Read idege ISIKẸLỤ 16 Bible Online

ISIKẸLỤ 16 - idege bible

ISIKẸLỤ 16

²“Ọngịnyị ehe ee, bwuru dodehe ya je iJerusalẹm ang inyibyi ịlẹ kọ họ.

³Ya joo ẹla ọlẹ kam am Ọngọlahị Amkpaa wẹẹ ya tọọ ịịlẹ mẹ: ‘Ọla iKenan ā ri lẹ. Adang ri ọla Amọ, ịnang ri ọla iHiiti.

⁴Ụka kị dọmwụ mang lẹ, ọngọngọhẹ-ẹ́ chịng ẹwụ lee o-hyong enyi, wụng ịma bala ọ-ya apwụ da kụrụng ka.

⁵Ọngọngọhẹ jujwo nyang kpụ ị ka yẹng ahyẹẹrwẹrwa kpahị jung ịịwẹ ka. Ụka kị mang, á há ọngọngọhẹ ka. Ị hung kpa ka dụwa ẹ-ẹpwụmẹ.

⁶“ ‘Ọọwa, m̄ wẹẹ chịpwụrụ lẹ, m̄ yẹ ka juwa rị ebilo ẹ-ẹpwụ nya ịwọ nyang lẹlẹ. À ri ịwọ-ịwọ wuu, ḿ tị pẹhing ā gbu ka.

⁷M̀ kpang, ā nwà gbọdọ-gbọdọ lala okoji. À nwà kpụrụ-kpụrụ bala ọ-gbọng kpụ ā nwà ọnyang. Amẹ nyang gba rịrị kokooko hiigu-hiigu, linyi nyang gba pyọlọ-pyọlọ. À tị ji lọhị-lọhị.

⁸“ ‘Ụka kam myịmyị chịpwụrụ, m̀ yẹ jaabwọ ká nwà ọnyang gbịlẹ-gbịlẹ. M̀ ya awụrụ nyam kụrụng hi oyoyi nya o-ji lọhị-lọhị nyang. M̀ myị ọnụ nyọka yeng-ng ye kpụ am Ọngọlahị Amkpaa nwa iro bala ahụ. Ọọwa, ā ri nyam lẹlẹ.

⁹“ ‘Ọọwa, lẹ m̄ chị enyi hyong gbịlẹ-gbịlẹ lịwọ nyang ịwẹ lẹ, m̄ gu ida wụng lẹlẹ.

¹⁰M ya ịwụrụ ịnọmwụ ju ịnyịịla-ịnyịịla ịlịnya-lịnya kụrụng, ya egbatẹ nya egba nya iyo jung.

¹¹M̀ ya ịjang ịdụụbwọ bala idoomyi dang.

¹²M ya ọmapẹ o-ku okwinyi kung bala ọ-ya ang i-gu arụ gung bala okpo ọkụrụ egbeju ọnyịịla-ọnyịịla kụrụng.

¹³M̀ họng ịnyangga lokpoko ịgọm bala okpoko onyoowuru. Ịwụrụ nyang ri ịlẹ kị ga lịpwụ ịnụnụ bala ịnọmwụ ju ịlẹ kị lịnya. Ang oriri ịlẹ kị há gụ wuu lala ịkaa ịnyịịla-ịnyịịla bala inwa bala ida nya olivu ā kaa ri lẹ. Ụhị nyang chị ahị ịraapya. À lala adịrahụ ọnyang.

¹⁴Ohi oruru nyang pyẹ yịrị odehe yịrị ọọ-lajị nya ụhị onwuro-nwuro nyang. Am Ọngọlahị Amkpaa-à ri ọngọ họ ká ụhị nyang kpẹ̀hị lụmẹ ịnyị lẹ.

¹⁵“ ‘À tị́ kpụnịrọ ụhị ọháha nyang lẹ, ā chajị nya ohi oruru nyang pyẹ ụkụ da ha anyabalịwụ ọnyị myị ọnyị kọ wọọnụ pile tang lẹlẹ.

¹⁶À ya ịwụrụ nyang ịhyẹ bá ang ẹga ká ka kpụ ijiga. Ụwa ā tị kaa họ akpara nyang lẹ. O-me ọlanyị à tị́-ị̀ wẹ?

¹⁷À nwụla ang ịdaabwọ bala ang idoomyi nya okpoko ịgọm bala okpoko onyoowuru ịlẹ kam ya hang lẹ, ā ya họ ekpeku alẹng lẹ, ā juwa kpụ eteji haa lẹlẹ. Ọwẹ ri ụya ọ-họ bam.

¹⁸À go ịwụrụ ịnọmwụ ju ịlẹ kam ya hang kụrụ ekpeku ịwẹ. À ya ida nya olivu bala ịtangare ịlẹ kam ya hang ha ọhaha ha ekpeku ịwẹ.

¹⁹Ang oriri ọlẹ kam ya hang tụ ida bala inwa, à gyaa kpa kịla iya ha ijiga. Am Ọngọlahị Amkpaa yẹ ọhọhọ nyang ịwẹ wuu.

²⁰“ ‘A go anyị nyang anyang bala alẹng ịlẹ ka ma ham kịla iya ha ijiga ịwẹ. Akpara ọhọhọ nyang lang nya ẹla ochiche a da ká

²¹juwa gom anyị nwụ bwula ọ-yaa kịla iya ju ila ha ijiga lẹka le?

²²Ụka ká wẹẹ họ ang ịtịpyọ ịwẹ wuu lẹ, á jẹ kpịtịya nya ụka nya enjwo nyang chẹẹ ka. Ụka ọọwa, à tị́ ji lọhị-lọhị juwa rị ebilo ẹ-ẹpwụ nya ịwọ nya ịlọng.’ ”

²³Ọngọlahị Amkpaa yẹkẹẹ, “ ‘À ri enyi gu obyi lẹ! Ang inyibyi ịlẹ ká họ wuu-ú nwang ka,

²⁴à nwụ ada ị-kpụ ijiga ọ-ọka nya ụgbẹyị ọnyị myị ọnyị bala o-juwa họ akpara.

²⁵À kpa ụhị nyang tudu ịpyị, juwa kpa ịlọng dịnya ha ọng myị ọng kọ juwa chịpwụrụ. Ịị họ akpara gụ ọwẹ wẹẹ-ẹ́?

²⁶A myị ala Ijipiti ịlọnaabwọ ị-họ imyi nya ịnyịrọ ịwẹ kpang ka ube dala angịlẹ ká la ene. À kpa akpara ọhọhọ nyang ọwẹ du agbama jum.

²⁷“ ‘Ịnyị à du kam hu ụbwọ nyam hwaa yẹng akama, chị oyi nya ọpyị ọlẹ kam ya hang hi nwẹẹrịị wẹ lẹ. M̀ hung ju ala iFilisitiya ịlẹ ká waa ẹjẹ lala ịngịngịhyẹ ụ-ụbwọ. Abwẹla onyobyi nyang ọwẹ dọmwụ haa ịwa ayịdang ohu.

²⁸“ ‘À họ akpara ta ala Asiriya ịnyịnyị, chajị o-wung ọnụ lẹka. Kpọkpọọkpọ ọ́ tị myịmyị wung ọnụ ka.

²⁹À họ akpara ta ala ịBabịlọn alẹpwụma ịlẹ kị ri alọhị ịtụka. Ọ́ tị wung ọnụ ka lala onyogo.

³⁰“ ‘Am Ọngọlahị Amkpaa jam bying yẹkẹẹ, ọkịlẹtụ nyang chakpa tà atịra! Ịnyị à du ká họ ang ịlịịwẹ wuu lala ọlakpara ọ-jẹ oyoyi ka lẹ.

³¹À nwụ ube ube ọ-kpụ ijiga bala ịnya akpara ọhọhọ ọ-ọka nya ụgbẹyị ọnyị myị ọnyị. Ị́ họ kpá á tịị ye okpoko bwu ụbwọ nyaa lala alakpara ịkịla ka.

³²À lala ahụ ọlụya ọlẹ kọọ ri ba angga ọkọkọ nya ọrụmwụ.

³³Alakpara ịkịla ka ye okpoko, ịnyang-ńg tị lịnyị ka. Ahụ à kaa kụ ụwa ga alẹng nyang ang-ahị, chaa ikiriju kị ka wẹ ẹga nyang lẹ.

³⁴À datị hi alakpara ịkịla wuu. Ọngọngọhẹ-ẹ́ tụng tutu kaka ri ọlakpara ka. Ị́ị̀ nwụng uri ka. Ahụ à dachichi kaa nwaa uri lẹ! À datị kụma!’ ”

³⁵“Lẹẹlẹ, iJerusalẹm ọlakpara ee, wo ẹla ọlẹ ká Amkpaa wẹẹ ya mẹ.

³⁶Ọ yẹkẹẹ, ‘À ya ịlọng da lọhị-lọhị lala ọlakpara, pẹhi ịlọng ha angị háng há. À kpụ eteji ha ekpeku. À nwụ anyị nyang kịla iya ha ijiga.

³⁷Ajị nya ọhọhọ nyang ịwẹ lẹ, m̀ ka kpa alakpa nyang, angị ji igu tang ịlẹ kị háng há tụ ịlẹ kị háng há ka warị kaka tụgurung. Ọọwa, m̄ ka ying apwụ ji lọhị-lọhị kịịwa wuu ka jẹ oyoyi nyang lẹlẹ.

³⁸M̀ ka ya eje wung chajị nya ọlụya bala ọngọ nwụ angịnyị oriri nyang. M̀ ka ya eje nya igu ọnyẹẹgẹga wung ẹ-ẹpwụ nya agbama nyam.

³⁹M̀ ka yang jwaa ụ-ụbwọ, kị ka tụrụ ebe nya ijiga bala ịnya akpara nyang. Ị ka pwọng ịwụrụ tụ ịjang nyang wuu kpa rụ hing dụwa lọhị-lọhị.

⁴⁰Ị ka diro iru nya angịnyị kaka da ajwọ nwụng. Ọọwa, ị ka wọng pẹtẹ-pẹtẹ lige nyaa lẹlẹ.

⁴¹Ị ka chị ẹpwa nyang wuu ila, yẹng akama a-ahị nya iru nya anyang. M̀ ka hung abwọ la ọlakpara oriri bala ọ-họ ká ka hịnyọ la ọ-ya ang-ahị ga angị háng há.

⁴²Ụka ọọwa, agbama nyam à ka myị lẹ, ijiiji ọlala nyam ka kpụba lẹ, m̄ ka hụ lokem lẹlẹ. Ḿ tụtụm ka wụ ẹjẹ kaka.

⁴³À deeri jaabwọ kam kpẹhị rịrịng lụka nya enjwo nyang. À du agbama jum bwula ang ịwẹ wuu ká họ. Ịnyị à du kam kpa akama ịwẹ wẹ uhye egbeju nyang kwiwa lẹ. À họ ang inyibyi ịwẹ wuu ene kaa họ akpara baa u-uhye. Am Ọngọlahị Amkpaa-à ya ẹlẹwẹ lẹ.

⁴⁴“ ‘Yẹ mẹẹ, angịnyị ka kpa ẹla nyang ahụ iJerusalẹm da etu yẹkẹẹ, “Ụnyịrẹ-ẹ́ẹ̀ ma ọnyị, ọnyị-ị̀ me ẹna ka.”

⁴⁵Ịnang tịtị mang yẹẹyẹẹ. Ịnang tị́ nyẹẹkpẹ da ọrụmwụ bala anyị nyamwụ. À me aanang anyang ịnyịnyị. Ọrwaa waa ẹjẹ, anyị nyaa waa ẹjẹ. Ahụ bala epweji ịkịla aanang lẹ, ịnanụ tị́ bwu iHiiti. Adanụ tị ri ọla Amọ.

⁴⁶“ ‘Ọnyịnang ọnyang ọgbahị à ri ịSameriya kọ kụ ẹ-ẹtẹ nyang lepweji ichiche nyamwụ lẹ. Ọnyịnang ọnyang ochiche ri ịSọdọm kọ kụ ka edii nyang lepweji ichiche nyamwụ ịnyịnyị.

⁴⁷Ọ-ba ang onyobyi ọhọhọ nyaa jẹ ịịwẹ kem á nwang ka. Ẹ-ẹpwụ nya ẹhị ọ-mwụ biri, ang onyobyi ọhọhọ nyang la yomo-yomo gụ ịnyaa wuu.

⁴⁸“ ‘Am Ọngọlahị Amkpaa-ā ya jeng nya ịlẹhị-ịlẹhị ká wo mẹ, ịSọdọm ọọnang bala anyị anyang nyamwụ-ụ́ họ ang onyobyi pwụ ẹgẹhẹ nya ịlẹ kaahụ bala anyị anyang nyang họ-ọ̀ wẹ ka.

⁴⁹Ang ịtịpyọ ịlẹ ká ịSọdọm bala anyị anyang nyamwụ họ ri ị hi ọbọọchẹ. Ị ye ang ri lẹpwụ kpọbọ-kpọbọ, ị́ tị myị da alẹbyahị bala angị ju la ọlọlọhẹ-ka ụbwọ ka.

⁵⁰Ị hi ọbọọchẹ bala ọ-la egbeju-ọngịrị juwa họ ang ipwọku-ka ị-ịlahị nyam. Ịnyị à du kam taa ayịreji jaabwọ kanụ jẹ-ẹ̀ wẹ lẹ.

⁵¹“ ‘ỊSameriya-á họ ang onyobyi pwụ ẹhya nya ịlẹ ká họ ka. A họ ang ịtịpyọ gụ ịlẹ kị họ wẹẹ. Ị́ chụnụ pwoku awụlẹ, ịSọdọm bala ịSameriya aanang anyang há gụng pẹ̀tẹ-pẹ̀tẹ.

⁵²Lẹẹlẹ, à ka kpa olo nya oyoyi ọwẹ ụbwọng. Ang onyobyi ọhọhọ nyang lụmẹ gbee ká aanang mwọọgịlẹ chị hwehwe gụ ịnyang lẹ. Kpa oyi ọwẹ ụ-ụwa mọmbọọ mẹ, chajị à họ aanang anyang me angị ịkpẹẹkpẹẹ gụng lẹ.

⁵³“ ‘Ụka juwa wẹ kam ka họ ká ịSọdọm bala ịSameriya tụ epweji ichiche nyaa pyẹpyọọ myịmyị. M̀ ka họ ahụ iJerusalẹm ka pyẹpyọọ ịnyịnyị wẹẹ.

⁵⁴Ụka ọọwa, à ka jẹ oyi nya ang ịlẹ ká họ-ọ̀ wẹ wuu. Ị ka yẹ jaabwọ ká ang onyobyi nyaa ri ọ-ma ọnụ ma a-ahị nya ịnyang.

⁵⁵ỊSọdọm bala ịSameriya aanang anyị tụ angịnyị nyaa wuu kpa pyẹpyọọ myịmyị. Ụka ọọwa, ahụ tịtị ka wuleji gburum onyeewe.

⁵⁶À tị́-ị̀ kpa ịSọdọm ọọnang hu utungguru lụka nya ọbọọchẹ ohihi nyang.

⁵⁷Ugbẹnyị lẹ, ọng myị ọng jẹ ohwehwe nyang lẹ. Ahụ à hi ká ala Ẹdọm bala ala iFilisitiya bala angị kụ baa ba tụ angị kụ dagaga jung ịlẹ ká waa ẹjẹ ka kpa họ lẹlẹ.

⁵⁸A ka yẹ akama chajị nya ekpilo nya ang inyibyi ịlẹ ka họ wuu. Ịnyị am Amkpaa-à ya lẹ.’ ”

⁵⁹“Ọngọlahị Amkpaa yẹkẹẹ, ‘M̀ họng jaabwọ kọ pwoku, chajị à nyẹẹkpẹ da ọnụ ọlẹ ká myị bwula ọ-bịrị iro ọnwanwa nyam lẹ.

⁶⁰M̀ tị ka ju ihi nya iro ọlẹ kam nwa tang lụka nya enjwo nyang, kam ka nwa iro tang kọọwa ka yeji gbe oyi myị oyi.

⁶¹Ụka ọọwa, ọ ka lang oyoyi ụka ká kpịtịya nya ang ịlẹ ká họ wuu. M̀ ka ya ịSọdọm bala ịSameriya aanang anyang hang kị ka lala anyị anyang nyang, ịnọ ḿ ya ịnyị ẹ-ẹpwa iro ọlẹ kam nwa tang ka.

⁶²Ḿ chị iro nyam ahị hang lẹ, ā ka jẹ ká am à ri Amkpaa lẹ lẹlẹ.

⁶³M̀ ka hịnyọhi ang ịtịpyọ ịlẹ ká họ wuu, à tị ka kpịtịya nyaa kpụ ọ ka lang oyoyi nyọka nya ọ-dọmwụ ka hụ́ ọnụ mẹẹ ya ẹla bwu ọnụ. Am Ọngọlahị Amkpaa-à ya ẹlẹwẹ lẹ.’ ”