Read idege ISIKẸLỤ 28 Bible Online

ISIKẸLỤ 28 - idege bible

ISIKẸLỤ 28

¹Ọngọlahị ya ẹla tam yẹkẹẹ,

²Ọngịnyị ehe ee, byi Adịrahụ nya iTaya a am ohe Oluhye Agụgụ nyị yẹkẹẹ: Chajị nyọlẹ ka ọkịlẹtụ nyang myị la ọbọọchẹ lẹ a juwa ya ọwa nyị ri ohe. Ọwa nyị hụhụ ám̀ ẹ-ẹchị nya Adịrahụ nya ọọwa lala ohe ẹpwarịrị nya Ihu ọtụka. Ọrinyịlẹhị a ka pịrị lọng ya ọwa nyịri ohe maà tị́ri ịngịngịhyẹ dala ongịnyị ehe ka.

³A me irya ya a jẹla gụ ịDanẹlụ, a me irya ya ịngịngịhyẹ a ka jẹ-ẹ̀ kpịbaa hing myị ka.

⁴Bwula ẹla ọjẹjẹ bala ẹla o-wo kpakpa nyang ahụ nyaa kpa kpụ ụdụ lẹ bala ọ kpa ye okpoko ịgọm bala ọkpọ onyoowuru ịlẹ ka go ju ụ-uwa ẹ-ẹga ọnyang kpịba nyang lẹ.

⁵A họ ụdụ ọkpụkpụ nyang juwa kịlahị bwula ẹla ọjejẹ ọtụka nyang. A juwa hi ọbọọchẹ chajị nya ụdụ ọkpụkpụ nyang.

⁶Chajị nya ọọwa lẹ, Ọngọlahị Ohe Oluhye yẹkẹẹ, Chajị nyọlẹ ka me irya ya ọwa nyị jẹ ẹla lala Ohe Oluhye lẹ,

⁷M ka kpa angga warị chịng gụ, angịlẹ kiri ẹpwụma ị lọkwọ gụgụ wuu, ị ka gbile ẹma nya ẹwụ nyaa ị ka ta angị ịnyịịla ịlẹ ka kpa ẹla ọjẹjẹ nyang họ ayịreji ị ka họ ọhị ọrụmụ nyang ka lẹpẹpẹ.

⁸Ị ka tụng ju ka ụjẹ ọpyị a ka gbu igu ẹgẹga ụwa ẹpwarịrị nya ihu ọtụka.

⁹A myịmyị ka jẹ-ẹ̀ ya ọwa nyị ri ohe ịlahị nya angịlẹ kịwẹ ka nwụng wẹẹ? A ka ri ọngịnyị ehe ụwa ụbwọ nya angị nwụng nwụ, ụkọọwa a ka ri Ohe kaka.

¹⁰Ang ịwa ka nwụng ịgu ụma nya ịnyọngọ dụwụwụ ka, ịnyị am Ọngọlahị Ohe Oluhye a ya lẹ.

¹¹Amkpaa myịmyị ya ẹla tam yẹkẹẹ,

¹²Ọngịnyị ehe, mwu eje nya ida ọbaba ju adịrahụ nya ala ịTaya, ká byoo mẹ, Amkpaa Ohe Oluhye yẹkẹẹ, À la kpẹẹkpẹẹ kpá, myị̀ lẹla ọjẹjẹ bala ụhị pwọ̀ọọ ẹnẹhẹ lẹ!

¹³A tị́ kụ Idẹn ẹrụ nya Ohe Oluhye. Ị họ angị ịkụrụ-kụrụ nyang ịnyangga lajwọ ịnyịịla-ịnyịịla datị-datị. Ajwọ ịịwa ri ogbe bala ịdayamọndu bala itopasị bala ịbẹriili bala ịkaneliyan bala ịjasịpa bala ịsafaya bala emeralụdụ bala ịgaanẹtị. Ị ya ịjang nya okpoko ịgọm wụlọ dang. Ẹnụ kị họng ị ya ang ịwẹ hang lẹ.

¹⁴M chụ olegu-icherubu kụ ụwa nyọka gbeng. A juwa u-uhye nya ọgbọdọ ọlịgọgọ nya Ohe Oluhye juwa jẹdịyẹ ẹ-ẹpwarịrị nya ajwọ ịnyịịla-ịnyịịla ịwẹ.

¹⁵Abyị nya ẹlẹlẹhẹ a juwa ẹpwụ nya ọhịhị nyang ka bwu ụka ọlẹ kị họng gbee ka daka ụka ọlẹ kịị yẹ ang onyobyi ẹpwụ nyang.

¹⁶Ẹ-ẹpwụ nya ọhị ọdada nyang lụmẹ-lụmẹ ọọwa lẹ ọhị hị nyang a mịla agbụrụ bala ọhọbịrị lẹlẹ. Ụka ọọwa lẹ m kụng hi ọgbọdọ ịgọgọ nya Ohe Oluhye lẹ, ala iCherubim ịlẹ kị gbeng a gbang kpehe hi ajwọ nyịla ọlẹ ka ji lẹlẹ.

¹⁷A hi ọbọọchẹ lụmẹ-lụmẹ chajị nya ụhị nyang. A bịrị ẹla ọjẹjẹ nyang chajị nya ọhị ọ ru ru nyang ọọwa lẹ m chịng abwọ da wẹ odehe chajị ka ịdịrịhụ ka yẹ nya ang o-ju ẹjẹẹ.

¹⁸A chị ẹga ọgbịgba nyang ịrị bwula iru nya ịhọbịrị nya bala abwẹla ọ-chịla o-hu ọkịlẹtụ a ka ịlẹpwụ nya ọhị ọdada nyang. Ọọwa adu kam ju epweji nyang ila kọ rwila kpobyi lẹ, M yeng kaa ri agbu chajị ka angịlẹ wuu kị jẹng ka yẹng.

¹⁹Ela nyang wu angịlẹ kị jẹng wuu ẹjiri chajị nyọlẹ kọọ chẹju nyang lụhị hi ịịwẹ katị ka ji ẹgẹhẹ ẹnẹnẹhẹ kaka.

²⁰Ọngọlahị ya ẹla tam yẹkẹẹ,

²¹Ọngịnyị ehe ee jahị daka ịSayidọn chajị ka yẹ ọmwụ taa pyịpyị.

²²Byaa ya ịlẹ Ọngọlahị Ohe Oluhye a ya lẹ, ẹla nyang wụm ẹjẹ ịSayidọn, angịnyị ka gwogbo ham chajị nyang ịlẹ kam ka họng. Ịka jẹm am a ri Ohe Oluhye lẹ ụka ọlẹ nyị la ịgọgọ lẹlẹ. Ala Isirẹlụ ka nọ ẹpwa ụwa ọpyị nyaa ọlẹ kam ya ha iJekọbụ ọnchẹ nyam.

²³M ka du ẹdụrụ warị ẹdụrụ ọhẹ wẹ ẹga nyanụ, opeje nyanụ ka ri ịwọ-ịwọ. Ẹdụrụ ọọwa ka chịnụ ọgụ bwu ịkịka ọnyị myị ọnyị wuu. Ọọwa, anụ ka jẹ kam a ri Amkpaa lẹlẹ.

²⁴Ẹpwụma ịdagaga ju ala Isirẹlụ ịlẹ wuu kị baanụ ẹtẹ ene-ene tụtụ ka gunu ejwo kaka.

²⁵Amkpaa ya ọwa nyị ka kpa ala Isirẹlụ nyà bwu ẹpwụma ịlẹ wuu kọọwa nyị nyaa epepe ju ka.

²⁶Ị ka kụrwa lokpunyi, ị ka nwụ ẹpwa bala ọ tọ ekeji nya alakọnụ, angịlẹ kịị nọ ẹpwa baaba kịkaa yẹhị daa bwee wuu m ka ya akama. Ụka ọọwa lẹ ị ka jẹ ya am a ri Ọngọlahị Ohe Oluhye lẹlẹ.