Read idege ISIKẸLỤ 17 Bible Online

ISIKẸLỤ 17 - idege bible

ISIKẸLỤ 17

¹Ọngọlahị ya ẹla tam yẹkẹẹ

²Ọngịnyị ehe ee, da etu ka kpa joja je ala Isirẹlụ

³yẹkẹẹ, ọchịnụ idu ọtụka ọhẹ kele ka ịiLebanọn, idu ọwa bwu achwọ ịtụka-ịtụka. Arụrụ nyamwụ lediyo ị tị chịna datị-datị, ọọwa lẹ ọ chị ẹtẹ nya okoji isida eku lẹlẹ.

⁴Ọkpa ka epweji nya angị da ọhị ọọwa lẹ ọ ya tọ ụwa lẹlẹ.

⁵Ọọwa lẹ ọ hụ ugbe nyokoji bwu ọpyị nya ala Isirẹlụ lẹ, ọ kpa kaa tọ ọpyị ọjweyo: Iga ọlẹ ka enyi kaa dịda ụka mụka lẹlẹ. Ọ tịtọ ka okoji ọọwa ka nwa lala okoji nya Imillo.

⁶Ụka ká okoji ọọwa nwa lẹ, ọ ya ẹla alakọnụ ọbẹdẹ ọlẹ kabwọ nyamwụ pyẹ kụrụ ịpyị wuu lẹlẹ. Abwọ nya alakọnụ ọọwa jahị da ka ẹga nya ọchịnụ idu ma attẹ nyamwụ juwa ekpeleji nyamwụ. Ụka ọlẹ kọ yẹ ẹla alakọnụ lẹ ọ bwabwọ bala ọ ju apwụ lẹlẹ.

⁷Ma ọchịnụ idu ọkịla tị juwa ọtụka-ọtụka kọ ju achwọ ịtụka tụka bala ọbwụ arụrụ lụmẹ-lụmẹ, ụka ọọwa lẹ, alakọnụ ọọwa a nịra attẹ bala achwọ nyamwụ kpaa ka ẹga nyamwụ chajị ka ọchịnụ idu ọtụka ọwẹ ka kpa enyi jwọọ nwa uhye nya ugbẹwụ ọlẹ kii ya alakọnụ ọwa tọọ lẹlẹ.

⁸Ma, Ẹga ọlẹ kii ya alakọnụ ọwẹ bwu ene-ene ri ọpyị ọ jweyo ọtụka-ọtụka ọlẹ ka enyị jwoo hiigu-hiigu chajị kọ ka jẹ-ẹ̀ bwu abwọ bala ọnwụ egbe bala ọ ka ri alakọnụ ọlẹ kọ lihi.

⁹Lẹ taa wo wẹẹ, am Ọngọlahị Ohe Oluhye wẹẹ taa ịtọ ịịlẹ, alakọnụ ọwẹ ka jẹ-ẹ̀ hịị ọka nwa mịị? Ọchịnụ idu nya ọgbanyẹ ọlanyị a ka hu ọmwụ nyamwụ latẹ-latẹ ọ ka họ ọlẹ ka egbe nyamwụ ka mama bala eju ọ jwẹ jwe nyamwụ ịlẹ kịị wẹẹ be wẹẹ ka gbu ba wembe kaa?

¹⁰Ẹga myị ẹga ọlẹ ká hwoo kaa juju wẹẹ, ụka ọlẹ ka ọhụ ọlẹ kọọ da bwu ọmwẹnụ-ụtụrụ a wẹ kaa mịlọọ nmoo ọ ka gbu gbanggbang ka?

¹¹Ọọwa lẹ Ọngọlahị a ya ẹla tam yẹkẹẹ,

¹²Tọọ angị legbeju ọngịrị ịwẹ wo jaabwọ ka ọdawụlẹ nya etu ọwẹ ri wẹẹ, anụ nyị jẹ ọdawụlẹ nya ẹla ọlẹ wẹẹ. Byaa a yẹkẹẹ, Adịrahụ nya ala ịBabylọn nyị warị wẹ iJerusalẹm lẹ, nyaa wu adịrahụ ọlụwa bala alegbeju ịlekpeleji nyamwụ bịlọmwụ ka ịBabylọn lẹlẹ.

¹³Ọọwa lẹ Adịrahụ nya ala ịBabịlọn ọwẹ a hu ọnyị olugbiyegu nya adịrahụ ọhẹ lẹ ọ nwa iro tọọ chajị kị ka wo lawụlẹ lẹlẹ.

¹⁴Adịrahụ nya ala ịBabylọn họ ịnyị chajị ka ala iJuda ka la dẹwụ-dẹwụ ọlẹ kị ka jẹ-ẹ̀ ya ẹla ta ala ịBabịlọn kaka ma ịka juwa kpa iro ọnwanwa nyaa ọwa kịlahị pyịyọọ.

¹⁵Ma Adịrahụ nya ala iJuda la egbeju-ọngịrị ta Adịrahụ nya ala ịBabịlọn ọọwa lẹ ọ du angị ku ọmwakpa nyamwụ ka Ijipiti chajị kị ka ya anyịrẹ bala ịsọja ị-dẹwụ ịtụka tụka du wọọ lẹlẹ. Lẹẹ ọ ka jẹ-ẹ̀ kụrụ mịị wẹẹ? Ọngọlẹ kọ họ ụma nya ala ịlịwẹ ka jẹ-ẹ̀ bee mịị? Ọ ka bịrị iro ọnwanwa ọ ka jẹ-ẹ̀ chịda mịị?

¹⁶Ohe Oluhye Ọngọlahị yẹkẹẹ, Jaabwọ ọlẹ kam juwa hịhị lẹ adịrahụ ọwẹ ka gbu ụwa ịBabilọn chajị nyọlẹ kọ bịrị iro ọnwanwa nyamwụ ọlẹ kọ nwa ta Adịrahụ nya ala ịBabilọn ọngọlẹ kọ hwọọ ri adịrahụ.

¹⁷IFero bala ịsọja ịlịngịrị nyamwụ bala iru nya angịnyị lụmẹ-lụmẹ a ka jẹ-ẹ̀ da Adịrahụ nya ala iJuda ụbwọ ọ ọgbẹwụ ka. Ala ịBabylọn ka mee angịlẹ kị ka ta iru nya angịnyị lụmẹ-lụmẹ ayịreji.

¹⁸Chajị ọ ya ẹhị da iro nyamwụ ọlẹ kọ nwa bwee ọlẹ kọ bịrọọ chajị nyọlẹ kọọ họọ ang ịlịịwẹ wuu lẹ ọjẹka be mịị ka.

¹⁹Chajị nya ọọwa lẹ, Ọngọlahị Ohe Oluhye yẹkẹẹ, jaabwọ ọlẹ kọọwa Ohe Oluhye nyịị juwa hịhị lẹ, ọwa nyị ka yẹ Adịrahụ nya ala iJuda akama chajị nyọlẹ kịịnyị bịrị iro ọlẹ kịị nyị nwa tọwa.

²⁰Am ka da ụgbọọwụ nyam wọọ, M ka kpọọ ka ju ka ịBabịlọn lẹ ọwa m ka lọọ eje ụwa chajị nyọlẹ kọ bịrị ehile nyam lẹlẹ.

²¹Ị ka ta ịsọja nyamwụ ịlẹẹ kịhagụ wuu ayịreji ọọgbẹwụ, angịlẹ kịtị be mịị lẹpwụ nyaa ka nyi epepe tụ ẹga myị ẹga wuu da chajị kaka jẹ ya am Ohe Oluhye a ya ẹla lẹ.

²²Ọngọlahị Ohe Oluhye yẹkẹẹ, am ka chị ẹtẹ ju nya okoji ikeda ọwẹ eku bwu ayịrẹtẹ nyamwụ. M ka kpa kaa tọ ụwa uhye-ọgba nya ọgbọdọ ọtụka-ọtụka ọlẹ kọ luhye lụmẹ.

²³Ụwa uhye nya ọgbọdọ ọlẹ kọ luhye gụ wuu am Isirẹlụ m ka ya tọọ lẹ. Ọ ka bwu abwọ lụmẹ-lụmẹ bala ọ nwụ egbe ịnyịnyị. Ọ ka nwa kaa ri okoji nya iseda ọtụka-ọtụka ọlẹ ka ịchịnụ ụma ọnyị myị ọnyị ka nu awụ nyaa uhye nyamwụ bala ị ka nọ ẹpwa ụwa uhye nya abwọ nyamwụ.

²⁴Ekeji ịlẹpwụmẹ wuu ka jẹ ya am a ri Ohe Oluhye lẹ, M ka kpa ekeji iluhye weji, m tị ka họ ekeji ikpikpiri ka nwa luhye gbọng. M ka họ apwụ nya ekeji ilukpo lukpo ka nwọnwụ m tị ka họ apwụ nya ekeji ịnwọnwụ ka yẹ ri ilukpo lukpo. Am Ohe Oluhye Ọngọlahị a ya anyị lẹ, m tị ka họ ẹla ọwa jịra.