Read idege ISIKẸLỤ 12 Bible Online

ISIKẸLỤ 12 - idege bible

ISIKẸLỤ 12

¹Ọngọlahị ya ẹla tam yẹkẹẹ,

²Ọngịnyị ehe ee ẹpwarịrị nya angịnyị ịlẹ kị legbeju ọngịrị a ji wẹlẹ, ị ju egbahị ma ịtị jẹkaa kpa yọyị ka, ị ju arụ ma ịtị jẹkaa kpa wo ẹla ka chajị ị ri angịnyị ịlẹ kị legbeju ọngịrị.

³Chajị nya ọọwa lẹ, ọngịnyị ehe nwụla ang nyang ka rụ ka ẹga ọkịla alẹnụ jaa bwịlahị nyaa wuu mẹ. Ọrụ rụ nyang ọwa ka me ịnya ọngịnyị ọlẹ kị ka ku rụ bwigehe kaka kụ ẹga ọkịla. Ọ ri nya ịlẹhị ịla egbeju-ọngịrị la kpa lẹ, ọhẹka ị ka jaang ọlẹ ka wẹ họọ.

⁴A ju olo nyang wuu rịrị odehe alẹnụ gede-gede chajị nyọka rụ ka ẹga ọkịla. Alobyi lẹ, a rụ bwu ịlahị nyaa wuu gede-gede mẹ.

⁵Ụka ọlẹ kịị wẹ yẹng, bwuru ugulọ iwa chajị ka gba ọlo nyang kpehe bwuwa ụwa ịlahị nyaa wuu gede-gede.

⁶A hu olo nyang nọ o-omyi lụka ka ẹwụ wẹ ke ịlahị nyaa wuu chajị ka kpa kpehe, a yang kụrụ ahị nyang chajị kaka je ẹgẹlẹ kaa wẹ ka ka. Am hung nyang ọjuẹjẹẹ ha ẹpwa nya ala Isirẹlụ wuu lẹ.

⁷M họ kpẹẹkpẹẹ jaabwọ ọlẹ ka Ọngọlahị byim ya am nyị họ, m ju olo nyam wuu lẹnụ jaabwọ ọlẹ ka angịlẹ kị juwa ku rụ bwu ẹgẹhẹ ka ẹga ọkịla kaa họọ, alobyi m bwuru ugulọ ịwa lụbwọ nyam ọọwa lẹ mhu olo nyam kpehe bwuwa lẹ, m ya ọlo nyam nọ omyi lẹ, m rụ jaa bwịlahị nyaa wuu lẹlẹ.

⁸Ẹnụtụrụ ọkịla lụtụrụ lẹ Ohe Oluhye a ya ẹla tam yẹkẹẹ,

⁹Ọngịnyị ehe ee ala Isirẹlụ ịlegbeju ịngịrị wẹ juwa tọng wo yẹkẹẹ, ịyẹ à tị́họ ịwẹ?

¹⁰Byaa ya am Ọngọlahị Ohe Oluhye nyị yẹkẹẹ, Erụ ọlẹ kam du gu alegbeju ịlẹ wuu kị kaa kpehị rịrị iJerusalẹm bala angịlẹ kị nọ ẹpwa ụwa wuu.

¹¹Byaa yẹkẹẹ, ang ọlẹ ka họ wẹẹ ọ ri ang ọjuẹjẹẹ nyang ọlẹ kọ ka họ taa, ẹwụ ka kwaa rụ hi ẹpwa nyaa ị ka waa kpa rụ.

¹²Alegbeju ị kpẹhị rịraa ka golo nya guru ụkpụrọkọ alobyi ị ka kpa kpehe bwu iwa nya ugulọ ịlẹ kị chị. Ị ka yang chahị nyaa chajị kị ka jẹ ẹgẹlẹ kị wẹẹ ka datị ka.

¹³Am ka da ụgbọọwụ nyam gbọọ ọ ka ri ọnya wọọ, ọọwa lẹ am ka kpọọ ka ịBabịlọn ọpyị nya ala iKalịdịan lẹlẹ ma ọ tị ka jẹ ụwa ine koka gbu ụwa ka.

¹⁴Am ka nyi angịlẹ wuu kị dagaga jwoo bala angịlẹ kị kaa dọọ ụbwọ bala ịsọja nyamwụ epepe tụ ẹga myị ẹga wuu da. Ọọwa lẹ am ka gba ẹma nyẹẹwụ kpa kwaa lẹlẹ.

¹⁵Ị ka jẹ ya am nyị ri Ohe Oluhye ụka ọlẹ kam ka kwaa ka epwoja bala o-nyaa epepe tụ ẹpwụma wuu da.

¹⁶Ma am ka họ angịhyẹ pyịnyẹng ẹ-ẹpwụ nyaa ka be bwu ẹpwụ nya ẹwụ bala imyi ọnwụnwụ bala ẹdụrụ chajị ka ka jẹ-ẹ̀ ya ang ịtịpyọ nyaa ịlẹ kị họ ụwa ẹpwụ nya epwoja ọnyị myị ọnyị ọlẹ kị ka, ọọwa lẹ ị ka jẹm am nya ri Ohe Oluhye lẹlẹ.

¹⁷Ọngọlahị ya ẹla tam yẹkẹẹ,

¹⁸Ọngịnyị ehe ee, che bwebwebwe ụka ka juwa riang, ka hu biri biri biri luhi ojuju ụka ka juwa nwa enyi.

¹⁹Ka ya je alẹpwụma nya ala iJerusalẹm ịlẹ kị juwa Isirẹlụ, am Ohe Oluhye Agụgụ nyị yẹkẹẹ, nyị ka ri ang luhi luhi nyị tị ka nwa enyi lụka ọchịchị, chajị nyị ka go ang myị ang ilepweji nyaa kpa rụ wuu chajị nya ọhịhị nya agbụrụ ọlẹ kọ angịlẹ kị kụ am ẹgẹlẹ wuu la.

²⁰Epweji ọlẹ kọ myị lẹẹ langịnyị ị ka taa ayịreji ọọwa lẹ epweji a ka da luhwo-luhwo lẹlẹ.

²¹Ohe Oluhye ya ẹla taam yẹkẹẹ,

²²ọnyịnya ọngịnyị ehe, ịyẹà tị́ri etu nyanụ ala Isirẹlụ ọlẹ kị ka da yẹkẹẹ, Ụka lụrụ lẹlẹ ọmwụ ọyẹyẹ a ri nya ịlẹhị kaka?

²³Lẹ ya ẹla ọlẹ kam Ohe Oluhye ya uhye nya ẹla nya etu ọwẹ jaa yẹkẹẹ, am ka da etu ọwẹ yi gbanggbang lẹ, ọngọngọhẹ a ka myịmyị da etu ọwẹ am ọpyị nya Isirẹlụ kaka. Chajị nya ọọwa lẹ, byaa yẹkẹẹ, ẹnụtụrụ ọwa nyị juwa wẹ ọmwụ ọyẹyẹ nyị tị ka họ cheju.

²⁴Am ọpyị nya Isirẹlụ wuu tị lẹ, ọmwụ ọnọọkịla ọyẹyẹ lee ugono ọ-hụ angịnyị ahị a ka ji kaka.

²⁵Am Ohe Oluhye ka ya ẹla taa ẹla ọwa tị ka họ jịra, ịka tata kpong-kpong ene kị ka họ jịra ka. Ala nyam ịwa ka họ jịra tọnụ ahị, anụ angị legbeju ọngịrị, am juwa ya ẹla, am tị ka họ ẹla ọwa, ịnyị am Ọngọlahị Ohe Oluhye a ya lẹ.

²⁶Ọngọlahị byim yẹkẹẹ,

²⁷Ọngịnyị ehe ee, ala Isirẹlụ me ka ọyị ọyẹyẹ bala ọmwụ ọyẹyẹ ọlẹ ka yẹ ri ẹlẹhẹ ọlẹ kọ hi tata ene kọ ka họ.

²⁸Chajị nya ọọwa lẹ, byaa ya am Ọngọlahị Ohe Oluhye nyị yẹkẹẹ, ẹla ọhẹ-lọhẹ ọlẹ kam ya a ka nọ tata ene kọ ka họ kaka. Ela ọyaya nyam Ohe Oluhye Agụgụ a wẹ lẹ.