Read idege IJeremaya 50 Bible Online

IJeremaya 50 - idege bible

IJeremaya 50

¹Jaabwọ ká Amkpaa du ọlọmwụ iJeremaya. Ẹrụ chajị nya ẹpwụma nya ịBabịlọn bala angịnyị ị lụwa a lẹẹ lẹ:

²Ya oja ọlẹ je ẹpwụma, Ya dodehe gboo! Hang o-ju ẹjẹẹ mẹjẹ ka ya oja ọlẹ je ọng myị ọng! A yẹ lẹlẹ kpụ angịnyi ịbaa ka. ịBabịlọn gu cheji lẹ! Oyoyi ju ịBẹlụ ohe nyaa lẹ. ỊMaaduku myị la uhi ojuju. Oyoyi ju ekpeku nyaa bala ijiga nyaa lẹ.

³Ẹpwụma ọhẹ bwu oye nya ẹtẹ juwa warị kaa dẹwụ ta ala ịBabịlọn. I ka họ ẹpwụma nya ịBabịlọn ka yẹ ri ụgụmẹ. Ọngọngọhẹ a ka nẹpwa ụwa kaka. Angịnyị wuu tu iyo ịlụwa ka rụnyẹ rụ hi ụwa.

⁴Amkpaa yẹkẹẹ, “Ẹnụtụrụ ọwa bala ụka ọwa, angịnyị nya ala Isirẹlụ bala ala iJuda ka warị lida-lida jụwa tịtọ nya Amkpaa Ohe Oluhye nyaa.

⁵Ị ka tịtọ nya ụgbẹyị ọlẹ kị kaa bwu ka ịSayọn ọwa lẹ ị ka jahị kpata daka ụwa lẹlẹ. I ka nwụa iro ta Amkpaa ọlẹ kị ka byịrịị ẹnẹnẹhẹ kaka.”

⁶Angịnyị nyam la laa ikpịlọ ịlẹ ka ọngọ gbaa-gbe kaa yaa hwahị uhye nya ịgbọdọ ọlẹ kị kaa ga bwu ọgbọdọ ọhẹ ka ọkịla gbee kiị deeri nya ẹpwa nyaa, ẹga kị bwu.

⁷Ọng myị ọng kọ yaa juwa nwaa. Aluji nyaa juwa yẹkẹẹ, Ang ịlẹ kahị haa lẹ ọ tịpyọ ka chajị Ị họ ang onyobyi ba Amkpaa Ohe Oluhye ọlẹ kọ ri edame-ọjwọ-jwọ nyaa bala Amkpaa ọlẹ kọ ri ẹhi ọrịrị nya adaa igogo anyị.

⁸Angịnyi nya ala Isirẹlụ, anụ rụnyẹ rụ lagaga kpehe hi ẹpwụma nya ịBabịlọn. Anụ kpehe hi epwarịrị nya angịnyị nyaa. Anụ kpa angịkịla ji lahị kụnyẹ jaabwọ ka oyi chị ka kpa ogu nya ịmwụ jilahị lụnyẹ.

⁹M juwa ka wuleji ogu nya ẹpwụma ila ịngịrị ịtụka tụka ịhyẹ bwu oye nya ẹtẹ warị kaa dẹwụ tala ẹpwụma nya ịBabịlọn. Ị ka hyọgba nyẹẹwụ dagaga juọ ọọwa lẹ ị ka kụrwa lẹlẹ. Ị kaa da ịcha lala angịlẹ kị je irya nyẹẹwụ hygu-hygu ịcha nyaa a kaa laang ka.

¹⁰I ka wu ang myị ang ịla ịBabịlọn wu wuu. Angịlẹ kị ha angiwa ị ka go kparụ lẹ. Inyị Am Amkpaa a ya lẹ.

¹¹Ịlẹ Amkpaa a ya lẹ, Angịnyị nya ala ịBabịlọn, anụ nwulang nya alẹpwụma nyam wuu kparụ. Ọwa du anụ juwa chọkẹkẹnị bala ọ yụya lala ụgba nya ẹna ọ rụ ajamẹ lee ụnyịrẹ ọ jida.

¹²Ma ị ka hu oyoyi bala ẹpẹpẹ ju ẹpwụma ọtụka nyanụ ọwẹ. ịBabịlọn ka yẹ ri ẹpwụma ochịchẹ ọlẹ kọ byẹhị gu ẹpwụma uwa. Opyị nyamwụ ka chọhụ kịra kịra enyi a ka juwa ka.

¹³Chajị nya Ikẹjẹ awụrụ ọlẹ ká Amkpaa ka wụ taa ọngọngọhẹ ka nẹpwa ụwa kaka ma ịBabịlọn ka yẹ ri egwaawụ. Ọ ka la ọng myị ọng ọlẹ kọ chịpwụrụ bwuwa ahịbwuu. I ka yụbwọ bọnụ.

¹⁴Alẹwụ ịlẹ kanụ kpa uda, anụ hyogba nya ẹwụ dagaga ju ịBabịlọn kanụ da ịcha nyanụ wuu ju kele mẹ. Chajị ịBabịlọn họ ang onyobyi ba Amkpaa.

¹⁵Anụ cheko nya ẹwụ dagaga ju ịBabịlọn bwu ịkịka onyị myị ọnyị. Ala ịBabịlọn tụbwọ hi-ịlaa hanụ lẹ. Ugulọ nyaa gucheji ọbẹnẹ lẹ. Am Amkpaa a wẹẹ họ ịBabịlọn kwiwa lẹ. Chajị nya ọọwa lẹ, anụ wuleji kanụ haa kwiwa mẹ. Anụ haa ẹla jaabwọ kị họ angịkịla inyịnyị.

¹⁶Anụ a myị ka ọngọngọhẹ a ya ugbe nyang-ẹrụ tọ ipyi lee ọ hya egbe nyang ẹrụ kaka. Angaga wuu ka juhi rụnyẹ rụ ka ọpyị nyaa chajị nya alẹwụ nya aluji.

¹⁷Amkpaa yẹkẹẹ, Angịnyị nya ala Isirẹlụ la la ikpilo ịlẹ ka ugebe ka kwaa hwahị hi awụlẹ. Adịrahụ ọtụka nya ala Asiriya wuaa ri họhẹ-họhẹ, ọọwa lẹ iNebukadinesa Adịrahụ nya ala ịBabịlọn a ma ekpinegu nyaa ri lẹlẹ.

¹⁸Chajị nya ọọwa lẹ, Am Amkpaa Ohe Oluhye nya ala Isirẹlụ yẹkẹẹ, m ka yẹ Adịrahụ iNebukadinesa bala ẹpwụma nyamwụ akama jaabwọ kam yẹ adịrahụ ọtụka nya ala Asiriya akama.

¹⁹M ka kpa ala Isirẹlụ nya tịrẹkpẹ myịmyị ka edamẹ nyaa. Ị ka ri ang ẹrụ ọlẹ kị wu uhye nya Ọgbọdọ nya iKamẹlụ bala ụwa imwawụ nya ala ịBachan. Ị tị ka hya ugbe nyang ẹrụ ọlẹ kị wu ụwa Ọgbọdọ nya Ifurem bala ịGiliyadị ri wẹpwụ.

²⁰Ẹnụtụrụ owa bala ụka ọwa, ọhọbịrị ọhọhọ a ka ji ọpyị nya ala Isirẹlụ ka. Ang onyobyi a tị ka ji ọpyị nya iJuda ka ịnyịnyị chajị m ka hịnyị hi ha angịlẹ kam chịda wuu. Am Amkpaa a ya ịnyị lẹ.

²¹Amkpaa yẹkẹẹ, Anụ kaa dẹwụ ta angịnyi nya ala iMeretayịm bala ala iPekọd kanụ nwua wuu chajị kanụ taa ta ayịreji gbang gbang. Anụ họ jaabwọ kam danụ ehile. Am Amkpaa a ya ịnyị lẹ.

²²Ị wo ọmọnyọ nya alẹwụ ụwa epweji. Alẹwụ tang ayịreji lụmẹ kaa-kpoye!

²³ịBabịlọn ọlẹ kpa kọ ri oje ọnyọọngịrị ọ bang nyang ene, anyị ị tị jẹẹ bọọ ene ịwẹ! Ọ-la ẹpwụma wuu ẹbyẹbyị nyang ọlẹ kọ họ ta ịBabịlọn ịwẹ.

²⁴ỊBabịlọn a da ụnya gbe ịlọng ọọwa lẹ a jẹ kaka lẹ, a kpẹpwụ nyamwụ lẹlẹ. A ma uya ta Amkpaa ọọwa lẹ, ịje jung lẹ, ị wung lẹlẹ.

²⁵Amkpaa wụrụ ube iga kọ kaa yang abwọ nyẹẹwụ nyamwụ gụrụ. Ọ gba angabwọ nyẹẹwụ nya agbama nyamwụ kpehe chajị Amkpaa Ohe Oluhye Agụgụ la ụkụrwọ kọ ka họ ọ-pyị nya ala ịBabịlọn.

²⁶Anụ dẹwụ taa bwụ ụpa onyịmyọnyị wuu. Be iga ọyang oriri nyaa ene. Ang iriri nyaa anụ taa guru gbudum jaabwọ ọlẹ kị kaa ju ewu nya ajame. Ang myị ang nyaa anụ ta ayịreji chajị ka ịngịnghyẹ a hi ka.

²⁷Alẹwụ nyaa wuu anụ nwụaa. Anụ kpaa kele ka chịmi. Odu ọtụka hi ala ịBabịlọn lẹ. Ụka pwụ ká Amkpaa ka yaa akama ugbenyi lẹ.

²⁸Ke ụrụ, angịnyị ịlẹ ka ẹwụ ku bwu ọpyị nya ala ịBabịlọn rụ kele ka ịSayọn kaa ya dodehe jaabwọ ká Amkpaa haa kwiwa chajị nya ube igogo nya Amkpaa ọlẹ kị bịrị.

²⁹Bẹkọ wụrụ alẹwụ ịkpa uda dẹwụ. Angịlẹ wuu kị ka ya ịcha ku-uda. Byịaa kị warị kaa dagaga ju ẹpwụma nya ịBabịlọn chajị ka ọngọngọhẹ a ka be ka. Ang inyibyi nyaa ịlẹ kị họ anụ nwụaa uri tịrẹkpẹ. Anụ haa ẹla ịnyịyị jaabwọ ọlẹ kị h ọ angịkịla. Chajị ị họ abwẹla la ọbọchẹ jahị dam Am Amkpaa, Ọngọ Ọlịgọgọ nya ala Isirẹlụ.

³⁰Chajị nya ọọwa lẹ, alẹwu ka nwụ ikolobya nyaa chụwa tụ opeje-opeje da. Ị tị ka nwụ alẹwụ nyaa wuu ẹnụtụrụ ọwa. Inyị am Amkpaa a ya lẹ.

³¹Am juwa tụng-pyịpyị, ọ ahụ ịBabịlọn epweji ọ hi-ọbọchẹ. Inyị am Amkpaa Ohe Oluhye Agụgụ a ya lẹ. Ẹnụtụrụ ọlẹ kam ka yẹng akama pwu eji lẹ.

³²Epwụma nyang ọhi-ọbọchẹ ka chabwọ mileji, ọngọngọhẹ a ka wụlọ eji ka. M ka wuru ila jụ ẹpwụma nyang. Ang myị ang ọ lẹpwụ nyamwụ wuu ka rụ ila.

³³Amkpaa Agụgụ yẹkẹẹ, “Ị juwa yẹ ala Isirẹlụ bala ala iJuda ụhị. Angịlẹ kị waa kpa-à wẹ yụbwọ chaa kpa giri-giri. Ị́ myị tụụbwọ hyaa rụ ka.

³⁴Ọngọ ka gbaa kpehe tị ri ọngọ lọngịrị. Ẹnyị nyamwụ à ri Amkpaa Agugu lẹ. Ọwa lịlọmwụ ka dẹwụ yaa dada, kọ ka kpa okpunyi wẹ odehe. Okpunyi-í tị ka ji ha ala ịBabịlọn ka.”

³⁵Amkpaa yẹkẹẹ, Ẹwa ā ri ẹpwụma nya ịBabịlọn! Ẹwụ ā ri angị kụ ụwa, bala alegbeju nyaa, tụ angị jẹ ẹla nyaa ịnyịnyị.

³⁶Ẹwụ ka ri alọmwụ ịnịịkịla nyaa, ịwa alọmwụ aluchi ịwẹ lee! Ẹwụ ā ri angịdẹwụ nyaa, uhi ọtụka ka jwaa.

³⁷Anyịrẹ bala ang ịrụnyẹ nyamwụ ka ta ayịreji. Angịdẹwụ ịlẹ kị dirọ wuu kaa dẹwụ taa ka ta ayịreji. Chajị nya ọdẹwụ dẹwụ nyaa. Ẹga ọ-ya ang guru nyaa ị ta ayịreji. Ang ịlụwa, ịka nwụlaa kparụ ị ka waa wu.

³⁸Amwenyi a wẹchị ẹpwụma nyaa ọgụ ka ihu nyaa a nwụ wuu. Ẹpwụma nya ịBabịlọn ri ẹpwụma ọle ka ijiga nyaa luhihi.

³⁹Lẹẹlẹ, iyo ịlẹpwamẹ tụ ikirom ka nọ ẹpwa ị-ịBabịlọn. Ụwa ka ri ẹpwa nya ịchịnụ ogoriigo, angịnyị ehe-é ka kụ ụwa ẹnẹnẹhẹ kaka.

⁴⁰Ụma nya ang ọlẹ kọ họ ta ịSọdọm bala iGomora bala ẹpwụma ị-baa ba ẹpwụma nya ịBabịlọn lẹ. Inyị am Amkpaa a ya lẹ. Ọngọngọhẹ a ka kụwa ẹnẹnẹhẹ kaka.

⁴¹Yẹ mẹẹ, angịnyị wẹẹ warị bwu ọpyị oloye nya ẹtẹ, ẹpwụma ọtụka-ọtụka o-bwu ẹga ọlụrụ. Idịrịhụ lụmẹ-lụmẹ juwa ju agidi nya ẹwụ.

⁴²Ị go eda bala ikonggo, ị kpa ịkpachị nyaa la o-jujwo nya ọngọngọhẹ ka, ị tụ iru lala ihu à gu agbụ, juwa kụ anyịrẹ nyaa, ị nwụlanọ nya ẹwụ yahị da ala ịBabịlọn.

⁴³Adịrahụ nya ala ịBabịlọn wo oja nyaa. Abwọ nyamwụ nyà kaa tọ ata meme. Ọ chị uhi jwoo ọtụka-ọtụka lala ọnyang ọlẹ ka ang nya ọnyị juwa họ.

⁴⁴“Jaabwọ ká ugẹbẹ kaa gba kpehe kpiloko bwu ipyinu nya ịJọdan kọọ gba ju ka ẹpwụ nya ịkpịlọ ịlẹ kị juwa ri amẹ, ịnyịnyị m̄ ka ku ịBabịlọn bwu ọpyị nyamwụ lụka ọmwaaa, kam ka chụ olegbeju ọlẹ kọ ham nyọka ri adịrahụ nyaa lẹ. Oowo kpong-kpong à tị́ lala am lẹẹ-ẹ̀? Oowo à tị́ ka bá ẹla tam myị-ị̀? Olegbeju ọhẹ ji kọ ka kụ uya yahị dam myị-ị̄ị́?

⁴⁵Lẹẹlẹ, wo obyi ọlẹ kam me yahị da epweji nya ịBabịlọn wẹẹ, ká jẹ ang ọlẹ kam wẹẹ ka họ ala ịBabịlọn mẹ. Angị ri anjwo ichiche nyaa ri, aluji ka gbilaa kpịla-kpịla rụ, ọpyị nyaa ka ta ayịreji gbanggbang.

⁴⁶Ụka ká ebe ka ba ẹpwụma nya ịBabịlọn, ọ ka tá iru ọlẹ kọ ka hụ́ odehe wuu jigi-jigi. Alẹpwụma ịkịla wuu ka wo eko nya ụbwọngee ọlẹ ká alụwa ka chị.”