Read idege Ida Ọbaba 3 Bible Online

Ida Ọbaba 3 - idege bible

Ida Ọbaba 3

¹Am à jẹ ang ọlẹ ká akama ọyẹyẹ ẹ-ẹpwụ nya agbama nya Ohe Oluhye ri lẹlẹ.

²Ọ kum ju ka ẹpwụ nya ukpowu ọkpẹmkpẹm ẹga ká ahịgboo pwụ ka.

³Ọ yahị dam myịmyịịmyị, juwa nyim enyiri ụka wuu.

⁴Ọ họ ká ịnyịrọ nyam pyị rịta-rịta, bala o-bem ekpinegu ene.

⁵Ọ wum ju agba kpa ọjụjụ bala akama yẹm dada.

⁶Ọ yam kụ ẹpwụ nya odolowu lala angị gbu kpá gbalẹ-gbalẹ lẹ.

⁷Ọ chị ajẹ yẹm dada kam ka jẹ-ẹ̀ be ka, ọ jum agba ịtụka.

⁸M̀ chị eko gboo bịlẹ ụbwọ ọdada, Ohe Oluhye ya arụ kpịla.

⁹Ọ họ ụgbẹyị nyam gu ịgịlẹ, ọ ya ajwọ hịla ẹ̀ga ị-ịlahị nyam.

¹⁰Ọ kụ ịnya gbem lala ọnarwọ, ọ kụ lala ugẹbẹ nyọka gba mịlam.

¹¹Ọ gbilem kpa rụ hi ụgbẹyị nyam, hụlam hwẹẹhwẹẹ, tụụbwọ him dụwa.

¹²Ọ ya ịcha kụ uda nyamwụ, gbile uda nyamwụ chakuu jahị dam.

¹³Ọ chịm ịcha kẹng-ng— ịcha ọlagburuku nyamwụ.

¹⁴M̀ ri ẹla-ẹlẹhụ nya angịnyị nyam wuu, am ị kaa mwu eje gu ẹnụ myị ẹnụ lẹlẹ.

¹⁵Akama ọnyuujujwo ọ ya ham nya ang oriri lẹ, enyi ọnwanwa nyamwụ la ujujwo lala ụpyị.

¹⁶Ọ kpa egbenjwọ bem angịrị ene, kpam rị ịpyị biri-biri.

¹⁷Okpunyi ji hwẹ̀ẹẹ him, m̀ deeri nya ang ọlẹ ká ọkẹkẹnị ri lẹ.

¹⁸M̀ ya ẹ-ẹpwụ-ẹpwụ yẹkẹẹ, “M̀ gbu hụrụ lẹ! Ahị ọdahile Amkpaa gụm myị lẹ.”

¹⁹M̀ me irya ịlẹ kam wẹẹ yẹ, ị lam ujujwo lala ụpyị.

²⁰M̀ me irya jwaa ụka wuu, ọkịlẹtụ bịrịm chịkẹ-chịkẹ.

²¹Nanaana, ẹlẹhẹ ọlẹ kam kpịtịya kọọ ya ahị ọdahile ham ri:

²²Ọháha o-gbu enyi-ka nya Amkpaa bala ahyẹẹrwẹrwa nyamwụ kaa juwa pyịyọọ.

²³Ị ri inyeewe ẹnụ myị ẹnụ, Amkpaa chakpa ju ọdahịhile.

²⁴Amkpaa-à ri ang ọlẹ kam la lẹ, m̀ ka dahịhiloo.

²⁵Amkpaa kaa họ ang ọnyịịla ha angị dahịhiloo, angịlẹ wuu kịị jwoo ihi.

²⁶Lẹẹlẹ, ọ hiigu nyọka dayị pịlẹẹẹ gbe Amkpaa kọ ka chịhị da.

²⁷Ọ hiigu ká ọngịnyị ka jẹ akama ọyẹyẹ lụka nya enjwo nyamwụ.

²⁸Ụka kọ lịnyị, ọ hụhụ chịng lọnụ-ujiji ẹ-ẹpwụ nya ugbodu ojuju.

²⁹Ọ kpa ịlọmwụ ọnụ ri eji odu mẹ, ahị ọdahile ka ji wẹẹ.

³⁰Ọ ya abaa da ha ọngọ wẹẹ wọọ abwọ, ko ye ido ododo nya aluji mile mẹ.

³¹Ọngọlahị kaa nyẹẹkpẹ da ọngịnyị gbe oyi myị oyi ka.

³²Ọ ka kpa ọjụjụ warị myị, ọ tị ka yẹ ahyẹẹrwẹrwa wẹẹ jaabwọ ká ọháha o-gbu enyi-ka nyamwụ la.

³³Ọ́ ri ang ọ-kpọọ ịpyọọ nyọka kpa akama lee ọjụjụ wẹ angịnyị ehe ka.

³⁴Alagba ilodehe tị lẹ, ịị taa pyị eji ẹga wuu.

³⁵Ịị yẹ angịnyị ba haa ri kịrọrọ la o-me irya nya Agụgụ ka.

³⁶Ị pyị eje ọ-chị ha ọngịnyị anyoko, Ọngọlahị tị yaa wuu.

³⁷Oowo tị́ ka ya ẹla ká ẹla ọọwa ka họ jịra ó-ri ká Ọngọlahị á ya ịnyị ka?

³⁸Ụka ká Agụgụ á ya iwe da, ang ọnyịịla bala ang onyobyi à kaa họ myị lẹ.

³⁹Ịyẹ tị́ du ká ọngịnyị kaa chị eru-ūù? akama nya ịhọbịrị nyamwụ ọ tị́ wẹẹ yẹ.

⁴⁰Ahị wụla ụgbẹyị nya ọhịhị nyahị yẹ kahị nyà tịrẹkpẹ chị Amkpaa ọgụ mẹ.

⁴¹Ahị wụrụ ọkịlẹtụ nyahị da ha Ohe Oluhye olepwoohe, kahị pyẹ abwọ nyahị maaa juwa raabwọ họọ yẹkẹẹ,

⁴²“Ahị họ ang onyobyi bala ọ-la egbeju-ọngịrị, á tị hịnyọhi hahị ka!

⁴³“Agbama nyang la gede-gede jahị dahị, à nwụhị la o-jujwo nyahị ka.

⁴⁴Agbama nyang chị ụka kpọrị-kpọrị lala egbamwụ, abwọ ọrịrị nyahị-ị́ kpoye nyamwụ pwụ ẹga nyang myị ka.

⁴⁵À họ kpá ahị ri ajeyi— ang ịlọtẹwụụ a-ahị nya angịnyị ehe lẹ.

⁴⁶“Aluji nyahị wuu ya hwọọhwọ lido-lido tahị.

⁴⁷Ahị ji ẹpwụ nya uhi ojuju dapwụ hwamẹ, akama bala ayịreji dagaga juhi.

⁴⁸Egbejida nyam dọba lala ihu, m̀ jida chajị nyọlẹ ká angịnyị nyam ta ayịreji.

⁴⁹“Egbejida nyam-ḿ ka ba la ọnyànya ka, ị ka nya pyịyọọ

⁵⁰gbee ká Amkpaa ka chẹhị bwu epwoohe kaka yẹhị.

⁵¹Ọkịlẹtụ bịrịm chịkẹ-chịkẹ, ụka kam yẹ ẹbyị ọlẹ kọ họ anyang ilepweji nyam.

⁵²“Aluji nyam bẹm-bẹ lala ọchịnụ, ḿ tị haa ịngịngịhyẹ kpa kaka.

⁵³Ị chịm pyíì lahị-lahị ju ka ẹpwụ nya ụjẹ, da ajwọ mịlam wẹ ẹpwụ nya ụjẹ.

⁵⁴Enyi myị̀ kem e-egbeju, m̀ me ká igu pwụ eji lẹ.

⁵⁵“M̀ dako gboo wụrụ ẹnyị nya Amkpaa, bwu ọmwụ nya ụjẹ ọọwa pẹtẹẹ.

⁵⁶À wo ọbịlẹ-bịlẹ nyam, á ya arụ kpịla hi ida ojeje nyam ka.

⁵⁷À wo ẹkọ obebe nyam, à byim am nyị chị uko ka.

⁵⁸“À wẹ kaka chịm da lẹ, Ọngọlahị, à gba ọhịhị nyam kpehe.

⁵⁹À tị́ jẹ jaabwọ kị họm kịrọrọ kaka ba lẹ, aa chị oku ham mẹ.

⁶⁰À jẹ jaabwọ kam wu aluji nyam ẹjẹ kaka ba, à jẹ obyi omeme nyaa jahị dam wuu.

⁶¹“À wo jaabwọ kịị kpam hu utungguru kaka ba, à jẹ obyi omeme nyaa jahị dam wuu.

⁶²Aluji nyam ya ẹla rụm ụka wuu, ị me obyi jum chị ụka deeji ka.

⁶³Ang myị ang kị juwa kpakpa họ, am-am ịị yọnụ gu lẹlẹ.

⁶⁴“Amkpaa ee, aa nwaa uri tịrẹkpẹ, chajị nya ang onyobyi ịlẹ kị họọ-ọ̀ wẹ wuu.

⁶⁵Aa gọlọ jwaa ka họ ká ọkịlẹtụ nyaa-ā la diidii.

⁶⁶Aa dịraa ka wu ẹ-ẹpwụ nya agbama nyang, ká taa ayịreji.”