Read idege ISIKẸLỤ 35 Bible Online

ISIKẸLỤ 35 - idege bible

ISIKẸLỤ 35

¹Ọngọlahị yẹla tam yẹkẹẹ,

²Ọngịnyị ehe ee, jahị daka ọgbọdọ nya ala Ẹdọm ka yẹ ọmwụ taa pyịpyị

³Byaa ya am Ohe Oluhye nyị yẹkẹẹ: Anụ ala Ẹdọm, ẹla nyanụ wụm ẹjẹ, m nịra ụbwọ nyam kpaa jahị danụ, m ka họ epweji nyanụ ka da uhuhwo.

⁴M ka bịrị epweji nyanụ, epweji nyanụ ka da uhuhwo ụkọwa lẹ anụ ka jẹ ya am a ri Ohe Oluhye lẹlẹ.

⁵And odudu ri, anụ ju ala Isirẹlụ uji ọ gboyi myoyi, anụ họ ị kụrwaa ẹwụ ụka ọlẹ kịị juwa ẹpwụ nya akama ọlẹ kam yaa ọkwẹkpẹkpẹ.

⁶Chajị nya ọọwa lẹ jaabwọ kam Ohe Oluhye juwa hịhị lẹ, m nwụlanụ nọ gbe igu lẹ, anụ ka jẹ-ẹ̀ be hi igu kaka. Eje nya angịnyị ịnwụ nwụ wunu lẹ, angịnyị ịnwụnwụ a ka dịrẹnụ lẹlẹ.

⁷M ka họ Ọgbọdọ nya Ẹdọm ka duhuhwo. M ka nwụ angịnyị ịlẹ kịị kaa kele kụwa lẹ ọ kpehe bwuwa wuu.

⁸M ka ya egu nya angịnyị myị ịgbọdọ nyaa wuu. Egu nya angịlẹ kịị nwụ ẹwụ ka chụwa ịgbọdọ bala ikpokpo bala ịba nyaa.

⁹M ka tanụ ayịreji wuu yịgẹ-yịgẹ ọngọngọhẹ a ka kụ e-epweji nyanụ ẹnẹnẹhẹ kaka. Ụka ọọwa lẹ anụ ka jẹ ya am a ri Ohe Oluhye lẹlẹ.

¹⁰Chajị anụ yẹkẹẹ, epwụma imiiye ịlẹ, Isirẹlụ bala iJuda nyị ri nyịịwa, ịwa nyịka yaa la. Nyị rịnyịlẹhị Ohe Oluhye nyaa nyịka juwa mịị.

¹¹Chajị nya ọọwa lẹ jaabwọ kam Ohe Oluhye juwa hịhị lẹ, m ka wunu uri nya agbama bala jiiji bala ẹjẹ ọlẹ ka angịnyị nyam wụnụ. Ụka ọlẹ kam yẹnụ akama, ala Isirẹlụ ka jẹ yẹkẹẹ, angịlẹ kaanụ nyii haa nya adudu lẹ.

¹²Anụ tịka jẹ ya am Ohe Oluhye nyị wo ido nyanụ ịlẹ kanụ ya igodo nya ala Isirẹlụ nyị da uhuhwo, nyị rịnyịwa kịwa nyịị ka myịaa wuu lẹ.

¹³Ẹla ịlẹ kanụ wẹẹ ya rụm libọchẹ wuu lẹ m wo.

¹⁴Ọngọlahị Ohe Oluhye yẹkẹẹ, ụka ọlẹ kam tanụ ayịreji ala ọdehe wuu ka chị ọkẹkẹnị.

¹⁵Jaabwọ ọlẹ kanụ chị ọkẹkẹnị ju ayịreji ọtata nya ala Isirẹlụ. Ịnyịnyị m ka họ anụ ịgbọdọ nya Ẹdọm bala Ẹdọm wuu lẹpwụ-lẹpwụ a ka duhuhwo lẹ. Ụka ọọwa lẹ anụ ka jẹ ya am a ri Ohe Oluhye lẹ.