Read idege IJeremaya 46 Bible Online

IJeremaya 46 - idege bible

IJeremaya 46

¹Ela ịlẹ ká Amkpaa ya ta ọlọmwụ iJeremaya chajị nya ẹpwụma datị-datị.

²Amkpaa ya ala ịlẹ chajị nya ẹpwụma nya Ijipiti, ọya ala ịlẹ ta alẹwụ nya iNeko Adịrahụ nya Ijipiti ịlẹ ka iNebukadinesa Adịrahụ nya ala ịBabịlọn kụrụ ụwa ịKaakemichi ọlẹ kọ ji oya nya Ihu nya iYufuretisi. Adịrahụ iNebukadinesa kụ rwaa ẹwụ ẹpwụ nya ẹka ọhene nyọlẹ ka iJehoyakim ri Adịrahụ nya ala iJuda.

³Anụ nwụla akụmada bala ọkpẹ ị kpa da ẹwụ nyanụ nọ kanụ hu ang nya ẹwụ mẹ.

⁴Anụ họ anyịre inyanga ka gba kwaa. Anụ ji ogba nyẹẹwụ kanụ ya okpo okpa dẹwụ kụrụ. Anụ juo ịkpa chị ịri kanụ ya akumada kụrụ.

⁵Ịyẹ atịdu kam yaa kị juwa juhi? Ị juwa rụ tịrẹkpẹ Ị kụrụ alẹwụ nyaa, Ị myị la uhi ojuju. I jahị juwa rụnyẹ-rụ. Ị chị ẹhyẹ kpẹ ka. Amkpaa a ya ẹla ịwẹ lẹ.

⁶A la okpịra kpịra la, a ka jẹ-ẹ̀ ka ịgegehe ka. Ang dẹwụ a tị ka be mịka. Ụ-ụwa edii ẹga nya Ihu nya ẹpwụrem, Ị chụchụ I mileji.

⁷Ọọwa atịị wẹ, kọ juwa wuleji lala ihu ịNayịlị? Ola laa Ihu ọlẹ kọ mwụ biri ọọnụka nyamwụ.

⁸Ijipiti a wẹ wuleji lala Ịnịlẹ lẹ. Ọwa-à wẹ lala Ihụ ọlẹ kọ mwụ biri ọọnụka lẹ. Ọ yẹkẹẹ, m ka wuleji ma ka kụrụ odehe wuu.

⁹Da anyịre ehile kị hung ẹdiye ka byi orunye kị rụ kịnyaa mẹ. Byi alẹwụ kị kele. Alẹng nya iSudan bala ala iLibya kpa ịkpachị bala ala ịLidya ịlẹ kị jẹ ịcha ọda-da.

¹⁰Ẹnụtụrụ nya Amkpaa Ohe Oluhye Agụgụ a wẹ lẹlẹ. Alẹ ri ẹnụtụrụ ọlẹ kọ ka wu angịnyị uri. Alẹ ri ẹnụtụrụ ọlẹ kọ ka yẹ aluji nyamwụ akama. Ema nyẹẹwụ nyamwụ ka ri angịnyị gbee kọ ka wu ẹpwụ. Otị ka nwụa iwo nya angịnyị gbee kọ ka kpọọ. Chajị alẹ, Amkpaa Agụgụ juwa kiliya ụwa ọpyị ola ẹtẹ, ịga nya ihu nya epwirem.

¹¹Ala Ijipiti, anụ kele la iGiliyadị kaa tịtọ nya utoji mẹ. Uteji ịlẹ kanụ la wuu a liri kaka. Anụ a ka jẹẹ la ụda ọhọhọ kaka.

¹²Epwuma ọnyị myị ọnyị wo oyoị ọlẹ ka june lẹ. Ongmyong wo ida ojeje nyanụ. Ọngọ dẹwụ olẹ chụchụ bwu uhye nya ọngọkịla. Iwa wuu mileji lawụlẹ.

¹³Ela ịlẹ ká Amkpaa ya tam ọlọmwụ iJeremaya ụka ọlẹ ka iNebukadinesa Adịrahụ nya ala ịBabịlọn juwa warị ka dẹwụ tala Ijipiti.

¹⁴Ya dodehe ụwa Ijipiti, ka ya ụwa iMigidolu bala iMemfisi bala iTafanihesi. Anụ nwụlanọ nyọka dẹwụ ye ịlọnụ dada. Ẹwu ka ta ang myị ang nyanụ wuu ayịreji.

¹⁵Ịyẹ atị du ka ohe nyanụ apis rụnyẹ-rụ? Ịyẹ atịdu ka ọlẹng nya ẹna nyanụ a godayị myị ka? Ang odudu ri Amkpaa gụọ mileji.

¹⁶Alẹwụ nyanụ chachụụ, ị mileji, ọngọhẹ byi ọngọkịla yẹkẹẹ, kẹwẹ kahị rụ ka ẹpwa kịga nya angịnyị nyahị. Chajị kahị be hi ẹma nyẹẹwụ nya aluji.

¹⁷Ju Adịrahụ nya Ijipiti ẹnyị ọnyẹnẹ yẹkẹẹ, “Ọngọ wa ẹla hịlọmwụ ọlẹ ka ụka nyamwụ gụọọ hụ.”

¹⁸Am Amkpaa Agụgụ a ri adịrahụ lẹ. Am a ri Ohe Oluhye ọlẹ kọ juwa ohịhị lẹ. Jaabwọ ka Ọgbọdọ nya ịTabọ luhye gụ ịgbọdọ ịkịla. Bala jaabwọ ka Ọgbọdọ nya ịKamẹlụ gba kpehe gedee bwu ẹpwụ nya ihu ọtụka. Inyịnyị ọngịrị nya ọngọlẹ kọ kụwa ka dẹwụ tanụ a ka la lẹlẹ.

¹⁹Anụ ju olo kanụ ka hwang nya agbe nyẹẹwụ mẹ, angịnyị nya ala Ijipiti. Ị ka biri epweji nya ịMemfisi ọ ka yẹ ri egwawụụ. Iga ọ ta ayịreji ọlẹ ka ọngọngọhẹ a ka kwẹpwa ka.

²⁰Ijipiti lala ugba nya ẹna ọnyang, ọlẹ ka ukpọji ị bwu oye nya ẹtẹ juwa chị dị rọọ.

²¹Alẹwụ ịlẹ kị diro jụhyẹ lala anyị nya ẹna. Ị daa ụbwo mịka. I godayị ị dẹwụ myị ka. I jahị kpata wu, ị rụnyẹ rụ. Ẹnụtụrụ nyaa pweji kị ka akama lẹ. Ẹnụtụrụ nya ayịreji ọtata nyaa pweji lẹ.

²²Ijipiti rụnyẹ rụ juwa juwa chịgbụ pyepyepye lala ịlo ụka ọlẹ ka alẹwụ nya aluji nyaa juwa jẹ ka jwaa chwẹẹ. Aluji nyaa kpa eje bọwụ dẹwụ taa lala angịnyị ịlẹ kị juwa tụrụ ekeji.

²³Ị ka tụrụ ipyinu nyaa jụ ka eji. Ịnọ ochiwu kpa ọngọngọhẹ a ka jwọọ kpoye myị ka. Angịnyị nyaa ju iru lala iyiri. Ị ka juwa wa kpa myị ka. Amkpaa a ya ẹla ọlẹ lẹ.

²⁴I ka hu oyoyi ju ala Ijipiti. Angịnyị I bwu oye nya ẹtẹ ka kurwaa.

²⁵Amkpaa Agụgụ Ohe Oluhye nya ala Isirẹlụ yẹkẹẹ, Am juwa ka ye Amon ojiga nya ala ịTẹbẹsi akama. M ka yẹ Ijipiti bala ijiga nyaa bala adịrahụ nyaa akama ịnyịnyị. M ka hu Adịrahụ nya ala Ijipiti bala angịlẹ kị kpụnịrọọ wuu.

²⁶M ka yaa ju iNebukadinesa Adịrahụ nya ala ịBabịlọn ọlẹ kọ tịtọ nyọka nwụaa ụ-ụbwọ. Ma ụka kọ nụwa gbee, angịnyị ka kụ aam ọpyị nya Ijipiti myịmyị jaabwọ kọ ka bwụka onyogo. Inyi am Amkpaa a ya lẹ.

²⁷Angịnyị nyam, anụ a juhi ka. Anụ ala Isirẹlụ, anụ a chuko ka. M ka gbanụ kpehe bala anyị ịtụma nyanụ bwu ọpyị ọlụrụ ọlẹ kị wụnụ kpa kaa ju agba. Anụ ka nya tịrẹkpẹ wẹ ẹpwa nyanụ, anụ ka kụwa la okpunyi ịngịngịhyẹ a ka junu uhuhi ka.

²⁸Inyanụ anyị nya Isirẹlụ tị lẹ, anụ ajuhị ka. Am Amkpaa a ya ịnyị lẹ. M ka juwa tanụ. Ẹpwụma ịlẹ wuu kam nyinu epepe ka m ka taa ayịreji. Ma m tị ka tanụ ayịreji ko. M ka hịnyọ lọ yẹnụ a kama ma m ka yẹnụ akama meme labwọ.