Read idege IJeremaya 9 Bible Online

IJeremaya 9 - idege bible

IJeremaya 9

¹Ang pyii ká enyi ka myị̀ egbeju nyam pwẹẹpwẹẹ, ká ahị nyam ka ri ẹmwụ nya egbejida jugú-jugú. Ịnọ m̀ tị ka jida lẹnụ tụ odu, chajị nya angịnyị nyam ịlẹ wuu kị nwụ.

²Ang pyii kam ka ye ẹga o-ju ụga nya angga ọhẹ u-ugbileji, ịnọ m̀ ka rụ hwẹ̀ẹẹ hi angịnyị nyam ịwẹ, ịwa wuu ri angị la kpẹẹkpẹẹ ka— alịnịịkịla myị ẹpwa myị ẹpwa.”

³Amkpaa wẹ yẹkẹẹ! Ẹlẹlẹ nya angịnyị nyam kpụ ìgu lala uda, ọnọọkịla ọlọnụ nyaa ru ẹhị lala ịcha, ọkọkọ nya ẹla-ịlẹhị, ị kpa ọnọọkịla kpa ọpyị. Ị họ ang onyobyi ọhẹ ma hile ọkịla, ị́ jẹm nya Ohe Oluhye nyaa kpong-kpong ka.

⁴Ọng myị ọng ā gbe ịlọmwụ ẹ-ẹga nya aligu nyamwụ mẹ, ọngọhẹ ā dahịhile ọọnamwụ koo, aanịna-aanịna kaa họ awụlẹ ri, aligu-aligu ga tụ ẹga da bịrị awụlẹ ẹnyị.

⁵Aligu-aligu da awụlẹ lụgbaa, ọngọngọhẹ-ẹ́ẹ̀ ya ẹla-ịlẹhị ka. Ị ka ube-ụpwụ nya ọnọọkịla omeme, ị họ ang onyobyi la ọngịrị gwaa myị, ị́ yẹ ịrya da myị kaka.

⁶Ị họ ang onyobyi ọhẹ chị ọkịla beji, ị pịrị angịnyị ju mwụ ịnyọ ka, ị pwa nyọka jẹm jẹ lẹ, Am Amkpaa-à ya ịnyị lẹ.

⁷Ajị nya ọọwa lẹ, Am Amkpaa Agụgụ yẹkẹẹ: “M̀ ka hụ́ angịnyị nyam charị-charị jaabwọ kị hyà oje kam ka maa yẹ lẹ. Ịyẹ m̄ tị́ tụtụm ka họ haa dala ọọwa wẹẹ, ị họ ọhọbịrị kpoye lẹ.

⁸Ẹlẹlẹ nyaa lala ịcha ọ ju ẹhwa, ọnọọkịla ị kaa me pịyọọ lẹlẹ. Ịị ya ẹla gẹnẹ-gẹnẹ tọ ọngịnyị ọọnaa, ị tị juwa tịtọ nya egbeju-igu nya ọngọọwa ẹ-ẹpwụ nya ịrya nyaa.

⁹M̀ ka yaa chịng nya ụma nya ọhọhọ ọlịịwẹ-ẹ́? M̀ ka jẹ-ẹ̀ hịnyọ la ọ-họ ẹpwụma ọlịịwẹ kwiwa-á? Am Amkpaa-à ya ẹlẹwẹ lẹ.”

¹⁰Ọọwa, m̄ yẹkẹẹ, “M̀ ka bida chajị nya ịgbọdọ, bala amẹ ilugbileji, chajị ị gbu womboo wuu lẹ, ọngọngọhẹ-ẹ̀ chịpwụrụ bwu ụwa kaka. Ọngọhẹ-ẹ́ wo anụ nya iyo ọ-kpa ri ụ-ụwa kaka. Ịchịnụ bala Iyo ịlẹpwamẹ wuu rụnyẹ rụ lẹ.”

¹¹Amkpaa yẹkẹẹ, “M̀ ka họ iJerusalẹm ka yẹ la egwawụ-egwawụ, ẹga ká iyo ịnyẹẹgẹga ka ga ri. M̀ ka họ epweji ịla iJuda ka yẹ la ugbileji, ẹga ká ọngọngọhẹ-ẹ́ kụ ka.”

¹²Ọọwa, m̄ tọ Amkpaa wo yẹkẹẹ, “Ọ tị́ lanyị ká ọpyị ọlẹ kpụ egwawụ-egwawụ dam luhwo-luhwo, ká ọngọngọhẹ-ẹ́ kaa chịpwụrụ bwu am̀ kaka mẹ? Oowo tị́ jẹ ẹla kpụ kọ ka jẹ etu nya ẹlẹwẹ-ẹ̀? Oowo ā tị́ da ẹlẹwẹ wụlẹ yaje kọ ka jẹ-ẹ̀ yoo dodehe myị-ị̀?”

¹³Amkpaa wẹ yẹkẹẹ, “Ang odudu ri yẹkẹẹ, angịnyị nyam nyẹẹkpẹ da ehile nyam ịlẹ kam daa. Ị́ jum ihi lee ọ-họ ang ọlẹ kam byaa kị ka họ ka.

¹⁴Ọkọkọ nya ọọwa lẹ, ị dịrẹ egbeju ọnyọọngịrị nya ịlaa kele kaka kpụ eteji ha ịBaalụ jaabwọ ká adaa igogo anyị mẹjaa.

¹⁵Lẹẹlẹ, aa wo ang ọlẹ ká am Amkpaa Agụgụ wẹẹ ka họ mẹ. M̀ ka ya apwụ ị-la ujujwo lala ụpyị ha angịnyị nyam ri. M̀ ka ya érù ju enyi haa-ā nwa.

¹⁶M̀ ka nyaa epepe tụ ẹpwụma datị-datị ịlẹ kịịwa ayịdang lee adaa igogo anyị-ị́ jẹ ka. M̀ ka du angịdẹwụ dịraa kị ka nwa gbee kị ka taa ayịreji gbanggbang.”

¹⁷Amkpaa Agụgụ yẹkẹẹ, “Anụ kụ irya ju ang ịlẹ kị wẹẹ họ wẹẹ! Anụ diro anyang ị kaa bida kị kẹwẹ—ịwa angịlẹ kị jẹ-ẹ̀ mwu eje nya ida ọbaba.”

¹⁸Angịnyị wẹ yẹkẹẹ, “Ee, ị wẹ páaa kaka jida juhi, gbee ká egbejida-ā go rịrịịhị a-ahị, kị nyà bwọbwọọbwọ mẹ.

¹⁹Ke ụrụ wo ida kị lalẹẹ je ị-ịSayọn wẹẹ: ‘Ahị ri enyi gu obyi lẹ ooo! Oyoyi juhi lẹ! Ahị ka rụ hi ọpyị nyahị, ị tụrụ ẹpwa nyahị ju eji lẹ.’”

²⁰Ọọwa, m̄ yẹkẹẹ, “Anụ anyang ee, anụ ke ụrụ lẹla nya Amkpaa mẹ, anụ ya ụrụ ba ẹla ọlẹ kọ juwa ya. Anụ mẹjẹ anyị anyang nyanụ jaabwọ kịị bida, ká ọngọngọọng nyanụ ā mẹ eje nya ẹrwa jẹ ọngịnyị ọọnamwụ mẹ.

²¹Igu bá pyeee wẹ ẹpwa nyahị lẹ, ọ jụ wẹ ẹpwụ nya ebe ịnyịịngịrị nyahị, ọ go anjwo nwụ o-opeje, tụ ikolobya ịlẹ kị jịra i-ikpọdọda.

²²Egu nya angịnyị ka myị eji kpataa tụ ẹga myị ẹga da lala ọtẹwụụ o-ju ẹrụ, lala ajẹ nya ang-ẹrụ ịlẹ ká alẹrụ tụhi chị pata-pata ká ọngọngọhẹ-ẹ́ juwa ka taa guru ka. Ẹla ọlẹ ká Amkpaa ya-à wẹ lẹlẹ.”

²³Amkpaa yẹkẹẹ, “Angị jẹ ẹla ā hi ọbọọchẹ ju ẹla ojeje nyaa ka, angị la ọngịrị ā tị chị ọgọm ju ọngịrị nyaa ka, alụdụ ā tị hi ahị ju ụdụ ọkpụkpụ nyaa ka ịnyịnyị.

²⁴Ọngọ ka chị ọgọm lẹ, ọ chị ọgọm nyori ọ jẹ lẹ mẹ, nyori ọháha nyam am Amkpaa-á kaa gbu enyi ka, m̀ kaa họ ang ọkpakpa bala opwoku, chajị ang ịlẹ kịị kpụm ọkịlẹtụ nyii à wẹ lẹ. Am Amkpaa-à ya ẹlẹwẹ lẹ.

²⁵“Ụka juwa wẹ kam ka yẹ angịlẹ wuu kị da ụwụwụ ba u-ugbinyịrọ kem.

²⁶Ala Ijipiti bala ala iJuda bala ala Ẹdọm bala ala Amọn bala ala iMowabụ anyị bala angịlẹ wuu kị kụ u-ugbileji kị kaa pwọ inyi nyaa hi bẹdẹẹ ri angị dụ ụwụwụ kị tị kpa ehile nya ụwụwụ ọdada ka. Alẹpwụma ịwẹ wuu-ú da ụwụwụ ọ-ọkịlẹtụ ka, tụụnụ anụ anụ ala Isirẹlụ wuu kanụ kpa ehile nya iro ọnwanwụ nyam ka.”