Read idege IJeremaya 52 Bible Online

IJeremaya 52 - idege bible

IJeremaya 52

¹ISedekaya gu ẹka iwo imiiye kụrụ ookpkpo ụka kọ dọmwụ nyọka ri adịrahụ. Ọ hụ iJerusalẹm ri adịrahụ ẹka iwo kụrụ ookpokpo. Ẹnyị nya ịnamwụ ri ịHamutal ọnyị nya iJeremaya ọla iLibina.

²ISedekaya Adịrahụ họ ang ịtịpyọ ị-ịlahị nya Amkpaa jaabwọ ká iJehoyakim Adịrahụ họ.

³Ụka ọọwa, Amkpaa wụ ẹjẹ ta ala iJerusalẹm bala ala iJuda gbee kọ kwaa rụ hi ịlọmwụ a-ahị. Adịrahụ iSedekaya la egbeju-ọngịrị ta iNebukadinesa Adịrahụ nya ala ịBabịlọn.

⁴Ẹnụtụrụ okiriwo nya ọya okiriwo nya ẹka ohikichu nya adịrahụ oriri nya iSedekaya lẹ, iNebukadinesa Adịrahụ nya ala ịBabịlọn à kpa angịdẹwụ bwọọọ kaka dẹwụ ta epweji nya iJerusalẹm lẹlẹ. Ị chịkụ odehe nya epweji lẹ, ị me ugbudu ịlẹ kị ka kụ dẹwụ dagaga jwọọ lẹlẹ.

⁵Ị chị urwe ju iJerusalẹm gbee da ka ẹka iwo kụrụ ookpokpo nya adịrahụ oriri nya iSedekaya.

⁶Ụka kọ nọ gbee da ká ẹnụtụrụ ohikichu nya ọya ohene nya ẹka ọọwa lẹ, ūhi à changịrị lụmẹ-lụmẹ e-epweji la angịnyị ye ang ri kaka lẹlẹ.

⁷Ị chị ugulọ iwa ẹ-ẹgẹhẹ lẹ, angịdẹwụ à be kpehe lodu ọọwa lẹlẹ, ịnọ ala ịBabịlọn tị kụ dagaga ju epweji wuu. Ị kpehe bwu ogirigba ọlẹga ka egwalọ imiiye ịwẹ gba chị awụlẹ o-oye nya ẹrụ nya adịrahụ lẹ, ị rụ yahị da ka Ọkpọọ nya ịJọdan lẹlẹ.

⁸Angịdẹwụ nya ala ịBabịlọn tị ku iSedekaya Adịrahụ gbee kị wọọ ẹ-ẹgẹhẹ nya ụteeji ịla iJeriko. Ọọwa, angịdẹwụ nyamwụ a nyi epepe hyọọ lẹlẹ.

⁹Ị kpọọ kịla iNebukadinesa ka epweji nya iRibila ọ-ọpyị nya ịHamatị. Ọ la iSedekaya eje ụ-ụwa lẹ, ọ ya eje wọọ lẹlẹ.

¹⁰Ụ-ụwa i-iRibila, ị nwụ anyị alẹng nya iSedekaya chahị jwọọ. Adịrahụ nya ala ịBabịlọn ya ị nwụ alegbeju ịgbẹgbịlẹ i-bwu iJuda ịnyịnyị.

¹¹Ọ ya ị gba iSedekaya egbahị bala ọ-jwọọ agba lẹ, ị kpọọ rụ ka ịBabịlọn lẹlẹ. Ọ ju agba ị-ịBabịlọn gbee da ka ẹnụ ọlẹ kọ gbu.

¹²Ẹnụtụrụ ọharwiye nya ọya ọharụ nya ẹka iwo kụrụ ihikichu nya adịrahụ oriri nya iNebukadinesa ị-ịBabịlọn, iNebusaradan olegbeju nya angị gbe adịrahụ, kọ tị ri ọngọ kaa ju iNebukadinesa irya wẹ iJerusalẹm.

¹³Ọ chị Ube nya Amkpaa ila tụ ẹpwa nya adịrahụ bala ẹpwa nya ịbagọ ịla iJerusalẹm wuu.

¹⁴Angịdẹwụ nya ala ịBabịlọn tụrụ egwalọ nya iJerusalẹm beji lẹlẹ.

¹⁵Ụka ọọwa, iNebusaradan go angịhyẹ nya alẹbyahị ịlụwa kpa rụ ka ịBabịlọn bala angị ihihi ịla iJerusalẹm tụ angịlẹ kị ri alụkụrwọ nya ụbwọ wuu bala angịlẹ ịnọ kị myị ọnụ nyọka ri anchẹ nya adịrahụ nya ala ịBabịlọn.

¹⁶Ọ tị pẹhi angịhyẹ ịlẹ kị ri alẹbyahị gụ wuu kị hụ i-iJuda ka juwa họ ụkụrwọ nya ẹrụ owuwu bala ọkpẹhị rịrị alakọnụ ịlụwa.

¹⁷Ala ịBabịlọn be ịtachị nya oje ọnyọmịla ịla Ube nya Amkpaa ene yịgẹ-yịgẹ bala ang ọrụnyẹ ọ-kpa kpa olo ọlẹ kị họ loje ọnyọmịla tụ irim nya oje ọnyọmịla lẹ, ị go oje ọnyọmịla ịlẹ kị kpa họ ang ịwẹ kpa rụ ka ịBabịlọn lẹlẹ.

¹⁸Ị go ịchụ bala ịja bala alẹ bala ang ị-kpa chị ebyi nya itinika bala ịja ị-ya ịwọ nya iyo ikiliya ju bala ịja nya iya nya ịtangare bala ang-abwọ ịlẹ kị họ loje ọnyọmịla kịị kpa họ ụkụrwọ u-Ube nya Amkpaa wuu kpa rụ.

¹⁹Ị go ang myị ang ịlẹ kị kpa okpoko ịgọm lee okpoko onyoowuru họ kpa rụ tụ ịja ichiche bala ịja ị-kpa chụ ila bala ịja ị-ya ịwọ nya iyo ikiliya ju bala ịja nya iya nya ịtangare bala ịlẹ kị kịla iya nya ere wuu kpa rụ.

²⁰Ịtachị imiiye bala ang ịrụnyẹ ị-kpa kpa olo bala irim ọtụka bala ịna iwo kụrụ imiiye kị ya irim rịrị ịlẹ ká ịSolomọn kpa oje ọnyọmịla họ chajị nya Ube Ịgọgọ lẹ, ịwa la ilo lụmẹ kịla ọ-ka me ori kịla.

²¹Ịtachị imiiye ịwẹ me awụlẹ. Ọnyọnyọọnyị nyaa la apatẹ iwo imiiye kụrụ irwiye nya uhye ọlala. Ọkịlọlọ nyamwụ la apatẹ iwo kụrụ ineku. Ị da ohulo ẹ-ẹpwụ. Ụka ọchịchị nyaa lala eku nya ẹpẹtẹ ookpokpo.

²²Egbeju ọpapịla ọlẹ kị họ kwọọ u-uhye loje ọnyọmịla ịnyịnyị la apatẹ irwiye ba ẹhya nya uhye ọlala. Ị kpa egbe nya ipomegịraneti ịlẹ kị họ loje ọnyọmịla haa ịnyangga dagaga ju egbeju nyaa ịịwa.

²³Ipomegiraneti ohu ookpokpo (100) ị ya họ ọtachị ọnyọnyọọnyị ịnyangga dagaga ju lẹ, ị tị jẹ-ẹ̀ yẹ iwo ihikichi kụrụ ịrwọnyẹ nyaa bwu eji.

²⁴INebusaradan olegbeju nya angịdẹwụ wu iSeraya Olegbeju Okiliya bala ịSẹfaniya ọngọkịliya bọọ ba bala angị ịta ịgbẹgbịlẹ ịhyẹ kịị gbe ọnang nya Ube nya Amkpaa kpa rụ ịnyịnyị.

²⁵Ẹ-ẹpwụ nya angị ihihi juwa e-epweji, ọ wu olegbeju ọlẹ kọọ kpẹhị rịrị angịdẹwụ ene-ene bala angị irwiye ịhyẹ kịị ju adịrahụ irya. Ọ wu akịraa ọlẹ kọ ri olegbeju nya angịdẹwụ ogogo bala angị iwo ịrwọnyẹ nya angịnyị nyamwụ ịlẹ kị juwa tọọ.

²⁶INebusaradan kpa angịwẹ wuu kele kịla adịrahụ nya ala ịBabịlọn kọ juwa e-epweji nya iRibila

²⁷ọ-ọpyị nya ịHamatị. Ụ-ụwa iNebukadinesa Adịrahụ à ya lẹ, ị nwụ angịwẹ wuu lẹlẹ. Ị go ala iJuda kpa rụ hi ọpyị nya ịlaa kaka ri anyịhị lẹ.

²⁸Ọlẹ ri ọdaju nya angịlẹ wuu ká iNebukadinesa go kpa rụ ka agba: Ịnọmba nya angịlẹ kọ gọ kpa rụ ka agba ẹ-ẹpwụ nya ẹka ọharwiye nya adịrahụ oriri nyamwụ wuu la angị ụnọ ịta da angị iwo imiiye kụrụ ịta.

²⁹Ẹ-ẹpwụ nya ẹka iwo kụrụ ineku nya adịrahụ oriri nyamwụ, ọ go angị ohu ineku da angị iwo ịta kụrụ imiiye kpa rụ bwu iJerusalẹm.

³⁰Ẹ-ẹpwụ nya ẹka iwo imiiye kụrụ ịta nyamwụ, iNebusaradan go angị ohu iirwiye da angị iwo ine kụrụ ịrụ. Ọtụchawụlẹ nya angịlẹ kị go kpa rụ wuu ri angị ụnọ ine da angị ohu ịrwọnyẹ.

³¹Ẹ-ẹpwụ nya ẹka iwo ịta kụrụ irwiye nyọlẹ ká iJehoyachin juwa a-agba, Ivulumerodakị à dọmwụ nyọka ri adịrahụ ị-ịBabịlọn lẹ. Ivulumerodakị yẹ ahyẹẹrwẹrwa nya iJehoyachin Adịrahụ nya ala iJuda, ọ gbọọ kpehe bwu ube nya agba. Ẹnụtụrụ iwo imiiye kụrụ ịrụ nya ọya iwo kụrụ imiiye nya ẹka ọọwa kpangga ọ gbọọ kpehe lẹ.

³²Ivulumerodakị la ọkịlẹtụ ọkpẹnẹ ẹ-ẹga nya iJehoyachin. Ọ ya iwe-ahụrụ olihi-ihi họọ gụ ịdịrịhụ ịkịla ịlẹ kị wu kpa ka agba ka ịBabịlọn balọọ.

³³Ọ ya ịwụrụ ịkịla ha iJehoyachin kụrụ ku ọmwakpa nya ịwụrụ nya agba nyamwụ. Bwu ụka ọwẹ kịlahị, ọ kaa ri ang ta adịrahụ gbee ẹ-ẹpwụ nya ọhịhị nyamwụ pyịyọọ.

³⁴Ẹnụ myị ẹnụ wuu, jaabwọ ka ọhihi nya iJehoyachin tata ka ba, ịị ya okpoko ọ-kpa a-amẹ-ang họọ kọ ka kpa ra ang myị ang ọlẹ kọ bọọ.