Read idege IJeremaya 5 Bible Online

IJeremaya 5 - idege bible

IJeremaya 5

¹Ala iJerusalẹm ee, anụ rụnyẹ tụ opeje-opeje nyanụ da wẹẹ! Anụ kpẹhị pileji dagaga ju, kanụ yẹ wẹẹ, anụ pịlahị tụ ikpọdọda da wẹẹ, anụ ye ọngọ ookpokpo ọhẹ ọlẹ kọọ họ ẹla ọkpakpa, juwa họ ẹla nya ịlẹhị-ị́? Ánụ ye ọngọ ookpokpo ọlam-ọlam aalẹ, ḿ ka ta iJerusalẹm ayịreji kaka.

²Ịnyịlẹhị lẹ, anụ wẹẹ nwa iro lẹnyị nyam, iro ọnọọkịla anụ tịị nwa lẹ.

³Amkpaa ee, ẹla nya ịlẹhị ā tọ bwu ẹga nya angịnyị nyang lẹ. À yaa akama, ọ́ tị waa ugbe ka, à gwaa ila, ị́ tị pwa ọmẹjẹ, ị la egbeju-ọngịrị lala ẹjwọ, ị pwa ọ-ka ye irya da.

⁴Ụka ọọwa, m̀ byi ịlọm ẹ-ẹpwụ-ẹpwụ yẹkẹẹ, “Angị ri alokpeeji ị-jẹ ẹlẹlẹhẹ ka-à lẹẹ lẹ. Ị họ ẹla uchi-uchi, ị́ jẹ ụgbẹyị nya Ohe Oluhye ka, ị́ jẹ ang ịlẹ ká Amkpaa tịtọ kị ka họ ka.

⁵M̀ ka ka ẹga nya alegbejụ kam ka ya ẹla taa wẹẹ. Ịwa jẹ ụgbẹyị nya Amkpaa, ị jẹ ehile nya Ohe Oluhye nyaa.” Ịwa wuu lawụlẹ-awụlẹ tị pwa ọngịrị nya Amkpaa deeji, ị́ myị jwoo ihi ka.

⁶Ajị nya ọọwa lẹ, egabẹ ka bwu ipyinu kaka nwaa, ikirom ka bwu ugbileji kaka taa ayịreji. Ijwo ka kụ ịnya gbaa e-epweji nyaa, ọngọngọhẹ kọ kpehe bwu ụwa, ijwo ka hụlọọ hwẹẹhwẹẹ, chajị ịhọbịrị nyaa ju iru kpụ elego, ị nyẹẹkpẹ da Ohe Oluhye kịla ụka ohu kụrụ iwo lẹ.

⁷Amkpaa towo yẹkẹẹ, “Ányị m̄ tị́ ka jẹ-ẹ̀ hịnyọhiinu-ù? Angịnyị nyanụ wuu nyẹẹkpẹ dam, kele kaka kpụ eteji ha ijiga ịlẹ kị ri Ohe ka. M̀ ya ang oriri haa-a ri wu ẹpwụ kpọngkpọng, ị tị kaka họ ụya, juwa mwụ tọọọ́ kele ka ebe nya akpara.

⁸Ị lala anyịrẹ i-ri ang wu ẹpwụ kịị che jwaa ka, ọngọngọọng juwa tọ oru nya ahụ nya ọngọkịla.

⁹M̀ ka yaa chịng nya ụma nya ọhọhọ ọlịịwẹ-ẹ́? M̀ ka jẹ-ẹ̀ hịnyọ la ọ-họ ẹpwụma ọlịịwẹ kwiwa-á?

¹⁰“Anụ tụ ẹrụ nya alakọnụ nya angịnyị nyam da, kanụ bịraa, anụ tị taa ayịreji gbanggbang koo. Anụ hụlaa abwọ chịịrụ, chajị angịwẹ-ẹ́ ri angịnyị nyam kaka.

¹¹Ala Isirẹlụ bala ala iJuda á la kpẹẹkpẹẹ ẹ-ẹga nyam kpong-kpong ka. Am Amkpaa-à ya ẹlẹwẹ lẹ.”

¹²Angịnyị nya Amkpaa pwọọ rwarụ, juwa yẹkẹẹ, “Ọ tị́ ka họhị-ị họ anyị-ị̀? Akama ọhẹ-ẹ́ juwa chịhị ọgụ ka pyii-ì! Ẹwụ-ụ́ juwa dahị lee ūhi ọ-chịhị ọgụ ka.

¹³Ehwo nya angịnyị alọmwụ à tị́ riiri-īì, Ohe Oluhye-é daa ẹrụ ọhẹ-lọhẹ kpá kaka, akama ịlẹ kị yẹ ọmwụ chajị nyaa-ā chaa ịwa ayịdang ọgụ.”

¹⁴Lẹẹlẹ, am Amkpaa Ohe Oluhye Agụgụ yẹkẹẹ, “IJeremaya ee, ajị nyọlẹ ká angịnyị ya ụma nya ala ịlịịwẹ lẹ, m̀ ka họ ẹla nyam ka lala ila ọ-ọnụ nyang, kọ ka rụ angịwẹ lala ịwụ.

¹⁵Anụ ala Isirẹlụ ee, anụ wo mẹ, am Amkpaa juwa kpa ẹpwụma ọhẹ bwu ẹga olụrụ kaka dẹwụ tanụ. Ẹpwụma ọọwa la ọngịrị bala o-ri ẹpwụma onyogo. Ẹpwụma ọọwa ri ọlẹ kanụ wo òja nyaa wo kpong-kpong ka.

¹⁶Ịcha ịlagburuku nyaa lụrụ-ụrụ nya igu-igu. Ịwa wuu ri angịdẹwụ ịtụka-ịtụka.

¹⁷Ị ka ri ang-ẹrụ nyanụ ịlẹ kanụ wụ bwu ẹrụ tụ ang oriri ịlẹ kanụ la. Ị ka nwụ anyị alẹng bala anyị anyang nyanụ, ị ka nwụ ịmwụ bala ịna nyanụ. Ị ka ta alakọnụ bala ikiledu nyanụ ayịreji. Ị ka ta epweji i-me egwalọ ju nyanụ ịlẹ kanụ dahịhile ayịreji.

¹⁸“Am Amkpaa jam byinu ya lụka nya ẹnụtụrụ ịịwa, aluji-í ka tanụ anụ ala iJuda ayịreji wuu gbanggbang ka.

¹⁹IJeremaya ee, ụka ká angịnyị nyang-ńg towo yẹkẹẹ, ‘Ọ tị́ lanyị ká Amkpaa Ohe Oluhye nyahị họhị ang ịlịịwẹ-ẹ̀?’ lẹ, aa byaa mẹ, ajị nyọlẹ kanụ pwa Amkpaa kaka myị ẹrụ ha ijiga nya alụma ịkịla am̀ ọ-ọpyị nyanụ lẹ, anụ tịtị ka myị ẹrụ ha angga ọ-ọpyị ọlẹ kọ ri ịnyanụ ka ugbẹnyị lẹ.” Amkpaa yẹkẹẹ,

²⁰“Ya ẹla ọlẹ je anyị ịtụma nya iJekọbụ, ká yọọ dodehe je ala iJuda:

²¹Anụ wo mẹ, anụ aluchi ị-la irya-ka, anụ ju ahị, ánụ tị yọyị ka, anụ ju arụ, ánụ tị jẹ wo ẹla ka.

²²Am Amkpaa anụ ju uhi ka ịịwẹ lẹ-ẹ́? Ánụ che bwẹ̀ẹ́bwẹ̀ẹ́ ị-ịlahị nyamwụ chẹẹ ka! Am à tụ ugburuja guru nyọka ri oyi nya ihu lẹ, ụwa ri oyi ọpyịyọọ ọlẹ kọ ka kpoye nyamwụ ẹnẹnẹhẹ kaka. Ihu ka gu agbụ myị, ọ́ tị ka kpoye nya ụwa kaka, ọ́ mwụ gbụrụ-gbụrụ abwọ myị abwọ, ọ́ ka be bwu ụwa myị kaka.

²³Anụ angịwẹ chakpa la egbeju-ọngịrị bala ọkịlẹtụ nya arụwoka, anụ ji kpata nyẹẹkpẹ dam lẹ.

²⁴Ánụ me irya kpá chẹẹ yẹkẹẹ, ‘Āhị ju ihi nya Amkpaa Ohe Oluhye nyahị mẹ, ọwa-à kaa do enyi hahị lụka nya Ohe ọ-chị enyi cheji bala ụka nya ụhyọọ du kahị-ị̀ ye ang-ẹrụ wụ ẹka myị ẹka lẹ’ ka.

²⁵“Ang onyobyi ọhọhọ nyanụ à ku ahị ọwawa iwe hiinu lẹ, ịhọbịrị nyanụ du kanụ ye ang ọnyịịla ọhẹ-lọhẹ kaka.

²⁶“Alọkwọ kụ ẹpwarịrị nya angịnyị nyam, ị kụ ịnya lala angị-ị durwe nya ịchịnụ. Ị da anya nyaa nyọka wu angịnyị.

²⁷Jaabwọ ká ọmwụkpẹ kaa wu ịchịnụ kụrụ u-udo, ịnyịnyị ẹpwa nyaa-à myị la obyi onyobyi omeme lẹ. Ịnyị à du kị ri angịtụka ị-kpụ ụdụ,

²⁸hye jwọọjwọọ bala ọ-la kpọbọ-kpọbọ lẹ. Ị́ị họ ang onyobyi chị ọngọhẹ deeji ka. Ịị chị eje ọkịrọrọ ẹ-ẹga nya anyị-egu, ịị yẹ alẹbyahị ba ẹ-ẹpwụ nya iwe-ahụrụ ọlẹ ịnọ kọ ri nyaa.

²⁹M̀ ka yaa chịng nya ụma nya ọhọhọ ọlịịwẹ-ẹ́? M̀ ka jẹ-ẹ̀ hịnyọ la ọ-họ ẹpwụma ọlịịwẹ kwiwa-á?

³⁰“Uguru-ẹla o-wu ejiri à họ am̀ ọ-ọpyị lẹ ooo—

³¹Alọmwụ yẹ ọmwụ ọnọọkịla, angịkiliya juwa họ jaabwọ ká alọmwụ ịịwa byaa, ọọwa-á tị wụụnụ anụ angịnyị nyam ẹjẹ chẹẹ kaka, ẹnụ ká akama ka chị ang ịwẹ ọgụ anyị anụ tị́ ka họ?