Read idege ISIKẸLỤ 21 Bible Online

ISIKẸLỤ 21 - idege bible

ISIKẸLỤ 21

¹Ọngọlahị byim yẹkẹẹ,

²Ọngịnyị ehe ee, jahị daka iJerusalẹm chajị ka ya ẹla tụ ẹga ọgbịgba nyaa bala ọpyị nya ala Isirẹlụ pyịpyị.

³Byi ala Isirẹlụ ya ẹla ọlẹ ka Ọngọlahị nyị ya nyaa lẹlẹ, ọwa nyị juwa tụnụ pyịpyị, ọwa nyị ka gbile ẹma nya ẹwụ nya ọọwa bwu apịlẹ kọọwa nyị ka ta alabwẹla ịnyịịla inyibyi ịlẹpwụ nyanụ ayịreji.

⁴Chajị nyọlẹ kọọwa nyị ka ta alabwẹla inyịla tụ alabwẹla inyibyi ayịreji lẹ, ikọngọ nya ọọwa ọlẹ kọọwa nyị ka gbile bwu apyịlẹ nyị ka tụ angịnyị pyịpyị bwu edii lalala ka ju ka ẹtẹ.

⁵Ụka ọọwa lẹ angịnyị wuu a ka jẹ ya am Ohe Oluhye Agụgụ nyị gbile ẹma nya ẹwụ nyam bwu apịlẹ ọwa nyị tị tịrọọ ẹkpẹ ju ka apịlẹ ododu kaka lẹlẹ.

⁶Chajị nya ọọwa lẹ ọngịnyị ehe, a mweru lọkịlẹtụ ujujwo bala ahiji ọbwọbwọ ọtụka-ọtụka ụwa ẹga ka angịnyị wuu ka jẹ yẹng mẹ.

⁷Ori ka angịnyị a tọng wo nyang odudu ka juwa mweru a byaa yẹkẹẹ, chajị nya ẹlẹlẹ kọ jaka họ ịnyị, ụka ka ẹla ọwa ahọ ọkịlẹtụ nya angịnyị wuu ka mịla uhi, ị ka wu abwọ nyaa wuu ju ẹjẹ, olegu nyaa wuu ka kpịbwọ bala arụụ nyaa ka họ dẹmwụ dẹmwụ lala enyi.

⁸Ọọwa, Amkpaa-à byim yẹkẹẹ,

⁹Ọngịnyị ehe ee ee, ya ẹrụ nyam ọlẹ je alụma mẹ. M̀ ju oge nyam weri-weri! Ọ yẹ hwoó-hwoò-hwoó lala apya.

¹⁰M̀ ju oge ọwẹ iri nyọka kpa nwụ angịnyị lẹ. Ọ chị ugẹkpẹ kọ ka yẹ hwoó-hwoò-hwoó lala apya. Ẹẹla nya ọ-kpa kọ ayịlọ koo! Angịnyị nyam a myị ke ụrụ la ụbwọ ọlẹ kam ya gbilaa ụ-ụrụ ka.

¹¹M̀ jwo ẹma nya ẹwụ ọọwa chajị kị ka pwọ cheri-cheri kị ka hwọọ ha ọngọ nwangịnyị ụbwọ.

¹²Yụbwọ ba ọmwụ ba egbeju ká chị eko mẹ, ọngịnyị ehe, chajị ẹwụ ọwẹ juwa jahị da angịnyị nyam bala alegbeju nya ala Isirẹlụ wuu pyịpyị. Ị juwa ka kpa ema nya ẹwụ ọwa bala angịnyị nyam wuu lawụlẹ. Chajị nya ọọwa lẹ, nyi ụbwọ pyiipyii ẹ-ẹpwụ nya uhi ojuju mẹ.

¹³Yẹ mẹ, ọ rika angịnyị a yẹhị da akama ọyẹyẹ bwe, alẹ alịwẹ a ka họ kaa? Ịnyị Ọngọlahị Ohe Oluhye a ya lẹ.

¹⁴Ọngịnyị ehe ee, yẹ ọmwụ ka chabwọ igo ka ẹma nya ẹwụ a kpịlawụlẹ ụka imiiye lee ụka ịta. Ema nya ẹwụ ọkpa nwụ angịnyị-ọ ya dada lẹ.

¹⁵Ema nya ẹwụ ka họ angịnyị ka juhi bala ọ chị uchụ, mya ẹma nya ẹwụ ọwa ji ụwa ịgẹhẹ ogirigba ọnyị myị ọnyị wuu, ọ juwa chị hwohwohwo ị tị pwọọ cheri-cheri kị ka kpa nwụ angịnyị lẹ.

¹⁶A hyangịnyị ka upipila bala ka pwuriri, ẹga myị ẹga ọlẹ ka jahị daka a hyangịnyị.

¹⁷Am ka jam chị abwigo ịnyịnyị gbe ka ịkẹjẹ awụrụ nyam ka myị, am Ọngọlahị Ohe Oluhye a wẹẹ ya ẹla lẹ.

¹⁸Ọngọlahị byim yẹkẹẹ,

¹⁹Ọngịnyị ehe ee, ju ụgbẹyị imiiye ẹjẹẹ ẹga ọlẹ ka Adịrahụ nya ala ịBabịlọn ka bwu warị lẹma nyaẹwụ nyamwụ. Agbẹyị imiiye ịwa ka dọmwụ bwu epweji ookpokpo. A ya uginikpo weji ka mẹ ẹgẹlẹ ka ụgbẹyị pẹ bwu ka epweji jẹ.

²⁰Ju ụgbẹyị ọlẹ kọ daka iRaba ọla Amọn bala ụgbẹyị ọlẹ kọ daka iJuda bala ẹga ọkpịba ọla iJerusalẹm ẹjẹẹ.

²¹Chajị Adịrahụ nya ala ịBabịlọn godayị rịrị ụwa ochapiye ẹgẹlẹ ka ụgbẹyị imiiye pẹhi awụlẹ ọ juwa tịtọ kọ ka jẹ ẹga kọ ka bwu, ọlaa kpa ịcha dịwo bala ọ juwa tọ ijiga nyamwụ ịtọ wo ọ myịmyị juwa kwẹhị yẹ ajẹ nyiyo ọlẹ kị ya kịliya.

²²Ụbwọ upwuriri nyamwụ hu ịcha ọlẹ kọ ri iwo ọwu iJerusalẹm lẹ: Ọ juwa byoo ya nyị kpa ekwiji be egwalọ ene bala ọ cheko nya ẹwụ bala ọnwangịnyị bala ọ ka be ogirigba ene leku ekeji bala ọ ka chị ụtụjẹ ọlẹ kị ka kpoye nya egwalọ bwu bala ọka mang yẹ ugulọ nya epweji dada.

²³Ala iJerusalẹm ka da ịwẹ nyori ala ịBabịlọn nyị ka myị họnyị chajị nyiwo ọlẹ kị nwa ma ọmwụ ọyẹyẹ ọlẹ ka kpaa ịtịya nya ịhọbịrị nyaa bala ọ ka ya jaa nyori ala ịBabịlọn ka kuraa ẹwụ.

²⁴Chajị nya ọọwa lẹ Ọngọlahị yẹkẹẹ, chajị nyọlẹ ka anụ nyị chị ịhọbịrị nyanụ ehe ka ọng myị ọng nyị jẹ jaabwọ ọlẹ ka anụ nyị ịhọbịrị ka ba kanụ nyị chị ịhọbịrị nyanụ ehe ẹpwụ nya abwẹla nyanụ ọnyị myị ọnyị lẹ, Ọwa nyị ya eje wunu aluji nyanụ nyị ka kụrunụ ẹ-ẹwụ.

²⁵Anụ alegbeju nya ala Isirẹlụ ịlẹ kanụ la ịgọgọ ka bala anụ angịnyị inyibyi ịwẹ ẹnụtụrụ nyeje ọkwẹkpẹ nyanụ pweji lẹ.

²⁶An Ọngọlahị juwa byinu yẹkẹẹ, anụ nwula okpo nya adịrahụ nyanụ bala apwụ ọdabarị egbeju nyanụ, ang a ka myịmyị-ị̀ la jaabwọ ọlẹ kọ la ine kaka. Hu angịlẹ ka iwe-ahụrụ nyaa byẹhị ka uhye ka kpa angịnyị ka iwe-ahụrụ nyaa lụmẹ keji.

²⁷Ayịreji! ayịreji! M ka ta epweji ọlẹ ayịreji. Ma ine kam ka tọọ ahreji ọngọlẹ kam chụ kọ ka yọọ akama ka pweji ine, ọngọọwa m ka ya ju ụbwọ lẹ.

²⁸Ọngịnyị ehe ee, yẹ ọmwụ yẹkẹẹ, ẹla ọlẹ ka Ọngọlahị Ohe Oluhye nyị ya chajị nya ala Amọn chajị nya ido ọlẹ kị nyị do ala Isirẹlụ nya lẹlẹ, Ema nya ẹwụ! Ema nya ẹwụ! ị gbile ema nya ẹwụ kọ ka nwụ angịnyị lẹ, ịpwọọ cheri-cheri kọ ka ta angịnyị ayịreji lẹ, ọ ka chị hwohwohwo lala apya.

²⁹Oyi ọyẹyẹ lẹhị nya olegu bala ọmwụ ọyẹyẹ nyanụ ri ọnọọkịla. Anụ lọkwọ anụ tị ri angịnyị inyibyi, ẹnụtụrụ nya akama ọ kwẹkpw nyanụ pweji lẹ, ị ka ya ẹma nya ẹwụ rịrịịnụ ụkpụrọkọ.

³⁰Tịrị ẹma nya ẹwụ nyanụ ẹkpẹ ju ka apịlẹ (anụ ala Amọn) am ka lanụ eje ám̀ ọ-ọpyị ọlẹ kị manụ lẹẹ, ọlẹ kọ ri ọpyị ọlẹ kanụ bwu.

³¹M ka wu agbama nyam tanụ, m ka dọhụ hụrụ la ila nya agbama nyam. M ka yanụ ju alọkwọ ịlẹ ka angịnyị ịnwụnwụ baa ahị ụbwọ.

³²Anụ ka ri ịwụ o-ju ila. Ịwọ nyanụ ka chị cheji ọpyị ọlẹ, ọngọngọhẹ a ka myịmyị kpịtịya nyanụ kaka. Am Ọngọlahị Ohe Oluhye a ya nyị lẹ.