Read idege ISIKẸLỤ 27 Bible Online

ISIKẸLỤ 27 - idege bible

ISIKẸLỤ 27

¹Ọngọlahị ya ẹla tam yẹkẹẹ,

²Ọngịnyị ehe ee, M wẹjẹ nya ịda ọbaba ju iTaya mẹ.

³M weje yẹkẹẹ, ahụ epweji nya iTaya ọlẹ ka juwa ogirigba ọ kẹpwụ nya ihu ọtụka kaka dohị ta angịnyị ịlẹ wuu kị kụ abụka nya ihu ọtụka, ịịlẹ Ọngọlahị Ohe Oluhye a ya lẹ. Ọ iTaya ee, ahụ ọngọlẹ kaka kpa ụhị nyang hi ọbọọchẹ.

⁴Ẹpwa nyang juwa ẹpwarịrị nya Ihu ọtụka. Angịlẹ kị nwụng hung a hụhị hịlẹ hịlẹ.

⁵Ị kpa okoji nya ifii bwu Ọgbọdọ ịHẹẹmọn nwụng, ị myịmyị kpa okoji isida bwu iLibanọn weji nyang.

⁶Ị kpa okoji nya Ooku ịla iBachan hang ọ ju ụmwụ nyang. Ị Họ oyeji nyang la okoji iPayini ịla ịSayịpịrọsi. I kpụ ẹngịrị nya inyi kurwọọ uhye-ọgba wuu.

⁷Ị kpa apwụ ịkpịnya ịlẹ kịị nịmwụ ju bwu Ijipiti họ ang ọ keng ọwa a ri ang-ẹjẹẹ nyang ọlẹ kịkaa kpa jẹng ụka ka ji hwẹẹẹ bwu epweji nya Elichaa ọlẹ kọ juwa ẹpwarịrị nya enyi dakụrụng uhye-ọgba.

⁸Angịnyị bwu iSayidọn bala ala Avadi a kaa pa ụmwụ nyang lẹ iTaya angịnyị nyang ịlẹ kii ri alịbańgà tị́kaa ju ụmwụ nyang lẹ.

⁹Angị kọ ụmwụ nyang bwu epweji nya iBibilọsị. Ị je ụkụrwọ hịlẹ-hịlẹ wuu kị ga kịị ba. Angịlẹ kị kaa ju ụmwụ nyaa wuu ka da ọhị tang.

¹⁰Ala iPesia bala iLydia bala iLibya juwa ẹpwụ nya ịsọja nyang. Ị kaa ya ọkụmada bala ọkpo ọkụrụ egbeju nya ẹwụ nyaa pịlẹ uhye nya ugulọ nyang. Ị wa a kaa kụrụ ẹwụ hang a du ka angịnyị ka wo ẹnyị nyang lẹ.

¹¹Angịdẹwụ i-bwu Avadi gbeji kpẹhị rịrị egwalọ nyanụ. Alẹng i-bwu ịGamadị gbe ebe iluhye nyanụ. Ị ya akụmada nyaa pịlẹ egwalọ nyanụ du kanụ há ụhị.

¹²Anụ da ọhị i-iSipeen. Alụwa kpa okpoko onyoowuru bala ije datị-datị ra ang-ụdụ ịlẹ kị ri ọhị nyanụ.

¹³Anụ da ọhị i-iGiriisi bala iTubalụ bala ịMẹchẹkị. Alụwa ya anyịhị bala ang ịlẹ kị kpa oje ọnyọmịla họ rịranụ.

¹⁴Ala ịBẹtị-ịtọgama ya anyịrẹ ị-kpa họ ụkụrwọ bala anyịrẹ ị-kpa dẹwụ bala anyịrẹ ịlẹ ká ibyiyó ma rịra ang nya ọhị nyanụ.

¹⁵Ala iRodisi ka dohị tanụ, iru nya angịlẹ kịị nọ ẹpwa ọ-nụka nya ihu ọtụka wuu kaa ya angị ri nya inyi bala ajini nyẹ ang nyọhị nyanụ.

¹⁶Ala Ẹdọm ka dọhị tanụ chajị nya iru nyang nyọhị ịlẹ kanụ la. Ị kaa ya ajwọ ịnyịịla-ịnyịịla bala ịpwụ iyiro-yiro bala ịpwụ ị-nang ju bala ịpwụ ịkpịnya bala ikoraal ịlẹ kị ka gba bwepwụ nya enyi bala ogbe ri ranụ.

¹⁷Ala iJuda bala ala Isirẹlụ ka dọhị tanụ: ịkaa ya iwiiti ịlẹ kị kpa bwu iminniki bala inwa bala ida nya olivu bala ida ochoru kwọkwọ dọhị tanụ.

¹⁸Ala ịDamasịkọsị ka dọhị tanụ chajị nya iru nyang nyọhị nyanụ bala ang ụdụ nyanụ ụma datị-datị ịlẹ kanụ la. Ang nyọhị nyaa ịlẹ kị ka ya nyẹ ịnyanụ ri ere ọlẹ kị kpa bwu iHelbọn bala egba nyiyo inyiwuru.

¹⁹Ala iDan bala ala ijavan ịlẹ kị bwu Usalụ ka dọhị tanụ: ị kaa kpa ịku nya ikpoko bala ikasiya bala imako nyang nyọhị nyanụ.

²⁰Ala iDedan kaa kpa ịpwụ ị dakụrụ anyịrẹ dọhị tanụ.

²¹Ala Arabụ bala alegbeju nya ala ịKẹdaa kaa ya ịmwụ nyẹ ang nyọhị nyang.

²²Ala ịChẹba bala ịRama ka kpa ang ịdaabwọ bala ang idoomyi bala okpoko ịgọm bala ida ọwụwụ nya ang nya ọhị nyang.

²³Ala epweji nya ịHaran bala ịKane bala Idẹn bala alọhị bwu ịChẹba bala ala Achuu bala iKilimadị anyị wuu ri alọhị nyang.

²⁴Ị kaa kpa ịpwụ ịnyịịla-ịnyịịla bala ịpwụ iyiro-yiro bala ịpwụ ị-nụ ang ju bala ịkapẹtị ụma datị-datị bala ịchiri dọhị tanụ.

²⁵Ụmwụ nyenyi nya ala ịTachichi a ka kpa ang nyọhị nyanụ lẹ. Ị ju ụmwụ olo, ọ myị pwẹẹpwẹẹ ụwa ẹpwarịrị nya ihu ọtụka.

²⁶Angị ju ụmwụ nyanụ kparụ kaka ju ka ẹpwa rịrị nya ihu ọtụka ọọwa lẹ igbachịwụ ọ bwu ọmwẹnụ-ụtụrụ a danụ ụwa lẹlẹ.

²⁷Ang ụdụ nyanụ ịlẹ kanụ ka kpa dọhị wuu bala angị ju ụmwụ nyanụ bala angị ka mwụ nyanụ bala alọhị nyanụ bala angịdẹwụ ịlẹ kị juwa ẹpwụ nya ụmwụ ịwa wuu byi enyi ụka ọlẹ ka igbachịwụ da ụmwụ nyanụ ụ-ụwa ẹ-ẹpwụ enyi.

²⁸Eko ọchịchị nya angịlẹ kị juwa byenyi ka họ odehe nyi enyi ka hụ jìgi-jigi.

²⁹Angịnyị ka kpehe hi amwụ nyenyi ịkịla ịlẹ kịị juwa pa wuu, angị kpa amwụ nya enyi ụgbẹyị bala angịị ju amwụ wuu ka kpehe kaa godayị ụwa ọọnụka nya ihu ọtụka.

³⁰Ịka jida onyuujujwo lomyi gboo, ị ka chụ ịpyị kụrụ egbeju bala ọ kpịlaa tudu agbu chajị nyang.

³¹Ị ka pwila inyi ị ka ya ịwụrụ nya ida ọbaba kụrụ chajị nyang. Ị ka bida chajị nyang lọkịlẹtụ onyuujujwo.

³²Ụka kị juwa cheru ị ka mwu eje nya ida ọbaba chajị nyang yẹkẹẹ, Oowo ịtị ka jẹ-ẹ̀ chụ kaa pwọku ịTaya, oowo ịtị ka jẹ-ẹ̀ chụ pwokwọọ ọngọlẹ kọ kwọnụ taa ẹpwụ nya ihu ọtụka?

³³Ụka kị kpang nyọhị nyang kpehe bwu ẹpwụ nyenyi ọ kaa họ ọbaba nya angịnyị wuu haa, bwula ụdụ ọọtụka nyang bala angịlẹ kaka kpa ra, ịdịrịhụ nya odehe kaa ka kpụ ụdụ.

³⁴Ma ọlẹlẹ ihu ọtụka lẹ, ang nyọhị nyang tụ angịlẹ kịị ka họ ụkụrwọ hang byi enyi balang lẹ.

³⁵Ọ la angịnyị ịlẹ wuu kị kụ ọọnka nya ihu ọtụka ẹbyẹbyị chajị nya ihwa hụrụ nyang. Ọ la ịdịrịhụ nyaa uhi hi ọtụka-ọtụka. Uhi ọọwa dọmwụ chehe ahị nyaa.

³⁶Angịlẹ kị ka dọhị chị pwọ chajị nyang. A ta ayịreji luhihi, ịngịngịhyẹ à tị́ ka ri ahụ kaka gboyi myị oyi.