Read idege ISIKẸLỤ 10 Bible Online

ISIKẸLỤ 10 - idege bible

ISIKẸLỤ 10

¹Am chẹhị kaa yẹ ang ọkịlọlọ ọlẹ kọ juwa uhye nya egbeju nya iCherubim, ịngịhyẹ juwa uhye ọgba nyaa kọ me abwụma nya ẹchị adịrahụ ọlẹ kị họọ la ẹjwọ ọkpịnya ọlẹ kị wụrụ ịSafaya.

²Ohe Oluhye byi ọngọlẹ kọ kụrụ ịwụrụ nya ịpwụ ịkpịnya yẹkẹẹ, ka ẹpwarịrị nya ata nyang ịrụnyẹ ịlekpeleji nya ịcherubim ka chụ awụrụ-ila myị ẹpwụtụbwọ nyang chajị ka nyaa pwuu kụrụ epweji wuu.

³Ala iCherubim godayị ụwa e-edii nya ube ịgọgọ nya Ohe Oluhye ịne ká ọngọ kụrụ ịwurụ nya ịpwụ ịkpịnya ju kele, ụka ọọwa lẹ ịmwụ a myị ube ọtụguru olube ịgọgọ nya Ohe Oluhye pwẹẹpwẹẹ lẹlẹ.

⁴Ụka ọọwa lẹ ụmụmẹ nya ijata ojiji nya Ohe Oluhye a rụ bwu uhye nya iCherubim lẹ ọ ka ọnang nya ube ịgọgọ lẹlẹ. Ụka ọọwa lẹ ịmwụ a myị ube ịgọgọ wuu lẹ, ube ọtụguru a myị la ahịgboo nya ijata ojiji nya Ohe Oluhye lẹlẹ.

⁵Iru ọhọhọ nya achwọ nya iCherubim pwụ ẹpwụ nya ube ọtuguru olodehe. Iru ịwa lala omyi nya ẹla ọyaya nya Ohe Oluhye.

⁶Ụka ká Ohe Oluhye byi ọngọ kụru ịwụrụ nya apwụ ọkpịnya kọ ka chụ awụrụ-ila bwu ẹpwarịrị nya ata nyang ọ-kpa runyẹ ịlekpeleji nya iCherubim lẹ, ọọwa lẹ ọ kele kaa godayị rịrị ịkịka nya ata nyang ọkpa rụnyẹ lẹlẹ.

⁷ICherubim ọhẹ nịra ụbwọ nyamwụ kpaa lẹ ọ chụ awụrụ-ila bwu ẹpwarịrị nyaa lẹ, ọọwa lẹ ọ ya ju ọngọ kụrụ ịwụrụ nya apwụ ọkpịnya lẹ, ọ ye ila lẹ ọrụ lẹlẹ.

⁸Am yẹ nyọri ọlala iCherubim ịwẹ la ịngịhyẹ ọlẹ kị me ụbwọ nya angịnyị ehe ụwa ekpeleji nya achwọ nyaa.

⁹Am yẹ ata nyang irunyẹ ine ị ga nya ịwa hu myịrị lala ẹjwọ ọkpinya ọlẹ kị wụrụ ịBẹryl.

¹⁰Ata nyang ịrụnyẹ ịwa wuu lụmụma, ọlala nyị họ ata ịhyẹ ju ka epwụ nya ata ịkịla.

¹¹Ụka ká iCherubim a jẹdịyẹ, ata nyang ịrụnyẹ ka dịraa ịnyịnyị, ị ka yẹ gile ka ịgẹgẹhẹ ka.

¹²Ịnyịrọ nya wuu bala ẹkpẹ nyaa bala abwọ nyaa bala achwọ nyaa bala ata irụnyẹ nyaa wuu myị la egbahị dagaga ju.

¹³Am wo kị bẹkọ gboo yẹkẹẹ, ata nya ụbọchịrị.

¹⁴ICherubim ọnyị myị ọnyị wuu ju ẹpwahị ine, ẹpwahị ọhọhẹ ri ahị nya iCherubim, ẹpwahị oheye ri ahị nya angịnyị ehe, ẹpwa hị ọhata ri ahị nya ugẹbẹ, ẹpwahị ohene ri ahị nya ọchịnụ idu.

¹⁵ICherubim ịlẹ a ri ịlẹ kam yẹ ụka nya ọgbanyẹ ẹga nya Ihu ịKhẹba lẹ, ụka ọlẹ ka iCherubim a hu hwaa

¹⁶kị jẹdịyẹ, ata nyang irunye kaa dịraa, ụka myị ụka ọlẹ kị pyẹ achwọ maa nyọka hụhụ, ata nyang ịrụnyẹ kaa rụ baa kele.

¹⁷Ụka ká iCherubim a godayị, ata nyang irunyẹ kaa godayị, ụka ọlẹ kị hụ ka uhye, ata nyang irụnyẹ ka hụ baa ka uhye chajị olegu nya iCherubim ịwẹ juwa ẹpwụ nyang irunye.

¹⁸Ụka ọọwa lẹ ahịgboo nya ijata ojiji nya Ohe Oluhye a rụ bwu ọnang nya ube ịgọgọ nya Ohe Oluhye lẹ, ọrụ ka uhye-ọgba nya iCherubim lẹlẹ.

¹⁹ICherubim ịwẹ pyẹ achwọ nyaa maa lẹ ịhụ ka uhye-ọgba lụka ọlẹ kam wẹẹ kpẹhị nyam yaa lẹlẹ, ụka ọlẹ kị hụ ka uhye-ọgba ata nyang irunyẹ baa ịnyịnyị. Ị godayị ọnang nya ube ịgọgọ nya Ohe Oluhye ọla ọmwẹnụ-ụtụrụ ọọwa lẹ ogbo nya Ohe Oluhye nya ala Isirẹlụ a juwa uhye nyaa lẹlẹ.

²⁰Am kpịtịya nyori iCherubim ịlẹ m yẹ wa ekpeleji nya Ohe Oluhye nya ala Isirẹlụ ụwa Ihu iKebaalẹ.

²¹Ẹpwahị nyaa a datị hi ahị nyaa ịlẹ kam yẹ ẹga nya ihu ịKẹbaa ka ị jediyẹ kpụrụrụ kịlahị-ịlahị.

²²Ahị nyaa lala ahị nya ang ịhịhị ịlẹ kam yẹ Ihu nya ịKẹbaa. Ịwa wuu rụ kpụrụrụ kịlahị.