹ.

¹⁵Ụka ọọwa lẹ, alẹng ịlẹ wuu kị je ya ịhụ nyaa juwa kiliya ha ihe ịkịla bala anyang ịhụ ịlẹ wuu kị godayị rụwa bala ala Isirẹlụ ịlẹ wuu kị ku ẹpwa ụwa ọpyi nya iPatirọsị ụwa Ijipiti. Iwa wuu ri iru nya angịnyị lụmẹ-lụmẹ. Ị wẹ iJeremaya ẹla yẹkẹẹ,

¹⁶“Ela ịlẹ ka ya jehi la ẹnyị nya Amkpaa lẹ, ahi pwa ẹla ịwa.

¹⁷Ahị ka họ ang myị ang ịlẹ kahị ya ahị ka họ. Ahị ka kpụ eteji ha Asịtatẹ kọ ri Adịrahụ ọnyang Oluhye-ọgba, juwa ya ere kịla iya họọ jaabwọ kaahị bala adahị igogo bala ịdịrịhụ nyahị bala alegbeju nyahị anyị kaa họ am̀ ọ-ọpyị nya iJuda bala o-opeje ịla iJerusalẹm kaa họ. Ụka onyogo ọọwa lẹ, ang oriri dịda hahị, ahị pyẹpyọọ la ọ-la akama ọhẹ-lọhẹ ka.

¹⁸Ma, bwu ụka ọlẹ kahị kpụba lọ kila iya ha ojiga Adịrahụ ọnyang Oluhye-ọgba bala ọ-hịnyọ ka ọ-ya ere họọ lẹ, áhị la ịngịngịhyẹ kaka. Angịnyị nyahị kaa gbu ẹ-ẹwụ gbu, ahị jam gbu igu nya imyi gbu ịnyịnyị.”

¹⁹Anyang ya ịnyịnyị yẹkẹẹ, “Ụka kahị kaa họ ịkaa, moo lala ukpeku nya ojiga Adịrahụ ọnyang Oluhye-ọgba, juwa kịla iya bala ọ-ya ere họọ lẹ, ọrụhị anyị jẹjẹ. Ị tị myị juhi.”

²⁰Ọọwa, iJeremaya a wẹ alẹng bala anyang ịlẹ wuu kị wọọ ẹla yẹkẹẹ,

²¹“Iya nya ịtangare ịlẹ ka adanụ igogo bala ịdịrịhụ bala alegbeju nyanụ tụ angịnyị nyanụ wun kaa kịla e-epweji nya iJuda bala opeje nya iJerusalẹm lẹ, anụ me ká Amkpaa-á jẹ ka lee o-deeri nyaa?

²²Ánụ yẹ-ẹ̀ wẹ ka-á? Ajị nyọlẹ ká ang onyobyi ọhọhọ nyanụ chị Amkpaa aga pwẹẹpwẹẹ à du kọ gọlọ ju ọpyị nyanụ, họ kọ kpụ egwawụ-egwawụ-ụ̀ wẹ alẹ lẹ.

²³Akama ọlẹẹlẹẹ ọlẹ wẹ uhye nyanụ, chajị anụ kịla iya ha ijiga, họ ọhọbịrị ba Amkpaa bwula ọ-myị ju ihi nya ehile nyamwụ ka.”

²⁴IJeremaya ya ẹla ta angịnyị wuu tụ anyang ịlẹ kị juwa yẹkẹẹ, “Anụ ala iJuda ịlẹ wuu kanụ jam ọpyị nya Ijipiti, anụ wo ẹrụ ọlẹ ká Amkpaa du tọnụ lẹẹ mẹ.

²⁵Ọ yẹkẹẹ, ‘Ọọwa ri anụ bala ịhụ nyanụ chị eje nyori anụ ka kịnya juwa myị ẹrụ ha ojiga ọnyang Adịrahụ Oluhye-ọgba bwula ọ-kịla iya bala ọ-ya ere họọ ịnyịnyịịnyị lẹ, ịnyị ka le? Anụ tị wẹ họ jaabwọ kanụ myị ọnụ lẹ! Anụ kịnyaa juwa họ ọnụ ọmyịmyị nyanụ jịra ẹ-ẹga nyamwụ mẹ-ẹ̀!’

²⁶“Anụ ala iJuda ịlẹ wuu kanụ kụ am̀ iJipiti, anụ wo ọnụ ọlẹ ká Amkpaa wẹẹ ya deeji mẹ. Ọ nwa iro yẹkẹẹ, ‘Jaabwọ ká am̀ Amkpaa juwa hịhị lẹ, m̀ kpa ẹnyị ọtụka nyam nwa iro ya ọngọngọhẹ nyanụ ā kpa ẹnyị nyam am Ọngọlahị Amkpaa nwa iro ẹnẹnẹhẹ kaka.

²⁷M̀ ka kpẹhị kụụnụ kee nyọka kpa akama wẹ uhye nyanụ, aang ọnyịịla à ka chịnụ ọgụ ka. Anụ wuu ka ta ayịreji. Ọng myị ọng nyanụ ka gbu ẹ-ẹwụ lee igu nya imyi gbee ká ọngọngọhẹ nyanụ ka hi kaka.

²⁸Ma. angị ịmanyị-ịmanyị nyanụ tị ka hi nyà bwu Ijipiti ka iJuda. Ụka ọọwa, angị hihi ịịwa ka jẹ ẹla ọlọnụ nya ọngọlẹ kọ họ jịra, ó-ri ịnyam lee ịnyaa.

²⁹M̀ jam ka ya ang-ẹjẹẹ hanụ kanụ ka jẹ nyori ayịreji ọlẹ kam hwahwa nyọka kpa chịnụ ọgụ ka pwụụnụ eji ịnyịlẹhị ẹgẹlẹ.

³⁰M̀ ka ya ịHọfụra Adịrahụ nya ala Ijipiti ju aluji nyamwụ ịlẹ kị tịtọ nyọka nwọọ ụ-ụbwọ jaabwọ kam ya iSedekaya Adịrahụ nya ala iJuda ju iNebukadinesa Adịrahụ nya ala ịBabịlọn ọlẹ kọ ri oluji nyamwụ kọ tịtọ nyọka nwọọ nwụ ụ-ụbwọ.’ ”