Read idege ISIKẸLỤ 2 Bible Online

ISIKẸLỤ 2 - idege bible

ISIKẸLỤ 2

¹Ọọwa, omyi ọọwa-à byim yẹkẹẹ, “Ọngịnyị ehe ee, wuleji godayị kọkọ kam ya ẹla tang wẹẹ.”

²Ụka kọ wẹẹ kpa ẹla ya tam, olegu nya Ohe Oluhye à ju wẹ ẹpwụ nyam lẹ, ọ wulem eji godayị kọkọ lẹ, m wo kọ kịnyaa juwa ya ẹla tam yẹkẹẹ,

³“Ọngịnyị ehe ee, m juwa dung ẹrụ ka ẹga nya ala Isirẹlụ. Ị ri ẹpwụma ịlẹ kị la egbeju-ọngịrị tam lala adaa igogo anyị.

⁴Ị rị angị la egbeju ọngịrị. Ị́ jum ihi ka. M̀ juwa dung ẹrụ kaka ya ẹrụ nyam am Ọngọlahị Amkpaa jaa.

⁵Ó-ri ka angị la egbeju-ọngịrị ịwẹ-ẹ́ ke ụrụ lang lee ị́ myị ke ụrụ lang ka wẹwẹ, ị ka jẹ ya ọlọmwụ nyị wẹ ẹpwarịrị nyaa lẹ.

⁶“Ahụ tị lẹ, ọngịnyị ehe ee, ā ju uhi nyaa ịwa ayịdang lee ịnya ẹla oyaya nyaa ka. Ịnyịlẹhị lẹ, ịwa ayịdang lala ejwo dagaga jung. Ị ju ẹhwa lala ịgịrịhya. Ā tị ju uhi nyaa lee ẹlẹlẹhẹ ọlẹ kị ka ya ka.

⁷Ẹrụ ọlẹ kam dung ā ka ya jaa lẹ, ó-riri kị ke ụrụ lee ị́ ke ụrụ lang ka. À tị́ jẹ jaabwọ kị ri angị la egbeju-ọngịrị ene lẹ.

⁸“Ọngịnyị ehe ee, ke ụrụ lẹla ịlẹ kam wẹẹ ya. Ā la egbeju-ọngịrị lala angịwẹ koo. Pyẹ ọnụ maaa ká ya ang ọlẹ kam wẹẹ ka ya hang ri mẹ.”

⁹Ụka ọọwa lẹ, m chẹhị kele lẹ, m yẹ kọ nịrọ ụbwọ kpaaa wẹ ẹga nyam lẹlẹ. Ang ọlẹ kọ juwa ụ-ụbwọ nyamwụ ri ụpwụ ọlẹ kị waba ju lala ọba.

¹⁰Ị da ụpwụ ụwa ịlahị bala ẹkpẹ nyamwụ wuu, ala ịlẹ kị tị da juwa ẹ-ẹpwụ nyamwụ ri ẹla nya ịda ọbaba bala eru ọchịchị bala inyiribyi.