Read idege ISIKẸLỤ 20 Bible Online

ISIKẸLỤ 20 - idege bible

ISIKẸLỤ 20

¹Ẹnụtụrụ iwo nya ọya ọharụ ẹpwụ nya ẹka ọharwiye nyọlẹ ka alẹwụ wuhi kparụ. Angịhyẹ ẹpwụ nya alegbeju nya ala Isirẹlụ warị kaa hụhụ chahị jum nyọka tọm wo chajị nya irya nya Ọngọlahị.

²Ọọwa lẹ Ọngọlahị a ya ẹla taam yẹkẹẹ

³Ọngịnyị ehe ee, byi angịgbahị nya ala Isirẹlụ ịwẹ yẹkẹẹ, ọlịyẹ nyatịdu kanụ nyị juwa warị kaa towa wo nya irya nya ọọwa-a? Jaabwọ ọlẹ kọọwa Ohe Oluhye nyị jaam hịhị lẹ, ọwa nyịtịtọ ka ọngọngọhẹ nyanụ nyị ka tọwa wo nya ẹlẹlẹhẹ ka.

⁴A ka laa eje? a ka laa eje ọngịnyị ehe? A-aya ang inyibyi nya daa igogo anyị ịlẹ kị họ jaa.

⁵Byaa ya Ohe Oluhye nyị yẹkẹẹ, ọwa nyị chụ ala Isirẹlụ, ọwa nyị myị ọnụ ha anyị ịtụma nya iJekọbụ lụka ọlẹ kọọwa nyị chịlọwa ehe haa ụwa ọpyị nya ala Ijipiti, lụka ọwaa ọwa nyaa myị ọnụ byaa ya ọwa Ohe Oluhye nya ri Ohe Ọngọlahị la lẹ.

⁶Lụka ọwẹ ịnyịnyị ọwa nyaa myị ọnụ haa ya ọwa nyị ka gbaa kpehe bwu ọpyị nya ala Ijipiti ka ju ka ọpyị ọlẹ kọọwa nyị chụchụ haa. Ọpyị ọwa nyị ri ọpyị ọlẹ ka enyi-ẹmẹ bala enyi inwa nyị juwa mwụ, ọwa nyaa hagụ ọpyị ịkịla wuu lẹlẹ.

⁷Ọwa Ohe Oluhye nyị jaa byaa ya nyị tụbwọ hi ịjiga nyaa ịlẹ kịị nyị wẹẹ yẹhị nyaa rịrị nyị chịlaa iri la ijiga nya ala Ijipiti ka chajị ọwa nyaa ri Ohe Oluhye nyaa lẹ.

⁸Ma ịla egbeju-ọngịrị tam, ịtịtọ nyọka ke ụrụ lam ka: ọngọngọhẹ lẹpwụ nyaa amị tubwọ hi ijiga nyaa ịlẹ kị yẹhị rịrị lee ọ tụbwọ hi ijiga nya ala Ijipiti ka. Ụka ọwa lẹ m cheje nyọka wu ịkẹjẹ awụrụ taa ụwa ọpyị nya ala Ijipiti lẹlẹ.

⁹Ma m tị myị họnyị ka, orinyi ka ọlịnyị ka hụ ẹpẹpẹ ju ẹnyị nyam chajị ụwa ẹpwa rịrị nya ala Ijipiti ịlẹ kịị kụ ta m ya dodehe nyori m ka gba kpehe bwuwa lẹ.

¹⁰Ụka ọọwa lẹ m gbaa kpehe bwu ọpyị nya ala Ijipiti lẹ, m kpaa ka ju ka ugbileji lẹlẹ.

¹¹M ya ọna ọdada bala ehile nyam jaa chajị kori kịị kpaa kong myị ọng nyaa ka la ọhị hị.

¹²M myịmyị ya Ẹnụtụrụ Ọhịnyọ Lụkụrwọ nyam haa ọlẹ kọ ri ang ọjwẹjẹẹ ẹpwarịrị nyahị, chajị kị ka jẹ ya am Ohe Oluhye nyịị chịgọgọ juwaa.

¹³Ma ala Isirẹlụ la egbeju-ọngịrị tam ụwa ugbileji. Ị pwoka kpa ehile nyam ọlẹ ka ọngịnyị a kpa kọ ka ohi hu ihi nya Ẹnụtụrụ Ọhịnyọ Lụkụrwọ nyam ka. Ụka ọọwa lẹ m cheje ịnọ kam ka wu ikeje awụrụ taa kam ka taa ayịreji ụwa ugbileji lẹlẹ.

¹⁴Ma m tị myị họ ịnyị ka, orinyị ka m ka hu ẹpẹpẹ ju ẹnyị nyam ụwa ịlahị nya ẹpwụma ịlẹ kam gbaa kpehe bwubwọ nyaa.

¹⁵Ụka ọọwa lẹ m dọnụ ụwa ugbileji ya am ka kpaa ka ọpyị ọlẹ kam myị ọnụ haa ka enyi-ẹmẹ bala ẹnyị nyinwa juwa mwụ ọlẹ kọ hagụ ọpyị wuu kaka.

¹⁶Ang odudu ọlẹ kam dọnụ ri, ị myị kpa ọna ọdada nyam ka, ị bịrị ehile nyam, ị hwẹpẹpẹ ju Ẹnụtụrụ Ọhịnyọ Lụkụrwọ nyam ọkọkọ nya ọọwa lẹ ijiga ọkpụkpụ haa gụ.

¹⁷Kpọkpọọpọ, m ye ahyẹẹrwẹrwa nyaa, m taa ayịreji ụwa ugbileji ka.

¹⁸Ọkọkọ nya ọọwa lẹ, m da anyị nyaa ọna kị ka kpa ehile ịlẹ ka adaa anyị daa lee ọ họ abwẹla ụma nyịnya lẹẹ ọ chịlaa iryi la ijiga nyaa ka.

¹⁹Am a ri Ọngọlahị Ohe Oluhye lẹ, anụ kpa ehile bala ọna ọlẹ ka danụ.

²⁰Anụ chịgọgọ ju Ẹnụtụrụ Ọhịnyọ Lụkụrwọ nyam chajị kọọwa ka ri angọọjwẹjẹẹ ọlẹpwarịrị nyam bala anụ. Chajị kanụ ka jẹ ya am a ri Ọngọlahị Ohe Oluhye nyanụ lẹ.

²¹Ma ala Isirẹlụ la egbeju-ọngịrị tam. Ị myị kpa ehile bala ụbwọ ogbile ụụrụ nyam ịlẹ ka angịnyị a kpa kịkaa hị ka. Ị hu ẹpẹpẹ ju Ẹnụtụrụ Ọhịnyọ Lụkụrwọ nyam. Ụka ọọwa lẹ m cheje ịnọ kam ka wu ịkẹjẹ awụrụ taa ka ka taa ayịreji ụwa ugbileji lẹlẹ.

²²Ma m wu ụbwọ nyam kpa, m myị họ ịnyị ka chajị ori kam họ ọnyị ọwa kari ọ hu ẹpẹpẹ ju enyị nyam ẹpwarịrị nya ẹpwụma ọlẹ kam gba ala Isirẹlụ kpehe bwụbwọ nyaa.

²³Eje ọlẹ kam myịmyị chị ụwa ugbileji ri m ka nyaa epepe tụ ẹpwụma ịlịga myị ẹga wuu da.

²⁴Ang odudu ọlẹ kam ka họnyị rẹkẹ, ị pwoka kpa ọna ọlẹ ka daa, ị myịmyị bịrị ehile nyam bala ị hu ẹpẹpẹ ju Ẹnụtụrụ Ọhịnyọ Lụkụrwọ nyam ị myịmyị ka kpụ ijiga nya adaa igogo anyị.

²⁵Bwula ọọwa lẹ m ya ehile ịtịpyọ bala ọna ọdada ịlẹ kịkaa ya ọhịhị ha ọngịnyị ka haa lẹlẹ.

²⁶M ya iwe da ị chịlaa ịrị la ọhaha nyaa bwula ọnyị nya ọgbanyẹ nyaa ịlẹ kị ka ya kịlịya ịwẹ m chuhi juwa chajị kị ka jẹ ya am a ri Ọngọlahị lẹ.

²⁷Chajị nya ọọwa lẹ ọngịnyị ehe, byi ala Isirẹlụ ya am Ohe Oluhye Ọngọlahị nyị yẹkẹẹ, ọgwọgw ọwọwẹ adịda igogo nyanụ anyị nyaa hu ẹpẹpẹ juowa bwula ọhọbịrị bọwa lẹ.

²⁸Ụka ká kpa ka pwụ ọpyị ọlẹ kam myị ọnụ haa kpa, ọọwa lẹ ị juwa gbịgba ha ijiga ụwa uhye nya ọgbọdọ bala ọ-ọmwụ nya okoji olukpo lukpo ọnyị myị ọnyị ịlẹ kịị yẹ lẹlẹ. Ụwa ịkaa kịlịya ọ jworụ kwọkwọ bala iya nya ere ohueji nyaa ịlẹ kị ka hu agbama jum lẹlẹ.

²⁹Ụka ọọwa lẹ m taa wo yẹkẹẹ, alẹà tị́ri ẹga oluhye ọlẹ kanụ ka kaa? Bwụka ọwa pyịyọọ dalẹ lẹ ịwụrụwa nya ẹga Oluhye lẹlẹ.

³⁰Chajị nya ọọwa lẹ, byi anyị nya ala Isirẹlụ ya, Ọngọlahị Ohe Oluhye nyị yẹkẹẹ, anụ nyị ka chịlọnụ iryị lala adanụ igogo anyị bala ọhuhị dịrẹ ijiga ịnyịnyị?

³¹Anụ juwa ya ang-ahị nyanụ bala ọ ya anyị nyanụ kịlịya ha ijiga. Gbee dalẹ anụ juwa chịlọnụ ịrị bwula ijiga nyanụ lẹlẹ, anụ ala Isirẹlụ m ka jẹẹ myị anụ ka tọm ẹlẹlẹhẹ wo wẹẹ? Jaabwọ ọlẹ ka Ọngọlahị Ohe Oluhye jam hịhị lẹ, am ka myị anụ ka tọm ịtọ nya ẹlẹlẹhẹ wo kpong-kpong ka.

³²Ala ịlẹ kanụ wẹẹ me irya a tị ka lịnyị ka. Irya nyanụ rẹkẹ, ahị tịtọ kahị ka lala angịkịla ịlẹ kịị juwa epwoja ịkịla, ahị tịtọ kahị ka gbịgba ha ekpeku ịlẹ kị kọ lajwọ bala ekeji.

³³Ọngọlahị Ohe Oluhye yẹkẹẹ, jaabwọ ọlẹ kọọwa nyị jam hịhị lẹ, ọwa nyị juwa byinu ya ẹpwụ nya ikeje awụrụ bala bwula ụbwọ ọnyọọngịrị bala ụmụmẹ nya ọọwa ọwa nyaka kpa ri adịrahụ nyanụ lẹ.

³⁴Am ka gbanụ kpehe bwu ẹpwụ nya angịnyị ịlẹ kanụ yẹjula bala m ka tụnụ guru bwu ẹpwụ nya epwoja ịlẹ wuu kanụ nyi epepe tụda bwula ụbwọ ogogo bala ụmụmẹ bala ịkẹjẹ awụrụ nyam.

³⁵M ka gbanụ kpehe ka ugbileji nya epwoja ịkịla ọwa m ka lanụ eje ụwa chahị junu lẹlẹ.

³⁶Jaabwọ ọlẹ kam ladanụ anyị eje ụwa ugbileji nya ala Ijipiti ịnynyị m ka lanụ eje lẹ, ịnyị Ọngọlahị Ohe Oluhye a ya lẹ.

³⁷M ka kpanụ lọngịrị ọngịrị m ka họnụ anụ ka kpa iro ọlẹ kahị nwa.

³⁸M ka gba angịlẹ kị legbeju ọngịrị bala angị họ ang onyobyi kpehe bwu ẹpwụ nyanụ. M ka gba kpehe bwu ọpyị ọlẹ kị kụwẹ ma m tị ka mịị ị ka tịrẹkpẹ pwụ ọpyị nya Isirẹlụ ka. Ụka ọọwa lẹ anụ ka jẹ ya am a ri Ohe Oluhye Ọngọlahị lẹlẹ.

³⁹Ọngọlahị Ohe Oluhye yẹkẹẹ, anụ ala Isirẹlụ, anụ juwa gbịgba ha ijiga nyanụ lẹlẹ mẹ, ma ụwa ịlahị anụ ka ke ụrụ lam anụ ka myịmyị hu ẹpẹpẹ ju ẹnyị ịgọgọ nyam bwula ịhaha bala ijiga nyanụ kaka.

⁴⁰Ụwa uhye nya ọgbọdọ ịgọgọ nyam, ọgbọdọ oluhye nya ala Isirẹlụ anụ ala Isirẹlụ wuu a ka gbịgba ham lẹ. Ụwa m ka yenu bala ọ tịtọ nya iya ọkịlaakịla bala ọhaha ịlẹ kị hagụ wuu bala ọhaha ịgọgọ nyanụ lẹ.

⁴¹Ụka ọlẹ kam gbanụ kpehe beu ẹpwụma ịlẹ kanụ nyi epepe tụda bala angịnyị ịlẹ kanụ yẹjula, kam tụnụ chaụlẹ, m ka chị ịgọgọ ọlala nya ehe ịlahị nya alẹpwụma ịwa, ọọwa lẹ m ka yẹnụ lala iya ọchoru kwọkwọ lẹlẹ.

⁴²Ụka ọlẹ kam kpanụ ka pwụ ọpyị nya ala Isirẹlụ, epwoja ọlẹ kam myị ọnụ ha adanụ ịgogo lẹ, anụ ka jẹ ya am a ri Ọngọlahị Ohe Oluhye lẹlẹ.

⁴³Ụka ọọwa lẹ anụ ka kpịtịya nyang ịtịpyọ ịlẹ kanụ họ bala jaabwọ kanụ chịlọnụ iri lẹlẹ.

⁴⁴M ka mọọ jẹ nụ chajị kanụ ka jẹ ọngọlẹ kam ri, ụka ọọwa lẹ anụ ka jẹ ya am a ri Ọngọlahị lẹlẹ: anụ ala Isirẹlụ. Ma m juwa họnụ jaabwọ ka abwẹla nyanụ tịpyọ kaa ba lee jaabwọ kaọhọhọ nyanụ tịpyọ ka ba ka. Ịnyị Ọngọlahị Ohe Oluhye a ya lẹ.

⁴⁵Ọngọlahị ya ẹla tam yẹkẹẹ,

⁴⁶Ọngịnyị ehe ee, yọyị koye nya edii, ya ẹla tụ edii pyịpyị ka yẹ ọmwụ tụ ịpyịnụ ọlụwa pyịpyị ịnyịyị.

⁴⁷Ya ẹla ju ịpyịnụ ọlẹ kọ juwa edii yẹkẹẹ, ịlẹ Ọngọlahị a ya lẹ, yẹ mẹ am juwa tụ ila ju, ila ọwa ka rụ okoji ịnwọnwụ tụ ilukpo-lụkpo ịlẹpwụ nyang, ẹlẹlẹ ila ọlẹ ka ịla owa ka dalẹ ọngọngọhẹ a ka jẹ-ẹ̀ mịrọọ myị ka. Ịla ọwa ka rwang bwu edii lalala ka ju ka ẹtẹ.

⁴⁸Ụka ọọwa lẹ ọng myị ọng a ka jẹ wuu nyori am Ọngọlahị a tụ ịla ọwẹ ju lẹlẹ. Ịngịngịhyẹ a ka jẹ-ẹ̀ mịrọọ myị ka.

⁴⁹Ụka ọọwa lẹ m yẹkẹẹ, O! Ọngọlahị, angịnyị jam ya ẹla rụm ya, ọjoja kem ọwa nya ka ja kaa?