Read idege Ida Ọbaba 2 Bible Online

Ida Ọbaba 2 - idege bible

Ida Ọbaba 2

¹Agbama ju Ọngọlahị lụmẹ, ọ ya odu ohite-hite hi ịSayọn, ọ chị ụhị ọlala epwoohe ọlẹ ká Isirẹlụ la abwọ ju ka ịpyị. Agbama nyamwụ lụmẹ gbee, ọ́ dọmwụ jujwo nya Ube Ịgọgọ nyamwụ ka.

²Bá pyee tụ ẹpwa nya ala Isirẹlụ da, taa ayịreji la o-jujwo nyaa ka. Ẹ-ẹpwụ nya agbama ojuju, Ọngọlahị tụrụ egwalọ ịnyịịngịrị ịla iJuda wuu. Ọ ya ẹpẹpẹ ju ẹpwụma tụ alegbeju ịlụwa wuu.

³Gbile ẹma da ọngịrị ọlala nya Isirẹlụ ẹ-ẹpwụ nya agbama ọtụka-ọtụka nyamwụ. Aluji wẹẹ gba mịlaa wẹwẹ lẹ, Ọngọlahị chẹwụ kaa ka. Agbama nyamwụ wuru pwuu lala ila ọ-ọpyị nya anyị ịtụma nya iJekọbụ, juwa rụ ang myị ang wuu dagaga ju.

⁴Da ịcha nyamwụ yahị da angịnyị nyamwụ lala ọwa nyaa ri oluji nyaa, ọ nwụ ịbọọchẹ nya angịlẹ kahị kpa yaya. Agbama nyamwụ wuru lala ila am̀ i-iJerusalẹm.

⁵Étēmēee! Ọngọlahị gá Isirẹlụ beji kpalị-kpalị jaabwọ ká oluji kaa họ lẹ, ọ ta ẹpwa nya ịdịrịhụ ịlụwa wuu ayịreji, pẹhi ebe ịnyịịngịrị nyaa kpụ egwawụ-egwawụ. Ida ọbaba bala ọjụjụ ọ-la ọbaba-ka ọ ya chụ ala iJuda e-egbeju lẹ.

⁶Ọ tụrụ Ube Ịgọgọ nyamwụ lala ụdaa ọlẹrụ, ọ da ọhụhụ ịlịgọgọ bala Ẹnụtụrụ Ịhịnyọ Lụkụrwọ wuu yi e-epweji nya ịSayọn lẹ. Ọ pwa adịrahụ bala ọngọkiliya tụ hyaa chị ka ọda lawụlẹ-awụlẹ.

⁷Ọngọlahị nyẹẹkpẹ da ogidi nyamwụ, pwa Ube Ịgọgọ nyamwụ. Ọ pẹhi iJerusalẹm ju aluji ụ-ụbwọ, ị tụrụ ebe ịnyịịngịrị ịlụwa wuu. Ị chị ụkwa dọọọ u-Ube nya Amkpaa lala iwuru ọdada ọ-ọhụhụ.

⁸Amkpaa chị eje nyọka ta egwalọ nya ịSayọn ayịreji, ọ me obyi nyamwụ kpẹẹkpẹẹ nwọọ nọ ka ọka. Ọ dọmwụ nyọka tọọ ayịreji, ebe iluhye bala egwalọ wuu kpụ bẹlẹ-bẹlẹ yẹ ri egwawụ-egwawụ.

⁹Ogirigba nya ịSayọn kpụ yahị kụrụ eji, ọ bịrị odo ị-kpa daa chị, chaa eku kpiki-kpiki. Adịrahụ bala alegbeju ịlụwa ri anyịhị ẹ-ẹpwụma ịkịla, ehile ọmẹjẹ-ẹ́ ji kaka, alọmwụ ịlụwa-áà wo ẹlẹlẹhẹ bwu ẹga nya Amkpaa kaka.

¹⁰Ịgabwọ nya ala ịSayọn hụhụ ị-ịpyị lọnụ-ujiji gu ịpyị chị ịlaa e-egbeju, ị kụrụ ịwụrụ nya owuru ọkpakpa, ị yẹẹnọ ịla iJerusalẹm yahị cheji.

¹¹Ahị nyam kpụ ịkpala pwuuu lida ojeje lẹ, ọjụjụ myị̀ ugbodu okpukpuru nyam, olujwo tọ ọkịlẹtụ nyam ajị nya ayịreji ọtata nya angịnyị nyam. Anjwo bala anyị ịlabwọ kpụ ịbwọ chụwa o-opeje nya epweji.

¹²Imyi nwaa nwụ, imyi-enyi nwaa nwụ, i chị eko wụrụ ịnaa, ahị chaa owu o-opeje lala angịdẹwụ ịlẹ ká ang họ, ọ kpaa bịlẹ-bịlẹ gbee kịị chị ẹjẹ nịrọ ịnaa o-omyi.

¹³Cháhòhóò! IJerusalẹm ee, iJerusalẹm lolikẹjẹ! Anyị m̄ tị́ ka ya chajị nyang kpá-à wẹẹ? Ọjụjụ o-me ịnyang ọlẹ tị́ ji ale lẹẹ-ẹ̀? Anyị m̄ tị́ ka bwu kpụng ẹjẹ myị-ị̀ wẹẹ? Akama nyang ri ẹbẹ-ọgọja, pyẹ kpamahyaaa lala ihu ọtụka, oowo tị́ ka chị ẹlẹwẹ igbe hang myị-ị̀?

¹⁴Alọmwụ nyang yẹng ọyị nya ịnịịkịla bala ụgbaa ọdada, ị́ myị bwuru abyịkọtọ nyang dodehe ka, ịnọ à tị́ ka be akama ọlẹ lẹ. Ị tị yẹng ọyị pịrịng ju du ká me ọhagụ nyị ka ji.

¹⁵Angị chịpwụrụ bwu ọnaabwọ ọlẹ chị abwigo jung, ị chị ịpyọ juwa hụlọ ahụ ju iJerusalẹm yẹkẹẹ, “Ahyu! Epweji ọlụhị ọlẹ à lẹẹ lẹ-ẹ́? Ịnọ ọwa-à tị́ ri ẹga ọ-kpa yaya nya odehe wuu!”

¹⁶Aluji nyang wuu juwa kpang họ, dang ịkwẹ churum bala ọ-wọ angịrị jung, juwa yẹkẹẹ, “Ẹ̀pyị́ị̀nẹ́ẹ̀! Ahị họọ elego dụwẹ lẹ, ẹnụ ọlẹ kahị yẹhị rịrị gbe à pwụ eji lẹẹ lẹlẹ.”

¹⁷Ang ọlẹ ká Amkpaa hwahwa nyamwụ, ọwa ọ họ lẹẹ lẹlẹ. Ọ ya ẹlẹwẹ neeji gbalẹ-gbalẹ ene, ọ tang ahụ iJerusalẹm ayịreji la o-jujwo ka, ọ họ aluji nyang chị ọkẹkẹnị nyọlẹ kị kpa ọngịrị ọtụka nyaa kụrụng.

¹⁸IJerusalẹm ee, egwalọ nyang ā chị eko wụrụ Ọngọlahị, egbeji nyang ā mwụ lala ihu lẹnụ bala lodu. Ā mwụ ịnyọ lida ojeje koo, egbeja-ā chị hi ahị nyang ka.

¹⁹Wuleji lepwodu jijiiji ká ya eko kpọnụ, dọmwụ bwu ụka nya obyi ohihi. Ya ẹla ọlẹpwụ nyang je Ọngọlahị, bịlọọ kọ yẹ ahyẹẹrwẹrwa nya anyị nyang ịlẹ kị wẹẹ gbu imyi chị pata-pata tụ opeje-opeje da.

²⁰Amkpaa ee, yẹ-ẹ̀ wẹ wẹẹ-ẹ̄! Á yẹ ọngọngọhẹ akama onyobyi-obyi ọlịịlẹ ẹnẹhẹ lẹka. Ọ lụmẹ gbee ịnịna ịlanyị jam ka go anyị nyị ịlaa— anyị ilikẹjẹ nyaa nwụ ri lẹ! Ị jam go angịkiliya bala alọmwụ nwụ u-Ube Ịgọgọ nyang mịlẹ-mịlẹ lẹ!

²¹Anjwo bala angịgbahị gbu chụwa ụ-ụgbẹyị, ịyẹẹnọ bala ikolobya nyam, ẹwụ ryaa wuu lẹ. Ẹnụ nya ikẹjẹ awụrụ nyang ā nwụụ wuu la o-jujwo nyaa ka lẹ.

²²À diro aluji chịm ọgụ lala ịnyaa diro angịnyị ka ọhụhụ, uhi ojuju chịm ọhị yẹrị-yẹrị. Ẹnụ nya agbama nyang ọọwa, ọngọngọhẹ-ẹ́ be lee o-hi hị ka anyị kam kpahị ju kẹmkẹm, aluji nwaa wuu gbanggbang.