Read idege ISIKẸLỤ 22 Bible Online

ISIKẸLỤ 22 - idege bible

ISIKẸLỤ 22

¹Ọngọlahị ya ẹla tam yẹkẹẹ,

²Ọngịnyị ehe ee, nwụlanọ kaka la epweji ọlẹ kọmịla angịnyị ịnwụnwụ eje lẹẹ? ya inyibyi nyaa ịlẹ kịị họ wuu jaa.

³Byaa a yẹkẹẹ, ẹla ọlẹ kọọwa Ohe Oluhye nyị ya nyị rẹkẹ, chajị nyọlẹ kanụ nyị nwụ awụlẹ lụmẹ-lụmẹ bala ọ chịlọnụ iryi bwula ijiga ịkpụkpụ lẹ ụka ọ ceju nyanụ nyị pweji lẹ.

⁴Eje nya ịwọ ọlẹ kanụ chị cheji bala ekpeku ịlẹ kanụ kọ wunu lẹ chajị nya ọọwa lẹ ụka nyanụ pwụ lẹ. Anụ chị ụka nya ịlọnụ kpii lẹ. Ang odudu ọlẹ kam ya iwe da kaala ẹpwụma ịkịla hu ẹpẹpẹ junu bala ọ chịnụ arụ awụlẹ.

⁵Angịlẹ kị juchụẹ tụ angịlẹ kị ji hwẹẹẹ wuu ka hulọnụ ahụ anụ angị họ abwẹla ịloyoyi bala ọ mịla ọ tang ayịreji ịwẹ.

⁶Anụ alegbeju nya ala Isirẹlụ anụ wuu dahịhile ọngịrị nya ịlọnụ lẹ anụ juwa nwụ angịnyị lẹlẹ.

⁷Anụ juhi nya angị manụ ma ka, anụ họ angga ịlẹ kị juwa tanụ ri anụ a myịmyị hẹla ịnyịịla ẹga nya ịhụ-egu bala anyị-egu ka.

⁸Anụ hu ẹpẹpẹ ju ẹga ịgọgọ nyam anụ a myịmyị kpa Ẹnụtụrụ Ọhịnyọ Lụkụrwọ nyam ka.

⁹Angịhyẹ nyaa mọnụ ba angịkịla chajị kị ka nwaa, angịkịla nyaa ri ang nyịjiga uhye nyịgbọdọ angịkịla nyaa kaa họ ụya ta awụlẹ.

¹⁰Angịhyẹ nyaa dịlahụ nya daa, angịkịla nyaa nọta anyang ụka kị juwa la umobyi nyaa.

¹¹Angịhyẹ họ ang opwoku ka ẹga nya ahụ nya ọọnaa, angịkịla nọta ọnyịnịna nya ahụ nyaa, angịkịla họ ụya ta ọnyadaa.

¹²Angịhyẹ ye okpoko ochikiriju chajị kị ka nwụ ọngịnyị, anụ ri awụlẹ apyobwuna lụgbẹyị okpwoku ka, anụ kaa họ aananụ ri bwula ye apyobwuna bwu ẹga nyaa ụka kanụ yang kpịla. Anụ deeri nyam am Ohe Oluhye. Ịnyị am Ohe Oluhye a ya lẹ.

¹³Yẹ mẹ, m chabwọ igo ju angịnyị ịhori ịlẹ kanụ wẹẹ kpa kpụ ụdụ bala angịnyị ịlẹ kanụ wẹẹ nwụ.

¹⁴Anụ ka ba ọhụ myị lee ụbwọ nyanụ ka la gogo ẹnụtụrụ ọlẹ kam ka yẹnụ akama? Am Ọngọlahị a ya ẹla lẹ, m tị ka họ ịnyị.

¹⁵Am Ohe Oluhye ka nyiinu epepe tụ ẹpwụma ilodehe wuu da ụka ọọwa lẹ m ka hunu abwọ lang inyibyi nyanụ ịlẹ kanụ wẹẹ họ lẹlẹ.

¹⁶Ụka ọọwa lẹ anụ ka hwẹpẹpẹ ju ịlọnụ ịlahị nya alẹpwụma ịkịla lẹlẹ chajị kanụ ka jẹ ya am a ri Ọngọlahị lẹ.

¹⁷Ọngọlahị ya ẹla tam yẹkẹẹ,

¹⁸Ọngịnyị ehe ee, Ala Isirẹlụ wuu mang ohideji ahị nyam lẹ. Ịlala ikwoje bala okpoko onyobiri bala okpoko onyoowuru ịlẹ kị kaa hyaa ụ-ụduwa chajị kị ka jẹ-ẹ̀ hi-ang ịhahaka nyaa hụrụ.

¹⁹Chajị nya ọọwa lẹ jaabwọ ká Amkpaa Agụgụ ya a lẹẹ lẹ, nyọlẹ kanụ ya ẹla ohideji wẹẹ, m ka tụnụ wuu guru ẹpwa rịrị nya iJerusalẹm.

²⁰Lọgwọgụ ọlẹ kịkaa go ikwoje bala okpoko onyobiri bala okpoko onyoowuru ju ka ụdụwa, kịkaa du ịla waa chajị kị jeka hyaa ịnyịnyị m ka tụ agbama nyam chaụlẹ chajị kam ka gonu jukele kam ka hyanụ lẹ.

²¹M ka tụụnụ guru lẹ, ọwa m ka du ịla nya agbama nyam junu ọọwa lẹ m ka hyanụ ụwa lẹlẹ.

²²M ka hyanụ kụrẹ-kụrẹ jaabwọ ọlẹ kị kaa hya okpoko onyoowuru ụdụwa. Ụka ọọwa lẹ anụ ka jẹ ya am Ohe Oluhye wu ịkẹjẹ awụrụ tanụ lẹlẹ.

²³Ọngọlahị ya ẹla tam yẹkẹẹ,

²⁴Ọngịnyị ehe ee, ya ẹla ta ọpyị yẹkẹẹ, A ri ọpyị ọlẹ ka la ịgọgọ lee enyi ọ do hung ẹnụtụrụ nya agbama ka.

²⁵Alegbeju nyaa me egabẹ ịlẹ kịkaa warụ ju iyo ịlẹ kị nwụ. Ị ta ọhịhị nya angịnyị ayịreji. Ị nwụla ang ụdụ bala angị kpịnyị nya angịnyị. Ị họ anyang lụmẹ-lụmẹ ri ahụ-ọgu lẹ.

²⁶Angị kịliya nyaa bịrị ehile nyam ị myịmyị kpihi ju ang ịgọgọ ka. Ị họ ebwo ọchịchị ọhẹ-lọhẹ ji ẹpwarịrị nyang ịgọgọ bala angịlẹ kị la ịgọgọ ka datị ka. Ị yẹhị da Ẹnụtụrụ Ọhịnyọ Lụkụrwọ nyam bwe gbee kam lẹpẹpẹ ẹpwarịrị nyaa.

²⁷Alegbeju igbeji nyaa lala ịchịwanụ ịlẹ kịkaa hụla iyo ịlẹ kị nwụ hwẹẹhwẹẹ. Ị chị angịnyị iwo bala ọ-ta angịnyị ayịreji chajị kị ka kpụ ụdụ.

²⁸Alọmwụ nyaa kaa tụ ịhọbịrị nyaa kpịba jaabwọ ọlẹ kị ka ya ọpyị onyoowuru du gulọ ẹkpẹ. Ị ka yoyi bala yẹ ọmwụ ọnọọkịla juwa yẹkẹẹ, Ịlẹ Ọngọlahị yaa ya lẹ ụka ọlẹ kam tị ya ẹla kpong-kpong ka.

²⁹Angịnyị ịla iJerusalẹm kaa họ angịnyị agbụrụ bala ọ-họ angịnyị ri. Ị tụ ịkpeyika bala angị lịbaba pyịpyị ị myịmyị kaa họ angga ri.

³⁰M pịlahị nyọngọlẹ kọ ka mugulọ me kọ ka godayị ẹpwa rịrị nyam balaa ẹgẹlẹ ka ugulọ bene chajị kam ka taa ayịreji ka ma m tị ye ọngọngọhẹ ka.

³¹Chajị nya ọọwa lẹ, ma ka wụ ikẹjẹ-awụrụ taa lẹ. M ka taa ayịreji lịla nya agbama nyam. M tịrị angịlẹ kị họ ẹkpẹ ka uhye nya egbeju nyaa lẹ. Ịnyị Ọngọlahị a ya lẹ.