Read idege ISIKẸLỤ 13 Bible Online

ISIKẸLỤ 13 - idege bible

ISIKẸLỤ 13

¹Ọngọlahị ya ẹla taam yẹkẹẹ,

²Ọngịnyị ehe ee yẹ ọmwụ tụ alọmwụ ọnọọkịla ịla Isirẹlụ ịlẹ kị-ị yẹ ọmwụ bwu irya nyịlaa pyịpyị. Byaa a kị ke ụrụ lọmyi nya ẹla ọyaya nya Ọngọlahị.

³Ohe Oluhye Agụgụ yẹkẹẹ, ayịreji ọtata ri nya alọmwụ ịluchi ịwẹ. Ẹla ọlẹpwụ nya irya nya ịlaa bala ọyị ọyẹyẹ nyịla ịka ya lẹ.

⁴Anụ ala Isirẹlụ ee, alọmwụ ịwẹ la laa ichiwanụ ịlẹ kịkaa juwa ẹpwụ nya epweji ọlẹ kọ juwa ta ayịreji.

⁵Alọmwụ ịwaa a tị me ẹga ka egwalọ bene ha Isirẹlụ chajị kịị ka jẹ-ẹ̀ godayị kpọngkpong gbe ẹwụ ọdada ọla ẹnụtụrụ nya Ọngọlahị ka.

⁶Oyi ọyẹyẹ bala ọmwụ ọyẹyẹ nyaa ri ọnọọkịla, ị juwa mọnụ ya Ọngọlahị nyịị yẹkẹẹ, ụka ọlẹ ka Ọngọlahịà tị́dọmwụ diaa ẹrụ kpong-kpong ka, kpọkpọọkpọ ị juwa yẹhị rịrị ka ẹla nyịlaa ọwa kahọ jịra.

⁷Ọyị ọyẹyẹ bala ọmwụ ọyẹyẹ ọnọọkịla a yẹ wẹ ụka ọlẹ ka wẹẹ ya nya Ọngọlahị nyịị yẹkẹẹ, ụka ọlẹ kam dọmwụ ya ẹla ka lẹ kaa?

⁸Chajị nyọwa lẹ, Ọngọlahị Ohe Oluhye yẹkẹẹ, chajị nyọlẹ ka alọmwụ ịwẹ juwa yọyị ọnọọkịla bala ọyẹ ọmwụ ọnọọkịla lẹ, ọ wụm am Ohe Oluhye ẹjẹ taa lẹ.

⁹Am Ohe Oluhye ka yẹnụ anụ angị yọyị ọnọọkịla bala ọyẹ ọmwụ ọnọọkịla akama, anụ a ka juwa ẹpwarịrị nyangịnyị nyam ụka ọlẹ kịị juwa me ẹla kaka lee ọ ka dọmwụ da ẹnyị nyanụ ẹpwụ nya ụpwụ ọdẹnyị ju nya ala Isirẹlụ ka lẹẹ ọ ka nya tịrẹkpẹ ka ọpyị nya ala Isirẹlụ myịmyị kaka. Ụka ọọwa lẹ anụ ka jẹ ya am nya ri Ohe Oluhye Agụgụ lẹlẹ.

¹⁰Chajị alọmwụ ịwẹ hụ angịnyị nyam ahị bwula ọ yẹkẹẹ, okpunyi ji, ụka ọlẹ ka okpunyi a ji ka, ụka ọlẹ ka angịnyị nyam a me ugulọ hule hule, angịwẹ ka kwoo wuu la arị onyoowuru.

¹¹Byi alọmwụ ịwẹ egwalọ ịwẹ nyị ka kpụ mileji am ka du ukpenyi ọtụka-ọtụka bala ọ do ajwọ bala ọda igbachịwụ ọnyọọngịrị tụrwọ mileji.

¹²Ụka ká egwalọ nyanụ ịwa a kpụ angịnyị ka dayi lọ tọnu wo ya egwalọ ịlẹ kị nyi kwo laryi onyoowuru nyị tị lee?

¹³Lẹẹlẹ, Ọngọlahị Amkpaa yẹkẹẹ, ẹ-ẹpwụ nya agbama nyam am ka du igbachịwụ ọtụka bala ọ do ukpenyi bala ọ do ajwọ bwu uhye-ọgba kaa ta ugulọ ọwa ayịreji.

¹⁴M̀ ka gbe ịnịịkịla ịlẹ kanụ kwo hịla-hịla lala egwalọ wẹ wuu junu, kam ka tụrụ ugulọ nya iJerusalẹm beji kpalị-kpalị. Ọ ka tụrụ kaka nwụnụ la ajwọ ilitiwe nyamwụ wuu ka chụwa odehe. Ụka ọọwa, anụ ka jẹ ya am nyaa ri Amkpaa lẹ.

¹⁵Am ka be ugulọ ọlẹ kanụ kụ laryị onyoowuru ene jukeji, omwiji nyamwụ ka dụwa hwoo. Ụka ọlẹ kọ kpụ ọ ka nwụnụ wuu ọọwa lẹ anụ jẹ ya am a ri Ohe Oluhye lẹlẹ. Am ka ju agbama ta ugulọ ọọwa bala angịlẹ kịị kwọ aryị onyoowuru. Ụka ọọwa lẹ am ka byinu ya ugulọ bala angị kwokwo ta ayịreji lẹ.

¹⁶Ịwa kpangga à ri alọmwụ ịlẹ kị ya iJerusalẹm ọmwụ ya ịwa nyịị yọyị nya okpunyi ojiji ụka ọlẹ ka okpunyi à tị ji ka, ịnyị Ọngọlahị Ohe Oluhye a ya lẹ.

¹⁷Ọọwa, Amkpaa-à byi Isikẹlụ yẹkẹẹ, Ọngịnyị ehe ee, ya ẹla tụ anyang ịlẹ kị wẹẹ, yẹ ọmwụ bwu irya nya ịlaa. Chẹhị kaa yẹ anyang nyanụ ịlẹ kịịwẹ yẹ ọmwụ bwu irya nyịlaa wẹ, lẹẹ yẹ ọmwụ taa pyịpyị mẹ.

¹⁸Ka byaa ya Ọngọlahị Ohe Oluhye nyị yẹkẹẹ, iyoo ka juwa hanụ anụ anyang ịlẹ kanụ chị ogbo ịdụụbwọ ha angịnyị bala ọ-họ ang ọ-chị egbeju ha angịnyị jaabwọ myị abwọ kịị luhye kaa ba, chajị ká angịịwa ka yẹ ri ori o-wu angịnyị wu. Anụ ka họ ọhịhị nya angịnyị nyam ka wori ka ịnyanụ kajẹẹ gba kpehe wẹẹ?

¹⁹Anụ hu ẹpẹpẹ jum ịlahị nya angịnyị nyam chajị kanụ ka ye ibalị myị ẹpwụtụbwọ bala eku nya ịka ịmanyị-ịmanyị. Anụ nwụ angịnyị ịlẹ kị pwọku kị ka gbu ka, anụ tị chị angịlẹ kị pwọku kị ka gba da, bwula ọnọọkịla nyanụ ịlẹ kanụ me je angịnyị nyaam kịtị myị ke ụrụ lanụ.

²⁰Chajị nya ọọwa lẹ, Ọngọlahị Ohe Oluhye yẹkẹẹ, ogbo ịlẹ kanụ họ da angịnyị ụbwọ kanụ wẹẹ kpa wu ọhịhị nyaa jaabwọ kị ka wu ịchịnụ wụm ẹjẹ lẹẹ am ka chiaa eku hyaa ụbwọ kị ka lịlaa.

²¹Am Ohe Oluhye ka gu angịlẹ kanụ ya kụrwaa ahị ene hyaa chajị kam ka gbaa kpehe bwu ẹpwụtụbwọ nyanụ gbe oyi myị oyi, ọọwa lẹ anụ ka jẹ ya am a ri Ọngọlahị Ohe Oluhye lẹlẹ.

²²Anụ họ ọkịlẹtụ kpụ alabwẹla inyịla enyi bwula ọnọọkịla imeme nyanụ, ma am à tị́họ ọkịlẹtụ kpa enyi, ka, anụ da chichi ju alabwẹla inyibyi ọhụ chajị kị ka juwa kịlahị ẹpwụ nyang inyibyi ọhọhọ nya irya ọyẹda kị ka chị ọhịhị nyaa da.

²³Chajị nya ọọwa lẹ, anụ a ka myịmyị yọyị ọnọọkịla lee ọyẹ ọmwụ ọnọọkịla kaka, am ka gba angịnyị nyaam kpehe bwu ẹpwụtụbwọ nyanụ. Ụka ọọwa lẹ anụ ka jẹ ya am a ri Ohe Oluhye lẹlẹ.