Read idege ISIKẸLỤ 25 Bible Online

ISIKẸLỤ 25 - idege bible

ISIKẸLỤ 25

¹Ọngọlahị ya ẹla tam yẹkẹẹ,

²Ọngịnyị ehe ee, jahị daka epweji nya ala Amọn chajị ka yẹ ọmwụ jwaa ịlẹ,

³byaa a kị ke ụrụ la ẹla ọlẹ kam Ọngọlahị Ohe Oluhye juwa taa, chajị nyọlẹ kanụ chị ọkẹkẹnị nyọlẹ kanụ yẹ ube ịgọgọ nyam kọ chịrị bala ọpyị nya ala Isirẹlụ ọlẹ kọ da uhuhwo bala ala iJuda ịlẹ kaalẹwụ wu kparụ.

⁴Chajị nya ọọwa lẹ, m juwa tụbwọ hiinu ju angịnyị ibwu ọmwẹnụ-ụtụrụ ụ-ụbwọ chajị kị ka yanụ la. Ị ka jiwe nya alẹwụ nyaa bala ọ kwẹpwa epweji nyanụ. Ị ka ri egbe nyang ẹrụ bala ọ nwa enyi-ẹmẹ nyiyo nyanụ.

⁵M ka yẹ epweji nya iRaba ri ẹga okpa anyịrẹ ri amẹ, m myịmyị ka họ epweji nya ala Amọn ka ya ẹla ẹga okpa ịkpịlọ ri amẹ. Ụka ọọwa lẹ anụ ka jẹ ya am a ri Ọngọlahị lẹlẹ.

⁶Jaabwọ ọlẹ ka Ọngọlahị ya rẹkẹ, anụ du-abwọ bala ọ chata-eji juwa chị ọkẹkẹnị bwula imajẹ nyanụ ọlẹ kanụ la jahị dala Isirẹlụ.

⁷Chajị nya ọọwa lẹ, m ka tụbwọ hiinu ju alẹpwụma ịkịla ụbwọ ị kpanụ rụ lala angga abwọ ịlẹ kị kaa ye bwu ọgbẹwụ. M ka tanụ ayịreji yịgẹ-yịgẹ ọlẹ kanụ ka la epwoja nya ịlọnụ kaka. Ụka ọọwa lẹ anụ ka jẹ ya am a ri Ọngọlahị lẹlẹ.

⁸Ọngọlahị Ohe Oluhye yẹkẹẹ, chajị nyọlẹ ka iMowabụ ya ala iJuda nyi lala alẹpwụma ịkịla lẹ,

⁹M ka ya iwe da ị ka tụ epweji ịlẹ kị juwa ọ oyi nya ala iMowabụ pyịpyị. Epweji ịwa ri epweji nyaa ịlẹ kị hagụ wuu. iBetị-iJechimoti bala iBalị-ịmẹyoni bala iKiriyatani.

¹⁰M ka ya ala Amọn bala ala iMowabụ ha angịnyị-ị bwu ọmwẹnụ-ụtụrụ. Ị ka yaa la lala ang-ugu nyaa. Aalẹ ọngọngọhẹ a ka myịmyị wo ẹnyị nyori Amọn nyị ri epwoja ẹnẹnẹhẹ kaka.

¹¹M ka ya ala iMowabụ akama. Ụka ọọwa lẹ ị ka jẹ ya am a ri Ohe Oluhye lẹlẹ.

¹²Ọngọlahị Ohe Oluhye yẹkẹẹ, chajị nyọlẹ ka ala Ẹdọm nyị họ ala iJuda ẹla kwiwa lẹ. Ang ọlẹ kịị nyị haa kwiwa nyị ya eje nya ọhọbịrị wu ala Ẹdọm lẹ.

¹³Chajị nya ọọwa lẹ Ọngọlahị Ohe Oluhye yẹkẹẹ, m ka tụ ala Ẹdọm pyịpyị lọngịrị nyam. M ka nwụ angịnyị tụ iyo ịlụwa wuu. M ka họ ụwa wuu ka da uhuhwo bwu epweji nya ala ịtema lalala ka ju ka epweji nya ala iDedan. Ẹma nya ẹwụ ka ri angịnyị

¹⁴M ka kpa ala Isirẹlụ angịnyị nyam họ ala Ẹdọm kwiwa. Ị ka họ ala Ẹdọm kwiwa jaabwọ ka agbama nyam lụmẹ ka ba. Ụka ọọwa lẹ ala Ẹdọm a ka jẹ ẹla ọhọ kwiwa nyam lẹlẹ. Ịnyị am Ohe Oluhye a ya lẹ.

¹⁵Ọngọlahị Ohe Oluhye yẹkẹẹ, chajị nyọlẹ ka ala Isirẹlụ ri aluji nya ala iFilisitiya gbe oyi myị oyi lẹ, ị juwa haa ẹla kwiwa ju lọkwọ bala imajẹ ẹpwụ ịtịtọ kị ka taa ayịreji.

¹⁶Chajị nya ọọwa lẹ, m ka tụ ala iFilisitiya pyịpyị lọngịrị nyam. M ka ta ala ikereti bala angịlẹ kị nọ ẹpwa ọọnụ nya ihu ọlẹgbegbu ayịreji.

¹⁷M ka yaa akama lagbama ọtụka-ọtụka, m ka haa kwiwa, ụkowa lẹ ị ka jẹ ya am ri Ohe Oluhye lẹlẹ.