Read idege ISIKẸLỤ 23 Bible Online

ISIKẸLỤ 23 - idege bible

ISIKẸLỤ 23

²Ọngịnyị ehe ee, anyịnịna anyang imiiye ịhyẹ juwa.

³Ụka nya ọyẹẹnọ oriri nyaa kị juwa Ijipiti ị hakpara ụwa, ọọwa lẹ ịrịangị jẹ alẹng nya ọgbanyẹ-ọgbanyẹ lẹ amẹ nyaa a kpụda lẹlẹ.

⁴Ẹnyị nya ọnyị ọnyang ọgbahị ri Ọholah ọlẹ kori iSameria, ẹnyị nya ọnyị ọnyang ọnjwo ri Oholibah ọlẹ kọ ri iJerusalẹm. Ịwa angị m imiiye ri ịhụ nyam ị tị manyị ham.

⁵Ọrinyịlẹhị inyam oholah a ri lẹ ma ọ tị juwa hakpara. Ọ myị la imyi nyịnyịrọ ta aligu nyamwụ Asiriya alọgẹwụ.

⁶Ị kụrụ ịwụrụ inyukpukpo wuu, alegbeju nyaa ịkpehị rịrị angịnyị bala alegbeju nya ịsọja anyị wuu ri ikolobya ịlẹ kị hụhị lụmẹ, ịwa wuu juwa uhye nya ụnyịrẹ.

⁷Ọ họ akpara ta angịlẹ kị ri angị kwẹhị nya ala Asiriya wuu, ọ chịlọmwụ ịrị la ijiga nyọng myị ọng nyaa ọlẹ kọ hu ịlọmwụ ha.

⁸Ọ juwa kịnyaa lọ hakpara ọlẹ kọ dọmwụ nyọ họhọ bwu Ijipiti ẹgẹlẹ kọ jẹ ọlẹng nyọ gbanyẹ ọgbanyẹ, bwụka ụka ọlẹ kọ ri ọyẹẹnọ ikolobya dọmwụ nyọ họ ụya tọọ. Ị hwoo lala ọlakpara.

⁹Chajị nya ọọwa lẹ m hwọọ ju Asiriya ọngọhọha ọlẹ kọ tịtọ nyamwụ lụmẹ ụ-ụbwọ lẹ.

¹⁰Ị yọọ apwụ ji lọhị-lọhị. Ị wu anyị alẹng bala anyị anyang nyamwụ ọọwa lẹ ị nwọọ la ẹma nya ẹwụ lẹlẹ. Ị yọọ akama, anyang wuu ya ẹla rwọọ.

¹¹Ọ ri nya ịlẹhị ọholiba ọnyịnamwụ ọnyang yang ịwẹ wuu ma ọ tị myịmyị hakpara ọtụka-ọtụka gụ ọlẹ ka oholah dọmeụ họ wẹẹ.

¹²Ọhobịrị mọọma ta alegbeju ị kpẹhị rịrị ala Asiriya bala alegbeju nya ịsọja bala ọgẹwụ ịlẹ kị kụrụ ịwụrụ nya ẹwụ bala angị luhye nya ụnyịrẹ ịlẹ ka ịwa wuu ri ikolobya alụhị.

¹³M yẹ nyori ọchịlọmwụ ịrị. Ịwa anyịnịna im imiiye họ ụma nya abwẹla okpokpo.

¹⁴Ma akpara ọhọhọ nyamwụ tị kpagụ. Chajị ụkalẹ kọ yẹ ala ịBabịlọn ịlẹ kị kọ ekpeku nyaa bugulọ kị ya ịwụrụ ịnyịmịla kụrwaa

¹⁵lugba chọhị nyaa ị ya apwụ ọdarị egbeju chaa. Ekpeku ịwa wuu me arụrụ nya alegbeju nya ala ịBabịlọn.

¹⁶Ụka ọlẹ kọ yaa lẹ ọhọbịrị a mọma ta lẹ ọọwa lẹ ọ dẹrụ taa ka ịBabịlọn lẹlẹ.

¹⁷Ụka ọọwa lẹ ala ịBabịlọn ịwa a bọọ wẹ ẹpwa nyamwụ lẹ ị dịlahụ nyamwụ ụwa lẹlẹ. Ụka ọlẹ kị kpọọhọ gbee kị chị ọhịhị nyamwụ ịrị wuu lẹ ọ chọọ aga lẹ ọ tụbwọ hi ala ịBabịlọn lẹlẹ.

¹⁸Ụka ọlẹ kọ wẹẹ họ akpara ụgbọdọda bala ọ ya ịlọmwụ ji lọhị-lọhị ịlahị nya angịnyị wuu wẹẹ, ẹla nyamwụ chaga pwẹẹpwẹẹ lala ịnya ọnyịnamwụ ọnyang.

¹⁹Kpokpọọkpọ, ọ juwa họ akpara gụ ọwọwa, lọgụgụ ọlẹ kọ hakpara ụka nya onjwo ọyẹẹnọ nyamwụ ụwa Ijipiti.

²⁰Akpara ọhọhọ mọma jahị da alẹng ịlẹ kị kaa hakpara lala ije lee anyịrẹ.

²¹Oholibah, a myịmyị juwa tịtọ nyọka hakpara lala ụma nyọlẹ ka họ ụka ọlẹ ka ri onjwo ọyẹẹnọ ụwa Ijipiti ụka ọlẹ ka alẹng dang egbamẹ.

²²Chajị nya ọọwa lẹ, Oholibah, Ọngọlahị Ohe Oluhye yẹkẹẹ, Ịnọ ẹla nya angị hang há ịwẹ chịng aga lẹẹ, ma m ka họ ị ka ju agbama tang. M ka kpa warị kaa dagaga jung.

²³M ka kpa angịnyị bwu ịBabịlọn bala ichalidiya bala iPekod bala iChowa bala iKowa bala ala Asiriya wuu bala ikolobya aluhị tụ alegbeju ịkpẹhị rịrị angịnyị bala alegbeju nya ịsọja bala ọgẹwụ bala angị kụ anyịrẹ wuu.

²⁴Ị ka tụnụ pyịpyị bwu edii. Ị ka kpa ịsọja lụmẹ-lụmẹ la icharọtụ bala ịwagọn ọ-ya ang-abwọ nyaa ju. Ị ka kpa ọkụmada bala okpo ọkụrụ egbeju nya ẹwụ nyaa. M ka ya da ịka kụrụnụ ọọwa lẹ ị ka ka ehile nyaa lanụ eje lẹlẹ.

²⁵Am ka ji ịkẹjẹ awụrụ nyam ahị danụ chajị kị ka jẹ-ẹ̀ họnụ ẹla lagbama. Ị chị ikwịnyi bala arụ nyanụ eku. Ị ka nwụ angị hihi lẹma nya ẹwụ. Ị ka wu anyị alẹng bala anyị anyang nyanụ kparụ hiinu. Ị ka chị angị hihi ịla.

²⁶Ị ka pwọng angị juju nyanụ tụ ang ịdabwọ bala angị idoomyi ịnyịịla nyanụ.

²⁷Ụka ọọwa lẹ m ka hunu abwọ la imyi nyuchi nyanụ bala akpara ọhọhọ nyanụ ịlẹ kanụ kaa họ bwu Ijipiti lẹlẹ. Alẹ ị ka myịmyị manụma lee anụ ka kpịtịya nya Ijipiti myịmyị kaka.

²⁸Ịlẹ Ọngọlahị a ya lẹ, m ka tụbwọ hiinu ju angịlẹ kị wụụnụ ẹjẹ bala angịlẹ kẹẹla nyaa chịnụ aga ụbwọ.

²⁹Ị ka họnụ ẹla nya ọkwọ chajị anụ waa-ẹjẹ, ị ka nwụla ang myị ang ịlẹ kanụ h ụkụrwọ nyọka lala wuu kparụ. Ị ka tụụbwọ hiinu chụwa lọhị-lọhị bala ọ chụwa lụhwo luhwo. Ọng myị ọng jẹ chajị nya akpara ọhọhọ nyanụ. Imyi nya ụchị ọnwụnụ nwụ bala akpara ọhọhọ nwanụ,

³⁰a kpa ala ịlẹ wuu chịnụ ọgụ lẹ. Ang odudu ri ẹkẹẹ anụ họ akpara ta alẹpwụma ịkịla myịmyị anụ chịlọnụ ịrị la ijiga nyaa.

³¹A dịrẹ ọgụ ẹpẹtẹ nya ọnyịnang ọnyang, chajị nya ọọwa lẹ, m ka ya ẹkpẹ nya akama ụma nyọlẹ kam ya haa hanụ ịnyịnyị.

³²Ịịlẹ Ọngọlahị Ohe Oluhye a ya lẹ, a ka nwa ẹkpẹ ụma nyọlẹ ka ọnyịnang ọnyang nwa. Ẹkpẹ ọwa la kpori-kpori ọ tị ju ẹpwụ pwọọ. Ọng myị ọng ka kpang họ bala ọhụlọ ẹhụ jung chajị ẹkpẹ ọwa myọọ pwẹẹpwẹẹ.

³³A ka myị la ang ọnwanwa bala olujwo. Ẹkpẹ ọwa ri nya ayịreji ọtata bala hi ojuju. Ẹkpẹ ọwa a ri nya ọnyịnang ọnyang iSameriya lẹ.

³⁴A ka nwọọ kpa wuu gbanggbang. A ka bọọ ene, ene nyaa ịwa ka kọng ọ kịlẹtụ. Ịnyị am Ọngọlahị Ohe Oluhye a ya lẹ.

³⁵Chajị nya ọọwa lẹ Ọngọlahị Ohe Oluhye yẹkẹẹ, chajị nyọlẹ kanụ deeri him kanụ nyi-ẹkpẹ dam lẹ, anụ ka yẹ akama chajị nya imyi nya ọhọbịrị ọlala nyanụ bala akpara ịlẹ kanụ họ.

³⁶Ọngọlahị byim yẹkẹẹ, ọngịnyị ehe, a ka la Oholah bala Oholibah eje? Ọ rịnyị alẹ yang ịtịpyọ nyaa ịlẹ kịị họ jaa mẹ.

³⁷Ị hụchị ị myịmyị nwangịnyị. Ị huchị ta ekpeku nyaa ị myịmyị nwụ anyị ịlẹ kị ma hanụ. Ị ya anyị nyam kịla iya ọ jwila ha ikpeku nyaa.

³⁸Ọ ba ịwẹ kem ka ị chị ube ịgọgọ nyam ịrị ị myịmyị bịrị Ẹnụtụrụ Ọhịnyọ Lụkụrwọ nyam.

³⁹Ẹnụtụrụ ọlẹ kị nwụ anyị nyaa kịliya ha ịjiga nyaa, ẹnụ-ẹnụ ọwọwa ị wẹ ube ịgọgọ nyam kaa chọọ ịrị lẹ. Ịịwẹ a ri angịlẹ kị họ ube ịgọgọ nyam lẹ.

⁴⁰Ị dọmwụ du ẹrụ tọ angịnyị ka ẹga ọlụrụ ọọwa lẹ angịịwa a warị lẹlẹ. Anyịnịna anyang ịmiye ịlẹ hyenyi kpengkpeng chajị nyanga ịwa, ọọwa lẹ ị ya Ipentị kwo ahị nyaa ịmyịmyị yang ịdabwọ bala ang idoomyi nyaa da lẹlẹ.

⁴¹Ị hụhụ uhye nya ịbẹẹdị ọnyịịla nyịla, ị ya itẹbụrụ da ịịlahị nyịlaa. Ọọwa lẹ ị go ang ọchoru kwọkwọ bala ida nyam ọlẹ kam ya haa rụwa uhye nyamwụ lẹlẹ.

⁴²Angịnyị ịlẹ ka ẹla a rịaa ẹlẹlẹhẹ ka juwa họ ọmọmọnyọ dagaga jwoo. Iru nya angịnyị myụwa wuu ịkpa angị nwa ere bwu ugbileji kele ị yang ịdabwọ da anyịnịna anyang imiiye ịlẹ ị myịmyị ya okpokụrwẹgbeju nya adịrahụ ihuhị lụmẹ-lụmẹ kụraa.

⁴³Ọọwa lẹ m yẹkẹẹ, O-o ịnọtọọ gbee kọhị uhuhwo lẹ, ị juwa kpọọ nọta lala ọlakpara odu mẹ chajị ọlịnyị ọ hị meme la lẹlẹ lẹ.

⁴⁴Ị juwa tịrẹkpẹ kaa nọta Oholah bala Oholibah anyang alakpara ịwẹ ịnyịnyịnyịị.

⁴⁵Ma angị leje kpẹẹkpẹẹ tị ka ya eje waa chajị nya akpara ọhọhọ bala angịnyị ịnwụ nwụ nyaa. Chajị ị kaa hụchị bala ụbwọ nyaa chịwọ nya angịnyị.

⁴⁶Ịịlẹ Ọngọlahị a ya lẹ, tụ iru nya angịnyị guru chajị kị chuhi jwaa bala ọ iluhye-ọgba ang-abwọ nyaa kparụ.

⁴⁷Iru nya angịnyị ịịwa ka mịlaa ajwọ bala ọ nwaa lẹma nya ẹwụ, ị ka nwụ anjwo nyaa bala ọ chị ẹpwa nyaa ila.

⁴⁸Ụka ọọwa lẹ m ka hu ụchị ọhọhọ abwọ am ọpyị ọlẹ wuu lẹlẹ. Ọ tị ka ri ụbwọ ogbile anyang wuu ụ-ụrụ chajị kị ka myịmyị hakpara lala aananụ kaka.

⁴⁹Anụ anyang anyịnịna imiiye ịwẹ m ka yẹnụ akama chajị nya ụchị ọhọhọ bala ijiga ịkpụkpụ nyanụ. Ụka ọọwa lẹ, anụ ka jẹ ya am a ri Ọngọlahị Ohe Oluhye lẹlẹ.