Read idege IJeremaya 49 Bible Online

IJeremaya 49 - idege bible

IJeremaya 49

¹Jaabwọ ká Amkpaa ya chajị nya ala Amọn a lẹẹlẹ: Ala Isirẹlụ a manyị alẹng kaka? Lee ị manyị ịka rugu nyaa ka-a? Iyẹ atịdu ka angịlẹ kị kaa kpẹtẹji ha ọhẹ nya ịMọlẹkị ya imwawụ nya ala onegba nya ịGadị wuu kị nẹpwa ụwa mẹ?

²Yẹ mẹẹ, ụka juwa warị ká Amkpaa ka chị ekụrẹ nyẹẹwụ ju ala epweji nya iRaba ọlẹ kọ juwa Amọn? Ụwa wuu ka ta ayịreji. Alẹwụ ka chị epweji nyaa ịla jụka eji. Ala Isirẹlụ ka ye ọpyị nyaa tịrẹkpẹ myịmyị.

³Anụ angịnyị nya ala ịHẹchịbọn, anụ jida mẹ, ị ta epweji nya Ai ayịreji lẹ. Anụ anyang nya ala ịRaba, anụ ju ka ẹpwụ nya ida ọbaba! Anụ go ịwụrụ nya owuru nyanụ kụrụ kanụ dọmwụ nya ida ọbaba mẹ. Anụ rụnyẹ kam kale ẹ-ẹpwụ nya iwe-ahụrụ ojigi-jigi. Alẹwụ ka hụ ịMọlẹkị ojiga nyanụ bala angịkiliya tu angị myị ẹrụ nyamwụ kparụ.

⁴Anụ angịnyị ịla kpẹẹkpẹẹ ka, ọ lịyẹ atịdu kanụ wẹa ha ịlọnụ? Ọngịrị nyanụ wẹẹ keji, lẹ ọ lịyẹ atịdu kanụ myịmyị juwa ya ọngọngọhẹ nyị ka byẹjẹ da ẹ-ẹwụ tịwa myị kaa?

⁵Am ka kpa ang oluhihi chịnụ ọgụ bwu ịkịka ọnyị myịnyị. Anụ wuu ka rụnyẹ rụ. Ongmyong nyanụ ka rụnyẹ nyọka kpa ọhịhị nyamwụ be. Ọngọngehe a ka myịmyị-ị̀ ji ọ ka tụ anginyị nyanụ gụrụ kaka. Inyị Amkpaa Agụgụ a ya lẹ.

⁶Ma ụka kọnọ gbee, m ka myịmyị-ị̀ tịrẹkpẹ ha ala Amọn ahị ọwawa nyaa wẹẹ.

⁷Jaabwọ ká Amkpaa Agụgụ ya chajị nya epwụma nya Ẹdọm alẹẹ lẹ: “Anụ ala Ẹdọm a la ẹla ọjẹjẹ kpọng kpọng kaka?” Angịlẹ kị kaa mẹla jaa a jẹ mẹjaa jaabwọ kị ka họ kaka? Ẹla ọjẹjẹ nyaa wuu gụaa byi lẹẹ.

⁸Anụ angịnyị nya ala iDẹdan, anụ jahị kpata kanụ rụnyẹ rụ. Anụ rụ kaa kpịbaa mẹ, m juwa ka ta anyị ịtụma nya iSọ ayịreji chajị ụka pwụ kam ka yaa akama lẹ.

⁹Ọ ri ka ongịnyị a hya egbe nya ekeji. Ọ kaa tụbwọ hi egbe nya ekeji ịmanyị-ịmanyị ju okoji ọwa rụwa kaa? Ụka ká aleyi a ka ẹpwa kaa go ang yoyị lodu, angịlẹ kem kọ haa ị kaa go kparụ lẹ.

¹⁰Ma, m chị anyị-tụma nya iSọ ehe iga kị kpịba, m nwụlang ọlẹ kị ya kụrụ ịlaa hyaa ọọwa lẹ ị ye ẹga ọlẹ kị ka kpịbaa kaka lẹlẹ. Angịnyị ịla ẹpwụma nya Ẹdọm wuu ta ayịreji lẹ. Ọngẹhẹ lẹpwụ nyaa a hi kpongkpong kaka.

¹¹Anụ tụbwọ hi anyị-egu nyanụ ham mẹ. M ka kpẹhị rịraa. Ihu-egụ nyanụ a dahịhilem mẹ.

¹²Amkpaa Ohe Oluhye yẹkẹẹ, ori angịnyị ịlẹ kị dọmwụ pwọkụ kam ka yaa akama ka, kpokpo-kpo kam tị yaa akama lẹ a mirya ya ma ka yẹng ahụ akama kaa? ehe, a ka be akama ọlẹ kam ka yeng ka. M ka yẹng akama pyii lẹ.

¹³Chajị m kpa ẹnyị nya ịlọm gọlọ. Am Amkpaa a ya ịnyị lẹ. ịBọsira ka ri iga ọlẹ ka angịnyị ka yẹ juhị bala iga ohulo-ahụ ju. Ọ ka ri egwawụ bala iga nya inyiribyi.

¹⁴M wo oja ká Amkpaa du ọngọ myị ẹrụ anụ tụguru kanụ nwụlanọ nyọka dẹwụ.

¹⁵Am Amkpaa ka họng ahụ ẹpwụma nya Ẹdọm a ka la dẹmwụ-dẹmwụ. Ọngọngọhẹ a ka myịmyị-ị̀ yung ịhị kaka.

¹⁶Ọbọọchẹ nyang dang lụgbaa lẹ. Ọngọngọhẹ-ẹ́ ju uhi nyang jaabwọ ká wẹẹ me irya ka. A kụ ẹpwa kpịbaa uku nya ẹjwọ iluhye nya ịgbọdọ, ahị jẹ. Ẹpwa nyang-ńg ji uhye pyiipyii jaabwọ ká idu kaa hụ wẹwẹ, Amkpaa ka chịng abwọ bwu ụwa. Amkpaa-à ya ịnyị lẹ.

¹⁷Amkpaa yẹkẹẹ, Ayịreji ọtata ọlẹ kam ka kpa chị ẹpwụma nya Ẹdọm ọgụ ka lụmẹ. Ọng myị ọng ọlẹ kọ chịpwụrụ kọ yọọ ka yụbwọ ba ọnụ bala ọ chịpyọ chajị nya iyabwọ ọtụka ọlẹ kọ ka wẹ uhye nyaa.

¹⁸Jaabwọ ká Amkpaa ta epweji nya ịSọdọm bala iGomora bala epweji ị-baa ba ịkịla ayịreji, ịnyịnyị ọ ka họ epwụma nya Ẹdọm lẹ. Ọngọngọhẹ-ẹ́ ka kụ ẹpwa ụ-ụwa ẹnẹnẹhẹ kaka. Am Ampkaa a ya ịnyị lẹ.

¹⁹Jaabwọ ká ugẹbẹ kaa kpehe kpiloko bwu ipyinu nya ịJọdan da ka ẹpwụ nya ịkpịlọ ịlẹ kị juwa ri amẹ, ịnyịnyị m ka warị ka ku ala Ẹdọm rụ lụka ọmwaaa hi ọpyị nyaa lẹ. Ụka ọọwa, m̀ ka chụ ọngọlẹ kọ ham nyọka kpẹhị rịrị ọpyị nyaa. Oowo à tị́ lal am lẹẹ-ẹ̀? Oowo à tị́ ka chịm ọnụ myị-ị̀? Olegbeju oyina a tị́ ka bá ẹla tam myị?

²⁰Lẹẹlẹ, anụ wo ang ịlẹ ká Amkpaa nwụlanọ nyọka họ ẹpwụma nya Ẹdọm bala jaabwọ ọlẹ kọ ka họ alepweji nya ịTẹman ẹla kaa ba mẹ. Ị dọmwụ ka gbile anjwo ichiche nyaa kpa rụ, ọ ka lọng myị ọng ẹbyẹbyị.

²¹Ẹpwụma nya Ẹdọm ka ta ayịreji. Odehe wuu ka hụ jigi-jigi ọọ-la iru ọtáta nyamwụ. Angịnyị ka wo ida ojeje nyaa pwụ Ihu Oletungkohyo.

²²Oluji ka gba mịla epweji ịBọsịra lagaga jaabwọ ká idu kaa hụ̀ ka uhye-ọgba pyiipyii ene kọọ nyà weji lọngịrị-ọngịrị. Angịdẹwụ ịtụka nya ala Ẹdọm ka da apwụ hwamẹ ẹnụ ọọwa lala ọnyang ọlẹ ká ang nya ọnyị juwa họ.

²³Jaabwọ ká Amkpaa ya chajị nya ịDamasịkọsị alẹẹ-lẹ: Angịnyị ịla epweji nya ala ịHamatị bala Apadị a la ọmwịịnyọ ka chajị ị wo oja onyobi. Ị mirya gbee ọkịlẹtụ gụa gbịlaa lala ihu ọtụka. Ị la ọmwịịnyọ ka.

²⁴Angịnyị nya ịDamasịkọsị juhye. I juhi rụnyẹ rụ I juwa ẹpwụ nya ọjụjụ bala uko ọchịhcị jaabwọ ka ọ-kaa la ọnyang ọlẹ ka ang nyọnyị juwa họ.

²⁵Ye jaabwọ ka angịnyị rụ hi ẹpwụma ọlẹ kọ kwehye lụmẹ-lụmẹ ka angịnyị ịlụwa kaa myị lọkẹkẹnị wẹẹ.

²⁶Ẹnụtụrụ ọwa, Alẹwụ ka nwụ anjwo ikolobya nyaa opeje. Angịdẹwụ nyaa wuu ị ka taa ayịreji. Am Amkpaa Ohe Oluhye Agụgụ a ya ịnyị lẹ.

²⁷M ka ju ugulọ nya ịDamasịkọsị ila. Ila owa ka rụ iga okpịba nya ịBẹnhadadị.

²⁸Jaabwọ ká Amkpaa ya chajị nya angịnyị nya ala ịKẹdaa bala epweji ịlẹ ka iHasọ kpẹhị rịrị ka adịrahụ iNebukadinesa niọọ a lẹẹ lẹ. Anụ wuleji kanụ dẹwụ ta ala ịKẹdaa. Angịnyị ịlọmwẹnụ-ụtụrụ wuu anụ taa ayịreji.

²⁹Anụ niaa ọdụ ọnune bala iyo ileji n yaa kanụ niaa apwụ oke onang nya odu-onune nya tụ angabwọ ịlẹ kị la wuu. Anụ go anyịrẹ ịKamẹlụ nyaa kparụ kaa la. Cheko gboo ya je angịnyị yẹkẹẹ, “Ang oluhihi jam dagaga juhi wuu lẹ.”

³⁰Anụ angịnyị ịla epweji nya iHasọ. Anụ rụnyẹ rụ lagaga ọtụka-ọtụka kaa kpịbaa kpịrẹ kpịrẹ mẹ. iNebukadinesa Adịrahụ nya ala ịBabịlọn mobyị junu. Ọ nwụlanọ wuu nyọka tụnụ pyịpyị lẹ.

³¹Anụ wuleji kanụ dẹwụ ta ẹpwụma ọlẹ kọ hụ lọkpunyi ịngịngịhyẹ a taa pyịpyị kpong kpong ka. Epweji ọwa ala ogirigba lee ang ọtụgbẹjị ku ka ingịngịhyẹ a ke ọgirigba nyamwụ ka. Amkpaa a ya ịnyị lẹ.

³²Anụ nwụla anyịre iKamẹlụ bala ogu nya iyo ileji nyaa kparụ kaa la. Angịlẹ wuu kị pwọ-ịnyị ẹẹpwahlirẹtẹ m ka nyịaa epepe hwahị rụ kịga datị-datị. M ka kpa ayịreji ọtata chaa ọgụ bwu ịkịka ọnyị myị ọnyị. Ịnyị Amkpaa Agụgụ a ya lẹ.

³³Epweji nya iHasọ ka yẹ ri ugu me pyịọọ. Ikirom kem a ka juwa lẹlẹ. Ongịnyị-ehe ọhẹ-lọhẹ a ka nẹpwa ụwa ẹnẹnẹhẹ kaka. Am Amkpaa a ya ịnyị lẹ.

³⁴Ahahị nyọlẹ ka iSedekaya ri Adịrahụ nya ala iJuda lẹ, Amkpaa a yẹla ta ọlọmwụ iJeremaya chajị nya ẹpwụma nya ala Elam lẹlẹ.

³⁵Amkpaa yẹkẹẹ, “Am ka nwụ alẹwụ ịkpa uda dẹwụ ịlẹ kị họ ọlẹ ka ẹpwụma nya Ẹlam lọngịrị.

³⁶Aluji ka dẹwụ taa bwu ịkịka ọnyị myị ọnyị. Ị ka kụrwaa, alẹwụ ka wuaa kparụ nyi epepẹ tụ odehe-odehe da wu. Ẹpwụma ọhẹ-lọhẹ a ka hi ka alẹwụ a ka chịda lọ wuaa kparụ-ka lẹ ka.

³⁷M ka họ angịnyị nya ala Eram ka juhi nya aluji nyaa ịlẹ kị tịtọ nyọ nwụa nwụ. M ka ju agbama ọtụka-ọtụka ta ala Elam, m ka taa ayịreji. M ka du alẹwụ chia ọgụ ị ka nwụaa gbee kị ka myị gbang gbang.

³⁸M ka ta idịrịhụ nyaa bala alegbeju ịla ekpeleji nyamwụ ayịreji. Ọọwa, m ka ya ẹchị adịrahụ nyam da ụwa lẹlẹ.

³⁹Ma ụka kọ nọ gbee, m ka myịmyị-ị̀ tịrẹkpẹ ha ẹpwụma nya Elam Ahị ọwawa nyaa onyogo. Inyi Am Amkpaa a ya lẹ.”