Read idege ISIKẸLỤ 18 Bible Online

ISIKẸLỤ 18 - idege bible

ISIKẸLỤ 18

¹Ọngọlahị ya ẹla tam yẹkẹẹ,

²Ọlịyẹ atidu kịkaa da etu ọlẹ ọpyị nya ala Isirẹlụ yẹkẹẹ, adịda nyị nẹ egbe nya ekeji ọlẹ kịị nyị ga kalẹ, angịrị nyị gbu anyị nyaa?

³Ọngọlahị yẹkẹẹ, jaabwọ ọlẹ kọọwa nyị juwa hịhị lẹ, ọngọngọhẹ nyị ka myịmyị da etu ọwẹ ám̀ ọ-ọpyị nya Isirẹlụ kaka.

⁴Ọhị hị nyọng myị ọng ri nyaam, ọhịhị nya adịda tụ ọhịhị nya ọnyị nyamwụ. Chajị nya ọọwa lẹ, ugbodu okpukpuru ọlẹ kọ họ ang onyobyi a ka gbu lẹ.

⁵Ori ka ọngịnyị a ri ọlabwẹla ọnyịịla kọ hang ọlẹ kọ hiigu bala ọ hẹla kpẹẹkpẹẹ.

⁶Kori kọ ri ang nya ijiga ịluhye nya ịgbọdọ ka, bala ọgbịgba ha ekpeku ịlẹ ka ala Isirẹlụ ka gbịgba ha ka, bala ọ dilahụ nya ahụ nya ọngịnyị ka bala ọ nọ ta ọnyang ẹpwụ nya umobi nyamwụ ka.

⁷Kori ka ọhọngịnyị ri ka, ma ọ tịrị ang ọlẹ ka ọngọ kpọọ uri ya họọ chajị nya uri ọwa ẹkpẹ họọ ụka ọlẹ kọ nwọọ uri kpa, kori kọ yang oriri ha ọngọlẹ ka imyi nwụ bala ọ ya apwụ duru ọngọ ji lọhị-lọhị.

⁸Ọngọlẹ kọ ya okpoko kpịla ọngịnyị kị ya apyobuna ju họọ ka, ọngọ gba ụbwọ nyamwụ kpehe hi ang onyobyi ịhọhọ, ọngọ la eje kpakpa ẹpwarịrị nya angịlẹ kị rwarụ.

⁹Ọngịnyị ọlịnyị kaa kpa ehile bala ọna ọdada nyam wuu kpẹẹkpẹẹ. Aalẹ ọ la kpẹẹkpẹẹ, ọ ka hị. Ịnyị Ọngọlahị Ohe Oluhye a ya lẹ.

¹⁰Kori ka ọngịnyị ọkpẹẹkpẹẹ ọlịnyị a dọmwụ mọnyị ọlẹ kọhọ angịnyị agburụ bala ọ kaa nwụ angịnyị lee ọ ka họ ẹla ịkịla ịlịwẹ,

¹¹(Ko ri ka adamwụ ọmọọma a họ ụma nya abwẹla ịlịwẹ ka) ori ka ọnyị ọwa a kaa riang nya ijiga uhye nya ịgbọdọ lee ori kọọ dịlahụ nya ọngọkịla

¹²bala ọ tụ ikpeyika pyịpyị bala ọ hangịnyị ri bala ọ myị tịrị ang ọlẹ ka oluryi ya neji ine kọọ kpịlaang ẹkpẹ họọ ụka ọlẹ kọ nwuri kpa ka bala ọ kaa kpụ ijiga bala ọ họ abwẹla ịtịpyọ

¹³lee kori kọ kaa ya okpoko kpịlọngịnyị iyaang ha ju họọ. Ọngịnyị ọlịnyị ka hii mịị? Ehe, ọ ka hịị ka. Chajị nyọlẹ kọ họ ang inyibyi ịlịwẹ wuu lẹ ọ ka gbu pyii lẹ. Ịwọ nyamwụ tị ka juhye nya egbeju nyamwụ.

¹⁴Ma ori ka ọnyị ọwẹ kọ hang ịtịpyọ ịwẹ a tị mọnyị, kọ ri ká ọnyị nyamwụ ọwaà tị́kwẹhị yẹ abwẹla nyadamwụ wuu kọ pwọ dịrẹ ọgụ ẹpẹtẹ nyadamwụ,

¹⁵kori ka ọnyị nyamwụ ọwa a riang nyijiga uhye nya ịgbọdọ ka bala ọ gbịgba ha ekpeku ịlẹ ka ala Isirẹlụ kaa gbịgba ha ka bala ọdịlahụ nyahụ nya ọngọkịla ka

¹⁶lee ọ họngịnyị ẹla onyobyi ka lee ọ tịrị ang ọlẹ ka oluri ya neji ine kọ kpịlọ ang ekpe họ ụka kọ nwọọ uri kpa lee ọ họngịnyị agbụrụ ka, ma ọyang oriri ha ọngọlẹ ka imyi nwụ bala ọ ya apwụ duru ọngọ ji lọhị-lọhị,

¹⁷bala ọ gba ụbwọ nyamwụ kpehe hi ang onyobyi ọ họhọ bala ọngọlẹ kọ ya okpoko kpịla ọngịnyị kị kaa ha ju họ ka bala ọ kpa ehile bala ọna ọdada nyam wuu kpẹẹkpẹẹ ọngọọwa ka gbu chajị nya ịhọbịrị nya adamwụ ka ma ọ ka hi.

¹⁸Ma chajị nyọlẹ ka adamwụ hangịnyị ri bala ọ họ angịnyị agbụrụ lẹ, ọ ka gbu chajị nya ịhọbịrị nyamwụ.

¹⁹A tị juwa tịtọ yẹkẹẹ, nya ọlịyẹ a tị du ka ọnyị nyị ka yẹ akama chajị nya ọhọbịrị nya adamwụ kaa? Ọwẹwẹ nya ịtọ ọwẹ rẹkẹ, ọnyị hang ọlẹ kọ pwọku bala ọ la kpakpa ọ juhi nyehile nyam wuu, chajị nya ọọwa lẹ ọ ka hị.

²⁰Ọngọlẹ kọ họ ang onyobyi ọngọọwa a ka gbu lẹ, ọnyị a ka yẹ akama chajị nya ọhọbịrị nya damwụ ka lee adịda a ka yẹ akama chajị nya ọhọbịrị nya ọnyị nyamwụ ka. Abwẹla ọnyịịla nya ọlabwẹla ọnyịịla ka ri ịnyamwụ. Angị inyibyi nya ọlẹbwẹla onyobyi tị ka ri inyamwụ

²¹Ori ka ọlabwẹla onyobyi a yẹ irya da bwu ẹpwụ nya ihibịrị nyamwụ ịlẹ kọ họ kọ kpa ehile nyam wuu kọ họ ẹla opwoku alẹ ọ ka hịị, ọ ka gbu ka.

²²Chajị nyọlẹ kọ hang ọlẹ kọ pwoku lẹ, ị ka hịnyọhi ịhọbịrị nyamwụ wuu họọ, ọ ka hị.

²³Ọngọlahị Ohe Oluhye tịtọ yẹkẹẹ, anụ me ka igu ogbugbu nya ala ohọbịrị haam, gụ ọ ka yẹ irya da kị ka hị?

²⁴Ma ori ka ọlabwẹla ọnyịịla a hịnyọ laang ọnyịịla ọhọhọ kọ juwa hang ịtịpyọ ipwoku ka ịlẹ ka ọlabwẹla onyobyi kaa họ a me irya ya nyị ka hị? M ya ma ehe. Abwẹla ịnyịịla ịlẹ kịi họọ wuu ị dọmwụ ka kpịtịya nyaa ka. Ị ka gbu chajị nya ọ́ chịla o-hu ọkịlẹtụ ha-ka bala ịhọbịrị ịlẹ kọ họ.

²⁵Ma anụ tị yẹkẹẹ, ẹla ịlẹ ka Ohe Oluhye nyị họ lẹ nyị hiigu ka. Ala Isirẹlụ anụ wo wẹẹ. Anụ me ka ọhọhọ nyam a tịpyọ-ọ́? Abwẹla nyanụ a haka lẹ.

²⁶Ori ka ọlabwẹla ịnyịịla a hịnyọ labwẹla ịnyịịla ịhọhọ kịị họbịrị, chajị nya ịhọbịrị ịlẹ kị họ lẹ ị ka gbu.

²⁷Ịnyịnyị ọla lẹ, ụka ọlẹ ka alabwẹla ịtịpyọ a hịnyọ la ang inyibyi ịhọhọ ka họ angị ịnyịịịla ọhịhị nyaa ka chịda.

²⁸Chajị ị kwinya ju ịhọbịrị nyaa ịlẹ kịị họ ị hịnyọ la ịhọbịrị ịwa bwulọwa lẹ, ịka gbu kaa. Ịka hị.

²⁹Anụ ala Isirẹlụ tị myịmyị juwa yẹkẹẹ, ọhọhọ nyam am Ohe Oluhye nyị haka lee anụ me irya ka ọhọhọ nyam ahaka-a wẹẹ? Abwẹla nyanụ anụ ahaka wẹ kaa?

³⁰Chajị nya ọọwa lẹ, anụ ala Isirẹlụ, am la lọng myị ọng nyanụ eje jaabwọ ka abwẹla nyanụ la. Anụ yẹ irya da bwu ẹpwụ nya ịhọbịrị nyanụ me orinyi ka ịhọbịrị nyanụ ka tanụ ayịreji.

³¹Anụ tụbwọ hi ịhọbịrị nyanụ ịlẹ kanụ wẹẹ họọ wuu bam chajị kanụ la ọkịlẹtụ onyeewe bala irya onyeewe mẹ. Ọ lịyẹ a tị du ka anụ ala Isirẹlụ juwa tịtọ kanụ ka gbuu?

³²Ọngọlahị Ohe Oluhye yẹkẹẹ, Am tịtọ ka ọngọngọhẹ ka gbu ka chajị nya ọọwa lẹ anụ yẹ irya da bwu ẹpwụ nya ịhọbịrị nyanụ kanụ hị mẹ.