Read idege ISIKẸLỤ 33 Bible Online

ISIKẸLỤ 33 - idege bible

ISIKẸLỤ 33

¹Ọngọlahị yẹla tam yẹkẹẹ,

²Ọngịnyị ehe ee, yẹla ta angịnyị nyang ka byaa yẹkẹẹ, Ori kam du ẹma nyẹwụ chịnụ ọgụ ka alepweji ọwa a dụ ọngọhẹ nyọka gbeji.

³Kori ọngọ gbeji ọwẹ a yẹ alẹwụ kịị juwa warị kọ chịị ẹkụrwẹ nyọ dangịnyị ọna,

⁴ka angịlẹ kịị wo lanụ nya ẹkụrwẹ ọwẹ a yarụ kpịla, ẹma nyẹwụ ka ri angịịwa, iwo nya angịịwa tị ka juwa uhye nyegbeju nyịlaa.

⁵Ang odudu ri, iwo la ẹkụrwẹ ọ daa ọna ma ị yarụ nyaa kpịla, chajị nya ọọwa lẹ, ịwọ nyaa ka juwa uhye nya egbeju nyịlaa. Ọ ri kịtị ke ụrụ la ọna ọdada ị ka chị ọhịhị nyịlaa da.

⁶Ma ori ka ọngọ gbeji a yẹ alẹwụ kịị juwa warị kọ myị chị ẹkụrwẹ dangịnyị ọna ka, ka alẹwụ a kaa nwaa ẹpwụ nya ihibiri nyaa m ka tịtọ nya ịwọ nyangịịwa bwu ụbwọ nya ọngọgbeji.

⁷Chajị nya ọọwa lẹ, ọngịnyị ehe, m hung nyọngọ gbeji aam ẹpwụma nya ala Isirẹlụ, ẹla myẹla ịlẹ kam ya jeng, a ka gbilaa ụbwọ arụ lalịịwa.

⁸Ọ ri kam byi angịnyị onyobyi yẹkẹẹ, angịnyị inyibyi anụ ka gbu, ka myị daa ọna kị ka yirada hi ọhọbịrị nyaa chajị kị ka hị ka, kori ka angịnyị inyibyi ịwaa a gbu ẹpwụ nya ihibiri nyaa m ka tịtọ nya ịwọ nyaa bwu ẹpwụtụbwọ nyang.

⁹Ma ori ka da angịnyị inyibyi ọna chajị kị ka yira da hi ihibiri nyaa, kori kịtị myị yirya nyaa da ka gbee kịị gbu ẹpwụ nya ịhibiri nyaa ọhịhị nyang ka chịda.

¹⁰Ọngịnyị ehe ee, mẹla ọlẹ ka ala Isirẹlụ ya jiaa yẹkẹẹ, ehile ịbịrị bịrị bala ọhọbịrị nyahị ịlẹ kahị họ ri olo chụụhị. Ahị jam ta ayịreji hụrụ lẹ, anyị ayịtịka họ kahị ka hịị mẹẹ?

¹¹Byaa yẹkẹẹ, jaabwọ ọlẹ kam Ohe Oluhye jam hịhị lẹ, m chị ọkẹkẹnị ju igu nya ala ọhọbịrị ka, ọkọkọ nya ọọwa lẹ, m tịtọ kị ka yirya da kị ka hị, anụ yirya da mẹ, anụ yirya da bwu ọhọbịrị nyanụ mẹ, iyẹtịdu kanụ tịtọ kanụ ka gbuu-ala Isirẹlụ?

¹²Ọngịnyị ehe ee, byi angịnyị nyang yẹkẹẹ, abwẹla ịnyịla nya ọngịnyị ọkpẹkpẹ a ka chọọda ụka ọlẹ kọ họ ang onyobyi ka, ang ịnyịbi nya ọlọhọbịrị ịlẹ kọ họ a ka yeje wọọ myịmyị kori kọ yirya da kaka. Ori ka ọngọlẹ kọla kpẹẹkpẹẹ a dọmwụ nyọka hang inyibyi alẹ ọ ka chịda ka.

¹³Ọ rinyịlẹhị m byi alẹbwẹla ịnyịla ya nyịka hị ma ori kịị dahịhile abwẹla ịnyịla nyaa kị họ ang inyibyi, ị ka kpịtịya nyang ịnyịla nyaa ịlẹ kịị họ ka, ẹpwụ nya ịhibiri ịlẹ kịị họ ịka gbu lẹ.

¹⁴Lee ori kam byi ọlọhọbịrị ya, a ka gbu pii lẹ, ori kọ yirya da bwu ẹpwụ nya ọhọbịrị nyamwụ kaa họ abwẹla ịnyịla

¹⁵kọ tịrị angịlẹ ka ọngịnyị ya họọ ine kọngọwa yụbwọ bala ọ tịrị angịlẹ kọ go yoyi ẹkpẹ ha ọngọlala, ọ kpụba lang inyibyi ịhọhọ kọ juwa kpehile nya Ohe Oluhye ọlẹ kọ kaa ya ọhịhị ha ọngịnyị a lẹẹ ọ ka gbu ka, ọ ka hịị.

¹⁶M ka hịnyọhi ọhọbịrị nyaa ịlẹ kịị họ wuu haa, chajị nyang ịnyịla ịlẹ kọ họlẹ ọ ka hị.

¹⁷Anụ angịnyị tị ya ẹla ọlẹ kam Ohe Oluhye nyịhọ nyịhaka, ma ẹla ọhọhọ nyanụ a tị tịpyọ lẹ.

¹⁸Ori ka ọlabwẹla ọnyịịla a tụbwọ hi ang ịnyịla ọhọhọ nyamwụ kọ họ ang ịnyibi, ọ ka gbu chajị nyang inyibyi ịwa.

¹⁹Ma alabwẹla onyobyi a yirya da hi ang inyibyi nyamwụ kọ họ angịlẹ kịị pwoku bala ang ịnyịla, ị ka hi.

²⁰Anụ ala Isirẹlụ tị juwa ya abwẹla nyam am Ọngọlahị nyị la kpẹẹkpẹẹ ka. M̀ ka la ọng myị ọng nyanụ eje jaabwọ ka abwẹla nyamwụ la!

²¹Ẹnụtụrụ ịrụ nya ọya okiriwo ẹpwụ nya ẹka iwo kụrụ imiiye nyọlẹ ka alẹwụ wuhi kparụ, ọngọhẹ ọlẹ kọ be bwu iJerusalẹm wẹ kaa ya jem yẹkẹẹ, alẹwụ nyị kụrụ ala iJerusalẹm lẹ.

²²Alobyi nya ịnịyẹ ine ka ọngịnyị bwu iJerusalẹm warị lụtụrụ m yẹ ọngịrị nya Ohe Oluhye uhye nyam ọtụka-ọtụka. Ụka ká ọngọwẹ pweeji lẹ, Ọngọlahị a ya ọngịrị nya ẹla ọyaya ham myịmyị lẹlẹ.

²³Ọngọlahị yẹla tam yẹkẹẹ,

²⁴Ọngịnyị ehe ee, angịnyị ịlẹ kịị juwa ọpyị nya ala Isirẹlụ ọlẹ kịị bịrị juwa yẹkẹẹ: Ọngọ ookpokpo Ebiraham a tị ri, ị ya ọpyị ọlẹ wuu họọ, ahị tị jam lụmẹ-lụmẹ lẹlẹ chajị nya ọọwa lẹ ọpyị ọlẹ ri nyahị.

²⁵Byaa ya am Ohe Oluhye nyị yẹkẹẹ, anụ riyo lịwọ lịwọ, anụ gbịgba ha ijiga bala ọ juwa nwụ angịnyị, lẹ anụ ka la ọpyị ọwẹ mịị?

²⁶Anụ dahịhile ẹma nyẹwụ nyanụ, anụ họ ẹla ịtịpyọ bala ọngọngọọnwụ nyanụ juwa dịlahụ nyọọnamwụ, lẹ, anyị anụ tị ka jẹ-ẹ̀ me irya ya ọpyị ọwẹ nyị ka rinyanụ-ụ?

²⁷Byaa ya am Ohe Oluhye nyị yẹkẹẹ, jaabwọ ọlẹ ka-am Ohe Oluhye jam hịhị lẹ, ịka nwụ angịlẹ kịị juwa epweji nya Isirẹlụ ọlẹ kịị bịrị lẹẹ lẹma nyẹwụ, iyo ịlẹpwụmẹ ka wu angịlẹ kịị juwa ẹpwụmẹ. Angịlẹ ka ẹga ọ kpịba bala ọrụ ka ikpokpo ẹdụrụ ka nwụaa.

²⁸M ka họ ọpyị ka da luhwo luhwo ọọwa lẹ, ọbọọchẹ ụmụmẹ nyaa a ka cheju lẹlẹ, ịgbọdọ ịla Isirẹlụ ka da hwoo gbee ọngọngọhẹ a ka chịpwụrụ bwuwa ka.

²⁹Ụka ọlẹ kam họ ka ọpyị nyaa a da luhwo luhwo chajị nya ang inyibyi ịhọhọ nyaa lẹ ịka jẹ ya am ari Ohe Oluhye lẹlẹ.

³⁰Ọngịnyị ehe ee, ụka ọlẹ ka angịnyị nyang a ta awụlẹ ụwa ịka nya egwalọ bala ọnang nya ẹpwa nyaa, ị juwa byi awụlẹ ya, ahị kaa wo ẹla ịlẹ ka Ohe Oluhye ya mẹ.

³¹Ịị warị wẹ ẹga nyang jaabwọ ka angịnyị juwa warị, ịị hụhụ chahị jung lala angịnyị nyam ịị ke ụrụ lala iyaya nyang ma ịtị juwa ju alịịwa ihi ka. Chajị ọnụ ọyẹla nyaa la gẹnẹ-gẹnẹ ma irya nyaa juwa aang nya apyobwuna nya ịlaa.

³²Ịnyaa lẹ, a ri ọngọ mwu eje rụ angịnyị ọ-há awụlẹ kem ọlẹ kọ juwa du ogum̀ jwoo. Ịị wo ẹla oyaya nyang woowo, ị́ tịị kpa họ ụkụrwọ ka.

³³Ụka ká ala iyaya nyang ịlẹ a họ jịra-ịtị dọmwụ juwa ka họ jira, ọọwa lẹ, ị ka jẹ ya ọlọmwụ juwa ẹpwarịrị nyaa lẹlẹ.