Read idege ISIKẸLỤ 34 Bible Online

ISIKẸLỤ 34 - idege bible

ISIKẸLỤ 34

¹Ọngọlahị yẹla tam yẹkẹẹ,

²Ọngịnyị ehe ee, yẹ ọmwụ tụ angịị gbe ịkpịlọ nya ala Isirẹlụ pyịpyị ka byaa yẹkẹẹ, Anụ angịị gbe ịkpịlọ nya ala Isirẹlụ, Ọngọlahị Ohe Oluhye yẹkẹẹ, anụ juwa yang oriri ha ịlọnụ wu ẹpwụ! Angị gbe ịkpịlọ akaa yang oriri ha ịkpịlọ kaa?

³Anụ ri eyo nya iyo bala ọ ga ịwụrụ nya egba nya iyo kụrụ bala ọ nwụ iyo iju eyo jwọjwọ ma anụà tị́yang oriri ha ịkpịlọ ka.

⁴Anụ họ a lịhyẹ la gogo ka, lee ọ họ alẹdụrụ ụda lee ọ ya abacha chị ọngọlẹ kọ chẹbẹ lee ọ tịrị angịlẹ kịị hwahị ẹkpẹ lee ọ pịlahị nya angịlẹ kịị byi ka. Ma anụ juwa kpa angịnyị la gbụrụ agbụrụ.

⁵Ikpịlọ wuu nyi epepe chajị ọngọ kpẹhị rịraa a ji kaka. Ị ri ang oriri nya iyo ịlẹpwamẹ lẹ.

⁶Ikpịlọ nyam nyi epepe tụ ịgbọdọ ịgbọdọ bala ọ tụ odehe wuu da, ọlẹ ka ọngọngọhẹ a juwa nyọka pịlahị nyaa ka.

⁷Chajị nya ọọwa lẹ, anụ angịị gbe ịkpịlọ, anụ wo ẹla ọlẹ ka Ọngọlahị Ohe Oluhye ya mẹẹ,

⁸Jaabwọ ọlẹ kam Ohe Oluhye jam hịhị iyo ịlẹpwamẹ wẹẹ wu ịkpịlọ nyam nwụ ri chajị nyọlẹ kịị la ọngọ kpẹhị rịraa ka. Angịgbikpịlọ nyam a myị kpẹhị rịraa ka, ị juwa kpẹhị rịrịlaa keem.

⁹Chajị nya ọọwa lẹ anụ ke ụrụ la ẹla ọlẹ ka Ohe Oluhye ya tanụ angịị gbe ịkpịlọ mẹẹ.

¹⁰Ọngọlahị Ohe Oluhye yẹkẹẹ, ẹla nyanụ angịị gbe ịkpịlọ wụmẹjẹ, m ka tịtọ nya ịkpịlọ nyam bwubwọ nyanụ, m tị ka hunu abwọ lọ yang ha ịkpịlọ nyam ri. Anụ angịị gbe ịkpịlọ à tị́ ka yang oriri ha ịlọnụ kịlahị kaka, m ka nunu ịkpịlọ nyam bwọnụ nyanụ, ị ka ri ang oriri nyanụ kịlahị kaka.

¹¹Ọngọlahị Ohe Oluhye yẹkẹẹ, am lịlọm ka pịlahị nya ịkpịlọ nyam, m ka kpẹhị rịraa lịlọm.

¹²Jaabwọ ọlẹ ka angịị gbe ịkpịlọ kaa pịlahị nya ịkpịlọ nyaa ụka ọlẹ kị nyi epepe, ịnyịnyị m ka pịlahị nya ịkpịlọ nyam lẹ. M ka gbaa kpehe bwu ẹga myịga wuu ịlẹ kịị nyi epepe ka. Ẹnụtụrụ ọwa amwụ ka kpụ ukpoowu tịka chị ọtụka-ọtụka.

¹³M ka gbaa kpehe bwu epwoja nya angịkịla m ka kpaa nya tịrẹkpẹ wẹ ọpyị nyaa, m ka kpaa ka uhye nya ịgbọdọ nya ala Isirẹlụ kaa rịang, m ka yang haa ri ọ-ọnụ nya ogo nya ala Isirẹlụ bala ụwa ẹdame ịlẹ wuu kịị juwa o-ọpyị nya ala Isirẹlụ.

¹⁴M ka ya edame ị jwọjwọ haa ri, ị ka ri amẹ uhye nya ịgbọdọ nya ala Isirẹlụ. Ị ka nọnọ ụwa ẹga ka edamẹ ji lụmẹ-lụmẹ.

¹⁵Am lịlọm a ka ri ọngọgbikpịlọ nyam lẹ, m tị ka ya ọmwịịnyọ haa ịnyị Ohe Oluhye a ya lẹ.

¹⁶M ka pilahị nya ịkpịlọ ịlẹ kịị bi, m ka kpa ịlẹ kịị hwahị nyaa tịrẹkpẹ. M ka họ ịlẹ kị chị ẹbẹ uda bala ọ-ya ọngịrị ha ịlẹ kị la dẹwụ-dẹwụ. Ma ịkpịlọ ịlẹ kị hye bala ọ-la ọngịrị wuu m ka taa ayịreji. M ka kpẹhị rịraa jaabwọ kọ pwoku.

¹⁷Anụ ịkpịlọ nyam, am Ohe Oluhye Agụgụ yẹkẹẹ, m juwa ka leje ẹpwarịrị nya ọkpịlọ ọhẹ bala ọkịla bala ẹ-ẹpwarịrị nya omilodo bala embiri.

¹⁸Edamẹ ịnyịla ịlẹ kanụ ri a nwanụ lẹka anụ ju wa myịmyị tụrụ amẹ ịlẹ kịị godayị kọkọ cheeji? Ụka ọlẹ kanụ nwa enyi cheri-cheri wuu anụ juwa yi ọhịhị yi la apatẹ nyanụ?

¹⁹Lẹ, ịkpịlọ nyam ka rịang ịlẹ kanụ jẹdịyẹ bwu uhye nyaa lee enyi ịlẹ kanụ kpa apatẹ yayi wuu?

²⁰Chajị nya ọọwa lẹ, Ohe Oluhye Ọngọlahị juwa byinu yẹkẹẹ, am Ohe Oluhye lịlọm ka leje epwarịrị nya ịkpịlọ ihyehye bala ịkpịlọ ikengbe.

²¹Chajị anụ ịkpịlọ ihyehye ịwẹ kpa ịkịka bala amwachụọ nyanụ taa tuu, anụ kpa achụ nyanụ gu ịkpịlọ ị dẹmwụ dẹmwụ mileji, anụ taa pyịpyị gbee kịị nyi epepe tụ ẹga myị ẹga da.

²²M ka chị ịkpịlọ nyam da, anụ ka myịmyị haa ang gwọwẹ kaka. M tịka leje epwarịrị nya ọkpịlọ ọhẹ bala ọkịla.

²³M ka ya ọngọgbikpịlọ okpokpo ọlẹ kọ ka kpẹhị rịraa haa, ọlẹ kọ ri iDevidi ọnchẹ nyam, ọwa a ka yang haa ri lẹ, ọ ka kpẹhị rịraa.

²⁴Ụka ọọwa lẹ, am Ọngọlahị a ka ri Ohe Oluhye nyaa lẹ ọnchẹ nyam iDevidi a ka ri adịrahụ nyaa lẹlẹ, ịnyị am Ọngọlahị Ohe Oluhye a ya lẹ.

²⁵M ka nwa iro nya okpunyi taa, m ka kpa iyo ịnyịngịrị rụ hi ọpyị nyaa chajị ka ịkpịlọ nyam ka jẹ ri ụwa ẹpwamẹ lokpunyi.

²⁶M ka họ ahị ọwawa ka ji haa bala imwawụ ịlẹ wuu kịị juwa ọ-ọka nya ịgbọdọ nyam, m ka do enyi ụka nya enyi idodo. M ka denyi nya ahị ọwawa.

²⁷Ekeji ịlẹpwamẹ ka nwụ egbe, ang ịlịpyị ka hiigu. Ịkpịlọ nyam ka juwa lokpunyi ụwa ọpyị nyaa. Ụka ọlẹ kam chị agba ịlẹ kị ya ju angịnyị nyam eku kam họ kị lịlaa bwụbwọ nya angịlẹ kịị waa nya anyịhị lẹ anụ ka jẹ ya am a ri Ohe Oluhye lẹlẹ.

²⁸Ala ẹpwụma ịkịla a ka myịmyị dẹwụ taa ayịreji lee iyo ịnyịngịrị owaa ri myịmyị kaka, ị ka hulokpunyi, ọngọngọhẹ a ka myịmyị jwaa uhihi kaka.

²⁹M ka ya ọpyị o-ju iyo haa chajị ka imyi á ka taa ayịreji ọpyị ọwa lee ẹpwụma ịkịla ị daa dọ kaka.

³⁰Ụka ọọwa lẹ ị ka jẹ nyori am Ohe Oluhye juwa taa bala ori ala Isirẹlụ ri angịnyị nyam lẹlẹ. Ịnyị Ọngọlahị Ohe Oluhye a ya lẹ.

³¹Anụ a ri ịkpịlọ nyam, anụ ri ịkpịlọ ịlẹ kam ka kpẹhị rịrị lẹ. Am a tị ri Ohe Oluhye nyanụ lẹ. Ịnyị Ohe Oluhye a yalẹ.