Read idege IJeremaya 48 Bible Online

IJeremaya 48 - idege bible

IJeremaya 48

¹Ịịlẹ Amkpaa Agụgụ, Ohe Oluhye nya ala Isirẹlụ a ya chajị nya epwụma nya ala iMowabụ lẹ. Anụ ala iNebo, anụ ri enyi gu obyi lẹ! epweji nyanụ ta ayịreji lẹ! Alẹwụ kụrụ epweji nya iKiriyatayim lẹ. Ị tụrụ ẹga ịkpịbaa ịtụka nyanụ wuu, oyoyi ju angịnyị nyanụ lẹ.

²Ohi ọ rụ ru nya iMowabụ myị lẹ. Ụwa epweji nya iHẹchịbọn ị ka me obyi onyobyi tụụ-alụwa pyịpyị. Kẹwẹ kahị bịrọọ chajị kọ ka ri ẹpwụma kaka me! Ahụ epweji iMadmen ị ka hong a ka chị-tọọ ẹma nyẹẹwụ ka chị dịrẹng.

³Angịnyị nya ala iHoronayịm juwa jida yẹkẹẹ, Ang ojigijigi bala ang obịrịị-bịrị.

⁴Ị ta ẹpwụma nya iMowabụ ayịreji lẹ wo ka anjwo nyaa laa jida.

⁵Wo la iru nya Ida ojeje nyaa ụka ọlẹ kị juwa wule ọgbọdọ kele ka epweji nya iLuhiti. Ka wo iru nya ida ojeje nyaa ụka ọlẹ kị juwa pwọ ọgbọdọ ka epwẹji nya iHoronayịm.

⁶Rụnyẹ la agaga! Chị ịlọnụ da mẹ. Rụnyẹ lagaga lala ụcha ola ipwamẹ.

⁷iMowabụ, a kpunịrọ ọngịrị ọlala bala ụdụ ọkpụkpụ nya ịlọng. Kpọkpọọkpọ ị ka kụrụng. Alẹwụ ka hu ohe nyang iKemochi bala angịkiliya nyaa tu angị myị ẹrụ họọ kparụ ka ọpyị nyaa.

⁸I ka ta epweji ọnyị myị ọnyị ayịreji. Ọkpọọ bala ọpyị ọpẹẹpẹẹ wuu ka ta ayịreji. Am Amkpaa-à ya ịnyị lẹ.

⁹Ya ịma hu eji iMowabụ mẹ. Chajị ị ka tọọ ayịreji pii lẹ. Epweji nyaa wuu ka ri egwawụ ọngọngehe a ka nẹpwa ụwa kaka.

¹⁰Ọlọ ọgaga jụwa ha ọng myị ọng ọlẹ kọ hu ọkịlẹtụ nyamwụ wuu kpa họ ụkụrwọ nya Amkpaa ka! Olo ogaga juwa ha ọngọlẹ kọ wu ẹma nyẹẹwụ kpa ọka ya chị ịwọ.

¹¹Amkpaa yẹkẹẹ, iMowabụ juwa la okpunyi pyịyọọ bwu ọmwọmwụ. iMowabụ lala ere ọlẹ kị ka ya rịrị kem. Ị yọọ bwu akwo ọhẹ jụka akwọ ọkịla I ba hịọ ọmwụ nyamwụ kpụ keji. Chajị nyowa lẹ, ọ gbujwo ka. Ịpyọ ọlala nyamwụ juwa pyịyọọ.

¹²Chajị nya ọọwa lẹ, ụka pwụ ka am Amkpaa ka du angịnyị kaa chị iMowabụ ju-aang lala ere lẹ. Ị ka chịọ gbee akwọ nyamwụ ka da uhuhwo ọọwa lẹ Ị ka be akwọ ọwa ene lẹlẹ.

¹³Ụka owalẹ, ala iMowabụ a ka ju oyi nya iKemochi ohe nyaa jaabwọ ka ala Isirẹlụ ju oyi nya ịBẹtẹlu ẹga kị la ẹhị odahile bwu lẹlẹ.

¹⁴Alẹng nya ala iMowabụ-ee, Anyị anụ tị ka jẹ-ẹ̀ yẹkẹẹ, ahị ri ọgẹwụ bala alẹwụ ị ju ugbodu?

¹⁵Ọngọlẹ kọ ka ta iMowabụ bala epweji nyamwụ ayịreji pwu-eji lẹ. I ka nwụ Ikolobya ịlẹhị-ịlẹhị nyaa wuu. Inyị Amkpaa Agụgụ ọlẹ kọ ri adịrahụ a ya lẹ.

¹⁶Ẹbị ọlẹ kọ juwa ka họ iMowabụ ju chwẹẹ lẹ. Ahireji ọtata nyamwụ juwa warị lagaga.

¹⁷“Anụ angịlẹ wuu kanụ kụ ẹpwa ba ẹpwụma ọwẹ ba bala anụ angịlẹ wuu kanụ wo ohi oru-ru nyamwụ anụ bida chajị nyamwụ yẹkẹẹ, ọngịrị nyamwụ ọ kpa gbeji ọtụka nwu eku lẹ. Ọ la ihi bala ọla ụmụmẹ kaka.”

¹⁸Anụ angịlẹ kanụ nẹpwa iDibọn, anụ hireji bwu ẹga ọla ihi nyanụ kanụ kaa hụhụ ịpyị ẹ-ẹpwụ nya ekuruwa. Ongọlẹ kọ ka ta iMowabụ ayịreji pwụ eji lẹ.

¹⁹Anụ angịlẹ kanụ nẹpwa Aroyẹẹ, anụ gudayị ọọka nya ụgbẹyị kanụ tọ alẹng ịlẹ kị juwa rụnya ẹlagaga bala anyang-ihụ ịlẹ kị wẹẹ kpa ịlaa be ịtọ wo nya ẹla ọlẹ kọ họ.

²⁰Ị hu oyoyi ju iMowabụ lẹ, chajị ị tụrwọọ jụka eji lẹ. Anụ juwa jida bala mweru chajị nyamwụ mẹ. Ya dodehe wuu ụwa Anọn ya ị ta iMowabụ ayịreji lẹ.

²¹Eje ọlala juhye nya epweji ịluhye nya ọgbọdọ ịluhye-ọgba-pẹpẹ. Eje ọlala juhye nya iHolọn bala ịJahasa bala ịMefatị

²²bala iDibọn bala iNebo bala ịBẹtị-idibilatayim bala

²³iKiriyatayim bala ịBẹtịgamulu

²⁴bala iKeriti bala ịBọsịra bala epweji wuu ịla ẹpwụma nya iMowabụ. Ịlẹ kị ji lụrụ lee kị ju chwẹẹ.

²⁵Ị chị ongịrị ọlala nya iMowabụ eku lẹ. I bịrị ogogo ọlala nyamwụ lẹ. Ịnyị Amkpaa a ya lẹ.

²⁶Amkpaa yẹkẹẹ, “Tụ ere rịrị iMowabụ gbee kọ nwa jwọọ mẹ, chajị ọ la egbeju-ọngịrị tụ Amkpaa pyịpyị. IMowabụ ka gwegbilo ẹ-ẹpwụ nya ịkọ ọkọkọ nya ịlọmwụ. Angịnyị ka hụlọ ahụ jwoo.

²⁷Isirẹlụ tị́ ri ang ọ-kpa hụlọ ahụ ju nyang. Ooyi ọ yi kpá kaka, à tị tọọ ịmyị-ọnụ lala ahụ nyaa woo itinabwọ nya ẹlẹhẹ.

²⁸“Anụ angị kụ i-iMowabụ, anụ rụ bwu ẹpwa nyanụ kaa kụ ẹpwa ọ-ọnụ nya ụgbụ lala enewulo mẹ.

²⁹IMowabụ la ọbọọchẹ lụmẹ. Ahị wo jaabwọ kọ hi ọbọọchẹ bala o-hu ịlọmwụ gẹdẹ bala jaabwọ ka ọkịlẹtụ nyamwụ myị la ịlomwụ ọháha.

³⁰Am Amkpaa lịlọm jẹ jaabwọ kị hi ọbọọchẹ ka ba. Ịlaa ọháha ri odudu, ang myị ang ịlẹ kị tị họ ri odudu ịnyịnyị.

³¹Chajị nya ọọwa lẹ, Am bida chajị nya ọng myị ọng ọlẹ kọ juwa iMowabụ bala ala epweji nya iKiiri-ịharẹsẹtị.

³²M ka bida nya angịnyị ịla iSibima dọmwụ gụ ọlẹ kam ka jida chajị nya ala ịJasẹẹ wẹẹ. Epweji nya iSibima lala alakọnụ ọlẹ ka abwọ nyamwụ pyẹmaa kụrụ Ihụ Ọlịmịma lalala kaa pwụ ịJasẹẹ. Ma ị ka ta egbe nyang ịlẹ kị ga lụhyọọ bala egbe ilekpo-lekpo nyang wuu ayịreji.

³³Ị hụ ọkẹkẹnị bala ụya ọyaya kparụ hi ọpyị o-ju eyo nya iMowabụ lẹ. M họ ere kpụba lọ mwụmwụ bwu ẹga ọ hụ ere lẹ. Ọngọhẹ a myịmyị ji ọ ka hụ ere juwa dakọ nya ọkẹkẹnị kaka.

³⁴Angịnyị nya ịHẹchịbọn bala Eleyale chị eko gboo. Ị wo ida ojeje nyaa ọọwa pwụ epweji nya ịJahasị. Angịnyị ịla iSowa wo ịnyịnyị. I wo Ida ojeje gbee pwụ iHoronayim bala Egilatị-ịchẹlichiya. Ẹmwụ-enyi ọla iNimrim nwụ wuu lẹ.

³⁵M ka hu ala iMowabụ abwọ la iya ọkịlaakịla a-ada ikiliya nyaa. M ka hwaa abwọ lọ ọ-kpụ eteji ha ijiga nyaa. Inyị Am Amkpaa a ya lẹ.”

³⁶Chajị nyowa lẹ, ọkịlẹtụ nyam bida chajị nya iMowabụ bala angịnyị nya ala iKiiri-ịharẹsẹtị lala uhulo nya Ida ọbaba ọlẹ kị kaa chị. Chajị ang myị ang nyaa ịlẹ kị la ta ayịreji lẹ.

³⁷Iwa wuu pwo inyi olegbeju bala ịchwọ nyaa. Ị ya ẹma kọ-ịlaa wuu ụbwọ ị go ịwụrụ nya ida ọbaba kụrụ.

³⁸Uhye-ogba nya ịnawụ nya ala iMowabụ ọnyi myị ọnyị bala ikpododa nyaa wuu, ị da ọbaba juwa chajị m be iMowabụ ene lala ugu-echụ lẹ. Inyị Amkpaa a ya lẹ.

³⁹Ye jaabwọ kị be iMowabụ ene wẹẹ! Ye jaabwọ kị juwa jida! Ye jaabwọ ka iMowabụ jekpe da la oyoyi! O, iMowabụ ye ri ang okpa hụlọ ahụ ju bala ị ga ọ wu a aanamwụ ejiri lẹ.

⁴⁰Amkpaa myị ọnụ ya ẹpwụma ọhẹ nyịka chabwo bwu uhye weji lala ụpa kaa pyẹ achwọ ju ẹpwụma nya iMowabụ.

⁴¹Alẹwụ nya ẹpwụma ọwa ka kụrụ epweji nya iMowabụ bala iiga ịkpịba nyaa. Ẹnụtụrụ ọwa, ọkịlẹtụ nya angị dẹwụ ị kpịra kpịra nya ala iMowabụ ka myị la uhi oju lala okịlẹtụ nya ọnyang ọlẹ ka ang nyọnyị jụwa họ.

⁴²Epwuma nya iMowabụ ka ta ayịreji ị ka ri ẹpwụma kaka chajị ị họ abwẹla tụ irya nyam pyịpyị.

⁴³Ang ịluhihi bala ụtụje bala ụnya dụwa gbe angịnyị nya ala iMowabụ. Amkpaa a ya ịnyị lẹ.

⁴⁴Ọngọlẹ kọ rụnyẹ hi ang ịluhihi i-ea ọ ka chabwọ jụka ụtụjẹ, ọngọlẹ kọ maga nyọka kpehe bwu ẹpwụ nya ụtụjẹ, unya ka wuọọ. Angịlẹ kam ka họ ẹpwụma nya ala iMowabụ ẹnụtụrụ ọlẹ kam ka yaa akama a wẹlẹ.

⁴⁵Angịlẹ ka ẹwụ kụrụ, ịnyịrọ chaa pyẹpyẹ. Ị maga nyọka rụ kpịbaa ka ịHẹchịbọn epweji ọlẹ ká iSihọn ri adịrahụ ẹnẹhẹ lẹ. Ila o-bwu ụwa tị kele kaka rụ angị kụ ịlahị bala ịgbọdọ nya ala iMowabụ ịwẹ ká ẹwụ maama lala ịngịngịhyẹ wuu.

⁴⁶Iyoo juwa hanụ ala iMọwabụ. Anụ kaa gbịgba ha ohe iKemochi. Anụ ta ayịreji lẹ. Alẹwụ wu anyị alẹng bala anyị anyang nyanụ kparụ ka agba nyẹẹwụ lẹ.

⁴⁷Ma Amkpaa ka myịmyị-ị̀ tịrẹkpẹ ha ala iMowabụ (ọhaha) ahị ọwawa nyaa wẹẹ. Angịlẹ wuu Amkpaa a ya kị ka họ ta ẹpwụma nya iMowabụ lẹ.