Read idege ISIKẸLỤ 24 Bible Online

ISIKẸLỤ 24 - idege bible

ISIKẸLỤ 24

¹Ẹnụtụrụ iwo chiriri nya oya okiriwo ẹpwụ nya ẹka ihikichu nyọlẹ ka alẹwụ wuhi kpa rụ, Amkpaa ya ẹla tam yẹkẹẹ,

²Ọngịnyị ehe ee, da ẹnụtụrụ nya ala jụang mẹ chajị alẹ kpanga Adịrahụ nya ala iBabịlọn a juwa kpangịnyị nyamwụ kaa dagaga ju iJerusalẹm lẹlẹ.

³Da angịnyị nyam ị-la egbeju-ọngịrị etu ọlẹ yẹkẹẹ, hụ ẹchụ tọ ila ka chị enyi myọọ.

⁴Go abwọ bala ata nya iyo juwa ẹ-ẹchụ ka go iyo i-ju ekpinegu ịnyịịla-ịnyịịla myị ẹchụ kpọngkpọng.

⁵Hu iyo nya ọkpịlọ ọlẹ kọhagụ wuu juẹchụ ka go ịwụ ju ila ka tịla ju gbee kịwụ kpụ iyo ịwa gbee ka ekpinegu nyaa a myị ịnyịnyị.

⁶Chajị nya ọọwa lẹ, ịịlẹ Ọngọlahị a ya lẹ, Iyoo ka juwa hang ahụ epweji ọ-nwụ angịnyị. Ịyoo ka juwa ha ẹchụ ọkpang ọlẹ kị hwọọ kọ ka jẹ-ẹ̀ rụ myị ka. Hu eku nya iyo ookpokpo-ookpokpo gbee kị ka myị lọ wụlaa yẹ ine ka.

⁷Angịnyị ịlẹ kị nwụ juwa e-epweji ọ chiwọ nya angịnyị ịwa kuruhye nya ejwo. Ọ chọọ kuripyị chajị kị ka jẹ tụ egburuja kụraa ka.

⁸Am Ohe Oluhye tụbwọ hi ịwọ ọlẹ kị chị rụwa uhye nya ẹjwọ chajị kị jeka tang kụraa ka chajị ka agbama nyam ka wuleji kam ka jẹ-ẹ̀ haa kwiwa.

⁹Ọngọlahị Ohe Oluhye yẹkẹẹ, Iyoo ka juwa ha epweji ọ-nwụ angịnyị. Am lịlọm a ka tụ ịwụ ịlẹ kị ka ya tila ju guru lẹ.

¹⁰Tu guru gbudum ka tila ja. Kpu iyo ọwa hiigu-hiigu, yang nyịnọ ẹpwa jwoo ka họ ka ekpinegu nyaa a rwila.

¹¹Hu hwo nya ẹchụ okpang rịrị awụrụ ịla gbee kọ gomịla gbuu chajị ka iri bala ẹga ọchị chị nyamwụ ka rwila wuu.

¹²Akama ọlẹ kam họ wuu ka ẹchụ ka la cheri-cheri rododu ila rila a dọmwụ rụ ẹga ọchị chị nyamwụ myị ka.

¹³IJerusalẹm ụchị ọhọhọ nyang chịng ịrị lẹ, ọ ri nya ịlẹhị m maga nyọka hụng cheri-cheri, kpọkpọọkpọ a juwa ịrị ọchị chị nyang. A ka jẹ-ẹ̀ la cheri-cheri myị kaka gbee kam ka ju agbama tang pwụ ọbaba.

¹⁴Am Ọngọlahị a ya ẹla wẹlẹ, ụka juwa pwụ eji kam ka họ ịnyam lẹ, m juwa hu ọhọbịrị nyanụ ujiji lee ọ yẹnụ akama chajị nya angịlẹ kanụ họ. Ịnyị Ọngọlahị Ohe Oluhye a ya lẹ.

¹⁵Ọngọlahị ya ẹla tam yẹkẹẹ,

¹⁶Ọngịnyị ehe ee, m juwa ka hu ọngọ hang hagụ wuu kparụ ụka okpokpo kpi rang. A tị ka mweru lee ojida lee ọdọmwụ nya egbejida bwahị nyang kpong-kpong ka.

¹⁷Aa mweru ju ịlọng ẹpwụ-ẹpwụ kem, a bida chajị nya igu nyamwụ ka. A ya apwụ ọ-chị egbeju nyang chị ka ya ẹgbatẹ nyang juata. A ya ịngịngịhyẹ ẹwụ kụrụ ahị ka lee ọ ri angị riri ụma nyọlẹ ka angị bida kaa ri ka.

¹⁸Ụka ọọwa lẹ m ya ẹla ta angịnyị lụtụrụ gbegbegbe lẹ, alobyi lẹ ahụ nyam a gbu lẹlẹ ọọwa lẹ ahị ọpyẹpyẹ ọkịla lẹ, m họ jaabwọ ka Ọngọlahị byim lẹlẹ.

¹⁹Ụka ọọwa lẹ angịnyị a tọm wo yẹkẹẹ, a ka ya jehi etu nyang ịlẹ ka wẹ họ chajị kahị ka jẹ kaa?

²⁰Ụka ọọwa lẹ m wa yẹkẹẹ, Ọngọlahị ya ẹla tam yẹkẹẹ,

²¹Ọwa nyị byi ala Isirẹlụ ya ịlẹ ọwa Ọngọlahị Ohe Oluhye nya ya lẹ. Ube ịgọgọ nya ọọwa ọlẹ kịị nyị ri ọngịrị nyanụ ọlẹ kaanụ nyị ka hi ọbọọchẹ ju bala ọ haanụ kanụ nyị ka juwa yọọ bala ọ kele kaa gbịgba ụwa. Ọwa nyị ka chị ịgọgọ jwoo kaka. Anyị alẹng tụ anyị anyang nyanụ ịlẹ kị hi wuu ám̀ i-iJerusalẹm ị ka nwaa lẹma nya ẹwụ.

²²Ụka kọ lịnyị lẹ anụ ka họ jaabwọ ọlẹ kam wẹ họ lẹlẹ, anụ a ka yang kụrụ ahị lee ọ rịang ụma nyọlẹ ka angị bida ka ri ka.

²³Anụ ka ya apwụ ọ chị egbeju nyanụ kụrụ egbeju bala ọya egbatẹ nyanụ juata. Anụ a ka cheru lee ọ ka jida ka, ma anụ ka juwa rụ ịrụ hụrụ chajị nya ịhọbịrị nyanụ ọọwa lẹ anụ ka juwa mweru jawụlẹ lẹlẹ.

²⁴ISikelu ka ri ang ọ jwẹjẹẹ hanụ, anụ ka họ jaabwọ ọlẹ kọ họ wẹ ukọlẹ kahụ nyamwụ gbu. Ụka ká ang ịlẹ a họ lẹ anụ ka jẹ ya am a ri Ọngọlahị Ohe Oluhye lẹlẹ.

²⁵Ọngọlahị yẹkẹẹ, ọngịnyị ehe, m ka hu ube ịgọgọ ọlẹ kọ ri ọngịrị bala ang ọ hi ọbọọchẹ ju bala ọ chị ọkẹkẹnị ju nyaa ọlẹ kị kaa yẹ bala ọ ju kẹpwụ nyamwụ kparụ m ka myịmyị naa anyị alẹng tụ anyị anyang nyaa.

²⁶Ẹnụ ọlẹ kam ka họ ẹlọwa, ọng myị ọng ọlẹ kọ be myị ka warị kaa tịrọnụ jeng.

²⁷Ụka ọwẹ ịnyịnyị ọnụ nyang ka wụrụ. A ka ya ẹla a ka myịmyị kwọnụ kaka. Ụka ọọwa lẹ a ka ri ang o-ju ẹjẹẹ ha angịnyị lelẹ bwula ọọwa ị ka jẹ ya am a ri Ọngọlahị Ohe Oluhye lẹlẹ.