Read idege Ida Ọbaba 1 Bible Online

Ida Ọbaba 1 - idege bible

Ida Ọbaba 1

¹Ahyu! IJerusalẹm kpụ egwawụ-egwawụ lẹ! Ọ myị la angịnyị kpá ẹnẹhẹ lẹ. Odehe wuu jwoo ihi kpá ẹnẹhẹ lẹ, ọ tị lala ahụ-ogu lẹ. Epweji olihi gụ wuu ịnọ ịnyị, alụwa tị yẹ kpata ka ri anyịhị lẹ.

²Ọ jida gbokiri lepwodu. Egbejida nyà dịrọọ abaa. Ẹ-ẹpwụ nya iru nya aligu nyamwụ ilene wuu ọngọhẹ nyaa-á hi ka kpọọ ẹjẹ ka. Alakpa nyamwụ pịrọọ ha mwọọgịlẹ yẹ kaka ri aluji nyamwụ lẹ.

³Ị kpa ala iJuda rụ kaka ri anyịhị lẹ, ị kpaa ẹkpa ri eji, ị kụ ịpyị ịkịla. Ị yẹ akama la o-ye ụbwọ ọdada ka. Ị́ la ẹga nya ụbwọ nya ịlaa ka mwụ ịnyọ ka. Aluji yaa dada la o-ye ẹgẹhẹ ka bwu be ka.

⁴Agbayị i-bwu ka iJerusalẹm chị nyooo lala ẹga kịị bida, ọngọhẹ-ẹ́ wẹ Ube Ịgọgọ lụka nya ọhụhụ ịlẹ kị hunọ kaka. Ịyẹẹnọ ịlẹ kịị mwu eje ụ-ụwa yẹ akama, angịkiliya ịlụwa juwa mwu eru. Ọngọhẹ-ẹ́ juwa ọ-ọnụ ọgirigba kaka, ịSayọn juwa ẹpwụ nya ujujwo.

⁵Aluji nya iSayọn kụrụ lẹ, ị ye ọngịrị kpa ụ-ụbwọ. Amkpaa họ ị yẹ akama, chajị nya iru nya ang inyibyi ịlẹ kị họ. I wu alụwa kpa rụ ka ịpyị ịlụrụ, ị ri anyịhị nya aluji lẹ.

⁶Ụmụmẹ ọlẹ ká iJerusalẹm la wuu ri ang ọ-kpa gbe ego lẹ. Alegbeju ịlụwa họ gude-gude lala apyị i-ye ang ri ka, ị la ukuru kaka, ị kpa ata gbileji hụlọ-hụlọ rụnyẹ rụ hi ịmwụkpẹ.

⁷Ala iJerusalẹm yẹ akama la ọ-mwụ ịnyọ ka, ị kpịtịya nya ụdụ oligbalẹ nyaa. Ụka ká aluji baa ẹpwa, í ye ọngọdụbwọ ka. Aluji gbẹhị daa teee, hụlọ ẹhụ jwaa ẹ-ẹpwụ nya ichi nyaa.

⁸Ọ họ ang onyobyi onyobyi-obyi, ọ ri olibyi lẹ. Angị jwọọ ihi ene-ene yẹhị dọọ bwee, ị yẹ jaabwọ ká aluji noo ang wuu hi abwabwọ lala ọngọ ji lọhị-lọhị. Ọ juwa mwu eru, yahị chị ọka.

⁹Ang ibyi nyamwụ la gede-gede, ọ́ me irya kpá nya akama olijuju kaka. Ayịreji nya iJerusalẹm wu ejiri, ọ́ ye ọngọ ka kpọọ ẹjẹ ka. Ọ be ẹkọ ida ngịrọrọọrọ yẹkẹẹ, “Amkpaa nyam ee, aluji kụrụm lẹ! Kụ ẹhị yẹ akama nyam, ká yẹm ahyẹẹrwẹrwa mẹ.”

¹⁰Aluji wọọ ang-ụdụ nyamwụ wụ wuu, noo ang ịnyịịla ịlẹ kọ la gbanggbang. Ọ kpa ẹhị nya ịlọmwụ yẹ alẹpwụma ịkịla kị pwururu ju ka Ube nya Amkpaa ọlụwa, ịwa alụma ịlẹ ká Amkpaa hile ya nyị jụ kele kpong-kpong ka.

¹¹Ala iJerusalẹm mwu eru, juwa teleko nya ang oriri, ị kpa ang-ụdụ nya boku nya ang oriri ọlẹ kị ka ya ke opyeepyee. IJerusalẹm dakọ gboo yẹkẹẹ, Amkpaa ee, kụ ẹhị kpẹẹ, ká yẹ akama ọlẹ kam ji ẹpwụ nyamwụ wẹẹ.

¹²“Anụ angị chịpwụrụ kam ee, anụ yẹm-m̀ wẹ wẹẹ, ọjụjụ o-me ịnyam ọlẹ ji ẹgẹhẹ-ẹ́— ọjụjụ ọlẹ ká Amkpaa ya bam ila ụka nya ikẹjẹ-awụrụ nyamwụ?”

¹³“Ọ du ila bwu uhye-ọgba warị kaka rụm e-ekpinegu. Ọ da ụnya wum, kpam nọnọ. Ọ tụụbwọ him lahị họm bwuu dam ẹ-ẹpwụ nya ọjụjụ ụka wuu.”

¹⁴“Ọ jẹ ịhọbịrị nyam wuu, ọ ya ori wụlaa rẹẹrẹẹ da pịlẹm o-omyi, ilo ọlala nyaa du ká ọngịrị gụm myị. Ọngọlahị yam ju aluji nyam ụ-ụbwọ, angịlẹ kam ka waa ugbe myị ka.”

¹⁵“Ọngọlahị ya ẹpẹpẹ ju ịmaga nya angịdẹwụ nyam wuu, du alẹwụ warị nyọka ta ikolobya ịdẹwụ nyam ayịreji. Ọ pyị angịnyị nyam ịnyịrọ-nyịrọ lala ịnyaa pyị alakọnụ kpa họ ere.”

¹⁶“Ajị nya ala ịlẹ kam-m̀ jida legbejida nyà chịrọ-chịrọ à wẹ lẹlẹ. Ọngọ ka kpụm ẹjẹ-ẹ́ ji ka, angị ka jum ọhụ wuu ji hwẹ̀ẹẹ, anyị nyam kụ abwabwọ, chajị oluji kụrụ lẹ.”

¹⁷“Am iJerusalẹm nịra ụbwọ kpaaa, ọngọ ka yụbwọ chịm dam ụbwọ-ọ́ tị ji ka. Amkpaa diro aluji yahị dam am ọnyị ọtụma nya iJekọbụ ya aloye-ẹpwa nyam-m̀ nyị ri aluji nyam mẹ. Am iJerusalẹm ri ugugungkwọ nyaa, ị hum lala ụchị-apwụ ọlịhịịhya.”

¹⁸“Amkpaa tị họ kpakpa, chajị am à la egbeju-ọngịrị tọọ lẹ. Anụ angịnyị wuu ā wo ẹla nyam gu onwu gu ọba, kanụ yẹ akama ịlẹ kam ji ẹpwụ nyamwụ lẹẹ mẹ. Ikolobya bala ịyẹẹnọ nyam wuu, ị gbilaa kpịla-kpịla kaka ri anyịhị lẹ.”

¹⁹“M̀ wụrụ alakpa nyam kị ka dam ụbwọ, ị tị mwọọgịlẹ pịrịm ju. Angịkiliya bala alegbeju gbu am̀ e-epweji ụka kị wẹẹ teleko nya ang oriri ọlẹ kị ka ya ke opyeepyee.”

²⁰“Amkpaa ee, yẹ olujwo ọlẹ kọ wẹẹ tọm wẹẹ, ọkịlẹtụ bịrịm chịkẹ-chịkẹ ọọ-lajị nya ịhọbịrị nyam. Igu nwụ angịnyị nyam tụ opeje-opeje da, ị́ hụ ẹ-ẹpwa hụ, igu baa kele.”

²¹“Angịnyị wo ẹrụ omwumwu nyam wo, ọngọ ka kpụm ẹjẹ-ẹ́ tị ji kaka. Aluji nyam wo oja nya akama nyam, ị chị ọkẹkẹnị nyọlẹ ká yẹm akama. Họ ká ẹnụtụrụ ọlẹ ká ya lẹẹ ā pwụ eji hyaa, chajị kị yẹ akama jaabwọ kam wẹẹ yẹ mẹ.”

²²“Aa yẹ ang inyibyi ịlẹ kị wẹẹ họ wuu, yaa akama jaabwọ ká yẹm am chajị nya ịhọbịrị ịlẹ kam họ. M̀ mwu eru kpụba ka, odu nyam ru ịrụ.”