Read idege ISIKẸLỤ 11 Bible Online

ISIKẸLỤ 11 - idege bible

ISIKẸLỤ 11

¹Olegu nya Ohe Oluhye hum kpa ka ogirigba nya ube ịgọgọ nya Ohe Oluhye ọlẹ kọ jahị da ka ọmwẹnụ-ụtụrụ. Ọọwa lẹ am yẹ alẹng ohu kụrụ ịrụ ụwa ẹga nya ọgirigba lẹlẹ. Am yẹ ịJaasaniya ọnyị nya Assọ bala ịPẹlatiya ọnyị nya ịBẹnaya ịlẹ kị ri alegbeju nya angịnyị ụwa ẹpwarịrị nyaa.

²Ọọwa lẹ Ohe Oluhye a byim yẹkẹẹ, ọngịnyị ehe, alẹng ịwẹ a kaa me obyi nyang inyibyi bala ọ mang inyibyi jẹ angịnyị ám̀ ọ-ọpyị ọlẹ lẹlẹ.

³Alẹng ịwẹ kaa yẹkẹẹ, ụka ọlẹ kahị ka nwụ ẹpwa a ji chwẹẹ lẹka, epweji ọlẹ a ri ẹchụ ọkpang lẹ, ahị à tị́ri iyo lẹ.

⁴Chajị nya ọọwa lẹ, ọngịnyị ehe, yẹ ọmwụ taa pyịpyị mẹ.

⁵Olegu nya Ọngọlahị wẹ uhye nyam lẹ Ọngọlahị a ya ẹla jum ọnụ ta angịnyị yẹkẹẹ, anụ ala Isirẹlụ, am jẹ ẹla ọlẹ kanụ wẹẹ ya bala ang ịlẹ kanụ wẹ nwụlanọ nyọ họhọ.

⁶Anụ nwụ iru nya angịnyị ám̀ e-epweji ẹgẹlẹ gbee ka ipeje wuu myi la egu nya angịnyị lẹ.

⁷Chajị nya ọọwa lẹ, Ọngọlahị Ohe Oluhye yẹkẹẹ, egu nya angịnyị ịlẹ kanụ nwụ chụwẹ a ri iyo lẹ, epweji ọlẹ à tị́ri ẹchụ ọkpang lẹ, ma ị tị ka gonu kparụ hi epweji ọlẹ.

⁸Anụ juhi nya ẹma nyẹẹwụ ma ẹma nyẹẹwụ ọwa m tị ka kpa chịnụ ọgụ lẹ.

⁹Am ka kunu kpehe hi epweji ọlẹ am ka tụbwọ hiinu ju angga ụ-ụbwọ ị ka yẹnụ akama.

¹⁰Am ka yẹnụ akama, ẹma nyẹẹwụ ka rinu ụwa o-ui nya ọpyị nya ala Isirẹlụ ụka ọọwa lẹ anụ ka jẹ ya am a ri Ohe Oluhye lẹlẹ.

¹¹Epweji ọlẹ a jẹ ka ri ẹchụ ọ-kpụ ang nyanụ ka, anụ a tị jẹ ka ri iyo ọlẹpwụ nyamwụ ka, ma am ka yẹnụ akama ụwa ọ-oyi nya ịpyị nya ala Isirẹlụ.

¹²Ụka ọọwa lẹ anụ ka jẹm ya am a ri Ohe Oluhye ọlẹ kanụ wẹẹ bịrị ehile bala ọna ọdada nyam, ọkọkọ nyọka kpa ehile nyam kanụ wẹẹ ju ihi nya ehile nya ala epweji ịkịla ịbaanụ ba ịwẹ lẹ.

¹³Ụka ọlẹ kam wẹ kpa ọmwụ yẹ lẹ, ịPẹlatiya ọnyị nya iBẹnaya a gbu lẹlẹ, ụka ọọwa lẹ am hị myị leji yahị kụrụ ịpyị m jida byi Ohe Oluhye yẹkẹẹ, O Ọngọlahị, a ka nwụ ọng myị ọng ọlẹ kọ hi jam ọpyị nya ala Isirẹlụ wuu.

¹⁴Ọngọlahị byim yẹkẹẹ,

¹⁵Onyị nya ọngịnyị ehe, angịlẹ kị kụ ụwa iJerusalẹm juwa ya ẹla rụng bala angịkịla nyang ịlẹ wuu kị wu kpa rụ ka agba nya ẹwụ yẹkẹẹ, Angịlẹ kịị nyịi wu kpa ka agba nya ẹwụ nyị lụrụ hi Ohe Oluhye lụmẹ, nyị ka jẹ-ẹ̀ gbịgba họọ kaka, chajị nya ọọwa lẹ, ọpyị ọlẹ nyị ri ịnyịwa kịwa nyị ka ya la lẹ.

¹⁶Chajị nya ọọwa lẹ byi angịkịla nyang ịlẹ kị jaam a-agba nyẹẹwụ yẹkẹẹ, am Ohe Oluhye a nyaa epepe tụ epwoja datị-datị dalẹ, ma ọlẹlẹ wẹlẹ, am ka juwa taa ẹpwoja ọnyị myị ọnyị ịlẹ kị ji wẹ.

¹⁷Chajị nya ọọwa lẹ, ya ẹla ọlẹ kam ya jaa yẹkẹẹ, am ka tụnụ guru bwu ẹpwụ nya epwoja ịlẹ kam nyiinu epepe ka wuu, am tị ka myịmyị tịrị ọpyị nya Isirẹlụ ẹkpẹ hanụ.

¹⁸Ụka ọlẹ kị nya tịrẹkpẹ warị ị ka ta angị ibi ịlẹ kịị jaam wuu ayịreji.

¹⁹Am ka ya ọkịlẹtụ onyeewe bala olegu onyeewe haa, m ka hu ọkịlẹtụ nya ẹjwọ kparụ hyaa ọọwa lẹ am ka ya ọkịlẹtụ nya ahwiyo haa lẹlẹ.

²⁰Ụka ọọwa lẹ ị ka kpa ehile bala ọna ọdada nyam kpẹẹkpẹẹ lẹlẹ. Ọọwa lẹ ị ka ri angịnyị nyam lẹ am a ka ri Ohe Oluhye nyaa lẹlẹ.

²¹Ma angịlẹ ka ọkịlẹtụ nyaa juwa dịrẹ angị ịtịpyọ ịhọhọ, am ka yaa akama chajị nyang onyobyi nya ịlẹ kị họ. Ịnyị am Ohe Agụgụ a ya lẹ.

²²ICherubim ịwa pyẹ achwọ nyaa maa lẹ, ị dọmwụ nya hụhụ lẹ, ata nya ang ịrụnyẹ a juwa dịraa lẹlẹ. Ahịgboo nya ijata ojiji nya Ohe Oluhye nya ala Isirẹlụ juwa uhye-ọgba nyaa.

²³Ahịgboo nya ijata ojiji nya Ohe Oluhye hụ ka uhye bwu ẹpwarịrị nya epweji ọọwa lẹ ọ kaka godayị ụwa ọ-gbọdọ ọla ọmwẹnụ-ụtụrụ nya iJerusalẹm lẹlẹ.

²⁴Ụwa-ụwa ẹ-ẹpwụ nya ọyị oyeye lẹhị nya ọlegu nyam ọwa, olegu nya Ọngọlahị hum lẹ, ọkpam nya tịrẹkpẹ ka ịBabịlọn ẹga ọlẹ kị wuhi nya agba nya ẹwụ ka lẹlẹ. Ọọwa lẹ ọyị ọyẹyẹ nyam lẹhị nya olegu a kpụba ụka ọọwa lẹlẹ.

²⁵Ụka ọọwa lẹ, am yang myị ang ịlẹ ka Ọngọlahị mẹjẹm je angịlẹ kị wu kpaka agba nya ẹwụ lẹlẹ.