Read idege IJeremaya 8 Bible Online

IJeremaya 8 - idege bible

IJeremaya 8

¹“Ụka ọọwa, ị ka gba ekpinegu nya ịdịrịhụ bala ịnya alegbeju nya ala iJuda tụ ịnya angịkiliya bala ịnya alọmwụ bala ịnya angịkịla ịlẹ kị kụ i-iJerusalẹm wuu kpehe bwu iworu nyaa.

²Ị ka nyi ekpinegu ịịwa epepe chụwa ká ẹnụ ka chaa, ká ọya bala ịdịchụ ka hụ́ rịraa. Ẹnụ bala ọya bala ịdịchụ à ri ang ịlẹ ká angịwẹ la ọháha ẹ-ẹga nyaa bala ọ-dịrẹ juwa kpụ eteji ha lẹ. Ị́ tụtụm ka tụ ekpinegu ịịwa tuuu kaka ju eji kaka, ị ka pẹhyaa chụwa lala ọtẹwụụ.

³Ala iJuda ẹpwụma onyobyi ịlẹ kị ka hi juwa hịhị ẹ-ẹga datị-datị ịlẹ kam nyaa epepe chị kà kà juwa ma igu ma ọkọkọ nyọka kịnyaa juwa hịhị. Am Amkpaa Agụgụ à ya ẹlẹwẹ lẹ.”

⁴“IJeremaya ee, aa byaa mẹ am Amkpaa jam taa wo yẹkẹẹ, “ ‘Ọngịnyị-ị́ mịla eji, ọ́ọ̀ wuleji ka-á? Ọngịnyị-ị́ hwahị ụgbẹyị, ọ́ọ̀ tịrẹkpẹ bwu ụwa ka-á?

⁵Ọ tị lanyị kaanụ angịnyị nyam nyẹẹkpẹ dam, kanụ myị ọnyànya tịrẹkpẹ kaka mẹ? Anụ yụbwọ chị ijiga ịkpụkpụ nyanụ ụ-ụwa giri-giri lẹ, ānụ pwa ọnyànya tịrẹkpẹ wẹ ẹga nyam-m̀ wẹ lẹka le!

⁶M̀ ke ụrụ kpá pịlẹẹ gbenu, ánụ tị myị ya ẹla nya ịlẹhị lẹka. Ọngọngọhẹ nyanụ-ụ́ chị ijẹma nya ang onyobyi ọhọhọ ka, ọngọhẹ-ẹ́ myị yẹkẹẹ, “M̀ họ tịpyọ lẹ! ka.” Olonwu ka Onwu, ọlụbwọ ka Ụbwọ nya ịlọmwụ-ịlọmwụ, lala ụnyịrẹ à chọnjịrọ pwururuuuru yahị da ka ọgbẹwụ.

⁷Àpà ri àpà-á kanyị, ị jẹ ụka kị ka nyà, ikirikede bala arwịị ịchịnụ ilido tenee jẹ ụka kị kaa kpa mwụ bwu ẹgẹhẹ ka ẹga ọkịla, anụ angịnyị nyam-ḿ tị jẹ ehile ịlẹ ká am Amkpaa danụ kaka.

⁸“Ányị kpong-kpong ānụ tị́ ka jẹ-ẹ̀ ya ịwa nyị jẹ ẹla, ehile nyam am Amkpaa nyị jam tịwa-āà? Ánụ yẹ jaabwọ ká angịmẹjẹ nyanụ pyị ehile nyam ọgbẹna bwula ọnọọkịla ịlẹ kịị da ju ka-á?

⁹Ị ka chị oyoyi ju angị jẹ ẹla nyanụ, eje ka waa lahị haa bwuuu. Ị pwa ẹla nyam am Amkpaa deeji, ẹla ọjẹjẹ oyina ị tị́ la-à wẹ mẹ?

¹⁰Lẹẹlẹ, m̀ ka go ịhụ nyaa ha alẹng ịkịla, m̀ ka ya ẹrụ nyaa ha angga, angịtụka nyaa tụ angị ichiche họ ìwo nya apyobwuna ochukuru, angị ri alọmwụ bala angịkiliya riri ịị họ angịnyị ri wuu lawụlẹ-awụlẹ.

¹¹Ị họ kpá lala abẹ ịtụka nya angịnyị nyam nyaa ri ugba-obiri ọpyẹpyẹ kem, ị haa utoji gile-gile-gile lẹ, ị byaa yẹkẹẹ, ‘Anụ ka kpunyi lẹ,’ okpunyi ọhẹ-ẹ́ tị ji ka.

¹²Ang inyibyi nyaa ịwẹ laa oyoyi ene-ēé? Ale tị́ mẹ? Ọ laa oyoyi kpong-kpong ka, ị́ jẹ ẹla ọ-la jii ka. Ajị nya ọọwa lẹ, ị ka ta ayịreji jula angịlẹ kị gbu ịnyịnyị. Ụka kam yaa akama lẹ, ị ka ta ayịreji gbanggbang lẹlẹ. Am Amkpaa-à ya ẹlẹwẹ lẹ.

¹³“ ‘M̀ ka ta ang-ẹrụ nyaa ayịreji, egbe nya alakọnụ nyaa-á ka juwa ji ka, ịnya ikiledu ka ji ka ịnyịnyị. Apwụ nyaa ka gbu womboo, ang ịlẹ kam ya haa wuu, angịkịla ka naa la.’ ”[2]

¹⁴Ala iJuda tọ awụlẹ wo yẹkẹẹ, “Ịyẹ āhị tị́ lẹẹ godayị gbe mẹ? Anụ kẹwẹ kaka jịra, kahị rụnyẹ rụ ka epweji ịlẹ kị me egwalọ dagaga ju kahị gbu ụ-ụwa mẹ! Amkpaa Ohe Oluhye nyahị ya eje nya igu wuhi, ọọwa, ya érù ju enyi hahị nwa lẹẹ lẹ, chajị ahị họ ang onyobyi bọọ.

¹⁵Ahị ya ẹhị rịrị gbe okpunyi, ịngịngihyẹ ọnyịịla-á tị jẹ ọgụ nyahị ka, ahị ya ẹhị rịrị nyọka ye uda ọhọhọ, tị yẹ-ẹ̀ wẹ mẹ, uhi ọtụka-à tị juhi lẹ.

¹⁶Aluji nyahị pwụ epweji nya ịDan lẹ, ahị wo ịhụ ọ-chị huuhuuhuu nya anyịrẹ nyaa lẹ. Iru ọtáta nya anyịrẹ nyaa ju chwẹẹ, ẹga wuu hụ jigi-jigi. Aluji nyahị wẹ kị ka ta ọpyị nyahị ayịreji bala ang myị ang ịlụwa tụ epweji bala angịnyị ịlụwa wuu.”

¹⁷Amkpaa yẹkẹẹ, “Anụ kpẹhị chịng mẹ, m̀ wẹẹ du ilo ịlẹhwa wẹ ẹpwụ nyanụ. Ụụma nya ilo ịlẹ ká ọngọhẹ ka jẹ-ẹ̀ riji nyaa koo, ị ka chịnụ nyigu-igu ọgwọgụ.” Ọọwa, iJeremaya-à yẹkẹẹ,

¹⁸Ọlujwo tọm kpụ elego, ọkịlẹtụ chịm pyẹpyẹ.

¹⁹Anụ ke ụrụ wẹẹ! Angịnyị angịnyị nyam lalẹẹ chị eko ẹ-ẹga myị ẹga nya ọpyị ọlẹ yẹkẹẹ! Ụbwọng eeeè! Amkpaa-á juwa ị-ịSayọn kaka-á? Adịrahụ nya ala ịSayọn-ń juwa kaka-á? Amkpaa adịrahụ nyaa wẹ yẹkẹẹ. “Ịyẹ tị́ du kanụ hu agbama jum lekpeku ịlẹ kanụ họ bala ọ-kpụ eteji ha ijiga ihideeji ene-è?”

²⁰Ọọwa, angịnyị à chị eru yẹkẹẹ, “Ẹla-à lẹẹ-ẹẹ́! Ụka nya ang-ẹrụ ọwụwụ kam̀ lẹ, ụhyọọ tị myị lẹ, Amkpaa-á tị chịhị da lẹka.”

²¹Ọọwa, iJeremaya-à yẹkẹẹ, “Odu nyam ru ịrụ pwụrẹ-pwụrẹ, chajị akama du angịnyị nyam abwọ yịgẹ-yịgẹ. M̀ bida, ọjụjụ kpam ẹkpa ri eji lẹ.

²²Utoji ọhẹ-lọhẹ-ẹ́ juwa i-iGiliyadị kaka-á? Idongkita ịlụwa wuu bẹ-ẹ̀? Ịyẹ tị́ du ká angịnyị nyam-ḿ da chaa ka tị̀tị̄?