Read idege ISIKẸLỤ 26 Bible Online

ISIKẸLỤ 26 - idege bible

ISIKẸLỤ 26

¹Ẹnụtụrụ ọhọhẹ nya ọya ọhẹ ẹ-epwụ nya ẹka ịwo kụrụ ookpokpo nyọlẹ kị goohi nya alagba kpa rụ kpá, Amkpaa ya ẹla tam yẹkẹẹ,

²Ọngịnyị ehe ee, ala iTaya lalẹẹ chị ụkwa ju ala iJerusalẹm yẹkẹẹ, Ẹ̀pyị́ị̀nẹ́ẹ̀! IJerusalẹm ta ayịreji lẹ! Ọwa kọ ri olegbeju nya ọhị ọtụka ọdada, ị gwoo cheji lẹ! Ahị ka ye iwe nyamwụ ku ká ọhị nyahị ka pyẹpyọọ ugbẹnyị lẹ!

³Ajị nya ọọwa lẹ, am Ọngọlahị Amkpaa jam yẹkẹẹ: Ahụ epweji nya ịTaya ee, m̀ juwa kpa ẹla tang lẹ. M̀ ka kpa ẹpwụma lụmẹ-lụmẹ kaka mwẹla tang. Ị ka wẹ tuuu jaabwọ ká ihu ọtụka kaa gu agbụ

⁴Ị ka be egwalọ nya epweji nyanụ bala angịlẹ kanụ me kanụ kaa kụ kpẹhị rịrị epweji ene yịgẹ-yịgẹ M ka tụ egbanjwọ nyaa wuu cheri-cheri ụwa ka yẹ ri ẹjwọ uhuhwo dụwa.

⁵Epweji nya ịTaya ka yẹ ri ọpyị ọkịlọlọ ọlẹ ka ya ubagala nyaa pa ụwa. Ịnyị am Ohe Oluhye Agụgụ a ya lẹ. Epwoja ịkịla ka wẹ kaa wangụ bwu iTaya.

⁶Alẹwụ ka ta epweji nyaa ịlẹ kị juwa odehe nya enyi ayịreji lẹma nya ẹwụ. Ụka ọọwa lẹ ị ka jẹ ya am a ri Ohe Oluhye Ọngọlahị lẹlẹ.

⁷Ọngọlahị Ohe Oluye Agụgụ yẹkẹẹ, M juwa kpa iNebukadinesa Adịrahụ nya ala ịBabịlọn ọlẹ kọ gụ ịdịrịhụ wuu kaa dẹwụ tanụ. Ọ ka warị bwu oye nyẹtẹ liru nya ịsọja. Ọ ka kpa iru nya anyịrẹ bala ang ịrụnyẹ bala angịdẹwụ warị.

⁸Alẹwụ ka ta epweji ịlẹ wuu kị juwa odehe nya enyi ayịreji. Alẹwụ ịwa ka chị aji junu ị ka myịmyị me ang ọlẹ kị ka bwu kpuye nya egwalọ bwu bala ị ka kpa ọkụmada jahị danụ.

⁹Ị ka kpa ekwoji be egwalọ ọdagaga ju epweji nyanụ ene. Ị ka kpa eje o-be ịwụ beẹgaọ kụ kpẹhị rịrị epweji nyanụ ene.

¹⁰Iru ojuju nya anyịrẹ nyaa ka lụmẹ gbee ị ka chị ẹkụrụwa kụrụ-nụ wuu. Iru nya anyịrẹ ịkụkụ nyaa bala inya ịcharọtụ bala umoto ị kpa olo nyang abwọ nya ẹwụ nyaa ka hu egwalọ nyanụ jigi-jigi. Adịrahụ nya ala ịBabịlọn ka kpa alẹwụ nyamwụ jụ ka ẹpwụ nya ogirigba nya epweji nyanụ wụlẹlẹẹlẹ lala epweji ọlẹ kị me ugulọ jua.

¹¹Ogu ẹpẹtẹ nya ụnyịrẹ nyaa ka chẹji tu opeje nyanụ wuu da. Ị ka nwụ angịnyị nyanụ ẹ-ẹwụ. Angị iweji nyanụ ịlẹ kị lọngịrị ka hu cheji.

¹²Aluji nyanụ ka go ụdụ nyanụ kparu wuu, ị ka myịmyị go ang nya ọhị nyamwụ yoyi kparụ. Ị ka be egwalọ nyanụ bala ọ bịrị eba ịnyịịla nyanụ ịwẹ ene. Ị ka go ajwọ nyanụ bala ẹkụ nya ekeji ị kpa nwụ ebe bala ọrụ nya ịpyị nyanụ ju ka ẹpwụ nya ihu ọtụka.

¹³M ka hunu abwọ leje ịlẹ kanụ ka mwụ bala ọdịrẹ ịlẹ kanụ kaadu.

¹⁴M ka họ ọpyị nyanụ ka yẹ ri ẹjwọ ọlẹ ka alurwenyi kaa ya ubagala nyaa pa. Ị ka jẹ-ẹ̀ ma epweji nyanụ nwụ ẹnẹnẹhẹ kaka. Ịnyị am Ọngọlahị Ohe Oluhye Agụgụ a ya lẹ.

¹⁵Ọngọlahị Amkpaa ya ẹla chajị nya epweji nya ịTaya yẹkẹẹ, Ụka ka alẹwụ kụrụụnụ, angịlẹ kị kụ ọnụ-enyi wuu ka juhi chajị nya eko ọchịchị nya angịnyị nyanụ ịlẹ kị ka juwa nwụ.

¹⁶Ụka ọọwa alegbeju nya epweji ịla ọnụ enyi wuu ka hireji bwu ẹchị nya adịrahụ nyaa. Ị ka pwọ ịwụrụ ị nang ju ịnyịịla nyaa cheji, ị ka hụhụ ịpyị ju che kpakpakpa chajị nya iwe-ahụrụ nyanụ, uhi ọlẹ kọ ka chị jua a ka jẹẹ myị ka.

¹⁷Ị ka mwu eje nya ịda ọbaba nunu yẹkẹẹ, Ị ta epweji ọlẹ kọ lelue lụmẹ ayịreji lẹ, ị ga ọlẹ ka alẹpwụ nya enyi nọ ẹpwa ẹpwụ nyang kpa ụkọhyẹ lẹ. Ahụ bala angịnyị nyang ịlẹpwụ nya enyi lọngịrị ọtụka-ọtụka ọlẹ ka angịnyị ịlẹ kị kụ ọ-ọnabwọ wuu juhi nyang.

¹⁸M ẹnụ nya eji ọmịla-mịla nyang ọlẹ ejiri wu angịlẹ wuu kị kụ ẹpwụ nya enyi chajị nyọlẹ kị Oluhye tang ayịreji.

¹⁹Ọngọlahị Ohe Oluhye yẹkẹẹ, M ka họng a ka dụwa uhuhwo lala ẹga ọlẹ ka ọngọngọhẹ a kụ ka. M ka họ Ihu ọtụka ka myị wuu kụrụng.

²⁰Ụka ọọwa lẹ m ka jung eji lẹ a ka tụdụrụ ju ka ọpyị nya alegu lẹlẹ. Ụka ká kaa tọ angịlẹ kị gbu lẹ, anụ ka kụwa lawụlẹ bala angịlẹ kị ta ayịreji ene-ene lụka ọnyọgo lẹlẹ. A myịmyị ka jẹ-ẹ̀ kpehe bwuwa ẹnẹnẹhẹ lee ọngọngọhẹ ọ kụ ẹpwụ nyang kaka.

²¹M ka họ ocheju nyang ka wejiri angịnyị ka tịtọ nyang ma ịngịngịhyẹ a tị ka rahụ ẹnẹnẹhẹ kaka ịnyị Ọngọlahị Ohe Oluhye a ya lẹ.