Read idege ISIKẸLỤ 29 Bible Online

ISIKẸLỤ 29 - idege bible

ISIKẸLỤ 29

¹Ẹnụtụrụ iwo kụrụ imiiye nya ọya iwo ẹ-ẹpwụ nya ẹka iwo nyọlẹ ka alẹwụ wuhi kparụ, Ọngọlahị a ya ẹla tam yẹkẹẹ,

²Ọngịnyị ehe ee, jahị da ka ẹga nya Adịrahụ nya ala Ijipiti chajị ka yẹ ọmwụ tọọ pyịpyị bala ala Ijipiti wuu:

³Byaa yẹkẹẹ, ẹla ọlẹ ka Ọngọlahị Ohe Oluhye ya rẹkẹ, ẹla nyang wụm ẹjẹ ahụ Adịrahụ nya ala Ijipiti a lalaa ẹchụ ọtụka ọlẹ ka juwa Ihu ịNayịlị. A yẹkẹẹ, Ihu ịNayịlị ri nyam, am a họọ hịlọm lẹ.

⁴M ka ya ọkụja dụrụng ị-ịtịnchwọ, ọwa m ka họ iyenyi ịlẹpwụ nya agbụ olihu a ka pịlẹng ego nyang wuro-wuro-wuro lẹ m ka gbang bwu Ihu ịNayịlị daka odehe lẹlẹ.

⁵M ka gbang bala iyenyi ịlẹpwụ nya agbụ nyang wuu chịka ugbileji. Anụ ka chụwa odehe ịịwẹ ododu ọngọngọhẹ a ka tụnụ guru lee ọ junu eji ka. M yanụ ha iyo ilodehe bala ịchịnụ ịluhye-ọgba nyang oriri nyaa lẹ.

⁶Ụka ọọwa lẹ ala Ijipiti wuu a ka jẹ ya am a ri Ohe Oluhye lẹlẹ. Ang odudu ri ala Isirẹlụ kpụ nịrọng nyọka daa ụbwọ ma anụà tị́lọngịrị gu ekinggo ijwadịrẹ ka.

⁷Ụka ọlẹ kịị yụbwọ chịng, a bene wuu chịkpa chịkpa a kaa amwachwọ nyaa ụka ọlẹ kị tị kpụ nịrọng a mweku a guaa a bẹkpẹ ene wuu.

⁸Chajị nya ọọwa lẹ am Ohe Oluhye Ọngọlahị juwa byinu yẹkẹẹ, m ka du alẹwụ warị ka dẹwụ tanụ ị ka tanụ bala iyo nyanụ wuu ayịreji.

⁹Ọpyị nya ala Ijipiti ka da luhwo-luhwo bala ta ayịreji ụka ọọwa lẹ anụ ka jẹ ya am a ri Ọngọlahị Ohe Oluhye lẹlẹ. Chajị a yẹkẹẹ, Ihu ịNayịlị ri ịnyam am a họọ hịlọm lẹ.

¹⁰Chajị nya ọọwa lẹ a hụ bala Ihu ịNayịlị ri aluji nyam, m ka ta ọpyị nya Ijipiti ayịreji, ọ ka da luhwo luhwo bwu ọpyị nya iMigidolu lalala ka ọpyị nya Iswan pyịpyị ụwa oyii nya ala iTiyọpyiya.

¹¹Ọngịnyị ọhẹ-lọhẹ lee iyo ọhẹ-lọhẹ a ka ya ẹta chụwa ka, ọ ka dụwa luhwo-luhwo ẹ-ẹpwụ nya ẹka ohwiye.

¹²M ka họ Ijipiti ka ri ẹpwụma ọ da uhuhwo gụ ẹpwụma ilodehe wuu. Ọ ka dụwa luhwo-luhwo ẹka ohwiye. M ka nyị alụwa epepe tụ ẹpwụma ilodehe wuu da.

¹³Ọngọlahị myịmyị yẹkẹẹ, ụka ọlẹ ka ẹka ohwiye ịịwa a cheju m ka tụ ala Ijipiti guru bwu ẹga ịlẹ kam nyaa epepe tuda wuu.

¹⁴M ka kpa ala Ijipiti ịlẹ ka alẹwụ nyi epepe wuu nyaa tịrẹkpẹ, Ị ka kụ ẹpwa ụwa ọpyị nya iPaturọsị ọlẹ kọ ri ẹga kịị bwu, m ka họ ọpyị adịrahụ nyaa kala dẹwụ-dẹwụ.

¹⁵Ijipiti a ka la dẹwụ-dẹwụ gụ ịpyị adịrahụ wuu lẹlẹ, ọ ka ju ẹpwụma ịkịla kụrụ mịị ẹnẹnẹhẹ kaka.

¹⁶Ala Isirẹlụ a ka myịmyị dahịhile ala Ijipiti nya ụbwọ ọdada kaka, iwe-ahụrụ nya ala Ijipiti ka kpụ ala Isirẹlụ itiya nya ọhọbịrị nyaa jaabwọ kịkaa kpịnịrọ ala Ijipiti nya ụbwọ ọdada, ụkọọwa lẹ ị ka jẹ ya am a ri Ohe Oluhye lẹlẹ.

¹⁷Ẹnụtụrụ ọhọhẹ nya ọya ọhọhẹ ẹpwụ nya ẹka ohu kụrụ irwiye nyọlẹ ka alẹwụ wuhi kparụ, lẹ Ọngọlahị a ya ẹla taa yẹkẹẹ,

¹⁸Ọngịnyị ehe ee, iNebukadinesa Adịrahụ nya ala iBabilọn dẹwụ ala iTaya pyịpyị lụmẹ kaa kpoye, egbeju nyaa wuu du pwẹẹpwẹẹ, amwachụọ nyaa wuu tị pyị kpanya kpanya lẹ ma adịrahụ lee ịsọja nyamwụ a ye apyobwuna bwu ẹpwụ nya akama nyaa ọọwa ka.

¹⁹Chajị nya ọọwa lẹ Ọngọlahị Ohe Oluhye yẹkẹẹ, m ka ya ọpyị nya ala Ijipiti ha iNebukadinesa Adịrahụ nya ala ịBabịlọn. Ị ka nwula ụdụ ọkpụkpụ bala ang myị ang nyaa wuu kparụ, angịịwa a ka ri uri nya ịsọja nyamwụ lẹlẹ.

²⁰M ya ọpyị nya ala Ijipiti nwaa uri nya ụkụrwọ ọlẹ kịị họ ham lẹ, chajị am ịịwẹ họ ụkụrwọ ha lẹ, ịnị am Ohe Oluhye Agụgụ a ya lẹ.

²¹Ụka ọọwa m ka họ ala Isirẹlụ ka lọngịrị, m tịka họ ahụ iSikẹlụ ka ya ẹla taa, ụkọọwa lẹ ị ka jẹ ya am a ri Ọngọlahị Ohe Oluhye lẹlẹ.