Read idege ISIKẸLỤ 14 Bible Online

ISIKẸLỤ 14 - idege bible

ISIKẸLỤ 14

¹Angịgbahị nya ala Isirẹlụ ihyẹ wẹ ẹga nyam kaa hụhụ chahị jum.

²Ọọwa lẹ Ohe Oluhye a ya ẹla taam yẹkẹẹ,

³Ọngịnyị ehe ee, angịwẹ ya ijiga nyaa kpịịbaa ụwa ọkịlẹtụ nyaa ọọwa lẹ ị hu ọhọbịrị nyaa ri ang ọdụgbẹyị kị ka kịlata lẹlẹ: chajị nya ọọwa lẹ, am ka ya iwe da haa kị ka tọm ẹla wo wẹẹ?

⁴Aa ya ẹla taa ka byaa yẹkẹẹ, Ọngọlahị Ohe Oluhye nyị ya ọngọngọhẹ am ọpyị nya ala Isirẹlụ kọ ya ijiga nyamwụ kpịbaa ụwa ọkịlẹtụ nyamwụ kọ tị hu ọhọbịrị nyamwụ ri ang ọdụgbẹyị kịlaa ata kọ tị jam wẹ ẹga nya ọlọmwụ nyọka tịtọ kọ ka wẹla bwu ẹga nyam alẹ, am Ohe Oluhye ka waa ẹla pwoku iru nya ịhọbịrị ịla ọkịlẹtụ nyaa ịlẹ kị kpa warị.

⁵Am ka họ ịnyị chajị kam ka myịmyị ye ọkịlẹtụ nya ala Isirẹlụ ịlẹ kị rụ hwahị ba ijiga tịrẹkpẹ.

⁶Chajị nya ọọwa lẹ, aa byi ala Isirẹlụ ya ọwa Ohe Oluhye nyị ya nyị yẹ irya da hi ijiga kịị nyị jahị nyaa kpata bwu ẹpwụ nya ang ịtịpyọ nyaa ịlẹ kịịnyị họ wuu mẹ.

⁷Chajị ọngọngọhẹ ọlẹ kọ ri ala Isirẹlụ lee angga ịlẹ kị dọmwụ warị kaa kwam ọpyị nya ala Isirẹlụ kụ kịtị ya ijiga nyaa kpịbaa ụwa ọkịlẹtụ nyaa lẹẹ ọ hu ọhọbịrị nyaa ri ang ọdụụgbẹyị kịlaa ata, kịtị wẹ ẹga nya ọlọmwụ nyọka tọwo nyọka jẹ irya nyam aalẹ, am Ohe Oluhye ka waa ẹla lịlọm.

⁸Am ka yaa lẹhị onyobyi m ka haa ang ọlẹ ka angịnyị ka yẹ juẹjẹẹ bala ọ họ kị ka ya ẹla rwaa, m ka myịmyị chaa ebwo hi ojịra-jịra nya angịnyị nyam chajị kị ka jẹ ya am a ri Ohe Oluhye lẹlẹ.

⁹Ori ka ọlọmwụ a tị yẹ ọmwụ kpẹẹkpẹẹ ka aalẹ, am Ohe Oluhye a ya ụgbaa jwoo ọnụ lẹ, m tị ka nịraa ụbwọ nyam kpaa ka uhye nyamwụ, m ka tọọ ayịreji hi ẹpwarịrị nya angịnyị nyam ala Isirẹlụ.

¹⁰Ọhọbịrị nyaa tị ka juhye nyaa, akama ọlẹ ka ọlọmwụ bala ọngọlẹ kọ kaa tọ ọlọmwụ ka yẹ ka la ụma ọkpokpo.

¹¹Ori kam họ ịnyị lẹ, aalẹ ala Isirẹlụ a ka hwahị him lee ọ chịlaa iri la ịhọbịrị kaka. Ị ka ri angịnyị nyam am Ohe Oluhye nyaa, ịnyị Ọngọlahị Ohe Oluhye a ya lẹ.

¹²Ọngọlahị ya ẹla taam yẹkẹẹ,

¹³Ọngịnyị ehe ee, ori ka alẹpwụma a họ ang onyobyi bam kị chịla o-hu ọkịlẹtụ haa ka aalẹ, m ka nịra ụbwọ nyam kpaa ka uhye nyaa m ka ta ẹga kị kaa kpa angị riri nyaa bwu ayịreji bala ọ du uhii bala imyi ọnwụnwụ, ka ẹpwụma ọwa bala nwụ angịnyị bala iyo ịlụwa.

¹⁴Ọ dọmwụ riri ka iNowa bala iDanẹlụ bala iJob a juwa ji ẹ-ẹpwụma ọwa, abwẹla ịnyịịla nyaa ịlẹ kịị họ a ka chị ọhịhị nyaa da lẹ.

¹⁵Ọ ri kam du iyo ịnyịịngịrị tu ẹga myị ẹga epweji da kịị ta angịnyị ayịreji kọ laa kpụ angịnyị a ka dọmwụ kpehe bwu ịgẹhẹ ka ẹga ọkịla myị ka.

¹⁶Ọdọmwụ riri ka alẹng angị ịta ịlẹ kam ya wẹ a juwa ji, nyịlẹhị-lẹhị jaabwọ kam Ohe Oluhye Agụgụ juwa hịhị lẹ, ịwa a dọmwụ ka jẹ-ẹ̀ chị anyị nyaa ịlẹ kị ma da ka, ọhịhị nya ịlaa kem ịjẹka chịda lẹ, ẹpwụma wuu tịka ta ayịreji.

¹⁷Lee ori kam họ kị dẹwụ ẹ-ẹpwụma ọwa, kam yẹkẹẹ, ẹwụ ọdada a jam e-epweji ọlẹ mẹ, kọ ri kam ta angịnyị ịlụwa bala iyo ịlụwa wuu ayịreji.

¹⁸Alẹng angị ịta ịwẹ kam ya wẹ a juwaji wẹẹ jaabwọ kam Ohe Oluhye Agụgụ juwa hịhị lẹ, ịdọmwụ ka jẹ-ẹ̀ chị anyị nyaa ịlẹ kịma da myị ka, ọhịhị nyịlaa keem ịjẹka chịda lẹ.

¹⁹Lee oriri kam du ẹdụrụ ka ẹpwụma ọwẹ bala ọ du agbama nyam kele kaa chị ịwọ, kịta angịnyị bala iyo ịlụwa ayịreji.

²⁰Oriri ka iNowa bala iDanẹlụ bala iJob a juwa, nyịlẹh-ịlẹhị jaabwọ ọlẹ kam Ohe Oluhye Agụgụ juwa hịhị lẹ, ịdọmwụ ka jẹ-ẹ̀ chị anyị nyaa ịlẹ kịị ma da myị ka, ịwa ayịdang a ka chịda bwula abwẹla ịnyịịla nyaa ịlẹ kịị họ lẹ.

²¹Ọngọlahị Ohe Oluhye yẹkẹẹ, oyinaà tị́ ka gwọlẹ ọlẹ kam ka du akama inyibyi ine ịlẹ kịị ri ẹwụ ọdada bala imyi ọnwụnwụ bala iyo iwu angịnyị ri bala ẹdụrụ ọ ta angịnyị ayịreji chị iJerusalẹm ọgụ kị ka ta angịnyị bala iyo ịlụwa ayịreji.

²²Jaabwọ myabwọ kọ tị la, anyị alẹng bala anyị anyang ka hi gbakpehe bwuwa. Ị ka kpehe anụ ka yaa, ụka ọlẹ kanụ yẹ ọgụ ẹpẹtẹ bala abwẹla nyaa anụ ka mii nyọrẹkẹ akama ịlẹ kam yẹ iJerusalẹm pwokwo nyịlẹhị.

²³Ụka ọwa anụ ka la ẹjẹ ọkpụkpụ nyori ang ịlẹ wuu kam họ ta ala iJerusalẹm lẹ, ḿ haa ododu ka, ịnyị Ọngọlahị Ohe Oluhye a ya lẹ.