Read idege ISIKẸLỤ 31 Bible Online

ISIKẸLỤ 31 - idege bible

ISIKẸLỤ 31

¹Ẹnụtụrụ ọhọhẹ nya ọya ọhata ẹ-ẹpwụ nya ẹka iwo kụrụ ookpokpo nyọlẹ ka alẹwụ wuhi kpa rụ, Ọngọlahị a ya ẹla tam lẹlẹ.

²Ọngịnyị ehe ee, tọ Adịrahụ nya ala Ijipiti bala angịnyị nyamwụ wuu ịtọ wo yẹkẹẹ, oowo kpakpakpa anụ tị lọngịrị nyanụ mee?

³Kwẹhị yẹ mẹẹ, Asiriya lalaa okoji isida ọla iLibanọn anọ ẹnẹhẹ lẹ, ọ bwu abwọ hụhị hụhị, abwọ nyamwụ ịịwa kpurụrụ ke ipinu, ọ luhye ọtụka-ọtụka kaka gu egbamwụ.

⁴Enyi ọlẹ kọ juwa họọ lụmẹ-lụmẹ bala enyi ọlịpyị kpọọ nwa. Ogo ọlẹ kọ dagaga jwoo mwụ ka ẹga nya ekeji ịkịla ịlẹ kịị juwa ẹ-ẹpwamẹ.

⁵Chajị nya enyi ọlẹ ka okoji ọwa la lụmẹ-lụmẹ lẹ, ọ nwa ọtụka-ọtụka gụ ekeji ịla ẹpwamẹ ịkịla wuu, abwọ nyamwụ hyee bala lediyo lụmẹ-lụmẹ.

⁶Ụma nya ịchịnụ ọnyị myị ọnyị nawụụ ụwa uhye nya abwọ nyamwụ, iyo ịlẹpwụmẹ wuu kaa manyị ekpeleji nya abwọ nyamwụ, alẹpwụma ịtụka ilodehe wuu kụ ekpeleji nya ụrụrụ nyamwụ.

⁷Ukoji ọwa lụmẹ ọ tị hụhị, abwọ nyamwụ luduyo, atẹ nyamwụ nwa ka ju ka enyi ọlịpyị.

⁸A ka jẹ-ẹ̀ chụ isida ịlẹ kịị juwa ẹpwụ nya iku nya Ohe Oluhye kaa pwọkwoo ka, okoji nya ifii lee okoji ododu ọhẹ-lọhẹ a bwu abwọ ụma nya ịnyamwụ ka. Eekji ịlẹ kịị juwa ẹpwụ nya iku nya Ohe Oluhye ọhẹ-lọhẹ a hụhị ịnyị myị ka.

⁹M họ ọ hụhị bwula abwọ ịlẹ kọ bwu lụmẹ-lụmẹ, ekeji ịlẹ kịị juwa i-iku nya Idẹn nya Ohe Oluhye wuu yẹ ijiiji nyamwụ.

¹⁰Chajị nya ọọwa lẹ, Ọngọlahị Ohe Oluhye yẹkẹẹ, chajị nyọlẹ ka nwa luhye kaa gụ egbamwụ ọọwa lẹ a juwa hi ọbọọchẹ chajị nya uhye ọlala nyang lẹlẹ.

¹¹M tụbwọ hing ju alegbeju ịkpẹhị rịrị epwoja ụbwọ nyọka kpẹhị rịrịng lẹ, m tụbwọ hing lẹ, ị ka nwụng uri jaabwọ ka ang onyobyi nyang la kaa ba.

¹²Ala ẹpwụma ịlẹ kịị lọkwọ gụ gụ wuu ka tụrwọọ deji. Ọ ka kpụ mịla ịgbọdọ bala ikpokpo wuu, abwọ nyamwụ ka mwueku chua iiba wuu ọọwa lẹ ala odehe wuu a ka rụ hi ụrụrụ nyamwụ lẹ ị ka tụbwọ hịọọ dụwa lẹlẹ.

¹³Ụka ká okoji ọwa a kpụ deji ịchịnụ iluhye-ọgba wuu ka ka uhye ugbile nyamwụ iyo ịla ẹpwamẹ wuu tị ka jẹdịyẹ bwu uhye nya abwọ nyamwụ.

¹⁴Aalẹ jaabwọ myị abwọ kị ju okoji enyi kaa ba, okoji ọhẹ-lọhẹ a ka nwaa luhye ịwẹ lee ọ yẹtẹ kịla egbamwụ kaka. Okoji ọhẹ-lọhẹ kọ ka kpa enyi nwaa a ka luhye ọlịnyị kaka. Ị wa wuu ka gbu igu lala ọngịnyị ehe ị ka ka ejegu wuu lawụlẹ.

¹⁵Ọngọlahị Ohe Oluhye yẹkẹẹ, ẹnẹhẹ ka okoji ọwẹ ka ka ejegu m ka họ enyi ọlịpyị ka tụ mịlọọ. M ka wu ihu bala igo ịtụka ịlẹ kị ka mwụ kaa jwoo kpa. M ka họ ukpowu ka chị iLibanọn chajị nyamwụ, ekeji ịla epwụmẹ wuu ka gbu gbuu fọọ chajị nyamwụ.

¹⁶Iru nya ọtụrụ-tụrụ nyamwụ ka hụ odehe wuu jigi-jigijigi ụka ọlẹ kam dọọ ka ejegu kiga nya angịlẹ kịị juwa wo oru, ụka ọọwa lẹ, ekeji ịla iku nya Idẹn bala ekeji ịlẹhị nya ala iLibanọn ịlẹ kịị jwaa enyi lụmẹ wuu kịtị juwa ejegu a ka chị ọkẹkẹnị chajị ụwa ejegu lẹlẹ.

¹⁷Ekeji iwa rụ ka ejegu bala okoji ọtụka ọwẹ ịnyịnyị. Ị kele kaa tọ angịlẹ kịị nwụ ẹ-ẹwụ bala angịị myẹla jwaa ịlẹ kịị ri ẹpwụma ilodehe wuu kịị kụ ekpeleji nya ụrụrụ nyamwụ.

¹⁸Okoji ọla Idẹn oyinaà tị́dọmwụ lala ahụ? ma yẹ mẹ m tị ka kpang ka ejegu lala ekeji ịla Idẹn ịkịla, ị ka nuaa bala angị da ụwụwụ ka ịlẹ kịị nwụ ẹ-ẹwụ. Ẹla ọlẹ ka họ ta iFero bala iru nya angịnyị nyamwụ wuu ịnyị Ọngọlahị Ohe Oluhye a ya lẹ.