Read idege IJeremaya 6 Bible Online

IJeremaya 6 - idege bible

IJeremaya 6

¹“Anụ ala iBenjamịn ee, anụ rụnyẹ nya ọhịhị nyanụ mẹ! Anụ rụnyẹ rụ bwu iJerusalẹm mẹ ooo! Anụ chị opyike i-iTekowa, kanụ tụ ila ju nya ang-ẹjẹẹ ị-ịBẹtị-ịHakẹrẹm mẹ! Akama onyobyi wẹẹ hị ụbwụrụ yahị da warị bwu ẹtẹ-ẹ̄, ayịreji ọtụka ịnyị-ị̄!

²Ahụ epweji nya ịSayọn ká ri ọnyị ọnyang ọlụhị nyam pyii—m̀ tị ka tang ayịreji.

³Alegbeju bala angịdẹwụ nyaa ka wẹ kaka mwẹla tang, ị ka wẹ kaka chịkụ dagaga jung. Ebwo ọnyọnyọọnyị ka chịkụ ẹ-ẹga kọ háa.”

⁴Ị ka byi angịdẹwụ nyaa yẹkẹẹ, “Anụ ju agidi nya ẹwụ yahị da iJerusalẹm mẹ, anụ nwụlanọ kahị gba mịlọọ lẹnụ ọrịrị ẹ-ẹpwayịrẹtẹ mẹ!” Ị tị ka wẹ yẹkẹẹ, “Eheehe, ụka jẹ lụmẹ lẹ, obyi juwa ka hi lẹ.

⁵Alodu ahị ka dẹwụ taa lẹ, Ahị ka ta ebe ịnyịịngịrị nyaa wuu ayịreji.”

⁶Amkpaa Agụgụ da angịdẹwụ ịwẹ ehile yẹkẹẹ, “Anụ tụrụ ekeji ịlụwa, kanụ me ikpiirigidi nyọka godayị rịrị dẹwụ ta iJerusalẹm. M̀ ka yẹ epweji ọlẹ akama lẹ, chajị angịnyị ọ-yẹba kịrọrọ lụmẹ ụ-ụwa.

⁷Jaabwọ ka enyi ọla ịwẹẹlụ kaa ri onyeewe-onyeewe, ịnyịnyị-ịnyịnyị ang onyobyi ọla iJerusalẹm à kaa chahị onyeewe lẹ, ọmọnyọ nya abwẹga ọhọhọ bala ayịreji pyẹ yịrị ụwa yịrị, ẹdụrụ bala abẹ ịchịchị mm̀ yẹ ụka wuu lẹ.

⁸Anụ ala iJerusalẹm ee, anụ wo ụbwọ o-gbile ụ-ụrụ nyam mẹ, ọ́ ri ịnyị ka, m̀ ka nyẹẹkpẹ danụ họ ká epweji nyanụ ka yẹ ri ugbileji, ẹga ká ọngọngọhẹ-ẹ́ kụ ka.”

⁹Amkpaa Agụgụ yẹkẹẹ, “Ị ka tụ angị ihihi ịla Isirẹlụ okpe kẹnị-kẹnị jaabwọ kịị dụmwọ nya alakọnụ bwu ẹrụ ọlẹ kị wụ ang-ẹrụ bwu kpá. Ọ ka la jaabwọ ká ọlẹrụ kaa tịrẹkpẹ kaka wụla alakọnụ yẹ.”

¹⁰Ọọwa, m̄ yẹkẹẹ, “Oowo anyị m̄ tị́ ka ka ya ẹla ta, daa ọna kpá lẹẹ-ẹ̀? Oowo tị́ ka myị-ị̀ ke ụrụ lam-m wẹ ene-è? Ị mwụ ang ku arụ, ị́ ka jẹ-ẹ̀ wo ẹla ka. Ẹla nya Amkpaa ri ang ọ-kpa hụlọ ẹhụ ju nyaa, ị́ tịtọ nyọka wowo ụ-ụrụ nyaa kpong-kpong ka.

¹¹Agbama nyang ahụ Amkpaa yẹ myịm pwẹẹpwẹẹ, ḿ ka wọọ kpa myị kaka.” Ọọwa, Amkpaa-à byim yẹkẹẹ, “Hirọọ eji u-uhye nya anjwo ilopeje bala ọjịra-jịra nya alụjụ mẹ. Agbama ọwẹ ā wu ịrwịhụ bala ịhụ nyaa ọyị tụ angịgbahị bala angị chị okwirichi kụnyẹ-kụnyẹ.

¹²Ị ka ya ẹpwa nyaa ha angịkịla la, ịnyịnyị ịrụ bala ịhụ nyaa-à ka yẹ ri nya angịkịla lẹ. M̀ juwa ka yẹ alọpyị ọlẹ akama onyobyi-obyi.

¹³Angịtụka tụ angị ichiche nyaa-ọng myị ọng nyaa wuu ho ìwo nya apyobwuna ochukuru. Angị ri alọmwụ bala angịkiliya ri, ịị họ angịnyị ri wuu lawụlẹ-awụlẹ.

¹⁴Ị họ kpá lala abẹ ịtụka nya angịnyị nyam nyaa ri ugba-obiri ọpyẹpyẹ kem, ị haa utoji gile-gile-gile lẹ, ị byaa yẹkẹẹ, ‘Anụ ka kpunyi lẹ,’ okpunyi ọhẹ-ẹ́ tị ji ka.

¹⁵Ang inyibyi nyaa ịwẹ laa oyoyi ene-ēé? Ale tị́ mẹ? Ọ laa oyoyi kpong-kpong ka, ị́ jẹ ẹla ọ-la jii ka. Ajị nya ọọwa lẹ, ị ka ta ayịreji jula angịlẹ kị gbu ịnyịnyị. Ụka kam yaa akama lẹ, ị ka ta ayịreji gbanggbang lẹlẹ. Am Amkpaa-à ya ẹlẹwẹ lẹ.”

¹⁶Amkpaa byi angịnyị nyamwụ yẹkẹẹ, “Anụ godayị ọ-ọchapiye, kanụ kụ ẹhị yẹ, kanụ ta angịnyị wo nya agbayị iligbalẹ, bala ẹga ká ụgbẹyị ọhagụ wuu ji mẹ. Anụ tụ ụgbẹyị ọọwa da, kanụ la okpunyi mẹ. Anụ tị mwọọgịlẹ pwa yẹkẹẹ, ‘Eheehe, ahị-ị́ ka bwu ụgbẹyị ọwẹ koo.’

¹⁷Ọọwa, m̄ chụ angịgbeji hanụ nyọka ya ụrụ nọ gbe opyike nya ẹla lẹlẹ. Ị tị yẹkẹẹ, ‘Eheehe, áhị ka ke ụrụ myị koo.’

¹⁸Lẹẹlẹ, anụ alẹpwụma datị-datị, anụ ke ụrụ, kanụ jẹ ang ọlẹ kọ wẹẹ ka họ ta angịnyị nyam mẹ.

¹⁹Anụ alodehe ā wo mẹ, m̀ wẹẹ kpa ayịreji ọtata chị angịnyị nyam ọgụ. Ọwẹ à ri apyobwuna nya ang onyobyi nyaa lẹ. Ị́ myị ju ẹla nyam ihi ka. Ị nyẹẹkpẹ da ehile nyam gbanggbang.

²⁰M̀ tị́ ka họ ịyẹ họ la iya nya ịtangare ịlẹ kịị kpa wam bwu ọpyị nya ịChẹba lee ida ichoru kwọkwọ ịlẹ kịị kpa bwu ẹga ọhwẹ̀ẹẹ kpong-kpong ene-è? Ḿ juwa ye ọhaha nyaa kokoo. Iya ịkịlaakịla nyaa-á chịm oru kaka.”

²¹Lẹẹlẹ, Amkpaa yẹkẹẹ, “M̀ ka họ ká angịnyị nyam ka chị achụụ mileji. Adịda bala anyị nyaa ka gbu. Aligu bala aloye-ẹpwa nyaa ka ta ayịreji.”

²²Amkpaa yẹkẹẹ, “Angịnyị bwu ọpyị ọlẹtẹ lalẹẹ jẹ warị, alẹpwụma ọlọngịrị ẹ-ẹgẹhẹ hwẹ̀ẹẹ lalẹẹ chụma kụ nya ẹwụ ọ-ka dada.

²³Ị kpa eda bala ịkpachị, ị ri alabwẹga i-jujwo nya ọngịnyị ka. Ị juwa kụ anyịrẹ nyaa liru ọtụka-ọtụka lala ihu à gu agbụ. Ị kụ gagaaga nya ẹwụ ọdada tanụ anụ ala iJerusalẹm lẹ!”

²⁴Ọọwa, ala iJerusalẹm à yẹkẹẹ, “Ahị wo oja ọwẹ wowo-ò wẹẹ, abwọ nyahị tị nyà kaka ta ata meme lẹ. Uhi bala ọjụjụ họ ahị gbu oje-oje, ọjụjụ nyahị lala ịnya ọnyang ọ-hya ụma lẹ.

²⁵Áhị kpehe ka oye-odehe kpụ myị ka, áhị jẹdịyẹ jẹ ụ-ụgbẹyị myị kaka. Aluji hu oge nyaa kụkụ jahị dahị, uhi ojuju dagaga juhi wuu.”

²⁶Amkpaa byi angịnyị nyamwụ yẹkẹẹ, “Anụ ya awụrụ nya owuru ọkpakpa kụrụ, kanụ rị ebilo ẹ-ẹpwu nya agbụ mẹ. Anụ jida lẹhị bọja jaabwọ kịị bida nya ọnyị ọlẹng olookpokpo ọlẹ kọ gbu, chajị ọngọ ka tanụ ayịreji juwa ka gba mịlaanụ lụka ọmwaaa.”

²⁷Amkpaa byim yẹkẹẹ, “IJeremaya ee, m̀ chụng ká ka ma angịnyị nyam yẹ jaabwọ kịị ma oje yẹ, chajị ká ka jẹ jaabwọ ká ọhịhị nyaa la.

²⁸Ịwa wuu la egbeju-ọngịrị juwa ga tụ ang-ang da kpa angịnyị kụ. Ị lọngịrị lala oje, ị byịbyị ka ịnwanị.

²⁹Ị du ugbuwa ju lọngịrị-ọngịrị, ká ịrị oluhye nya oje ka da hụrụ, ụwa ọhyahya ọwẹ tị ri ododu, angịnyị inyibyi-í chị ọpẹẹ chị ka.

³⁰Ùpwu ịị wụrụ ije ịlịịwẹ lẹ, ị́ ju apyobwuna kaka, chajị am Amkpaa pwaa deeji lẹ.”