Read idege IJeremaya 51 Bible Online

IJeremaya 51 - idege bible

IJeremaya 51

¹Amkpaa yẹkẹẹ, “M juwa kpa igbachịwụ nya ayịreji ọtata chị ịBabịlọn bala angịnyị ịlụwa ọgụ.

²M juwa ka du angịnyị warị bwu ẹpwụma ọkịla kaa ta ịBabịlọn ayịreji. Ị ka hịraa lala igbachịwụ ọlẹ kọ kaa go ehwo nyang hụrụ. Ụka ká ẹnụtụrụ nya ayịreji ọtata ọwa a pweji, Ị ka dẹwụ ta ala ịBabịlọn bwu ịkịka ọnyị myị ọnyị wuu.

³A ya iwe ha alẹwụ nya ịBabịlọn kị da ịcha nyaa ka. A tị ya iwe haa kị go ịwụrụ nya ẹwụ nyaa kụrụ ka. A mịka ikolobya nyaa ị hị lọhịhị ka. Alẹwụ nya ala ịBabịlọn wuu taa ayịreji.

⁴Alẹwụ ka chịa-ang ị ka gbu chụwa tụ ipeje-ipeje nya epweji nyaa da.

⁵Am Amkpaa Ohe Oluhye Agụgụ a deeri hi ala Isirẹlụ bala ala iJuda ka, ọ rinyị lẹhị ị họ ang onyobyi bam am ọngọ ịgọgọ nya ala Isirẹlụ.

⁶Rụnyẹ rụ bwu ẹpwụma nya ịBabịlọn mẹ. Rụnyẹ rụ chajị nya ọhịhị nya ịlọng. A họ kị nwụng chajị nya ọhọbịrị nya ala ịBabịlọn kaka. Ọ lẹlẹ am juwa wuaa uri bala ọ yaa akama jaabwọ kọ pwọkwaa lẹ.

⁷Epwụma nya ịBabịlọn la laa ẹkpẹ ọlẹ kị họọ la Igọlụ. Amkpaa kpọọ ẹpwụtụbwọ nyamwụ Ọ họ angịnyị ilodehe wuu nwụa ere ọlẹpwụ nyamwụ gbee kọ yaa.

⁸Ọwa lẹ, ịBabịlọn a chabwọ ahyaahị-ahyaahị ọ bene wuu lẹlẹ. Anụ bida chajị nyamwụ mẹ. Pịlahị nya utoji kaa jịọ ẹbẹ meẹ ọhẹka ẹbẹ nyamwụ ka myịmyị-ị̀ la uda ọhọhọ wẹ.

⁹Angga ịlẹ kị kụ-ẹpwa ịBabịlọn yẹkẹẹ, ‘Ahị maga kahị ka họ ala ịBabịlọn ụda ma ọ tị chịkpẹẹ ka. Anụ kẹwẹ kahị rụ hị ịBabịlọn wuu ka ẹpwụma nya ịlọhị mẹ. Akama ọlẹ ka Amkpaa yẹ ịBabịlọn lụmẹ kpoye lẹ.’ ”

¹⁰Angịnyị nya ala Isirẹlụ yẹkẹẹ, Amkpaa ya eje ruhị lẹ. Anụ ya dodehe ụwa ịSayọn nya ukụrwọ olẹ ká Amkpaa họ hahị mẹ.

¹¹Amkpaa họ irya nya adịrahụ nya ala iMidiya gwọọ gbịla lẹ. Chajị ọ ri ịrya nyamwụ ka ẹpwụma nya ịBabịlọn ka ta ayịreji. Inyị ọtịtọ kọ ka wu ala ịBabịlọn uri chajị nya ube ịgọgọ nyamwụ ọlẹ kị bịrị lẹ.

¹²Hang ọjuẹjẹẹ mẹjẹ nyọri a juwa ka dẹwụ ta ụgụlọ nya ịBabịlọn. Angịgbeji, juaa ọngịrị ka chụ angịlẹ kị ka kpehị rịrị-ịga kụ ẹga datị-datị chụ alẹwụ ka kpịba ẹpwamẹ. Chajị Amkpaa me obyi nyang ọlẹ kọ kahọ angịnyi nya ala ịBabịlọn ọ tị họ ang ọọwa ịnyịyị kpalẹ.

¹³Ahụ ẹpwụma ọlẹ ka la ihu lụmẹ-lụmẹ a kpụdụ la ang datị-datị. Ụka nyang họ cheju lẹ, ọwu ọlẹ kọ wu ọhịhị nyang kpa cheku lẹ.

¹⁴Amkpaa Agụgụ nwa iro la ẹnyị nyịlọmwụ nyori ọwa nyịka kpa angịnyị ju iru lụmẹ-lụmẹ lala ogu nya inwa kaa dẹwụ tala ịBabịlọn. Angịịwa ka chụkwa nya ọkụrụ-kụrụ ju ala ịBabịlọn.

¹⁵Amkpaa họ odehe ọlẹ bwula ongịrị nyamwụ odehe wu rịrị bwula ẹla ọjẹjẹ nyamwụ. Odehe wu rịrị bwula ẹla ọjẹjẹ nyamwụ. Bwula ang ọjẹjẹ kpori-kpori nyamwụ ọwa ọ pyẹ egbamwụ maa lẹ.

¹⁶Ụka ọlẹ kọ yẹla la omyi nyamwụ, enyi kaa gwarụ uhye nya egbamwụ. Ọ kaa kpa egbamwụ warị bwu ọbaba nya odehe wuu. Ọ kaa họ apya kaa chị e-pwụ nya enyi. Ọ ka du igbachịwụ ẹrụ kpehe bwu ube nyamwụ ọlẹ kọ wọọ kụrụ.

¹⁷Ụka ká angịnyị a yẹ angịlẹ wuu, ị me ịlaa aluchị bala angi jẹ ịngịngịhyẹ ka. Angịị hya ụdụwa ịlẹ kị kaa họ ekpeku nya ijiga wuu, oyoyi jwaa lẹ. Chajị ihyẹ ịlẹ kị họ ri ihye nya ịnịkịla, ị la ịhụ ọdada ka.

¹⁸Ị ju apyebwụna ka. I kpa abwọ haa ododu. Ụkọlẹ ká Amkpaa a ka wẹ ka laa eje, ọ ka taa ayịreji.

¹⁹Amkpaa Ohe Oluhye nya iJekọbụ a la laa ịhye nya ekpeku ịwẹ ka. Ọwa-à họ ang myị ang wuu lẹ. Ọ chụ ala Isirẹlụ nyọka ri angịnyị nya ịlọmwụ. Amkpaa Agụgụ a ri ẹnyị nyamwụ lẹ.

²⁰Amkpaa yẹkẹẹ, “Anụ ala ịBabịlọn ee, anụ à ri ọjị ọ-hya ụwa nyam lẹ. Anụ a ri ang-abwọ nya ẹwụ nyam ịnyịnyị lẹ. M̀ kpanụ be ẹpwụma bala ịpyị lụmẹ-lụmẹ ene.

²¹M̀ kpanụ du anyịre bala angị kwaa kụ abwọ. M̀ kpanụ du ang ịrụnyẹ bala angị kwaa kụ abwọ yịgẹ-yịgẹ.

²²M̀ kpanụ nwụ alẹng bala anyang ịgbahị, bala ọ-nwụ angịgbahị tụ anjwo tụ ikolobya bala ịyẹẹnọ.

²³M̀ kpanụ nwụ angịgbikpịlọ bala ịkpịlọ nyaa bala ọ-nwụ angị wu ẹrụ tụ ịna ị-kpa wu ẹrụ nyaa bala ịgọvụnọ anyị tụ alegbeju ịtụkụ yaa.”

²⁴Amkpaa yẹkẹẹ, “Anụ angịnyị nyam ee, m̀ juwa ka wu ala ịBabịlọn uri a-ahị nyanụ wuu, chajị nya ang onyobyi ọlẹ kị họ angịnyị nyam i-iJerusalẹm.”

²⁵ịBabịlọn ahụ ri ọgbọdọ itụka ọlẹ ka kaa ta odehe wuu ayịreji lẹ. A ri oluji nyam. M ka nịra ụbwọ nyam kpaa we uhye nyang. Ajwọ ịlẹ kị ji uhye nyang wuu, m ka nyaa epepe chị weji. A ka rụ ila kpụ obyi.

²⁶Ị ka jẹ hu ejwọ ọhẹ-lọhẹ bwu uhye nyang kpa me ugulọ kaka. A ka ri ụgụmẹ gboyi myị oyi. Am Amkpaa a ya ịnyị lẹ.

²⁷Họ ang-ẹjẹẹ nya ẹwụ ọdada mẹjẹ mẹ chị ẹkụrwẹ nya ẹwụ ka alẹpwụma wuu a wo. Byi alẹpwụma wuu kị nwụlanọ nyọka dẹwụ ta ẹpwụma nya ịBabịlọn mẹ. Byị ịpyị Idịrịhụ nya Ararat bala iMini bala Achịkẹnasị. Kị dẹwụ me chụ ọgẹwụ ọlẹ kọ ka kpaa jilahị nyẹẹwụ kanụ kpa anyịrẹ jwiru lụmẹ-lụmẹ lala ogu nya ịyịryi.

²⁸Byi alẹpwụma wuu kị nwụlanọ nyọka dẹwụ ta ẹpwụma nya ịBabịlọn. Du ẹrụ ta Idịrịhụ nya ala iMidiya bala alegbeju ịkpẹhị rịrị ọpyị bala alegbeju ịtụkụ yaa wuu bala alẹwụ nya ala ẹpwụma ịlẹ kị kpẹhị rịrị.

²⁹Ịpyị che kpakpakpa bala hụ jigijigi chajị jaabwọ ká Amkpaa myị ọnụ kọka họ ka ịBabịlọn ka ri egwawụ ẹga ka ongọngọhẹ a ka nẹpwa ka lẹ, ọ juwa họ ẹla ọwa cheju lẹ.

³⁰Alẹwụ nya ala ịBabịlọn kpụba la ẹwụ ọdada Ị rụ ka ẹga ọkpịbaa nyaa lẹ. Ị bọhụ myị kaka. Ị họ lala anyang lẹ ogiriba nya epweji nyaa, alẹwụ bọọ ene lẹ. Ị chị ẹpwa nyaa wuu ila lẹ.

³¹Ongọ rụnyẹ ọhẹ kaa tọ ọngọ rụnyẹ ọkịla. Ongọlẹ kị du ẹrụ ọhẹ kaa tọ ọngọlẹ kị du ẹrụ ọkịla. Ị kele kaa ya je Adịrahụ nya ịBabịlọn ya alẹwụ nyị be juka epweji nyamwụ bwu ịkịka ọnyị myọnyị lẹ.

³²Alẹwụ yẹ ẹga ọlẹ kị kaa kpoye nya Ihu bwu ka ụpa ọkịla lẹ. Egbụrụnya ịlẹpwụ nya ụwa ẹga ka angịnyi kaa kpịbaa, ị chaa ịla lẹ.

³³Ịịlẹ Amkpaa nya ubwẹwụ, Ohe Oluhye nya ala Isirẹlụ a ya lẹ. “Angịnyị nya ala ịBabịlọn lala ẹga o-ru ajẹ-amẹ. Ahyahị-ahyaahị ụka nyaa juwa ka pweji ka alẹwụ ka rwáà lẹ.”

³⁴iNebukadinesa Adịrahụ nya ala ịBabịlọn wu iJerusalẹm mile. Epweji wuu da uhuhwo lala ọta nya enyi. Ọ wu iJerusalẹm mile jaabwọ ka iyo owu angịnyị ri kaa họ. Ọ go angịịlẹ kị họọ wuu ri lẹ ọọwa lẹ ọ gba ihihi hụrụ lẹlẹ.

³⁵Ka angịnyị nya ala ịSayọn a yẹkẹẹ, Ala ịBabịlọn ka ye uri nyang ojigi-jigi ọlẹ kị họ ta ịnyịrọ nyahị, ka angịnyị nya ala iJerusalẹm a yẹkẹẹ, ịwọ nyam ka ji uhye egbeju nya ala ịBabịlọn.

³⁶Amkpaa byi angịnyị nya ala iJerusalẹm yẹkẹẹ, “M ka hu ẹla nyanụ chụ ịlọm, m ka họ aluji nyanụ ka nwuri tịrẹkpẹ hanụ angịịlẹ kị bịrị ụgbụ nya enyi nya ala ịBabịlọn m ka tọọ ku. M ka họ Ihu nyaa wuu ka nwụ kịra-kịra.

³⁷Ẹpwụma nya ala ịBabịlọn ka yẹ ri ọtẹwụ luhye gbudum. Iyo ịla ẹpwamẹ a ka nẹpwa ụwa lẹlẹ. Angịnyị a yẹ ụwa ọka waa ejiri. Ị ka chịpyọ ọngọngọhẹ a ka nẹpwa ụwa kaka.

³⁸Ala ịBabịlọn ka warụ lala ugẹbẹ bala ogbahụlọ lala anyị nya ugẹbẹ.

³⁹Ụkọlẹ kị juwa hu peepee, m ka nwụla ang oriri nyaa nọ gbaa, m ka họ ịka nwere, I ka chọkẹkẹnị. Ụka kị rụ kaa nune, ị ka chahị ẹnẹnẹhẹ kaka.

⁴⁰M ka kpaa ka ẹga kị ka nwaa jaabwọ kị kaa kpa anyị-Ịkpịlọ bala ẹmwụ-embiri bala imilodo ka nwụ inyị am Amkpaa a ya lẹ.”

⁴¹Ye jaabwọ ka alẹwụ kụrụ iChechach ọlẹ kọ ri ẹpwụma ọlẹ ka ala odehe wuu ya jaabwọ ka ihi ọlala nyamwụ la. Ẹga ọ wu ejịrị ọla nyị ịBabịlọn à tị́ ri ha alẹpwụma wuu!

⁴²Ihu ọtụka gwagbụ ọọwa lẹ ọhụ nya ịBabịlọn wuu lẹlẹ.

⁴³Epweji ịtụka nyaa yẹ ri ẹga ọ wu angịnyị ejịrị. Ọpyị nyaa chọrụ, enyi a juwa kpong kpong kaka. Ọngọngọhẹ a ka nẹpwa ụwa lee ọ chịpwụrụ bwuwa kaka.

⁴⁴IBel ohe nya ala ịBabịlọn m ka yọọ akama. Angịnyị ang ịlẹ wuu kọ go mile m ka họ ọ ka kịkọ laa. Epwuma ọhẹ-lọhẹ a ka myịmyị wẹ ẹga nyamwụ kaka. Ugulọ nya ịBabịlọn gu cheji lẹ!

⁴⁵Anụ angịnyị nya ala Isirẹlụ anụ rụnyẹ rụ kpehe bwu ịBabịlọn mẹ. Anụ rụnyẹ kanụ kpa ọhịhị nyanụ be hi agbama nya Amkpaa mẹ.

⁴⁶Anụ a myị ka ọkịlẹtụ a kpụnụ enyi lee anụ a juhi chajị nya oja ọlẹ kanụ wẹẹ wo ka. Oja ojaja nya ẹka ọnyị myị ọnyị datị nya ịlọmwụ. Ọja ịhyẹ ri ịnya ojigi-jigi ịla ọpyị, ọja ịkịla ri ịnya Adịrahụ ọhe ọ juwa dẹwụ ta adịrahụ ọkịla.

⁴⁷Ụka juwa warị kam ka yẹ Ijiga nya ala ịBabịlọn akama. Oyoyi ka ju ọpyị nyaa wuu. Angịnyị ịlụwa wuu ịka nwaa.

⁴⁸Uhye-ọgba bala odehe bala ang myị ang ịlẹpwụ nya wuu ka da iwuru chajị nyaa eji omịla mịla nya ịBabịlọn. Angịnyị juwa warị bwu oye nya ẹtẹ ka tọọ ayịreji. Inyị Amkpaa a ya lẹ.

⁴⁹Ala ịBabịlọn nwụ angịnyị ilodehe lụmẹ-lụmẹ. Bwula ọọwa lẹ, ala ịBabịlọn ka mileji chajị nyọlẹ kị nwụ ala Isirẹlụ. Inyị Am Amkpaa a ya lẹ.

⁵⁰Anụ ala Isirẹlụ ịlẹ kanụ hi juwa lọhịhị ka alẹwụ a nwụnụ ka, anụ rụ mẹ anụ a hịnẹkpẹ kaka. Ọ ri nya ịlẹhị, anụ lụrụ hi ẹpwa ma anụ kpịtịya nya Ohe Oluhye nyanụ kanụ kpịtịya nya iJerusalẹm.

⁵¹Anụ yẹkẹẹ, Ị hu oyoyi juhị bwula ido ọlẹ kahị wo kịị wẹ doiị lẹẹ. Ọ lahị oyoyi chajị aluji ye iga igogo ọlẹpwụ nya ube Igogo nya Amkpaa wuu lẹ.

⁵²Chajị nya ọọwa lẹ Amkpaa yẹkẹẹ, Ụka jụwa warị ka ijiga nya ala ịBabịlọn wuu m ka yaa akama. Angịlẹ kị họọ-ang ị ka mweru ẹga myị ẹga tụ ẹpwụma da.

⁵³Dọmwụ o ri ka ala ịBabịlọn a rụ ka uhye nya egbamwụ kaa nwụ ẹga ọ kpịbaa nyaa ụwa m ka du angịnyị kaa taa ayịreji. Am Amkpaa a ya ịnyị lẹ.

⁵⁴Amkpaa yẹkẹẹ, ke ụrụ ka wo la iru nya ida ojeje. Ụ-ụwa ọ-ọpyị nya ịBabịlọn kanụ wo ang ịtụka ịlẹ kị bịrị ọ-ọpyị nya ịBabịlọn.

⁵⁵Ẹpwụma nya ịBabịlọn wuu, Amkpaa ka tọọ ayịreji. Ọmọnyọ nyaa ọlẹ kị kaa hi ka kpụba. Alẹwụ juwa mwụmwụ kele lala ọhụụ nya enyi ọtụka. I juwa dẹwụ lụkwa dọọọ.

⁵⁶I warị wẹ ịBabịlọn kị ka tọọ ayịreji lẹ. Ị kụrụ alẹwụ nya ala ịBabịlọn, ị naa eda nyaa. Am à ri Amkpaa ọlẹ kam kaa yẹ ang onyobyi akama lẹ. M ka wu ẹpwụma nya ịBabịlọn uri jaabwọ kọ pwokwọọ.

⁵⁷M̀ ka họ alegbeju nyaa ka nwa ere kpụ ere. Ịdịrịhụ bala angị jẹ ẹla bala alegbeju ịkpẹhị rịrị ọpyị nyaa bala alegbeju ichiche bala alẹwụ nyaa wuu. Ị ka nune, ị́ tị ka chị ahị wuleji myị kaka. Am adịrahụ kam ri Amkpaa Agụgụ à ya ịnyị lẹ.

⁵⁸Ịlẹ Amkpaa nya ụbwẹẹwụ a ya lẹ: “Ụgụlọ ọtụka nya ịBabịlọn ọwẹ ka tụrụ jụka eji. Ogirigba nyaa ịlẹ kị luhye wẹ gbọrị-gbọrị ị ka chaa ịla. Ụkụrọ nya angịnyị ịlẹ kị kpa ụbwọ họ wuu ri ododu. Angịnyị kpịlaa họ ụkụrọ wuu nọ gbe ila ọ ka taa ayịreji.”

⁵⁹Ẹnyị nya olegbeju ọ kpehị rịrị ẹga ọnụne a rị iSeraya ọnyị nya iNerịya lẹ, adamwụ ogbahị ri iMeseya, iSeraya ri olegbeju ị tuku yi adịrahụ iSedekaya. Ẹẹpwụ nya ẹka ohene nyọlẹ ka iSedekaya ri Adịrahụ nya ala iJuda. Ọwa bala iSeraya juwa bajẹ ka ịBabịlọn. Ọọwa, ọlọmwụ iJeremaya a dọọ ẹrụ ịlẹ lẹlẹ.

⁶⁰Ọlọmwụ iJeremaya da ju ụụpwụ akama ịlẹ wuu kị ka chị ịBabịlọn ọgụ bala ang myị ang ịkịla ịlẹ wuu kị ka họ taa ẹpwụma nya ịBabịlọn.

⁶¹Ọ byi iSeraya yẹkẹẹ, “Ụka ọlẹ ka pwụ ọpyị nya ịBabịlọn a wa je angịnyị gboo ala ịlẹ wuu kam da ju ẹpwụ nya ụpwụ ọlẹ.”

⁶²Ọọwa, a ka raabwọ yẹkẹẹ, Amkpaa ee, ahụ a ya ká ka ta ẹgẹlẹ ayịreji chajị ká angịnyị ehe lee iyo lee ịngịngịhyẹ-ẹ́ ka kụ am̀ kaka lẹ. Ọ ka ri ugbileji dam gbe oyi myị oyi.

⁶³Ụkọlẹ ka wa ụpwụ ọlẹ kpa lẹ aa hu ẹjwọ chori bọọ chajị ka ya da jụka ẹpwụ nya Ihu iYufuretisi mẹ.

⁶⁴Ụka ká ya da jukele lẹ a yẹkẹẹ, ịBabịlọn a ka kpụ keji. A ka wuleji ẹnẹnẹhẹ kaka. Chajị nya ayịreji ọtata ọlẹ kam Ohe Oluhye wẹẹ kpa chịng ọgụ. Ẹgẹlẹ ala iyaya nya ọlọmwụ iJeremaya a cheju lẹlẹ.