Read idege ISIKẸLỤ 30 Bible Online

ISIKẸLỤ 30 - idege bible

ISIKẸLỤ 30

¹Ọngọlahị ya ẹla tam yẹkẹẹ,

²Ọngịnyị ehe ee, yẹ ọmwụ yẹkẹẹ, ịlẹ Ọngọlahị Ohe Oluhye a ya lẹ: juwa jida yẹkẹẹ, ẹnụtụrụ nya ọ jụjụ warị!

³Ẹnụtụrụ ọwa ju chwẹẹ lẹ, ẹnụtụrụ ká Amkpaa ka yẹ angịnyị akama. Ẹnụtụrụ ọwa ri eje ọlala nya angịnyị bala ịnya ayịreji nya ẹpwụma.

⁴Ị ka dẹwụ tala Ijipiti, ejiri ka wu ala tịọpyịa ụka ọlẹ kị ka anwụ angịnyị ụwa Ijipiti bala nwụla ụdụ nyaa kpa rụ. Ọ ka kpụ egwawụ-egwawụ.

⁵Ala Itiyopyiya bala iPut bala iLibiya bala iLydia bala Arabia bala iKub bala angịnyị nyam ịlẹ wuu kịị myị ju ala iJipiti ẹpwụ nya ẹwụ ọwa ka ta ayịreji bala ala Ijipiti.

⁶Ọngọlahị yẹkẹẹ, angịlẹ kị myẹla ju ala iJipiti wuu ka ta ayịreji ọbọọchẹ nyaa ka kpụba, Ị ka nwụ angịnyị bwu iMigidolu lalala kaa ju ka Asụwan.

⁷Ọpyị nya ala Ijipiti ka kpụ egwawụ-egwawụ da ụ-ụwa. Epweji ịlịnyị ka dagaga jwoo bala ta ayịreji lala epweji ịkịla ịlẹ kịị ta ayịreji.

⁸Ụka ọlẹ kam wuru ịla jụ Ijipiti bala ọ tangịlẹ wuu kịị daa ụbwọ ayịreji lẹ, Ị ka jẹ ya am a ri Ohe Oluhye lẹlẹ.

⁹Ọngọlahị yẹkẹẹ, ẹnụtụrụ ọwa a pyeji m ka du angịnyị kele ẹpwụ nya ụmwụ nyenyi kaa chuhi ju ala Itiyopyiya ịwẹ kịị lirya nya ẹlẹlẹhẹ ka. Ejiri ka waa ọtụka-ọtụka chajị nya ayịreji ọtata nya ala Ijipiti. Ẹnụtụrụ ọwa juwa warị lẹ!

¹⁰Ọngọlahị Ohe Oluhye yẹkẹẹ, m ka ta iru nya angịnyị nya ala Ijipiti ayịreji, m ka kpa iNebukadinesa họ ẹlẹwẹ.

¹¹Adịrahụ iNebukadinesa bala ịsọja nyamwụ ịlẹ kịị jẹ ahyẹẹrwẹrwa ka juwa warị ka ta ọpyị nya ala Ijipiti ayịreji, ị ka kpa ẹma nya ẹwụ dẹwụ taa. Ịga myị ẹga wuu ka mịla egu nya angịnyị.

¹²M ka họ ịbaa nya Ihu ịNayịlị ka nwụ wuu, m ka hu ọpyị nyaa rịra alabwẹla inyibyi. Angga ka ta ọpyị nyaa bala ang ịlụwa wuu ayịreji. Am Ọngọlahị a yaa nyị lẹ.

¹³Ọngọlahị Ohe Oluhye yẹkẹẹ, m ka ta ijiga bala ekpeku ịla iMemfisi ayịreji olegbeju ọhẹ-lọhẹ a ka myịmyị hii kpẹhị rịrị ala Ijipiti kaka. M ka chuhi ọtụka-ọtụka jwaa.

¹⁴M ka họ iPaturọsị ka da uhuhwo, m ka chị iSowan ịla bala ọ yẹ ịTẹbẹsị akama.

¹⁵M ka wu ịkẹjẹ awụrụ ta iPelusiyọm ọlẹ kọ ri iga ọkpịba nya ala iJipiti, m ka ta iru nya angịnyị ịla ịTẹbẹsị ayịreji.

¹⁶M ka wuru ila gu Ijipiti, iPelusiyọm ka jẹ pwụ nya ọjụjụ ọtụka-ọtụka ị ka tụrụ egwalọ ịla ịTẹbẹsị iMemfisi ka juwa ẹpwụ nya akama ọlala ẹnụ myị ẹnụ.

¹⁷Ị ka nwụ ikolobya nya ala iHẹlyopolịs bala ịsọja ị nya ala iBubasịtisị ọọgbẹwụ. Alẹwụ ka wu ala epweji ihihi kpa rụ.

¹⁸Ẹga ka chi owu ụwa iTaphanhes ụka ọlẹ kam bịrị ọngịrị nya ala iJipiti ọọwa lẹ ọbọọchẹ nyaa a ka myị lẹlẹ. Amwụ ka kpụ kụrwaa wuu alẹwụ ka wu alepweji ịkịla wuu kpa rụ.

¹⁹Ụka ọlẹ kam yẹ ala Ijipiti akama lẹ ị ka jẹ ya am a ri Ọngọlahị Ohe Oluhye lẹlẹ.

²⁰Ẹnụtụrụ irwiye nya ọya ọhọhẹ ẹ-ẹpwụ nya ẹka iwo kụrụ okpokpo nyọlẹ ka alẹwụ wuhi kparụ, Ọngọlahị ya ẹla tam yẹkẹẹ,

²¹Ọngịnyị ehe ee, yẹ mẹẹ, M mwụ ụbwọ nya Adịrahụ nya ala Ijipiti eku lẹẹ, ọngọngọhẹ a ya ibandeji lee ọ ya ori chọọ chajị kọ ka hagụ ọlẹ kọjẹka ya chị ẹma nya ẹwụ myị kaka.

²²Chajị nya ọọwa lẹ, Ọngọlahị Ohe Oluhye yẹkẹẹ, Adịrahụ nya ala Ijipiti ri oluji nyam, m ka mwụ abwọ im imiiye nyamwụ eku wuu, ọlẹ kọ lọngịrị tụ ọlẹ kọ bene juwa ene-ene ọọwa lẹ m ka họ ẹma nya ẹwụ a ka chabwọ deji bwụbwọ nyamwụ lẹlẹ.

²³M ka nyi ala Ijipiti epepe tụ odehe-odehe da wuu.

²⁴M ka họ ụgburubwọ nya Adịrahụ nya ala ịBabịlọn ka lọngịrị. M ka ya ẹma nya ẹwụ nyam jụọọ ụbwọ. M ka ya mwụ ụbwọ nya Adịrahụ nya ala Ijipiti eku ọ ka mweru jaabwọ ọlẹ kị họng lụmẹ-lụmẹ ka mweru.

²⁵M ka họ ugburubwọ nya Adịrahụ nya ala ịBabịlọn ka lọngịrị ma ụbwọ nya iFero ka la dẹwụ dẹwụ. Ụka ọlẹ kam yẹma nya ẹwụ nyam ju Adịrahụ nya ala ịBabịlọn ụbwọ kọọ jọọ ahị da ka Ijipiti lẹ, Ị ka jẹ ya am a ri Ohe Oluhye lẹlẹ.

²⁶M ka nyi ala Ijipiti epepe tu odehe-odehe da ụkọọwa lẹ ị ka jẹ ya am a ri Ohe Oluhye lẹlẹ.