Read idege IJeremaya 7 Bible Online

IJeremaya 7 - idege bible

IJeremaya 7

¹Amkpaa ya ẹla tam yẹkẹẹ,

²“IJeremaya ee, godayị ọ-ọnang nya Ube nya Amkpaa ká ya ẹrụ ọlẹ je angịnyị yẹkẹẹ, Anụ ala iJuda ee, anụ ke ụrụ wo ẹla ọlẹ kam am Amkpaa wẹẹ ya tanụ mẹ, anụ angịlẹ wuu kanụ kaa wẹ ẹgẹlẹ kaka gbịgba ham ịnyị.

³Am Amkpaa Agụgụ Ohe Oluhye nya ala Isirẹlụ jam byinu ya anụ nwụ ugbeyi ọlẹ kanụ wẹẹ hịhị bala abwẹla ịlẹ kanụ wẹẹ họ rịrị mẹ aalẹ, m̀ ka ba hiinụ anụ ka kụ am̀ ọ-ọpyị ọlẹ.

⁴Ānụ kpụnịrọ ụgbaa ọwẹ kịị danụ ya ‘Ube nya Amkpaa tị́ lẹẹ lẹ! Ube nya Amkpaa tị́ lẹẹ lẹ! Ịngịngịhyẹ-ẹ́ ka họhị kaka’ wẹ koo.

⁵“Anụ yẹ da bwu ugbẹyị nya ọhịhị nyanu kanụ hu abwọ lang ịlẹ kanụ wẹẹ họ. Anụ họ abwẹla kpakpa ẹ-ẹga nya awụlẹ.

⁶Ānụ họ angga bala anyị-ẹgu bala ịhu-egu ẹla kịrọrọ ka. Anụ hịnyọ la ọ-nwụ angịnyị ịlẹ kịị da ẹlẹlẹhe-ka ịlọpyị ọlẹ. Ānụ kpụ eteji ha ijiga ka, ó-ri ịnyị ka anụ ka ta ayịreji.

⁷Ó-ri kanụ yẹ irya da aalẹ, m ka bahiinu anụ ka kụ am ọ-ọpyị ọlẹ kam ya ha adịda igogo nyanụ nyọka ri ang ọlala nyaa pyịyọọ.

⁸“Yẹ wẹẹ, anụ hu irya nyanụ kpụnịrọ ụgbaa ọdada ododu.

⁹Anụ kaa yoyi bala ọ-nwụ angịnyị bala ọ-da ẹlahụ bala ọ-nwa iro ọnọọkịla bala o-ju ịtangare ila ha ojiga ịBaalụ bala ọ-kpụ eteji ha ijiga ịkịla ịlẹ kanụ jẹ ene-ene ka.

¹⁰Ánụ họ ang inyibyi ịlịịwẹ kpá wuu lẹ, ānụ warị kaka godayị i-ijata nyam am̀ u-Ube Ịgọgọ nyam juwa yẹkẹẹ, ‘Ahị jam lokpunyi lẹ!’— nyọka tịrẹkpẹ kaka họ ang ịwẹ myịmyị lẹlẹ

¹¹Anụ me ká Ube Ịgọgọ nyam à ri ẹga ká aleyi ka kpịbaa-á? Am ayịdang yẹ ang myị ang ịlẹ kanụ wẹẹ họ wuu-ū.

¹²Anụ kele ka iChilo ẹga kam chụ kị ka gbịgba ham lụka nya ọgbanyẹ mẹ, anụ ka yẹ ang ọlẹ kam họ ụ-ụwa ọọ-lajị nya ang onyobyi ọhọhọ nya ala Isirẹlụ angịnyị nyam.

¹³Anụ ịnyịnyị, anụ họ ang inyibyi ịwẹ wuu. Ụka ọwẹ wuu m̀ ya ẹla tanụ kịla ụka ohu kụrụ iwo, ánụ tị myị ke ụrụ ka. M̀ be ẹkọ be wụrụụnụ, ánụ dọnụ wẹm ka.

¹⁴Lẹẹlẹ, ang ọlẹ kam họ iChilo, m̄ wẹẹ ka họ Ube Ịgọgọ nyam ọlẹ kanụ wẹẹ dahịhile lẹlẹ. M̀ la ta ẹgẹlẹ ịnọ kam ya ha adanụ igogo anyị bala anụ ayịreji lala iChilo.

¹⁵M̀ ka kunu rụ hi ịlọm ẹ-ẹhị jaabwọ kam ku ala Ịsirelụ aananụ rụ.”

¹⁶Amkpaa yẹkẹẹ, “IJeremaya ee, ā raabwọ chajị nya angịlẹ kokoo. Ā jida nyaa lee ọ-raabwọ wọnụ nyaa ju kaka. Ā bịlẹm nyọka yẹ ahyẹẹrwẹrwa nyaa kaka ịnyịnyị, chajị ḿ ka dọnụ wẹng ka.

¹⁷Á yẹ ang ịlẹ kị wẹẹ họ tụ epweji-epweji nya iJuda bala opeje ịla iJerusalẹm da ka-á?

¹⁸Anyị-ị́ tụ ịwụ guru, adaa ya tụ ila nya iya ju. Anyang ya ọrụ nya ang họ ịkaa ịlẹ kị ka ya kịla iya ha ojiga ọlẹ kị wụrụ Adịrahụ Ọnyang Olepwoohe. Ị myịmyị kaa ya ere kịla iya ha ijiga ịkịla nyọka du agbama jum.

¹⁹À ya ká am ị wẹẹ họjụ-ụ̄ụ́? Ịlaa ị wẹẹ họ elego kpa oyoyi wẹ ịlaa lẹ.”

²⁰Lẹẹlẹ, am Ọngọlahị Amkpaa juwa ka hiri ikẹjẹ-awụrụ ọtụka nyam eji wẹ ẹgẹlẹ. Agbama nyam ọọwa ka wẹ uhye nya angịnyị ehe bala iyo ileji bala ekeji tụ ang-ẹrụ wuu. Agbama nyam ka wuru lala ila ọlẹ ká ọngọngọhẹ-ẹ́ ka mịrọọ myị ka.

²¹Am Amkpaa Agụgụ Ohe Oluhye nya ala Isirẹlụ jam byinu anụ ala iJuda ya anụ go iyo ịlẹ kanụ ya kịla iya ọ-rụ ila jula ịlẹ kanụ ya kịla iya ịkịla kanụ ya ri lawụlẹ-awụlẹ mẹ.

²²Ụka kam gba adanụ igogo anyị kpehe bwu Ijipiti lẹ, iiya ị-rụ ila bala ụma nya iya ịkịla m̄ byaa nyọka kpa wam ka.

²³Ehile ọlẹ kam daa ri ọ-ka ju ihi nyam, kam ka ri Ohe Oluhye nyaa, kị ka ri angịnyị nyam. M̀ byaa kị ka dịrẹ ụgbẹyị ọlẹ kam daa ehile-è wẹ, chajị ká ang wuu ka há haa.

²⁴Ị́ tị myị ju ihi lee o-ke ụrụ ka. Ị dachichi họ ang ịlẹ ká aruwoka ọlọkịlẹtụ onyobyi nyaa byaa ya nyị họ. Ọọwa, ị họ tịpyọ ọkọkọ nya ang ọnyịịla ọhọhọ lẹlẹ.

²⁵Bwu ụka ká adanụ igogo anyị rụ bwu Ijipiti gbee daalẹ, ịịwẹ m̄ kaa du alọmwụ anchẹ nyam ẹrụ tọnụ ịnyịnyịịnyị lẹ.

²⁶Ánụ tị myị wo lam lee o-ke ụrụ lam ka. Anụ dọmwụ la egbeju-ọngịrị bala ọ-họ tịpyọ gụ adanụ igogo anyị wẹẹ.

²⁷IJeremaya ee, á kpa ẹlẹwẹ wuu kaka ya je angịnyị nyam wẹwẹ. Ị́ ka myị-ị̀ ke ụrụ lang ka. Á be ẹkọ wụrwaa-wụrụ, ị́ juwa dọnụ wẹng ụpẹnị-ụpẹnị ka.

²⁸Aa byaa mẹ ẹpwụma nyaa-á myị jum am Amkpaa Ohe Oluhye nyaa ihi kaka. Ị́ myị ẹla ọmẹjẹ ka. Ọkpẹẹkpẹẹ ọlala ham myị gbanggbang lẹ. Ọngọhẹ-ẹ́ dọmwụ kaa ya ẹla rwọọ kaka.

²⁹Anụ ala iJerusalẹm ee, anụ pwọ ịlọnụ inyi hụrụ hi ẹtẹtẹ. Anụ mwu eje nya ida ọbaba i-ikiti mẹ, chajị am Amkpaa ju agbama tanụ kpụ m̄ pwanụ anụ angịnyị nyam lẹ.

³⁰Ala iJuda họ ang onyobyi bam lẹ. Ị go ijiga nyaa ịlẹ kị ri ang-ibyi ị-ịlahị nyam kpa kaka rịrị u-Ube Ịgọgọ nyam, kpa ibyi wẹ ụwa.

³¹Ị me ịTọfẹtị ada ọ-kpụ ojiga ọ-Ọkpọọ nya iHinọm nyọka go anyị alẹng bala anyị anyang nyaa nwụ ojiga i-ila. Aam à byaa ma ị họ ịnyị koo, ọ́ tị ka ụrụ nyaa kaka.

³²Lẹẹlẹ, aa yẹ mẹ, ụka juwa wẹ kị ka wụrụ ẹgẹwẹ ịTọfẹtị lee Ọkpọọ nya iHinọm ka. Ị ka wụrụ ụwa Ọkpọọ ọlẹ kịị nwụ angịnyị. Ị ka kpa egu kaka ju eji ẹ-ẹgẹwẹ, chajị ẹgẹgẹhẹ-ẹ́ ka hi nyọka ju egu eji dala ụwa kaka.

³³Egu ịịwa-à ka ri ang oriri nya ịchịnụ bala iyo ịlẹpwụmẹ. Ọngọngọhẹ-ẹ́ ka ji nyọka kwaa rụ hi egu nyaa kaka.

³⁴Ụka ọọwa, ọpyị ọlẹ ka kpụ egwawụ-egwawụ wuu. M̀ ka họ ọkẹkẹnị bala ụya ọyaya tụ ọhụhụ nya ahụ oyeye ịlẹ kịị ji epweji datị-datị nya iJuda bala opeje ịla iJerusalẹm ka myị gbanggbang.