Read idege Ida Ọbaba 4 Bible Online

Ida Ọbaba 4 - idege bible

Ida Ọbaba 4

¹Okpoko ịgọm ọlẹ kpá kọọ chị ahịịraapya, ọ họ kudu-kudu lẹ. Ajwọ ịnyịịla ịlẹ kị kpa me Ube nya Amkpaa nyi epepe chị pata-pata tụ opeje-opeje da.

²Ikolobya nya iSayọn ịnọ kẹhị lala okpoko ịgọm, ị tị pwa ịǹya lala ịta ị-kpa ume me lẹ.

³Ikirom ri ikromị kaa ya ẹmẹ ha ọnyị nyẹ, angịnyị nyam tị mwọọgịlẹ lala ogoriigo ịlẹ kị la ọkwọ ta anyị nyaa.

⁴Ụkpụrọkọ nya anyị ịlabwọ chọhụ, anjwo bịlẹ ang oriri kekeeke, ọngọngọhẹ-ẹ́ tị ya táa ka.

⁵Angị kaa ri ang oriri ịchẹhị gbọgbọ ene-ene gbu imyi chụwa ụ-ụgbẹyị lẹ, angị ri alẹpwa nya alụdụ ene-ene, juwa ga pịlahị nya ang oriri tụ ọtẹwụụ-ọtẹwụụ da.

⁶Akama ọlẹ ká angịnyị nyam yẹ gụ ịnya ala ịSọdọm kịịwa ta ayịreji ẹ-ẹpwụ nya ẹhị ọ-mwụbiri la o-ye ọngọdụbwọ ka wẹẹ.

⁷Alegbeju ịla iJerusalẹm kpá pyii ụhị nyaa ịnọ chị ahị ịraapya lala ara, pwo gụ enyi-ẹmẹ, chị awụụ pwụtụ-pwụtụ, hụ́ myịrị-myịrị lala ajwọ ịnyịịla.

⁸Ị tị chu obiri lala obyi lẹ, ọngọngọhẹ-ẹ́ taa ụ-ụgbẹyị jaa ogu kaka. Ịnyịrọ nyaa pyị kpịịlẹẹ hi ekpinegu-ekpinegu, nwọnwụ lala okoji.

⁹Ịnya angị gbu ẹ-ẹwụ háhá gụ ịnya angị gbu igu nya imyi ịlẹ ká imyi haa rume-rume gbee kị gbu ajị nya o-ye ang ri ka.

¹⁰Ayịreji ọtata nya angịnyị nyam-ḿ tịpyọ lụmẹ, ịnịna ị-la ọkịlẹtụ ọkpẹnẹ ẹ-ẹga nya anyị nyaa go anyị nya ịlaa kpụ́ ri ajị nya o-ye ang ri ka.

¹¹Amkpaa ju agbama ọnyọọngịrị-ọngịrị, ọ gu ịSayọn ila, rwọọ ila wutẹ-wutẹ.

¹²Ọngọngọhẹ odehe ọlẹ tụ alegbeju nya ẹpwụma ịkịla-á myị aluji nyị ka jẹ-ẹ̀ be iJerusalẹm ẹpwa, juwa kele bwu ogirigba ịlụwa myị ẹnẹnẹhẹ ka.

¹³Ọ tị lịnyị ọọ-lajị nya ịhọbịrị nya alọmwụ ịlụwa bala ang onyobyi nya angịkiliya ịlụwa ịlẹ kịị ju omwigu nya angị da ẹlẹlẹhẹ-ka.

¹⁴Alegbeju nya iJerusalẹm mà kpokpookpo tụ ụgbẹyị da lala alidu, libyi nya ịwọ ị-ịnyịrọ, ọngọngọhẹ-ẹ́ myị ya ịnyịrọ gwaa ka.

¹⁵Angịnyị juwa kpaa ịkata yẹkẹẹ, “Anụ tụkịnyaa hi ẹgẹlẹ! Anụ tụkịnyaa hi ẹgẹlẹ, anụ alibyi.” Ọọwa ị juwa ga chwolo-chwolo tụ ẹpwụma-ẹpwụma da la ọngọngọhẹ ọ-taa ba ịnyịrọ kaka lẹlẹ.

¹⁶Amkpaa lịlọmwụ nyaa epepe, ọ́ kpahị nyaa kaka, ọ́ ya ihi ọhẹ bala angịkiliya ba ka, ọ́ họ alegbeju ọnahị-ị họ ka.

¹⁷Ahị yẹhị nọ ụ-ụgbẹyị gbee, ẹhị ta ọyị lẹ, ahị yẹhị rịrị gbe ụbwọ ọdada bwu ẹga nya ẹpwụma ọlẹ kọ ka chịhị da myị ka.

¹⁸Oluji kpẹhị tụụhị da ẹ-ẹga myị ẹga, áhị-ị̀ jẹdịyẹ u-ugbọdọda myị ka, ẹnụ nya igu nyahị ji ọnaabwọ, ahị gbu hụrụ lẹ!

¹⁹Ị la ata-ịmịla gu ụpa bala ogbe, ị kuhi la ọ-mwụ ịnyọ ka, áhị kpụ uhye nya ịgbọdọ, ị baahị kpata-kpata ka ụwa, ó-ri ugbileji ri, ị kụ ịnya gbehi ụ-ụwa.

²⁰Adịrahụ ọlẹ ká Amkpaa chụ, ịnọ kọọwa ahị dakụ, ị woo pyẹẹẹ. Ọwa ahị dahịhile ịnọ nyọka chẹwụ keehi hi ẹpwụma ịlẹ kị ri aluji nyahị ịnọ lẹ.

²¹Anụ ala Ẹdọm bala ala Uusi, anụ chị ọkẹkẹnị kanụ hụlọ ahụ lẹẹlẹẹ odu mẹ. Ẹnụ ká odu ka hinu wẹẹ warị, anụ ka nwa ere, pwọ ang ji lọhị-lọhị loyi mọmbọọ kpá.

²²ỊSayọn yẹ akama chajị nya ịhọbịrị nyamwụ cheju lẹ, Amkpaa-á ka kpaa nụwa ẹ-ẹpwụ nya ọnyọhị oriri kaka. Anụ ala Ẹdọm tị lẹ, ọ juwa ka yẹnụ akama, ọ ka bwuru abyịkọtọ nyanụ dodehe.