Read idege Ida Ọbaba 5 Bible Online

Ida Ọbaba 5 - idege bible

Ida Ọbaba 5

¹Amkpaa ee, aa kpịtịya nya akama ịlẹ kahị yẹ, à tị́ yẹ oyoyi ọlẹ kọ juhi-ì wẹ lẹ.

²Ọpyị nyahị ji ụbwọ nya angga, ịwa angga ye ẹpwa nyahị la lẹ.

³Ahị ri anyị-egu ị-la adịda ka, ịnahị anyị ri ịhụ-egu wuu.

⁴Ahị kaa ra enyi ene kahị ka ye nwa, ahị kaa ra ịwụ ra ịnyịnyị.

⁵Aluji kuhi la ọ-mwụ ịnyọ ka, ahị chị ẹpẹtẹkẹẹ, ị́ tị myị āhị ya ila hyà ụga ri kaka.

⁶Ahị kpa ịlọhị ka eji ha ala Ijipiti bala ala Asiriya ajị nyọka ye ang ri.

⁷Adahị igogo anyị à họ ọhọbịrị lẹ, ị́ tị jam alẹ kaka, akama ọlẹ kọ ka ri ịnyaa āhị lẹẹ yẹ lẹlẹ.

⁸Anyịhị à lẹẹ ri alegbeju nyahị lẹlẹ. Ọngọ ka gbahị kpehe hi ọngịrị nyaa-á tị ji ka.

⁹Ahị kaa ga tụ ang-ang da teleko nya ang oriri, ya ịlọhị ga ha igu u-ugbileji.

¹⁰Uhi changịrị okwookwee, ịnyịrọ nyahị wuru pwuu lala ila nya utiyo.

¹¹Ị wu ịhụ nyahị chị beji ị-ịSayọn mịlẹ-mịlẹ, ị chị anyị anyang nyahị beji ịnyịnyị e-epweji ọnyị myị ọnyị i-iJuda.

¹²Ị wu alegbeju nyahị gbilaa kaka ju ịlaa orinwa, ị́ ya ihi ọhẹ ba angịgbahị ka.

¹³Ị gbile ikolobya kpaa họ ụkụrwọ nya ang ogògò, ị ju olo nya ịwụ chụ anyị alẹng gọọọ juwa jẹdịyẹ yata.

¹⁴Angịgbahị-ị̀ hụ ọnụ nya ogirigba kaka, alụjụ hwabwọ layịlọ odudu lẹ.

¹⁵Ọkẹkẹnị ọlẹ kahị la nwụtà, ọkọkọ nya ewo ọchịchị, ida ahị kaa ba lẹlẹ.

¹⁶Okpo-adịrahụ olegbeju nyahị chabwọ kpọkọlọ, ahị ri enyi gu obyi, chajị ahị họ ọhọbịrị lẹ.

¹⁷Ọkịlẹtụ chịịhị pyẹpyẹ, egbejida-á myị ahị jẹ yọyị kaka,

¹⁸chajị ịSayọn kpụ egwawụ-egwawụ, ụwa ikirom à kaa ga tụda lẹlẹ.

¹⁹Ahụ Amkpaa tị ri adịrahụ gbe oyi myị oyi, ẹchị nyang yeji pyịyọọ.

²⁰Ịyẹ tị́ du ka nyẹẹkpẹ dahị lụka ọtata ịnyị-ị̄ị̀? À ka myị-ị̀ kpịtiya nyahị wẹẹ wẹẹ-ẹ́?

²¹Amkpaa ee, tịrịịhị ẹkpẹ, ká kpahị nyà chị ịlọng ọgụ mẹ. Tịrị ihi oligbalẹ nyahị ẹkpẹ hahị!

²²À pwahị gbe oyi myị oyi lẹ le? Agbama nyang-ńg pwuru hiihi lẹka le?